1 Tamuwen 30:6 - Ala Wone Peenok Peebi Mbanak

⁶ It Ndawut awuri nogo inakuwi inapurilogwe wologwe-komologwe wogoren nogogwaarak paga inanini agaket yogo logonet, Ndawut nogo yugum paga wariyak nduk koonggwi iinok, at Ndawut nogo iniki piirik agagerak kwe, at iniki Aliku ogoba Ala oba panggombunuk mondok nu'lek aret wonagagerak.

1 Tamuwen 30:6 Cross References

Wakkagagerak 32:7

Yogo mbareegwa, at Yakup iniki piirik eeke mbareegi, agabiti nen, “At Etawu wage logonet, it aa'nduk leenogo nappiyaminggirak inooke kenok, it peebi nogwe ti, kole mbaganuwak o,” mbake nagagerik, at awuri inom wagagerak nogo inom, kambin-ndomba inom, tapi-lembu inom, keledai-unta inom, ando mogonogo inaa'nduk noorak leenogo piige, peebi noorak leenogo piige, eeke nagagerik, nappiya wagagerak.

2 Tamuwen 17:8

Kat kogoba inom, at awuri inom, wam nggwiya aagalogwe piginakwi iinok, anini wu aago menggi kwak, inogogumbuk wakaa'ngget lombok wonogwe o. Ndi, kogoba nogo wim age menggerak eya abok eenu me, at awuri nogo yugwi me, at inom nogo yegeelik nogo kat keenu aret o.

2 Endagembogut 4:27

Yoge nagagerik, kwe nogo aap Ala wone liirogon eeka puut paga wonage nogo owagam nanuk, iyok eenggi omaawi pigagangge mbareegi, at Nggekati nen eebe pelenogo nappereegerak mendek, aap Ala wone liirogon eeka nen ari logonet, “Kwe yi, iniki abu wakko'net wagaarak o. Ndi, iniki wakko'net wagaarak nogo, Aliku ALA nen kin paga yo'nega'lek awo kumaapporogo wonage me, kwe yi, teppu o.”

Ayup 13:15

An ambi eeriyak niniki lunik lek me, nooriyak mbake kagak kwe, Nawone nogo at enggaanom paga an nen aret naana'le mbanggolaagin o.

Ndawi 116:10

“An aaninggin abu meek eerogo panggerak o,” ari logonet kwe, Niniki koba panggombunuk abet kombake,

Ndawi 138:3

An nen, “Yeenggwa niru o,” yinuk, Noone nggwok paga yokkege neenok, aret yeenggwa nege, Nagabiti lek nogogumbuk logonet yorage logokit nduk, Eerogo panege, Eekendak o.

Ndawi 18:2

At Aliku ALA ti, an nayugum kwak, Nayugum pak wurogo pereegi kwak, An nagap ndaka, aret menggerak o. At nogoba Ala ti, Aakumi nen an nookwi iyo, Yugum lunik kwak abu'me pani unggwage, Nggeemu pogom mulunogo panit nege, Omaawi paga nagap ndarogo panege, Yugum pak wurogo pereegi kwak eerogo panit nege, Eeke menggerak o.

Ndawi 18:6

Eeppanit wage paga aaninggin noba wonage logonet, Aliku ALA noone nggwok paga yoge, “Nogoba Ala yeenggwa niru o,” yinuk, yoge, Eekirak paga, At awi wurik me logonet noone konengge, Le ari logonet, nggino yogirak nogo aruk konengge, Eekerak o.

Ndawi 25:17

Niniki mondok aaninggin ee'nabit unggwagak mban eeke paga niniki andi negen ee'nake yi, Teeluk eerogo panu o.

Ndawi 27:14

Togop aret me, Kit nogo Aliku ALA tokkogwe, Kinogogumbuk eekkologwe, Kiniki nu'lek eeppatinuk wonogwe, Eeko logomonggotik, At Aliku ALA tokkogo logonip o.

Ndawi 31:24

Togop me, “Aliku ALA nen eeppinanuwak lak, ao,” yinuk, Kiniki lunik wonogwe kit aap abok yi wae. Kinomaawi eekkologwe, Kiniki nu'lek eeppatinuk wonogwe, Eeko logonip o.

Ndawi 42:11

Niniki yoge logonet, “Niniki yi wae. Kat nonggop nduk puru ari, Nonggop nduk, Ai, mbake, Eeke agandik? Nagap ndaka nogoba Ala endage tiyappege logogin me, Niniki yi, at paga panggonak logot o,” Yinuk, yoge agarik o.

Ndawi 42:5

Niniki yoge logonet, “Niniki yi wae. Kat nonggop nduk puru ari, Nonggop nduk, Ai, lombok mbake, Eeke agandik? Nagap ndaka nogoba Ala endage tiyappege logogin me, Niniki yi, at paga panggonak logot o,” yinuk, yoge agarik o.

