2 Tamuwen 15:12 - Ala Wone Peenok Peebi Mbanak

¹² Inom aret nogo nogogwaarik, at Abatalom nogo Ala ake warogo wogoge logonet, aap Nggilo mendek endage Akitoben Ndawut inom wone koongga nogo, ame o Nggilo time wonage me, woraawak nduk, ayeloman mini yonggo nappiyareegerak. Togop eereegerak paga Ndawut tebenogo puwok nduk iniki ambit eeppunuk, koonogo pereegwaarak nogo, nggwok aret age mbareegi, aakumi apit at Abatalom inom mban aret ogogwaarak.

2 Tamuwen 15:12 Cross References

2 Tamuwen 15:31

Laganggwi iigak, aap ambi nen Ndawut yoge logonet, “Abatalom oreewi inom nen kat tebenogo pagarak iniki ambit eeppunuk, koonggwi nogo, aap Akitoben inom aret koonggo agaarik o.” Yogo mbareegwa, at Ndawut nen konembunuk, Aliku ALA yoge, “Kaliku nogoba ALA wae. At Akitoben wone koonogo yorage nogo, Wi negen agan nege agaarik, mbaruwak nduk, eeppu o,” agan puut kirin paga ari laganeegerak.

2 Tamuwen 16:15

Ti eerit nogwe iigak, at Abatalom inom, it aap Iterali mendek abok aret inom, o Yerutalem unggwi wogo mbareegwa, at Akitoben nogo inom aret unggwi wagagerak.

2 Tamuwen 17:14

Wone ti yoreegerak nogo at Abatalom inom, it aap Iterali inoweewi abok aret inom, inaruk konenggo nogogwaarik, “At Akitoben wone yegerak nogo ti, op negen kwe, at aap Ariki mendek Kutayi nen wone yegerak ti perak, abu obeelom aret yegerak kogo o,” yinuk, yereegwaarak. Wone ti yoreegerak nogo, at Aliku ALA nen aaninggin Abatalom oba puurak mbake logonet, Akitoben yereegerak meek mbaruwak nduk, eeppereegerak me, yoreegerak.

2 Tamuwen 17:23

Ndi, at Akitoben nen wone koonogo yoragagerak nogo eeka'lek iige nagagerik, keledai amborowak paga kwi'nagak nogo ndoonogo punuk, ti paga kwi'na'nuk, at awi alom paga kota nogome aret nage nagagerik, aaganapuri koonogo piinok, alik nen enggaanok keele yilunggolagagerak kangge mbareegi, at ogoba nggween taanak me nogome aret taambereegwaarak.

2 Tamuwen 23:34

Aap Maaka mendek Akatabayi aput Elipelet inom, Aap Nggilo mendek Akitoben aput Eliyam inom,

1 Endagembogut 21:12

inawuri inambe mage negen a'nuk logorak kuwak eeri woraawak nduk, yorogogwaarak kuwak eeri wogogwaarak nogo, aap Nabot it inaame kwippogo mbareegwa,

1 Mbinineegwaarak 27:33

Aap endagembogut wone owa'na nigakka ti, aap Akitopen aret. Ndi, aap endagembogut imbirak kunik ti, aap Ariki mendek Kutayi aret.

Ndawi 41:10

Togop aret eeppanugwi iigak kwe, Kaliku ALA perak, nabuwa mbake, It an maluk eeppanugwi nogo ti, Onggo eeppiyaakit nduk andi lek eerogo panege, Eeru o.

Ndawi 41:9

An nore niniki kunik abet aret mbake, Nimbirak mbi nengge, Eeke minggirak nogo nen kunduk, Nimbirak logorak, “Neebi o,” yinuk, mbo panegerak o.

Kini Wuppiige 15:8

Aap maluk mendek nen ake warogo Aliku ALA wogogwi nogo, at eebi lombok mbake menggerak kwe, Aap iniki koonak nen tamban eekwi iinok perak, koneniyak inikilom mbake menggerak.

Kini Wuppiige 21:27

It aap maluk mendek nen Aliku ALA ake warogo wogogwi iinok, eebi lombok mbake menggerak me, Iniki maluk ambi koombunuk ake warogo pit wogwe iinok perak, abunuk eebi lombok mbake menggerak o.

Yeremiya 6:20

It nen obari abe kaga o Tiyeba nen wonok nake pi wogwe, En weeri amburu aberogon o nda nen wonok niri wogwe, Eekwi ti, Nano ake eeko agaarik? Ti we aanom warogo aret! Warogo nake kani kunggwi ti, ninikilom mbake, Warogo wo'nugwi ti, nale'nggen mbake, Eekeelik mban aret o,” yinuk, yegerak me yokkiragi o.

Linggineegwaarak 23:1

At Mbileyam nen Mbalak yoge, “Kat warogo kani kunggak an nake 7 kuli o yime ogobakkigirogo punuk, tapi ngguunok 7 punogo pege, ndi, ndomba ngguunok 7 punogo pege, eeru o.”

Linggineegwaarak 23:14

Yoge nagagerik, at Mbalak nen Mbileyam nogo wonok, puut Pitaka paga inigen yomboonggo menggam time lagi nogo nogogwaarik, time nen warogo kani kunggak 7 kuli ogobakkigirogo punuk, tapi ngguunok ambi wagangge, ndomba ngguunok ambi wagangge, eeppunuk, warogo kani kunggak ogobakkigirik 1 nen 7 kuli nogo paga pit nagagerak.

Linggineegwaarak 23:30

Yoge mbareegi, at Mbalak nogo nen Mbileyam yoreegerak nogo ndak-ndak eeke logonet, tapi ngguunok ambi wagangge, ndomba ngguunok ambi wagangge, eeppunuk, warogo at ake kani kunggak ogobakkigirik 1 nen 7 kuli nogo paga pit nagagerak.

Yaya 13:18

Kit abok kiinok yokkirage lek o. An miirogo leengginabeegirak an neenu aret o. At nimbirak mbi nengge nogo nen aret nooriyak koonggerak o, yinuk, Ala wone liiru mbanak nogo a'me lik yuwak nduk, agaarak me, a'me lik yigin o.

Titut 1:16

It aap ti nen yogo logonet, “Ala nineenu o,” yogo menggaarak kwe, it eerit nugwi paga nen perak, “Ala nineebi,” mbako logonet, yogwe yelok iigo monggoorak. Ala wone konengga'lek taganogo pit nogo logonet, obeelom ambi eekulik maluk mban eekwi me, inogole warak aret iigo monggoorak o.

Yotuwa 15:51

Nggotiyen, Kolon, Nggilo, aret me, lambuk togon kota 11 wogorage logonet, enaagan-ambokan yaga'lelo mbuulogwe inom wogorage,