1 Tamuwen 2:35 - Ala Wone Peenok Peebi Mbanak

³⁵ Aap ambi nen an eeriyak mbake inom, niniki koongge inom, neebe unde logonet, mondok liippunuk, ndak-ndak eeke logowak nduk, leenogo mippatigin o. Mippake logominggirik, at apuri wiganak wogoriminggirak mondok nu'lek logonet, at ambi leenogo amburu eerogo punuk, mippigin nogo, enggaanom mondok-mondok ake eeke logogin o.

1 Tamuwen 2:35 Cross References

2 Tamuwen 7:27

Ndi, kat Komaawi Lombok Menggendak Kaliku Iterali inogoba Ala wae. Kat nen an kayeloman yo'nege logonet, Kapuri-kombowologwe wiganak paga mban Iterali inarum logogun, yo'negendak ti paga an kayeloman nagabiti lek nogogumbuk logonet, wone yi, yokkege agarik o.

1 Endagembogut 1:45

wonok nogo nagaarik, aap Ala unde Tarok inom, Ala nen yoge kagak yoraga Natan inom, nogo nen niyo eneeri wungge menggim Nggikon time nen at ninowe endagembogut aret logowak nduk, amburu kilippogo nagaarik, iniyokan wogo logonet, inale'nggen nen keekok yagaarak o kota abok aret ndak wake nogo karuk konenggendak o.

1 Endagembogut 1:8

Ala unde Tarok inom, Yoyara aput Mbenaya inom, Ala nen yoge kagak yoraga Natan inom, aap Timeyi inom, Ereyi inom, it aap Ndawut arum menggaarak inom, it nen, aap Aroniya kooneegerak nogo, “Eo,” yinuk, inom ari noolik.

1 Endagembogut 11:38

Ndi, an nayeloman Ndawut eeke nagagerak kokwak, kat nen an wone lengganogo yokkege nogo eeke, niniki mbake nogo mugurok nage, an nenegen neegak wone lengganak inom, Yogop ee'nu ndogop ee'nu, wone yugu inom, eerit nage logonet, obeelom mban eeke, eeke keenok, at Ndawut apuri wiganak nen mban inendagembogut mi'narit wundi wogo logowak nduk, koonogo yoreegirak nogo kokwak, kat kapuri nen mban aakumi Iterali inendagembogut mi'narit wunggo logowak nduk, eeppagagin o.

1 Endagembogut 2:35

Ndi, aap inowe endagembogut Talomo nen at Yoyara aput Mbenaya nogo Yowap obaane'me ineegin warak inowe logowak nduk mippege, ndi, at Tarok nogo Ala unde logowak nduk, at Abiyatat obaane'me mippege, eereegerak.

1 Mbinineegwaarak 29:22

Ne ti eyom Aliku ALA enggaanom iniki ale'nggen lombok paga inagi inom, inambi inom, nunggugwaarak. Nunggo nogogwaarik, “At Ndawut aput Talomo ti, ninowe endagembogut logowak o,” yinuk, Aliku ALA enggaanom paga inowe endagembogut logonet, wone lengganogo yorage logowak nduk ne ambinom amburu eerogo mippugwi, at Tarok Ala unde logowak nduk mippugwi, eereegwaarak.

Ndawi 18:50

Nendagembogut mippaneegindak nogo Neegin tiyak yuwak nduk eeppanege, Amburu eerogo mippaneegindak nogo An Ndawut inom, napuri-nombowologwe inom, Ninabuwa nen eeppinanit wundi wage tit logomunggun o.

Ndawi 2:2

At Aliku ALA tebenogo pugwi, At Amburu Eerogo Mippereegerak nogo maluk eeppugwi, Eeruwok nduk, Aap inendagembogut yi o ndi o nen pipuk eekwi, Aakumi inoweewi nagawan-nagawan kuwak eeppunuk, Wone koonogo pugwi, Eekwi nogo ti, Nonggop nduk eeko agaarik o?

Wundeegwaarak 1:21

Ndi, kumi elege ndaganaka ti, Ala mban ayuk wuko nogogwaarak me, Ala nen it inogonggelomini inom, inaagalogwe inom, wogoragagerak.

Yetikiyen 34:23

Aap ambi nen nandomba ndegeninake logowak nduk, mippigin nogo ti, nayeloman Ndawut aret me, at nen aret unde wogonake logogin o. Ndi, unde wogonake logonet, nandomba ndegeninaka at aret logogin o.

Linggineegwaarak 25:13

At ogoba Ala an nayuk warak logokit nduk, mondok mi'nage logonet, naana'le mbangge, it aakumi Iterali mendek inooke neyo, inagap ndarogo maluk mbet-mbet aret nggarengge, eekerak ti paga at inom, apuri-ombowologwe wigannarit nogo logogun paga inom, an neebe mondok-mondok unde logowak o, yinuk, wone abuk nggaruk togon yegerak, yorumunggun o,” yinuk, yoreegerak.

