1 Tamuwen 28:16 - Ala Wone Peenok Peebi Mbanak

¹⁶ Yoge mbareegi, at Tamuwen nen yoge logonet, “At Aliku ALA kimbirak kawim keenok, mbo pagareegerak kagak, an nonggop nduk kin wo'nege agandik?

1 Tamuwen 28:16 Cross References

2 Endagembogut 6:27

Yoge mbareegi, aap endagembogut nogo nen onggo yoge, “At Aliku ALA nen yeenggwa kege lek kenok, an kunduk, mbi ngga nen yeenggwa kiriyak nduk yagan o? An gandum yigiko menggam wonage nen wokkege, anggur aambiranggo menggam nen toolak kenok wokkege, eeriyak op kwe, lek aret me meek o.”

Leendawi 2:4

Aap inawim negen a'nuk, omaale eegin agale paga lumbunuk abinak lan agan nutik wage kwak eeri wage, Inom ogoorak nen inooko mengga kwak, inooriyak inikilom mbaketak nogo aret inoorit nage, O Tiyon Aagalukwe awooliya wurik paga kani kunik negen anini oba kilirogo pege, Eereegerak o.

Leendawi 2:5

Nogoba Ala ti, aap inom wim mbanak kwak wonage me, Iterali ambeme yonggorinake, Aap inendagembogut inawi nggwok abe wurik nogo yinik-minik eerogo pit nage, At obak wurik yigirik-noonom eerogo pege, Ndi, o Yekura Aagalukwe nogo ambinom iniki wakkolage, leenggu maake, eeke logowak nduk, eerogo pege, Eereegerak o.

Wayu 18:20

Eekwi iigak, at oone yo'nege nogo ambinom yo'nege logonet, “Kat mbogut yi, wae. Kale'nggen mbake, Kit Ala apuri ake leenak inom, obeelom wone yoranet nugu nogogutak nappiigak inom, Ala nen yokkirage kagak yoraga inom, Kit abok aret kwe yawukak nogo pogom o Mbaben yi nen eeppinagage nagagerak nogo onggo Ala nen aret eeppege me, kiniki ale'nggen mbakwi, Eeko logonip o,” yinuk, ari naruk konenggirak.

Owak Loongga 5:31

Togop aret me, Kaliku nogoba ALA wae. Kawim togop aret lek eerugun kwe, Oonegen komeninuk lagi wage kenok, Ia! yinuk, pi wakwi kwak, Kat kinom kiniki kunik nogo, togop aret logowak o.” Yinuk, ndawi pege nagagerik, wonogwe iigak, o nogo abolok lek wonage kagak, tahun 40 aret eereegerak o.

1 Tamuwen 28:15

Ngginnage mbareegi, at Tamuwen nen Tawun yoge logonet, “Kat nonggop nduk, Keebe kin aru, yinuk, wii'nege logonet, piya'nake agandik?” Yoge mbareegi, at Tawun nen Tamuwen yoge logonet, “Ala nen an mbo panege mbaki, aakumi Pilitin mendek ninom wim nambukwi paga an niniki ma'nagagerak wonage logonet, it aap Ala nen yorage kagak yoraga paga inom, nabi paga inom, yo'niruwak nduk, yogitak kwe, yo'nega'lek mban kenok, nogoba kat nen an eeriyak yo'nenok nduk, wiigigirak o.”

1 Tamuwen 28:17

Aliku ALA nen, Aap Tawun ndogop eeppigin o, yinuk, yo'nege mbareegi, yokkireegirak nogo ndak-ndak, eeppagage logonet, kat kendagembogut logonet, aakumi Iterali inarum menggendak nogo, muk ndinogo koreeluk Ndawut aret wogoreegerak o.