1 Tamuwen 1:11 - Ala Wone Peenok Peebi Mbanak

¹¹ “Ai, nogoba. Kat Komaawi Lombok Menggendak Kaliku ALA aret me, kayeloman niniki tebenak wonage yi, liippanege, ndi, an kayeloman kee'nggot aga'lek abe'nake, eeke logomenggendik, naagaluk aap ambi wo'niru o. Wo'nege keenok, at eenik kagak eeruwak mbangga'lek mondok-mondok Kaliku ALA kake leenogo teppagagin o,” yinuk, wone abuk nggaruk togon kumbuk mbanogo Aliku ALA yoreegerak.

1 Tamuwen 1:11 Cross References

Wakkagagerak 28:20

Nogo toombege nagagerik, at Yakup nen ari logonet, “An tu paga yime nage neegak, kat Ala nen liirogon ndegenneren nage, narum wonage, eeke logonet, nambi noorak inom, nambogoyum yikkoloorak inom,

Wakkagagerak 29:32

Ndi, Leya nogo abila age nagagerik, aagaluk manggu wulaga aret ndareegerak. Ndake nagagerik, ari logonet, “At Aliku ALA nen an niniki aaninggin wonage nogo neege nagaarik, naagaluk wulaga yi aret wo'negerak me, yogondak nen perak, at nogonggelo nogo iniki kunik ee'nake logonet, nabuwa mbarigin kagi o.” Ari nagagerik, at endage ti, Uruben tooneegerak.

Wakkagagerak 30:22

Ndi, Ala nen Araken oba abeppege nagagerik, at Araken tamban eereegerak nogo Ala aruk konembunuk, “Araken yogondak elege ambi wogorikit,” mbareegerak.

Wakkagagerak 8:1

At Nu inom, yi mendek ndi mendek inigen mbolok kwi anebunu lombok inom, inigen mbolok lek anebunu lombok inom, abok aret yiiro paga wonogogwaarak nogo at Ala nen kobak eerogo piyoolik aberak aret wonagagerak me, wiya nggwok ambi o nggween paga yime nappi wage mbareegi, niyo nogo poro agan wambeegerak.

2 Tamuwen 16:12

An o yogondak yi wone ndi wone ninikime yagabit tibik-tobok eekwi paga yagan warit nege nogo, at Aliku ALA nen liippanege logomenggerik, aap pulunogo panege nogo ti, obeelom eeppanuwak nduk, eeppege kagak, eerukwak, teppinip o,” yinuk, yoragagerak.

Ndawi 25:18

An ee'nakwi paga yagan wake, Tebenak logonet niniki andi negen wonage, Eeke yi, Pe'neege logomenggendik, nomaluk lek eerogo panu o.

Wundeegwaarak 4:31

it aakumi Iterali yo'nggok nogo nen, “Aaninggin-paaninggin ninoba pinanege nogo, Aliku ALA nen enegen niige nagaarik, koonggerak kogo o,” yinuk, iniki abet mbako logonet, inendobanggun yindumbunuk, alut eereegwaarak.

Kini Wuppiige 31:2

Naagaluk wae. Naagaluk ninikime mendek yi wae. Naagaluk tamban eereegirak paga ndarak yi wae.

Wone Alom Kibingga 5:4

Aap wi negen eekwi nogo ti, Ala inikilom mbakeelik me, “Ndogop wokkirigin o,” yinuk, kumbuk mbanogo Ala yoge logomenggendik kenok, elaambirik logorak ti mage o. Ata, yemenggendak ndak-ndak mbet-mbet aret wogorumunggun o.

Ala Unde 27:2

“It aakumi Iterali wone yoroorak nogo yi aret. Aap ambi nen aap alik ambi wonok wage logomenggerik, Aap yi Aliku ALA wogorikit o, yinuk, kumbuk mbanogo nake leenogo panemenggerak kwe, lek age kenok, kumbuk mbanemenggerak nogo, Onggo ndogop pogo logowak o, yinuk,

Linggineegwaarak 21:2

Wogoren wage mbareegi, it aakumi Iterali mendek nogo nen, “It aakumi o Kanan yi, waganogo nineenggime pinanege keenok, it inawi kota-kota mondok pup eerogo piyaagun o,” yinuk, wone kumbuk mbanogo Aliku ALA yoreegwaarak.