Iberani 2:17

nit aakumi maluk eekwi niinok, Ala anini ninombake nogo, iniki yanggo yuwak nduk, Ala unde inowe nggwok logonet, ninabuwa nen puk aga'lek ko'lu-kii'me ninake eeke logowak nen, nit ee'ninake menggerak nogo, abok aret at ndak-ndak eeriyak age mbareegi, aa'nduk at awuri nit pogom aret eekkolagagerak.

1 Tamuwen 10:9

Yoge mbareegi, at Tawun nogo nen Tamuwen teppunuk, woraakit nduk, ena nomo ari me, Ala nen obaabut alik mendek eeppege mbareegi, Tawun ayeloman nogo, imbirak o Nggibeya aap Ala wone yaga ambi eerak wogwe nogo, inom lambunggo mbareegwa, o ti eyom paga aret at Tamuwen nen yi eeriyak ndi eeriyak yoreegerak nogo, a'me lik ari kagak, Ala Aberiniki omaawi Tawun oba age mbareegi, it Ala nen yorage kagak yoraga nen wone agan wogwe nogo, inom aret agan wagagerak.

1 Tamuwen 12:3

Ndi, yogondak at Aliku ALA inom, aap leenogo amburu kilippogotak inom, inenggaanom paga an mi'ndak wonage me, an maluk eeppinagage logonet, aap ambi aanggo lembu wagangge, aap ambi aanggo keledai wagangge, aap ambi wi-wi eeppege, aap ambi tebenogo pege logonet, noone omaawi yoge, aap ambi eekerak kagaarogo pikit nduk, wu wo'niri wage kenok wagangge, ti mendek ambi eeke neegotak nogo yo'nugwi kiinok, an nen obaane'me pikit nduk, yo'ninip o.”

1 Tamuwen 16:13

Yoge mbareegi, at Tamuwen nogo mi'na'nuk, eyo tayitun amburu toolak nogo wagangge nagagerik, oweewi inenggaanom paga at Ndawut nogo anobak paga amburu kilippereegerak. Kilippege mbareegi, ti eyom paga aret at Aliku ALA Aberiniki omaawi Ndawut oba agagerak mondok-mondok wonage kagak, at Tamuwen nogo iyokan o Arama aret wagagerak.

1 Tamuwen 2:36

Ti eeke neenok, at apuri wiganak ineenik wonogwe nen aap mippigin nogo, owagam wogo logomenggaarik, inendobanggun yindumbunuk, Ai, ninogoba. Nit mbi abu me, wu a, mbi a, kolaawok nduk, aap Ala unde ineyabu ambi eeriyak yo'niret o, yinuk, yori wagak eeko logogun, yegerak o, yinuk, yokkigi o,” yoreegerak.

1 Tamuwen 25:28

ndi, an kayeloman maluk eeppagagirak nogo mari eerogo panege, eeru o. Kat nen at Aliku ALA awim eeke menggendak me, kat nogoba kapuri ndaganabemenggaarak kinom Iterali mondok unde wogonako logomunggup nduk, Aliku ALA nen aret eeppagagin o. Togop aret me, kat kangga'lek keenik logonet, maluk eeka'lek obeelom mban aret eeke logomunggun o.

1 Tamuwen 3:1

At wulaga Tamuwen nogo awo tawe kagak, Eli abu'me logonet, Aliku ALA eyabu eeke nagagerak. At eyabu eeke ti eyom paga at Aliku ALA nen oone paga inom, inabinggaanggo paga inom, ne ambiriluk mban yorage nagagerak.

1 Tamuwen 7:9

Yogo mbareegwa, at Tamuwen nogo ndomba aagaluk awo yilak nengge ambi warogo enaani aret Aliku ALA ake kani kungge logonet, oone nggwok paga Iterali inake Aliku ALA yoge kagak, it Pilitin mendek nen Iterali inom perenggolaawok nduk, panggo yi wogwe iigak, Tamuwen nen Aliku ALA yoge nogo konembunuk, it Pilitin mendek inagabiti mbaruwak nduk, mbogut paga ngguurubu eeke logonet, mbogut telangge mbareegi, iniki ma'nogo nogogwaarik, Iterali inigen iigak, mbaganit nogo mbareegwa,

1 Tamuwen 8:3

inogoba eeke nagagerak nogo liirogon woppunuk eeko logolik. Ata, wu kolaawok nduk, aakumi inambokan laganggwi, wu wogorogwe iinok, inoone yaga-kaga eerogo abe inowak looninaka'lek teppiigwi, eeko nogogwaarak.

1 Tamuwen 9:12

Nogo yorogo mbareegwa, it komologwe nogo nen, “Wonage aret o. Kit peebi wogwe kiigak, at aa'nduk, o kota time yogondak iluk unggwi nage kagak wogoorak me, mugurok nanip o. O yogondak aret aakumi apit puurom paga Ala ake warogo kani kunggo logonet,

1 Tamuwen 9:13

at nen, Wo'niragandak Ala wa, yinuk, Ala yoge kenok, it aap inom eeriyak inayonggo piigaarak nogo Tamuwen inom mbi noorak me, nengga'lek tokkogo logukwak me nduk, mbet-mbet nage kero, o kota tu unggwogo menggam taati wonage me, ka namunggup nduk, mbet-mbet aret nanip o.”