1 Tamuwen 12:3 - Ala Wone Peenok Peebi Mbanak

³ Ndi, yogondak at Aliku ALA inom, aap leenogo amburu kilippogotak inom, inenggaanom paga an mi'ndak wonage me, an maluk eeppinagage logonet, aap ambi aanggo lembu wagangge, aap ambi aanggo keledai wagangge, aap ambi wi-wi eeppege, aap ambi tebenogo pege logonet, noone omaawi yoge, aap ambi eekerak kagaarogo pikit nduk, wu wo'niri wage kenok wagangge, ti mendek ambi eeke neegotak nogo yo'nugwi kiinok, an nen obaane'me pikit nduk, yo'ninip o.”

1 Tamuwen 12:3 Cross References

2 Tamuwen 22:22

Nogoba Ala mbo punuk maluk eerit naga'lek Aliku ALA eerit nage mban mugurok nage,

Nekemiya 5:11

O yogondak aret inanggween inom, ineyabu anggur yarak inom, eyo tayitun yarak inom, inawi inom, inawu lek kenok, luulu unde eeppinagareegwaarak nogo obaane'me wogoraanip o. Ndi, wogorogo logonet, 100 wonage kenok ambiret oba lunogo wo'niraanip o, yorogogutak kira wogogwaarak wu inom, gandum inom, anggur amburu ngget toolak inom, wam amburu inom, abok aret obaane'me wogorogo logonip o.”

Ndawi 15:5

“Ninawu porogo wonogotak nabennagaarak nogo Inom wo'niraanip o,” yorogolik kenok, Aap maluk eerulik kagak, “Abet aret eekerak,” yuwak nduk, Wu wogorogwe nogo waganggulik kenok, Aap ti mendek mban o time logogun o. It aap ti mendek mban eekwi iinok, Iniki mondok-mondok nu'lek aret logogun o.

Wundeegwaarak 20:17

Aap ambi awi wurik a, akweeluk a, ayeloman kumi-aap a, aanggumi lembu-keledai a, amindik-amendek abok aret kiniki nen uugwe-uugwe mbariyak mage o,” yinuk, wone ti abok aret at Ala nen aret yoragagerak.

Wundeegwaarak 22:4

Ndi, lembu a, keledai a, kiraaremenggerak nogo eenik wonage me, kwaakkogwe iinok perak, at ambiret kiraaremenggerak kwe, obaane'me aanggumi mbere aret wogoruwak o.

Wundeegwaarak 23:8

Maluk eerak onggo, Ndogop puurak o, yugu kagak, Puurak lek, yoruwak nduk, wu kote wogogwi nogo ti, aap inawone abe mbaniyak kagak inigen mbuk kwak liinggwi yogo logonet, kagaarogo pugwi, ndi, Ninawone op aret mbanugun, mba'nuk, nogwe nogo, wi-wi eeginako logonet, Maluk eerulik kagak yogotak o, yinuk, it aap obeelom nogo inenggali wappiigwi, eeko menggaarak me, togop eeruwak nduk, wu wogorogwe iinok, woorak mage o.

Kini Wuppiige 15:27

Aap ambi, “An mban kolaakit,” mba'nuk, ko'net nage paga akwe-apuri maluk eerogo piige menggerak kwe, Aap ambi, “Mage yugume eeriyak wu wo'niriyak neebi,” mbaka nogo perak, eenik aret logogin o.

Ala Unde 6:4

maluk aret me, kiraakerak kenok a, wi-wi eerikit nduk, wu kunggolegerak kenok a, arum logowak nduk wogoremenggerak kobak age kenok a, aap ambi amendek kobak aremenggerak kwaaremenggerak kwe,

Ala Unde 6:5

Kwaarulik o, yinuk, kumbuk mbangge kenok a, ti maluk aret me, omaluk ti, an nen lek eerogo pikit nduk, onggo pi wage logonet, wamenggerak nogo amendek unde wogoge logonet, oba lunogo ambinom seperlima aret wogoruwak o.

Linggineegwaarak 16:15

Yogo mbareegwa, at Muta nogo anini ambik age nagagerik, Aliku ALA yoge logonet, “An nen it inaanggo keledai ambit-ambi wagangge, it mendek ambi maluk eeppiige, eeka'lek neegak yogwe me, it nen kat kake warogo wokkugwi iinok, woorak lek o, nogoba.”

Matiyut 22:21

Yorage mbareegi, it nen, “Lek o. Ti Kayitat aret o.” Yogo mbareegwa, at nen, “Ti kenok, Kayitat amendek ti, Kayitat aret wogogwi, ndi, Ala amendek ti, Ala aret wogogwi, eeko logonip o.”

Lukat 19:8

Yogo mbareegwa, at Takeyut nen it apit inenggaanom paga Yetut yoge logonet, “Nogoba o. An namindik-namendek mogonogo aap ineenggi lek kenok, wogorage, aap wi-wi aganake nagarak kero, obaane'me onggo 4 aret wogorage, eerikit o.”

Nappiigak 20:33

Kit kinawu mbuti perak emas inom, kinambogoyum inom, an uugwe mbake logolik o.

2 Korindut 12:14

Aa'nduk ne mbere paga kiya wagagirak kwe, yogondak ne ambi inom pekkiya woroorak koongge agarik o. An woroorak ti, aaninggin ambi kinoba pinagakit nduk, woraagin lek o. Elege-aabologwe nen inogobamini inarum wonogolik o. Ata, inogobamini nen aret elege-aabologwe inarum menggaarak me, an kinogoba kinamendek ambi kolaakit nduk, woraagin lek o. Ata, kit kineebe lombok kinabuwa nen aret woraagin.

