1 Tamuwen 12:19 - Ala Wone Peenok Peebi Mbanak

¹⁹ Mbako nogogwaarik, it aakumi abok nen Tamuwen yogo logonet, “Nit ninomaluk aa'nduk eeko nogoorak wonage kagak, Aap ambi ninowe endagembogut logowak o, yinuk, nggino yokkogoorak nogo ti, maluk ambinom aret eekoorak me, nit kambukwak, kayeloman mini ninake at Aliku kogoba Ala yoru o.”

1 Tamuwen 12:19 Cross References

Wakkagagerak 20:7

Non mbambagage wonagarak me, yogondak kwe ti, ogonggelo unde wogori nak o. At ogonggelo ti, an noone yoge neenok yoraga mendek me, kat kake tamban eerigin kenok, kambumunggun lek o. Ndi, kwe ti, ogonggelo wogorumunggun lek kenok perak, kat inom, kowe-kawot inom, Nit abok aret kambugun aret kagi, mbake logot o,” yoreegerak.

Ayup 42:8

Nayeloman Ayup nen nabok abe pagangge menggi kwak, kit togop yuulik paga aaninggin kinoba pinagarak mbakirak kwe, lek eerogo pinagakit nduk, tapi ngguunok 7 waganggwi, ndomba ngguunok 7 waganggwi, ee'nuk, nayeloman Ayup owagam nogo logomonggotik, ti abok aret warogo kinake kani kunggwi kiinok, nayeloman Ayup nen kinake tamban eeke kenok, naruk konengge logominggirik, kit eekotak ndak-ndak eeppinagagin lek teppinagagin o,” yinuk, yoreegerak.

Wundeegwaarak 10:17

yogondak maluk eekirak yi kunduk lek eerogo paninuk, aaninggin nen aakumi kanggwi yi, lek aruwak nduk, at Aliku kinogoba Ala yo'nip o.”

Wundeegwaarak 32:30

Ko'lu Muta nen it aakumi Iterali yorage logonet, “Kit maluk mondok nggwok togon eekotak nogo Ala nen mbo punuk, kinom lambungge kaamun ilik, lek a? yinuk, an puurom paga kinake Aliku ALA yori lagakit o.”

Wundeegwaarak 9:28

o ngguurubu eeke, mayu kumulinggen wangge, eeke yi, yi kuli aret teppuwak nduk, Aliku ALA yo'nip o. Yogwi kiinok, kit o yime ambinom pinagago logorak lek mbet-mbet wundi namunggup nduk, teppinagagin o.”

Yetaya 26:16

Kaliku ALA wae. Nit nonggop eekkoloobok kenok, kat kowagam wogwe, Niniki koonnaruwak nduk, aaninggin ninoba pinanege mbareegin, “Ai-ao,” yogo logonet, tamban eekwi, Eekoorak o.

Yeremiya 15:1

Yoge mbaki, Aliku ALA nen an yo'nege logonet, “It Muta Temuwen imbirak kunduk nenggaanom paga mi'na'nuk, It aakumi yi, inabuwa mbaru o, yo'neremenggaarak kwe, an nen, It aakumi yi, inabuwa mbarigin mondok lek o, yoraagin me, kat nen it yi, an wonage me nen nawak nduk wumbiyet o.

Yeremiya 27:18

It aap ti, abet aret Naliku ALA yorage neegak yoraga logonetak en, yi mendek ndi mendek Naliku ALA nawi wurik me eegu wonage inom, aap Yekura inowe endagembogut awi o nggwok abe wurik me wonage inom, ndi, o Yerutalem yime wonage inom, ti wonok o Mbaben pi nogwe iyo, Nomaawi Lombok Minggirak Naliku ALA an nggino yo'nugu logonetak o, yinuk, yegerak o.

Yeremiya 37:3

Togop aret wonogogwaarak kwe, ne ambi paga aap endagembogut Terekiya nen aap Telemiya aput Yukan inom, Maateya aput Ala unde Tepaniya inom, imbirak Ala nen yoge kagak yoraga Yeremiya yori nawak nduk, nappiige mbareegi, nogo nogogwaarik, “Nit ninake ninogoba Aliku Ala yo'nok nduk, yokkiri wogo o,” yoreegwaarak.

Yeremiya 42:2

Ala yoge kagak yoraga Yeremiya nogo ka wogo nogogwaarik, at yogo logonet, “Nit aa'nduk aakumi ambik aret wonogogurak kwe, nineebe we mbuuluk mban yumbunogo pinaneegwaarak wonogwe nogo kenegen abe nen niigendak me, nit yumbunik abok aret ninake nen kogoba Aliku Ala nggino yo'nok nduk, kat kowagam ari wogo o.