Ndawi 42:7

Yi taakut wurabit wagagindak oone wo-wo ari ti, Niyo kole yenggenak ambi inikime nen Niyo kole yenggenak ambi inikime yoge, Yi nggwok kilaarak-mogonik eerogo wunabit nage menggendak nogo, An aret tebenogo panit wage, Eeke agaarik o.

Ndawi 56:11

Niniki kat Ala koba panggonak wonage paga An nagabiti mbarigin lek niniki kwi'ndak wonage me, It aakumi nggween paga mendek nen an nano eeppaniyak mbaken? Lek aret o!

Ndawi 62:1

Nagap ndaka ti, Ala aret me, At nen mban eeppaniyak niniki lunik logonet, Niniki ugun tayenak aret agarik o.

Ndawi 62:5

Togop aret me, niniki yi wae. Ala nen mban eeppaniyak mba'nuk lunik logonet, Oba panggombunuk, ugun tayenak logot o.

Ndawi 71:4

Nogoba Ala wae. It maluk eeka ineenggime nen ndinogo wumbanege, Aap iniki maluk inogogumbuk ineenggime nen ndinnake, Eeru o.

Ndawi 71:5

Kaliku Kitok Menggendak ALA wae. An wulaga tawe paga nen nok, yogondak kuli niniki kat paga lunik wonage, Kat paga niniki panggombunuk wonage, Eeke agarik o.

Wundeegwaarak 17:4

Yogo mbareegwa, Muta nen Aliku ALA yoge, “It aakumi yi, yugum paga nooriyak eekwi me, it inake an nonggop eeppiya o?”

Kini Wuppiige 18:10

Aliku ALA endage ti, o nggorek omaawi wurik kwak aret wonage me, Aap iniki abe koonak nogo nen mbe agan time unggwi na'nuk, ineebe obeelom aret wonogo menggaarak o.

Yetaya 25:4

Aakumi it nen eekkoloorak meek mendek nogo ineebe op logowak nduk, inarum wonage, It aap ineenggi lek mendek nen, “Nonggop eeruwi?” yinuk, lin wakwi nogo kat nen ndegeninake, Eekendak o. It aap iniki worokot linik inanini ti, O mayu woroorak eeke logonet, wiya omaawi wake menggi kwak, O karume mo tele-tele ari menggi kwak, Togop aret menggaarak me, O mayu nen inooke kero, ooliya wurik kwak eerogo piige, Mo andi inooke kero, ngguna'me eerogo piige, Eekendak o. It aap inambik inoone ya-kwa agan nugwi nogo inoone lek eerogo piige, Mo andi keket ari me, ndugwi lamunogo pege menggi kwak, It iniki worokot linik logonet, inale'nggen nen ndawi warit nugwi nogo inoone mbanogo piige, Eeke menggendak o.

Yeremiya 16:19

Kaliku ALA wae. Kat komaawi eeppanega, Nobak wurik kwak wonaga, aaninggin noba age kenok, neebe op logokit nduk, kabu'me panega, kat aret o. Yi aakumi ndi aakumi kat kowagam ari wogwe, O nggween irip-irip me nen kat keya wogwe, Eeko logomenggaarik, Kat yokkogo logonet, “Ninombomini ti, abe mendek ambi porogo logolik o. Ata, inambokan lagangga abe eeppiyoorak lek aanom warogo kagak inagugiwak ti mban porogo wonogogwaarak o.

Yunut 2:2

Tamban eeke logonet, “An niniki aaninggin ndugu aago logonet, noone nggwok paga Kaliku ALA yokkege neenok, onggo yo'nege, Aakumi kambunuk nogo menggam kiiniki paga wonage logonet, Yeenggwa niru o, yinuk, noone nggwok paga yokkege me, noone yi, karuk konengge, Eekendak o.

Linggineegwaarak 14:10

Yorogo mbareegwa, it aakumi Iterali mendek abok nen it aap ineebe mbere nogo yugum paga inooriyak nduk wone mbanggwi iigak, Aliku ALA inom lambungge menggim awooliya wurik nogo paga abinak pindanogo pege kogogwaarak.

Matiyut 21:9

eeko mbareegwa, nogo paga wage kagak, it ando inaa'nduk wogwe, it ando ambo'me wogwe, eeko logonet, “Ndawut ombooluk yi, Otana, yuwok o. Ninogoba Ala endage paga wage yi, wogoppuwok o. It mbogut irimbaga menggaarak kunduk, Otana, yuwak o,” yinuk, keekok agan wogogwaarak.

