1 Tamuwen 15:24 - Ala Wone Peenok Peebi Mbanak

²⁴ Yoge mbareegi, at Tawun nogo nen Tamuwen yoge logonet, “An abet aret maluk eekirak o. Aliku ALA nen, Yogop eeru o, yinuk, yo'negerak nogo inom, nogoba kat nen yo'negendak nogo inom, taganogo pege nagarik, an nawuri ineebe paga nagabiti nen inoone yo'negaarak nogo konembunuk, eekirak o.

1 Tamuwen 15:24 Cross References

Wakkagagerak 3:12

Yoge mbareegi, at aap nogo nen, “Kwe nimbirak logowak nduk wo'negendak nogo nen eyoonggen nogo mbanogo wo'nege mbaki, ninggirak o.”

Wakkagagerak 3:17

Yoge nagagerik, at Aliku Ala nen aap nogo yoge logonet, “An nen, Eyoonggen yi noorak mage o, yokkigirak kagak, kat kakwe oone konembunuk, nenggendak paga nggween yi pulunogo pigirak me, awo kangga'lek keenik logonet, yabu anggon-panggon agago punuk, yake logomenggendik, anggen mbanogo nenet nage logomunggun o.

2 Tamuwen 12:13

Yoge mbareegi, Ndawut nen Natan yoge logonet, “An nen at Aliku ALA maluk aret eeppigirak kagio.” Yoge mbareegi, at Natan nen at yoge logonet, “At Aliku ALA nen komaluk nogo lek eerogo pagagerak me, kat kambumunggun lek aret kwe,

Ayup 31:34

Aakumi apit inoone yogwe nogo nagabiti mbake, Nowe-nawot nen meek eerogo panugwi iinok, niniki lek age, Ee'netak en, Noone yaga'lek name mban puk logonetak kwe, togop eerulik o.

Ndawi 51:4

Kat aret maluk eeppagage, Aap alik lek kat lombok maluk eeppagage, Maluk eeriyak keebi mbake menggendak nogo kagak aret eeke, Eekirak me, Eekirak onggo eeppaniyak nogo ti op aret mbake, Ndi, nowak loonogo punuk, Aaninggin noba paniyak mbake nogo ti, a'me nggelok aret eeppanumunggun kombake, Eeke agarik o.

Wundeegwaarak 10:16

Nenet nogwe iinok, Pirawun nen Karun Muta imbirak mbet-mbet woraawak nduk, wiiragagerak nogo mbareegwa, it yorage logonet, “At Aliku kinogoba Ala inom, kit inom, maluk lombok eeppinagagirak me,

Wundeegwaarak 23:2

It aakumi apit maluk eeriyak koonit nugwi iinok, it inom koonit nugu logorak mage o. Aakumi inowak loonggwi me, it ambi nen nogo logomenggaarik, maluk abet aret eeremenggerak kagak, it aakumi nen, Maluk eerulik o, yogwe iinok, maluk onggo pugun lek me, at oone inom nabeniyak mage o.

Wundeegwaarak 9:27

Ti eeke mbareegi, at Pirawun nen Muta Karun imbirak wiiragagerak wogo mbareegwa, yorage logonet, “An nogo abu maluk eekirak o. At Aliku ALA nogo ti, abu obeelom mban wonage kagak, an napuri ninom perak, maluk aret eekoorak me,

Kini Wuppiige 29:25

Aakumi paga inagabiti mbarit nugwi ti, keele pugu kwak inenggaanok nggerenggologo menggaarak kwe, Iniki Aliku ALA oba panggombugwi nogo perak, tu kuuri'me aret nugu menggaarak.

Yeremiya 38:5

Yogo mbareegwa, at aap endagembogut Terekiya nen onggo it yorage logonet, “Kit eeriyak yogwe ti, nendagembogut an nen non mbanogo pinagarak meek me, at eeppuurak mbakotak nogo kinobaalombok eeppumunggup o.”

