2 Tamuwen 21:10 - Ala Wone Peenok Peebi Mbanak

¹⁰ Anggen iyaalok mbanggwi paga nen nok, age yubuni nogwe paga mayu mbogut paga nen lubu-lubu wambit wage menggim kuli, aap Aya apuluk kwe Iritapa nogo nen karun waganogo puut aap inoorak me taati yugum tabak paga ndoombatinuk, o liingge paga towe wiga agan aap nogo ineebe paga ninggiri wogwe, ndi, oonikiya paga nggwiya eyonggaame nen aap inoorak me wogwe, eekwi iyo, kwe nogo nen inarum aret wonagagerak.

2 Tamuwen 21:10 Cross References

Wakkagagerak 40:19

Ne kenagan logonuk, aap endagembogut Pirawun nogo nen kenggaanok mbanogo keebe waganogo eyo paga mippagamenggaarak me, yirowe-ndirowe nen kenggaanggum nenok ndi yuurak nogo aret kagandak o,” yinuk, yoreegerak.

2 Tamuwen 21:11

Ndi, aap Aya aput kwe Iritapa Tawun akwe ayeloman mendek wogo nen eeke nogo Ndawut yogo mbareegwa,

2 Tamuwen 3:7

At Tawun akwe ayeloman wogo aap Aya apuluk endage Iritapa wonagagerak me, ne ambi paga at Itibotet nogo Abenet yoge logonet, “Nonggop nduk kat nogoba akwe kimbirak nogo yegendak?”

1 Endagembogut 21:27

Eliya nen yoreegerak nogo aap Akap abu aret konengge nagagerik, ayum nibinogo patinuk, yum nibinik maluk mendek yikkolage nagagerik, mbi nengga'lek ambe mage negen logonet, yum nibinik maluk mendek nogo yirik winnage, mi'na'nuk nege logonet, iniki puru aago mbawok nege, eeke nagagerak.

Yeremiya 14:22

It yi aakumi ndi aakumi aanom warogo ayuk wuko menggaarak inagugi nogo nen o mayu wuppi wage, Ndi, mbogut alik nen o mayu lubu-lubu wurabit wage, Eeko menggaarak mbakop? Lek aret o! Kat ninogoba Kaliku Ala kalik nen mban aret eeke menggendak o. Ti abok aret eerit nage nogo ti, kat nen aret eeke menggendak me, nit niniki kat paga lunik aret ogoorik o.

Yetikiyen 39:4

Iterali wonogo menggam puut-puut ti paga at inom, awuri ineegin warak inom, yi aakumi ndi aakumi at inom ogogwaarak inom, abok aret inoorak wambit nagun o. Wambit nogwe iinok, an nen ineebe waganogo towe inenggaanggum nengga anebunu lombok abok aret inom, ndiimbu-nggwiya inom, inambi-mbiingga aret aruwak nduk, wogoraagin o.

Oteya 6:3

Togop me, At Aliku ALA ti, nit ninogoba aret o, yinuk, paganggwi, At eeke menggerak nineenu arit unggwogwe, Eeko logowok o. Ti eekwi niinok, oonegen lagi wage logonet, eya pindanogo pege menggi kwak at abet aret niya wage, O mayu wage menggim age kenok, mbogut paga nen mayu wuranet wage menggi kwak ninowagam wage, O kibi wonagaatik, o mayu wage logonet, nggween miin eerogo pege menggi kwak, at nen obeelom eerogo pinanege, Eerigin o, Yinuk, yogo agaarik o.

Yowen 1:18

Ninaanggumi mbi abu nen yinggwe-yanggwe agan nogwe, Inagari'ngga mbanogo nenet noorak lek kenok, lembu-tapi ambi me lingga nagak eerit nugwi, Ninandomba kunduk, mbi abu nen inoone nggininu-ngganinu agan nogwe, Eeko agaarik o.

Yowen 2:23

Kit aakumi o Tiyon wonogwe yi wae. Kinogoba Aliku Ala nen a'me nggelok eeppinagage logonet, Aa'nduk eereegi kwak, o kibi wonagaatik mayu nappi wage, O loongge nagaatik, mayu wuppi wage, Eeppinagagin me, Gandum agabolo mbelanggo menggam anggen mban yagabit age, Anggur amburu mburunogo tooko menggam anggur amburu inom, eyo tayitun amburu inom, Eno korok yinuk, kilu-kilu wangge, Eerigin me, Kiniki ale'nggen mbakwi, Kinogoba Aliku Ala eeppinagamenggerak ti paga ndawi lubuk yogwe, Eeko logomunggup o.

Takariya 10:1

O mayu nggwok woraawak nduk, Aliku ALA nen ndugwi kuwak eerogo pege, It aakumi inalitak inake mayu nggwok wogorage, Mayu wogoramenggerak paga yi mendek ndi mendek yarak nogo obeelom eerogo pege, Eeke menggerak me, Yi mendek ndi mendek agarit larit nage eyom paga mayu woraawak nduk, Aliku ALA nggino yogo logonip o.

Pelaareegerak 11:14

Liippunuk eekwi kiinok, awi yakwi eyom paga awi yarak mbilanuwak nduk mayu wokkirage, eebe mbaniyak eyom paga anggen piiruwak nduk mayu wokkirage, eeke kagak, gandum anggen mbanggwi, anggur anggen aambiranogo amburu tookwi, eyo tayitun amburu toologo pugwi, eerogo pako logomunggup o.

Pelaareegerak 21:13

kugun wagangga'lek kagak ayum yirik logomenggerak nogo nggoorogo punuk alik yikkolage, eeke logomenggerik, agalo-ogoba inale ari oome wonage kagak, tut ambiret abu penengge kenok, aap nogo nen, Nore aret kola o, yinuk, kolage logomenggerik, imbirak nogo yuurak op aret o.

Pelaareegerak 21:22

Yorage nagagerik, ambi yorage logonet, “Aap ambi warogo eebe eyo paga tugunogo pugwi kenok ti, Ala nen pulunogo pege menggerak me, aap ambi maluk eeremenggerak kenok, kambuwak nduk, Wariyak aret o, yinuk, wako logomenggaarik, eebe warak eyo paga tugunogo pugwi iinok, at Aliku kinogoba Ala nen kineyate kwak nggween wokkirage nogo paga maluk eerogo pukwak, at eebe warak nogo eyo paga tugunik wonage kagak, o kiip ariyak mage o. Ata, warogo punuk, ne ti eyom paga aret eebe warak nogo nggween taanogo pumunggup o,” yoragagerak.

1 Tamuwen 17:44

Pulunogo pege nagagerik, Ndawut nogo wone ambinom yoge logonet, “Kat nimbirak wakkaawok nduk mbet panggo yi omok nda! Kat kenggaanggum ti, towe wiga agan nugu menggaarak inom, nggwiya karume nugu menggaarak mendek inom, nawak nduk, wogoraakit nen, kat an nowagam ya'i panggo yi omok o.”

1 Tamuwen 17:46

Ne yi eyom paga at Aliku ALA nen keebe waganogo an neenggime wo'nege yi aret me, koorogo paganuk, kanobak mbanogo wagangge logonet, kawuri ineegin warak Pilitin mendek abok aret kinom towe wiga agan nugu menggaarak inom, nggwiya eyonggaame menggaarak inom, kineebe kinoorak nawak nduk, wogoraagin o. Ti eeriminggirak paga aakumi o nggween paga yime menggaarak abok nen, Aakumi Iterali inogoba Ala wonage aret kogo o, yinuk, ineenu arugun.