Pelaareegerak 16:19

Mippiyamonggotak aakumi inowak loonggo logonet, maluk eerak onggo, Ndogop puurak o, yugu kagak, Puurak lek, yoruwak nduk, wu kote wogogwi nogo ti, aap inawone abe mbaniyak kagak inigen mbuk kwak liinggwi yogo logonet, kagaarogo pugwi, ndi, Ninawone op aret mbanugun, mba'nuk, nogwe nogo wi-wi eeginako logonet, Maluk eerulik kagak yogotak o, yinuk, it aap obeelom nogo inenggali wappiigwi, eeko menggaarak me, togop eeruwak nduk, wu wokkirogwe iinok waganggwi, maluk eerak onggo ndak-ndak eeppuurak kagak yiluk-yiluk awone mbanggwi, aap inetenggen pegiigak inowak loonggwi, eeko logobok o.

1 Tetalonika 2:10

Kit abet mbareegutak nogo nit kinenggela'me logonet, Ala wone liippunuk eekwi, ndi, maluk eeka'lek abu obeelom eereegurak paga kinoone ambi ninoba pinanega'lek wonogwe, eerit nogogurak nogo ti, Ala niige, kit kunduk niigwi, eereegutak o.

1 Tetalonika 2:5

Niniki laakot logonet, ninoone yokkirogo logolik ti, kineenu aret o. Kit kinageerok ambi kolaawok nduk, ninoone, “Ai-ao,” yogwe ti, at Ala eenu me, yuulik mban.

1 Peterut 5:2

Kit Ala apuri inarum logobagip nduk, mippinagareegerak nogo, “Kineebi,” mbako logonet, inarum logorak ti mage o. Ata, Ala iniki mbake ndak-ndak, “Inarum logokit,” mbako logonet, ndomba ndegeninako mengga kwak, Ala apuri ti, togop aret ndegeninako logonip o. Ndi, onggo koloorak paga mban kiniki lunik logonet, ndegeninako logorak ti mage mban. Ata, we kiniki ale'nggen paga aret ndegeninako logonip o.

1 Tamuwen 10:1

Yoge mbareegi, ayeloman nogo nappereegerak nage kagak, aap Tamuwen nogo nen eyo tayitun amburu yiiwa'na toolak nogo wagangge nagagerik, Tawun anobak paga kilippunuk keyage wake, agandin eyak mbangge, eeke nagagerik, wone yoge logonet, “Ala apuri iniki kundugu Iterali nogo inarum logonet, inawone mbangge logonok nduk at Aliku ALA nen kat aret leenogo mippagagerak keenu a'nok nduk, amburu kilippagagi o.

1 Tamuwen 12:4

Yorage mbareegi, it aakumi nogo nen wone onggo at yogo logonet, “Abu lek o, ninogoba. Kat nen wi-wi eeppinanege, tebenogo pinanege logonet, koone omaawi yo'nirage, ninamendek ugun wagangge, togop abu eeke logolik o.”

1 Tamuwen 12:5

Yogo mbareegwa, at Tamuwen nen yorage logonet, “Kat maluk ambi eeppinanege logulik o, yinuk, at Aliku ALA enggaanom paga inom, aap leenogo amburu kilippogotak enggaanom paga inom, yo'nogotak ineenu me, it imbirak nen kinenggali wappinagago logonet yokkirogo logogun o.” Yorage mbareegi, it nen yogo logonet, “E o. Yogoorak nogo at Aliku ALA nen liippinanegerak me, at nen mban yo'nirage logowak o,” yinuk, yoreegwaarak.

1 Tamuwen 2:35

Aap ambi nen an eeriyak mbake inom, niniki koongge inom, neebe unde logonet, mondok liippunuk, ndak-ndak eeke logowak nduk, leenogo mippatigin o. Mippake logominggirik, at apuri wiganak wogoriminggirak mondok nu'lek logonet, at ambi leenogo amburu eerogo punuk, mippigin nogo, enggaanom mondok-mondok ake eeke logogin o.

1 Tamuwen 24:11

Kooka'lek teppagage logonet, kayum irip mban mbuuluk mbanogo waganggirak neenggime wonage yi, pekket o, nogoba. An tebenogo pagakit nduk, koone taganit nage, an maluk eeppagage, eekirak noba wonage lek yum yi paga keenu aru o. Kat perak, an nooriyak nduk, mu'neren-ma'neren nege menggendak ti,

1 Tamuwen 24:6

awuri yorage logonet, “An nogoba yi, at Aliku ALA nen leenogo pege mbareegi, amburu eeppereegerak me, Aliku ALA nen leenogo mippereegerak kagak, an neenggi teeluk a'nuk, maluk eeppuurak mbake neyo, Aliku ALA nen non mbannake logowak o,” yinuk, yoragagerak.

1 Tamuwen 24:7

Wone ti yoragagerak paga at awuri nogo nen Tawun warulik teppereegwaarak. Teppogo mbareegwa, at Tawun nogo ndoome nen wundi wage nagagerik, nagagerak.

1 Tamuwen 26:11

Togop aret me, at Aliku ALA nen leenogo pereegerak amburu eeppugu nogo, an nen wake neyo, Aliku ALA nen non mbambanege logowak o. Awooluwak inom, agiiwak inom, anobak me wonage nogo, ti mban waganggo logomonggoorik, nawok nduk, waawok o.”

1 Tamuwen 26:9

Yoreegerak kwe, at Ndawut nen ari logonet, “At Aliku ALA nen leenogo piige kenok amburu eeppiigaatak aap ambi nen wake kenok, aaninggin oba arigin lek ti lek, arigin aret me, wariyak mage o.