Linggineegwaarak 6:11

Pi wage kenok, it an neebe unde nogo nen towe ambi nogo wappunuk aap nogo omaluk lek eerogo pikit nduk, wo'nege, ndi, towe ambi nogo aap kambemenggerak obari eeruwak paga ninggiremenggerak nogo maluk aret aremenggerak me, lek eerogo punuk, ninom lambuniyak nduk, nggami aanggo wakwi kwak, warogo kani kungge, eeppunuk, ne ti eyom paga aret eeruwak nogo obaane'me obeelom wunduwak nduk, an nake leenogo pege logowak o.

Linggineegwaarak 6:5

Ndi, at nen, An Aliku ALA ake leenak aret logokit o, yinuk, kumbuk mbanemenggerak kuli nen nok kuli pi namenggerak nogo paga eeruwak mbangge, amboro mbangge, eeriyak mondok mage o. Ata, An Aliku ALA ake leenak logokit, yemenggerak kuli ari naga'lek kagak, Naliku ALA nake leenak logonet, eeruwak inom, amboro inom, mbangga'lek aret logowak o.

Linggineegwaarak 6:8

Ala ake leenak logorak kumbuk mbanemenggerak nogo kuli ari naga'lek kagak Naliku ALA nake aret leenak logowak o.

Owak Loongga 11:30

Nage nagagerik, at Aliku ALA yoge logonet, “Kat nen aakumi Amon mendek an neenggime pege keenok, inoorogo piinok, nagap ndarak obeelom aret name wage neenok, nano mendek ambi an name nen tu paarogo punuk, an keyage wo'nabi wundi wage kenok, Kaliku ALA kake ti aret me, kake warogo kani kunggo mengga kwak, aret warogo kake kani kunigin o,” yinuk, wone mondok abuk nggaruk togon kumbuk mbanogo pereegerak.

1 Tamuwen 1:10

iniki abu puru yinuk, le ari logonet, Aliku ALA yoge,

1 Tamuwen 1:12

At kwe Kana nogo oone lek we inikime nen mban Aliku ALA yoge logonet, tamban nggorek eereegerak. Eeke logonet, ambe puruk-lenggek ari at Eli nen liippege nagagerik, “Kwe yi, amburu nenok kumili kunggerak kagi,”

1 Tamuwen 1:19

Ko'lu o weege mbareegi, Elakana nogo akuwi apurilogwe inom ineenik ogo nogogwaarik, at Aliku ALA alut eeppunuk, iname o Arama time aret nogogwaarak. Nogo nogogwaarik, wonogwe me, Elakana nogo akwe Kana imbirak nogo yege mbareegi, kwe Kana tamban eereegerak nogo Aliku ALA abereegerak.

1 Tamuwen 1:22

at Kana nogo nen ogonggelo Elakana yoge, “Peebi Tamuwen yilak mbambunuk, at Ala alut eeko menggam awooliya wurik me time mondok-mondok logowak nduk, an nen Aliku ALA ake leenogo pi noorak me, yogondak ninom nagin lek o.”

1 Tamuwen 1:27

Aliku ALA nen an naagaluk wo'niriyak nduk nggino yoreegirak a'me lik togon wo'negerak nogo wulaga yi aret o.

1 Tamuwen 1:28

Togop me, wulaga yi, kangga'lek eenik wonage logonet, mondok-mondok Aliku ALA ake leenak logowak nduk, wogoriyak mbakirak me, an yogondak Aliku ALA aret wogogi o,” yinuk, yoge mbareegi, inendobanggun yindumbunuk, Ala endage alut eereegwaarak.

1 Tamuwen 2:20

Wogori wagak eeke kenok, at Eli nen Elakana akwe imbirak keyage warogo ale'nggen inoba piige logonet, aap Elakana nogo yoge, “Kakwe yi nen, Naagaluk wo'niriyak o, yinuk, Aliku ALA yoreegerak wogoge mbareegi, Aliku ALA wogoreegerak nogo obaane'me kapuri ambinom wokkege logogin o,” yorage kenok, at Elakana akwe imbirak iniyokan iname o Arama aret nogo nogogwaarak.