1 Tamuwen 25:30 - Ala Wone Peenok Peebi Mbanak

³⁰ At Aliku ALA nen yi mendek ndi mendek obeelom eeppagarak yokkegerak nogo, kat nogoba abu ndak-ndak aret eeppagage, ndi, it Iterali inowe kendagembogut logonok nduk, mippagage, eeke mbaremenggi,

1 Tamuwen 25:30 Cross References

2 Tamuwen 5:2

O maan aa'nduk nen at Tawun nogo ninowe endagembogut logonet, wone lengganogo yo'nirage kagak, wim namburiyak nduk, wundi nage kenok, it Iterali ineegin warak nogo kat nen aret wogoren wundi nagak eeke keegak, at Aliku ALA nen kat yokkege logonet, Kat an napuri Iterali inowe kendagembogut logonet wone lengganogo yorage, ndomba ndegeninako mengga kwak ndegeninake, eeke logomunggun o, yinuk, yokkereegerak nogo o,” yinuk, yoreegwaarak.

Ndawi 89:20

An nayeloman Ndawut aret kwaarogo punuk, Amburu an unde minggirak nogo oba kilirogo mippege, Eereegirak me,

1 Tamuwen 13:14

Aliku ALA nen wone lengganogo yokkegerak nogo liirogon eerulik me, yogondak aakumi Iterali inowe kendagembogut ambinom inarum logomunggun lek o. Ata, aap alik ambi Aliku ALA iniki mbake ndak-ndak eeke menggerak kero, at apuri inarum logowak nduk, leenogo mippigin o,” yoreegerak.

1 Tamuwen 15:28

Nibik ari mbareegi, Tamuwen nen at yoge, “Eekerak ti kokwak, o yogondak yi paga aret at Aliku ALA nen kat kendagembogut logonet, aakumi Iterali kabu'me piinok wonage nogo ndinogo koreeluk aap obeelom kenok wogogerak o.

1 Tamuwen 23:17

Ka nage nagagerik, Yonatan nen at Ndawut yoge logonet, “An nogoba Tawun nen pikkabi woraagin abu lek o. Kat nimbirak Iterali inarum logonet, kat kendagembogut keegak, an kat kabu'me logorak nogo neenu aret o. Ndi, nogoba Tawun kunduk, eenu aret me, kagabiti mbarugun o,” yinuk, yoreegerak.

1 Tamuwen 24:21

kat nen an napuri wigannaremenggaarak nogo, inenggaawak lek eerogo piige, ndi, an nowe-nawot inenggela'me nendage ki logorak nogo, lek eerogo pege, Eerigin lek o, yinuk, at Aliku ALA owak mbanogo yo'niru o.”

1 Tamuwen 25:31

kat nogoba kiniki mbake logonet, Alom lek kagak amiya wumbege, maluk eeppanegerak nogo onggo eeppiige, eerulik me, niniki aaninggin nen puru agago wonage lek tayenak aret agarik o, yinuk, mbake logomunggun o. Ndi, at Aliku ALA nen obeelom eeppagage kenok, an kayeloman yi, noba abe'nake logomunggun o,” yinuk, yoreegerak.