2 Tamuwen 21:6 - Ala Wone Peenok Peebi Mbanak

⁶ at Tawun apuri aap ineebe 7 waganogo wo'nirage keenok, at Aliku ALA nen aap leenogo mippereegerak Tawun awi alom paga o Nggibeya nogome inoorogo piinok, Aliku ALA enggaanom paga time tugumbiyaawok o.” Yogo mbareegwa, aap endagembogut nen, “Op aret yogotak me, wokkiraakit o,” yoragagerak.

2 Tamuwen 21:6 Cross References

Wakkagagerak 40:19

Ne kenagan logonuk, aap endagembogut Pirawun nogo nen kenggaanok mbanogo keebe waganogo eyo paga mippagamenggaarak me, yirowe-ndirowe nen kenggaanggum nenok ndi yuurak nogo aret kagandak o,” yinuk, yoreegerak.

Wakkagagerak 40:22

ndi, at oroti woraka inowe nogo perak, eebe waganogo eyo paga tugunogo pege, eereegerak.

2 Tamuwen 17:23

Ndi, at Akitoben nen wone koonogo yoragagerak nogo eeka'lek iige nagagerik, keledai amborowak paga kwi'nagak nogo ndoonogo punuk, ti paga kwi'na'nuk, at awi alom paga kota nogome aret nage nagagerik, aaganapuri koonogo piinok, alik nen enggaanok keele yilunggolagagerak kangge mbareegi, at ogoba nggween taanak me nogome aret taambereegwaarak.

2 Tamuwen 18:10

Nage kagak, at Ndawut awot ambi nen Abatalom eyo ko'me nggelenak wonage enegen kage nagagerik, Yowap yoge, “At Abatalom nogo, eyo teno eno'mbak ko'me nggelenak yuwok talek ari wonage nenegen kagarak o.”

2 Tamuwen 19:28

Ndi, an nogobamini inom, nowe-nawot inom, it abok aret eereegwaarak paga kat nowe kendagembogut nen inoorogo piige logonet kwe, an kayeloman nalik aret it kinom mbi nonggo menggaarak nogo, ninom mbi nengge logokit nduk koonogo paneegindak me, an nowe kendagembogut ambinom koonogo panenok nduk, yokkirigin lek o.”

1 Mbinineegwaarak 12:3

aap Tema awi Nggibeya mendek apuri inowe inarum wonagagerak Abiyetet Yowat imbirak inom, aap Atamawet apuri Yetiyen Pelet imbirak inom, aap Mberaka inom, aap Anatot mendek Yeku inom,

Etara 6:11

Ndi, ambi eeriyak yi yokkira. Aap ambi nen wone an lengganogo yokkirage yi, taganogo pege kenok, at awi wurik eyo ambi nggigimbunuk, ti paga at eebe ndanunogo mippogo logomonggotik, at eeremenggerak paga awi yigirik-noonom eerogo pogo logonu o.

Matiyut 27:5

Yogo mbareegwa, at Yurat nen wu mbuti perak nogo Ala awi wurik me time yubunik-telenak eerogo mambege nagagerik, wundi nanuk, enggaanok keele yilunggola nage nagagerik, kambeegerak.

Nappiigak 13:21

Mippege mbareegi, ti'nuk, it aakumi nen, Ninarum logorak ninowe endagembogut ambi mippinanu o, yinuk, yogo mbareegwa, at Ala nen Kiti aput Tawun anebunu Mbeniyamin mendek nogo, mippege mbareegi, wone lengganogo yorage kagak, tahun 40 aret eereegerak.

Pelaareegerak 21:22

Yorage nagagerik, ambi yorage logonet, “Aap ambi warogo eebe eyo paga tugunogo pugwi kenok ti, Ala nen pulunogo pege menggerak me, aap ambi maluk eeremenggerak kenok, kambuwak nduk, Wariyak aret o, yinuk, wako logomenggaarik, eebe warak eyo paga tugunogo pugwi iinok, at Aliku kinogoba Ala nen kineyate kwak nggween wokkirage nogo paga maluk eerogo pukwak, at eebe warak nogo eyo paga tugunik wonage kagak, o kiip ariyak mage o. Ata, warogo punuk, ne ti eyom paga aret eebe warak nogo nggween taanogo pumunggup o,” yoragagerak.

Yotuwa 10:26

aap inendagembogut nogo inoorogo piinok, eyo 5 paga ineebe ndanunogo piigo nogogwaarik, mippiyareegwaarak wonogwe iigak, oonegen aret kilu yi nagagerak.

Yotuwa 8:29

Ndi, aap Ayi mendek inowe endagembogut nogo eyo paga ndanunogo punuk, mippereegwaarak wonage kagak, oonegen kilu yi nage mbareegi, aap warak nogo waganogo o kota tu unggwogo menggam ambe paga mbo wuppunuk, yugum kalo logonogo pereegwaarak, o yogondak wonage aret o.

1 Tamuwen 10:1

Yoge mbareegi, ayeloman nogo nappereegerak nage kagak, aap Tamuwen nogo nen eyo tayitun amburu yiiwa'na toolak nogo wagangge nagagerik, Tawun anobak paga kilippunuk keyage wake, agandin eyak mbangge, eeke nagagerik, wone yoge logonet, “Ala apuri iniki kundugu Iterali nogo inarum logonet, inawone mbangge logonok nduk at Aliku ALA nen kat aret leenogo mippagagerak keenu a'nok nduk, amburu kilippagagi o.

1 Tamuwen 10:24

Kogwe iigak, at Tamuwen nen it aakumi nogo yorage logonet, “At Aliku ALA nen aap leenogo mippegerak yi kogop a? At pogom ambi nit ninenggela'me wonogwe abu lek o.” Yorage mbareegi, it nogo nen, “Ninowe endagembogut mondok-mondok logorak nogo yi aret o!” yinuk, keekok piyanggogogwaarak.

1 Tamuwen 10:26

Nappiige mbareegi, at Tawun kunduk, ame o Nggibeya nogome nage me, it aap wakaa'ngget inom nawak nduk Ala nen inikime eeppiyareegerak nogo, inom aret nogogwaarak.

1 Tamuwen 11:4

Yogo nogogwaarik, it nappiya wogogwaarak nogo Tawun wonage menggim o Nggibeya nogome ari woraanuk, wone yereegerak nogo it aakumi Iterali yorogo mbareegwa, it abok aret inoone nggwok paga leenggu maareegwaarak.

1 Tamuwen 24:21

kat nen an napuri wigannaremenggaarak nogo, inenggaawak lek eerogo piige, ndi, an nowe-nawot inenggela'me nendage ki logorak nogo, lek eerogo pege, Eerigin lek o, yinuk, at Aliku ALA owak mbanogo yo'niru o.”

1 Tamuwen 24:22

Yoge mbareegi, at Ndawut nen, “Op aret yagan o,” yinuk, Ala owak mbaneegerak. Mbangge mbareegi, Tawun nogo ame iyokan wage kagak, at Ndawut awuri inom iniyokan yugum pak wurogo pereegim nogome aret unggwi nogogwaarak.