Linggineegwaarak 22:34

Ti yoge mbareegi, at Mbileyam nogo nen Aliku ALA ayonggo malayikat nogo yoge, “An nage neyo, tu non mbambaniyak nduk tu paga mi'ndak wonage nogo an neenggo'lek me, mondok maluk aret eekirak o. Kat nogoba nen an noorak lek nombakendak kenok, ya'nen aret name niyokan naakit o.”

Matiyut 27:4

“Ai. At maluk eerulik kagak, an nen warubagip nduk, onggo mbanggirak me, maluk aret eekirak o.” Yorage mbareegi, it nen, “Wone ti, nit ninoba agaarak mbaken? Ti kat kobaalombok aret o.”

Nggalatiya 1:10

An yokkirage ti, aakumi inikilom nombaruwak nduk ari ilik, Ala inikilom nombaruwak nduk ari a? Ndi, an aakumi nen tiyappanuwak nduk ari minggirak mbakop? Lek o. An aa'nduk aakumi inikilom mbaruwak nduk ari nagagirak nogo ndak-ndak ari logonetak en, yogondak an Keritut ayeloman logonetak lek o.

Wayu 21:8

it Ala wone mugurok noorak inagabiti mbaka inom, abet mbariyak ineebi mbaka inom, maluk peyak wurik kagak ugun eerit nega inom, aakumi inooka inom, kumi ugun wurinaka inom, magagirak iyagalo inom, kugiwak amili kungga inom, pilit pugungga inom, it abok aret it logowam pipuk eerogo pereegim kani omoonuk wunuk mban ari menggim nogome mbo nappiyaagin o. Aa'nduk ineenik logonuk, kambemenggaarak kwe, kani omoonu'me nappiyoorak nogo ti, peebi ne ambi kanggwi nogo kokwak aret o,” yinuk, yo'nege kagarak.

1 Tamuwen 15:15

Yoge mbareegi, Tawun nen onggo yoge logonet, “An nawuri nen it Amalek mendek inaanggumi ndomba inom, tapi inom, abu obeelom kero, at Aliku kogoba Ala ake warogo wogoriyak nduk, ineenik wogonako logonet, ineebe apit aret mondok lek eerogo piigaarak o.”

1 Tamuwen 15:30

Yoge mbareegi, at Tawun nen onggo yoge logonet, “An abet aret maluk eekirak kwe, napuri Iterali mendek inoweewi inenggaanom paga inom, aakumi Iterali abok inenggaanom paga inom, nendage op wonage neyaawak nen, at Aliku kogoba Ala alut eeruwok nduk, nimbirak nawok o, nogoba.”

1 Tamuwen 15:9

Piigo nogogwaarik, aap Amalek inowe endagembogut Agak nogo eenik teppugwi, tapi-ndomba abe mendek inom, inaagalogwe piirigalo mendek inom, “Yi abeme, inooriyak lek o,” yinuk, ineenik teppiigo logonet, mbi inikime waka'lek ineebenowak ko aago kenok, tigitogon aret inookwi, eereegwaarak.

1 Tamuwen 2:29

an nawooliya wurik me time it aakumi Iterali nake warogo kani kunggwi, iniki ale'nggen paga yi mendek ndi mendek we wo'nugwi, Eeko logonip o, yinuk, yoragagirak nogo, nonggop nduk miyuk-meya eerogo pogo agaarik? Ndi, it napuri Iterali mendek nen ndomba-tapi warogo nake kani kunggwi iinok, apuri nen enggaanggum mbanak abe kenok inaanoma'le andi lek nunggwi ti, nonggop nduk it iya, ndi, an meek, nomba'nuk, inaruk waka'lek teppiige agaarik?

1 Tamuwen 26:21

Yoge mbareegi, at Tawun nen ari logonet, “Ai, Ndawut naput o. An eekkabit nege nogo ti, wi negen maluk lombok eekkabit nege abet aret kagi o. Kat oonikiya yi aret nooriyak kwe, Nogoba me, wariyak meek o, nomba'nuk, teppanegendak me, an nen peebi koorigin lek aret me, niname nawok o.”