Matiyut 27:22

Yogo mbareegwa, at Pilatut nen, “Ndi, ti kenok, at Yetut endage Keritut yogwe yi, an nonggop eerogo pi o?” Yorage mbareegi, it abok nen at yogo logonet, “Eyo karo-karo paga nabenogo puurak aret o.”

Yaya 8:59

Yoragagerak ti paga it yugum waganogo Yetut waruwok nduk eereegwaarak mendek at Yetut nogo, Ala awi wurik me nen wundi nanuk eenggi-iyok lek aret lek agagerak.

Oroma 4:18

“Kat ndaremenggendak paga laaluguragan togop aret wigak yugun o,” yoreegerak nogo, eeriyak meek tit kagak kwe, yoreegerak abet mba'nuk, wone ti paga iniki mondok panggombereegerak me, yoreegerak liiru mbanak nogo ndak-ndak, yi aakumi ndi aakumi apit inogoba aret agagerak.

Oroma 4:20

wone abok yoreegerak nogo, “Arigin ilik, lek kwa?” mbake logolik. Ata, iniki nen, “Mondok abet aret eerigin kagi,” mba'nuk, abet mbareegerak nogo nen wone ti, inikime omaawi arit unggwage kagak, Ala wogoppege nagagerak.

Oroma 8:31

Togop me, wone yokkiragarak ti paga nonggop yuwok mbakop? Ala ninom kunik wonogwe me, ta nen ogoorogo pinanigin mbakop?

2 Korindut 1:6

Aaninggin-paaninggin ninoba age nogo ti, nit nen kit kiniki eyak wappinagagwi, ndi, obeelom eekkinakwi, eeruwok nduk, eeppinanugwi me, op aret o. Nit aaninggin ninoba pinanugwi iigak, niniki kwi'ndak logonet, waganggo monggoorak nogo, kit ndak-ndak eeppinagagwi iinok, kit togon, kiniki kwi'ndak logonet, waganggo logobagip nduk, nit nen kit kiniki eyak wappinagago monggoorak. Ndi, nit nen kit kiniki eyak wappinagawok nduk, aa'nduk Ala nen nit niniki eyak wappinangge menggerak.

2 Korindut 4:8

Taga'mbit agago pinanegaatak kwe, aan lebenogo pinanegeelik o. “Nonggop eeruwi o,” yinuk, niniki piirik wonogwe kwe, nineebe lek aga'lek, kagak aret monggoorak.

2 Korindut 7:5

Nit o Makendoniya unggwi wogo nogogurik, aaninggin mondok alik negen ninoba kwi'nage mbareegi, niniki ale'nggen mondok lek aret wonogogurak. Wone wakwi paga aaninggin ninoba age, “Nonggop arigin,” yinuk, ninagabiti ee'ninake, ee'ninakerak wonogwe niigak,

Owak Loongga 18:25

Yorage mbareegi, it Ndan mendek nen at yogo logonet, “Kat koone agan wage ti, it aakumi ambi iniki aagi a'nuk, kinoba kwi'nogo logonet, kat inom, kapuri inom, kinenggaawak lek eerogo pinagukwak, koone nggarurogon kame nak o.”

Owak Loongga 20:22

Nappiya wogo mbareegwa, it Iterali nogo inawooliyana wogo nogogwaarik, Aliku ALA enggaanom paga leenggu maakwi iigak, o aret kiip age mbareegi, it nen at Aliku ALA yogo logonet, “Nit nen ninoreewi Mbeniyamin mendek ti, ninom wim ambinom eeri nawi ilik, lek a?” Yogo mbareegwa, Aliku ALA nen, “Kinom wim namburi nanip o.” Yorage mbareegi, kobit ineebe koombunuk wonogogwaarak togo'nogo eeppunuk, at ambi kini wuppegak eerit

1 Tamuwen 1:10

iniki abu puru yinuk, le ari logonet, Aliku ALA yoge,

1 Tamuwen 23:16

at Tawun apuluk Yonatan nogo nen, “Ndawut iniki Ala oba panggombunuk logowak nduk, iniki eyak wappi na o,” yinuk, at Ndawut o Korep time wonage me ka nagagerak.

1 Tamuwen 28:15

Ngginnage mbareegi, at Tamuwen nen Tawun yoge logonet, “Kat nonggop nduk, Keebe kin aru, yinuk, wii'nege logonet, piya'nake agandik?” Yoge mbareegi, at Tawun nen Tamuwen yoge logonet, “Ala nen an mbo panege mbaki, aakumi Pilitin mendek ninom wim nambukwi paga an niniki ma'nagagerak wonage logonet, it aap Ala nen yorage kagak yoraga paga inom, nabi paga inom, yo'niruwak nduk, yogitak kwe, yo'nega'lek mban kenok, nogoba kat nen an eeriyak yo'nenok nduk, wiigigirak o.”