1 Tamuwen 29:3 - Ala Wone Peenok Peebi Mbanak

³ Wogo logonet, aap Pilitin mendek ineegin warak inoweewi nogo nen Akit yogwi, “Aakumi Iberani mendek yi, nonggop nduk kinom wogwe?” Yogo mbareegwa, aap Akit nen it yorage logonet, “Aap Iterali inowe endagembogut Tawun imbirak eeke nagagerak aap Ndawut nogo yi lek a? Aap Ndawut aret kwe, Tawun mbo punuk, neya wagagerak nimbirak wonage kagak, tahun ambi eereegerak kwe, at Tawun mbo punuk, neya wagagerak nen yogondak kuli yi, at maluk ambi eekerak an koolik aret o.”

1 Tamuwen 29:3 Cross References

Wakkagagerak 14:13

Wogoren nogwe iigak, aap ambi peberagangge eerak nogo nen at Lot eereegwaarak wone nogo wonok aap Iberani mendek Abaram nogo aap Amori mendek ambi endage Mamere ageyo teno alome nogome ooliya wuppunuk wonage me, yori wagagerak. At Mamere nogo ti, aap Etokon Anet imbirak inoreeluk aret me, it abok aret Abaram inom kunik aret wonogogwaarak.

1 Mbinineegwaarak 12:19

It Pilitin mendek nen aap Tawun inom wim namburuwok nduk, nogwe me, Ndawut inom namburi nawak nduk nage nogo it Manate mendek eegu nen kogo nogogwaarik, at Ndawut iyo'me a'nuk, inom nawak nduk eereegwaarak mendek, it Pilitin mendek inoweewi wone lengganinaka nogo nen, “Ninom nogwe niinok, wim nambuko logonet at ogoba Tawun iyo'me a'nuk, yeenggwaage kenok, ninenggaawak lek eerogo pinanege kero, nappuwok o,” yinuk, wone mbambunuk, Ndawut awuri inom iname nappiyareegwaarak me, inom wim eeri noolik.

1 Mbinineegwaarak 12:20

At Ndawut nogo o Tikalak nage me, anebunu Manate mendek inom a'nuk, wogogwaarak nogo ti, aap Arana, Yotabat, Yeriyayen, Mikayen, Yotabat, Eliku, Tiletayi aret. It ti, anebunu Manate mendek ineebe seribu lombok eerak inoweewi aret.

Ndaniyen 6:5

Maluk ambi eerulik aret mbareegi, it nen yogo logonet, “Aap endagembogut nen yoge eeke paga at Ndaniyen maluk eeke alom ambi yoriyak meek kogo o. Ata, at ogoba Ala yoge eeke ti paga ambi wonage kero, kwaaruwok o.”

Yaya 19:6

Yorage mbareegi, it aap Ala unde inoweewi inom, aap Ala awi wurik arum waka inom, nogo nen Yetut inigen kogo nogogwaarik, inoone nggwok paga yogo logonet, “Eyo karo-karo paga nabenogo puurak o! Eyo karo-karo paga nabenogo puurak o!” Yogo mbareegwa, Pilatut nen, “Lek o. Aap yi, maluk ambi abu eerulik kagarak me, kit kinobaalombok waganogo eyo paga nabenogo pi nanip o.”

Oroma 12:17

Maluk onggo-onggo eeko logogup o. Ata, aakumi nen obeelom eeriyak mbakwi nogo mban eeko logonip o.

1 Peterut 3:16

Kit Keritut kinom kunik logonet, obeelom eerit nogwe kiigak, it miyuk-meya eerogo pinagagwi nogo nen, kit obeelom mban eerit nogwe paga, “Ia!” yinuk, inagabiti mbarugun me, kiniki maluk ambi abe'naga'lek kiniki obeelom paga kinoone yanggorogon yorogo logonip o.

1 Tamuwen 14:11

Yoge nagagerik, at Yonatan eegin wonok nega imbirak aap Pilitin mendek inigen iyaawak nduk, kin ogo mbareegwa, it Pilitin mendek nen inigen iigo nogogwaarik, yogo logonet, “It Iberani mendek nggween enoona kumaarak wonogwe nogome nen wundi wogwe yi, pegiyaanip o.”

1 Tamuwen 25:28

ndi, an kayeloman maluk eeppagagirak nogo mari eerogo panege, eeru o. Kat nen at Aliku ALA awim eeke menggendak me, kat nogoba kapuri ndaganabemenggaarak kinom Iterali mondok unde wogonako logomunggup nduk, Aliku ALA nen aret eeppagagin o. Togop aret me, kat kangga'lek keenik logonet, maluk eeka'lek obeelom mban aret eeke logomunggun o.

1 Tamuwen 27:1

Tawun ame wagagerak wonage kagak, Ndawut iniki koongge logonet, “Ne ambi paga at Tawun nen nenggaawak lek eerogo panigin aret me, Iterali inenggela'me kwaa'nabit nege logonet, pi'nake kero, an mbaganit it Pilitin iname naminggirak ninom wonage neegak, op aret logogin,” mbake nagagerik,

1 Tamuwen 27:7

Ndi, at Ndawut nogo it aap Pilitin mendek inanggween paga time wonage kagak tahun ambit eeppunuk, tut kenagan eneneegerak.

1 Tamuwen 29:6

Yogo mbareegwa, aap Akit nen Ndawut wiireegerak wage mbareegi, yoge logonet, “Kat o maan an neya wagagindak nen yogondak kuli, maluk ambi eeka'lek logonet, kiniki abu koonak, aap abu obeelom lombok nawuri wim eeka kinom a'nuk, wim namburiyak op aret keegirak nogo, abet aret mbake logonok nduk, at eenik menggerak Aliku ALA endage paga yokkege kwe, it aap Pilitin mendek inendagembogut eegu nen perak, ineebi kombakwi me,

1 Tamuwen 4:6

Keekok piyanggogogwaarak nogo, it aap Pilitin mendek inaruk konenggo nogogwaarik, it mban-mban yogo logonet, “It aap Iberani mendek inawooliya oore'nggam nogome keekok yogwe ti, nonggop nduk, yogo agaarik o?” Yogo nogogwaarik, “Lek o. Aliku ALA aloobut mbanak nogo wonok Iterali inawooliya oore'nggam pi wogo nagaarik, yogo agaarik o,” yinuk,