Maleyaki 1:9

“An inogoba Ala nen inabuwa mbarikit nduk, yogondak yo'niruwak nda! Wo'niri wogwe ti mendek niri wogwe iinok, Op aret niri wogop o, yinuk, keyage warogo wogonaburak mbakwi ya? Lek aret o,” yinuk, at Omaawi Lombok Menggerak Aliku ALA nen aret yegerak me, kit at eebe unde aret yokkiragi o.

Linggineegwaarak 21:7

Kambit nogo mbareegwa, it aakumi Iterali mendek nogo apit aret Muta owagam wogo nogogwaarik, yogo logonet, “Kat inom, Aliku ALA inom, ninoone maluk yokkirogoorak ti maluk nggwok eekoorak o. Ndi, maluk eekoorak paga waalo ineyak mbaninakwi yi, lek aruwak nduk, kat nen Aliku ALA yoru o, ninogoba!” Yogo mbareegwa, at Muta nen it inake Ala yoreegerak.

Nappiigak 8:24

Yinuk, mberege mbareegi, at Timon nen, “Ai! Kit yogotak nogo an ee'nake kero, kinogoba Ala yogo logonip o,” yoragagerak.

Yakobut 5:15

Ndi, iniki Ala oba panggombunuk, tamban eekwi iinok, ninogoba nen aap andi nogo omaawi aret nege logowak nduk, obeelom eeppigin o. Ndi, at maluk eereegerak kenok, omaluk ti inom aret lek eerogo pigin o.

1 Yaya 5:16

Aap ambi nen maluk eeriyak iniki miippatinuk eerit nage kinigen kogo logomonggotik, at kani omoonu'me noorak nduk, eekwi nogo mendek eerit nage me, ake Ala yorubagip nduk, yokkirage ti lek o. Ata, kinore ambi Ala nen ninomaluk lek eerogo pinaniyak nogo mendek eeke kinigen kogwe kenok, Ala nen omaluk lek eerogo punuk, eenik mondok logorak mendek unde logowak nduk, “Ake Ala yogo logonip o,” yinuk, yokkiragi o.

1 Tamuwen 12:13

yinuk, nggino yo'nogo nogotik, kinowe endagembogut miikkologotak nogo, at Aliku ALA nen mippinagagerak yi aret me, kinigen kaanip o.

1 Tamuwen 12:17

O yogondak gandum anggen mbanggwi eyom nogo lek a? Mbanggwi eyom o kibi aret kwe, kit nen Aliku ALA mbo punuk, Aap ninowe endagembogut ambi mippinanu o, yogotak nogo ti, Aliku ALA enggaanom paga maluk nggwok eekotak kineenu arumunggup nduk, o ngguurubu eeke, mayu wuppi wage, eeruwak nduk, an nen at Aliku ALA yori o,” yinuk, yoragagerak.

1 Tamuwen 12:20

Yogo mbareegwa, at Tamuwen nen wone onggo yorage logonet, “Kit maluk eekotak nogo ti, abet aret kwe, kinagabiti nen Aliku ALA oone ari nogo mbo pugup o. Ata, kiniki-kineebe abok aret Aliku ALA mban wogo'nuk, mugurok nogo logonip o.

1 Tamuwen 12:23

Ndi, an nen perak, kit kinake Aliku ALA yoge lek neenok ti, Aliku ALA maluk eeppuurak aret me, kinake tamban eeke, ndi, obeelom eekkoloorak wone inom, tu koonak paga nogo logorak wone inom, mamungginake, eeke logogin aret kwe,

1 Tamuwen 7:5

Ti eeko mbareegwa, at Tamuwen nen, “Kit Iterali mendek abok aret o Mitapa taati kuwak ari nogwe kiinok, an nen kinake Aliku ALA yorikit o.”

1 Tamuwen 7:8

Tamuwen yogo logonet, “At Aliku ninogoba Ala nen it Pilitin ineenggime nen ninagap ndaruwak nduk, kat puk aga'lek koone nggwok paga ninake tamban mban eeke logot o.”

1 Tamuwen 8:6

“Ninowe endagembogut ninarum logowak nduk, aap ambi leenogo mippinanu o,” yinuk, yoreegwaarak nogo, at Tamuwen konengge nagagerik, “It aap yogwe yi, ao!” yinuk, at Aliku ALA yoreegerak.