1 Tamuwen 9:3 - Ala Wone Peenok Peebi Mbanak

³ Ne ambi paga Tawun ogoba aap Kiti nogo aanggumi keledai kobak ogo mbareegwa, at Kiti nen apuluk Tawun nogo yoge, “Nayeloman ambi kimbirak keledai nogo kwaaginabi nanip o.”

1 Tamuwen 9:3 Cross References

Owak Loongga 10:4

At apuri ti, 30 aret ndaganabeegerak. Ndi, o Nggileyat paga inawi ti, 30. Ndi, inaanggumi keledai awooluk ti, 30 togop aret wonagagerak me, inawi 30 nogo ti, “Aakumi Yayit wonogo menggam o,” yinuk, o yogondak yogwe wonogwe aret o.

Owak Loongga 5:10

Yi tooko menggam ndawi waka nen ndawi waka logonet, Aliku ALA nen yegetak a'me nggelok eeke, Aakumi Iterali ugun mendek nen abe koonak mban eekwi, Eekaarak ndawi ti, Kit keledai amborowak paga yum ndoombunuk kwi'nogwe, Keledai miya amborowak paga kwi'na'nuk wogwe, Eeko monggotak nogo Konembunuk yoranet nogo logonip o. Ndawi wakwi iinok, Aliku ALA apuri nen tu kota unggwogo menggam wambi woraanuk,

1 Tamuwen 10:14

Lagi nage nagagerik, ayeloman imbirak iname wogwe at Tawun ogobaluk nen enegen iige nagagerik, it yorage, “Kit ngga nen wogop?” Yorage mbareegi, Tawun nen ari logonet, “Keledai kobak agaarak nogo kwaarinabit nogoorak mendek, lek iinok, at Tamuwen eegwa'me wa nogo nogoorik, wogo o.”

1 Tamuwen 10:2

An ya neegak, yogondak aret kwe Araken nggween taambereegwam it Mbeniyamin wonogo menggam kuli o Teleta taa'nogo ari namenggendak me, aap mbere ambi kinom lambungge keenok, it nen yokkogo logonet, Keledai kwaarinabit nege nagandak nogo muk kagaarak kwe, yogondak kogoba nen, Naanggumi ngge o? yinuk, iniki lunik wonage lek o. Ata, Naput nonggop aga o, yinuk, iniki piirik wonage, yokkirugun o.

1 Tamuwen 9:2

At aput wulaga ambi endage Tawun wonagagerak. At enete abu kigirikwe it Iterali inenggela'me at kokwak ambi logolik it abok aret at uum abu'me mban wonogwe iigak, at anggup nggorek inirimbaga lombok tawe wonagagerak.

1 Tamuwen 9:20

Ndi, kat kaanggumi keledai kobak agaarak kagak, nogo kenagan yegendak nogo ti, muk kwaaginakaarak me, kiniki piirik logogun o. It aakumi Iterali abok iniki mbakwi nogo, Ta nen eeke logogin o, yinuk, kwaakwi nogo, kat inom, kowe-kawot inom, liippinagaga'lek mbake agandik?”

1 Tamuwen 9:4

Yorage mbareegi, imbirak nen o Eparayim nggelok-nggobok me kwaarinabeegwaarak mendek lek mbareegwa, o Talita enaagan-ambokan kwaarinabit nogogwaarak mendek lek mbareegwa, o nggween Takalim nogome kwaarinabit nogogwaarak mendek, lek mban mbareegwa, aakumi Mbeniyamin mendek iname kwaaginabi nogogwaarak mendek, ineebe abu lek aret iyareegwaarak.