फिलिप्पी 3:19 - केवट नया कारार

¹⁹ विनाश ओकरसिके अन्त छै, ऊसब खाली आपन शारीरिक इच्छा पुरा करैले जियैछै। लाज लागेवाला बातमे ऊसब गर्व करैछै, आर ऊसब सभे दिन खाली संसारके बातके बारेमे सोचैछै।

फिलिप्पी 3:19 Cross References

मत्ती 16:23

मगर येशू घुमिके पत्रुसके कहैल्कै, “शैतान, तुहें हमर लगतसे दूर हटिजो, तुहें हमर लिए बाधा छैं। तोर विचार परमेश्वरसे नै मगर आदमीके स्वभावसे छौ।”

मत्ती 25:41

तकरबाद ऊ आपन बायाँ बगलके आदमीसिके कहतै, ‘श्रापित आदमीसब! हमरसे दूर हो आर शैतान आर ओकर दूतसिके लिए परमेश्वरसे तैय्यार कैल कहियो नैमिझाबेवाला आगिनमे जो।

लूका 12:19

तब हमे अपने आपके कहबै, तोर लिए बहुते सालके लिए धन-दौलत राख्ल छौ। आब आरामसे र, खो-पी आर मौज कर।’

लूका 16:19

येशू फेर एकटा खिसा कहैल्कै, “एकटा मातबर आदमी रहै, जे बहुमूल्य मलमलके कपडा लग्याके सभे दिन सबसे उत्तम भोजनसे भोज कर्ते ऐशो-आराममे दिन बिताबै।

लूका 18:4

न्यायधीश कुछु समयतक ते नैमानल्कै, मगर पाछु आपन मनमे कहैल्कै, ‘हमे परमेश्वरके डर नैमानैछियै आर आदमीसिके वास्ता भी नैकरैछियै।

रोमी 16:18

कहिनेकी एरंको आदमीसब आपनसिके प्रभु ख्रीष्टके नै, मगर आपन पेटके लिए सेवा करैछै, आर ओकरसिके मिठ्ठ-मिठ्ठ बोली आर चापलुसीवाला बातसे सिधा-साधा आदमीसिके धोखा दैछै।

रोमी 6:21

आपन पुरना जीवनसे तोरा कोन फैदा भेलौ? तुहेंसब ओकर कारण खाली लाजमे पडैछैं। कहिनेकी उटा सभे कामके फल मौत छै।

१ कोरन्थी 3:3

कहिनेकी तुहेंसब एखनतक भी पापमय स्वभावके वशमे छैं। जब कि तोरसिके बीचमे जर्नी आर झगडा छौ ते, कि यी साबित नैकरैछै कि तुहेंसब आपन पापमय स्वभावके वशमे छैं? तुहेंसब ओरंको आदमीसिके जुगुर जियैछैं जेसब प्रभुके नैछै।

१ कोरन्थी 5:2

यी बातमे तोरासिके दुखित आर शोकित होना रहौ आर तोरासिके ऊ आदमीके मण्डलीसे निकाली देना रहौ। मगर ओकर बदलामे तुहेंसब घमण्ड करैछैं।

१ कोरन्थी 5:6

तुहेंसब घमण्ड करैले बन्द कर। तोरासिके मालुमे छौ कि कनेजरा खमीर सभेटा सान्ल अट्टाके फुल्या दैछै। ओहिने करिके, यदि एकटा आदमीके पाप करैके लिए अनुमति देल जैछै ते, जल्दी ही सभे आदमीसब उहे करैके लिए प्रभावित हैतै।

२ कोरन्थी 11:12

हमे तोरसिसे सहायता नैलेबौ ताकी हमे ऊ आदमीसिके रोके सकियै जेसब यी बात पर गर्व करैके लिए एकटा मौका चाहैछै कि ऊसब हमरेसिके जुगुर परमेश्वरके काम करैछै।

२ कोरन्थी 11:15

सेल्याके शैतानके सेवकसब भी धर्मी सेवकसिके जुगुर दिखावा करना कोनो आश्चर्यके बात नैछै, मगर ओकरसिके अन्त ओकरसिके कामके मुताबिक हैतै।

गलाती 6:13

ऊ खतना कैल यहूदी विश्वासीसब भी मूसाके सभे विधि-विधानके पालन नैकरैछै, मगर ऊसब चाहैछै कि तोरसिके खतना कैल जै ताकी ऊसब दोसर यहूदी आदमीसिके समनामे घमण्डसे यी बताबे सकै कि तोरसिके खतना ओकरसिके कारण भेलै छे।

फिलिप्पी 2:21

कहिनेकी सभेको आपन स्वार्थके खोजमे रहैछै, ऊसब जे बात येशू ख्रीष्टके लिए महत्वपूर्ण छै से बातमे चिन्तित नैहैछै।

कलस्सी 3:2

धर्तीमे भेल बातसिमे मन नैलगा मगर स्वर्गमे भेल बातसिमे मन लगा।

२ थेसलोनिकी 1:9

ऊसब सभे दिनके लिए प्रभुसे अलग हैतै आर ओकर आदरमे भाग नैपैतै। आर ऊ ओकरासिके कहियो खतम नैहुएवाला सजाय द्याके विनाश कर्तै।

२ थेसलोनिकी 2:12

आर परमेश्वर ऊ सभे आदमीसिके दोषी ठहरैतै जेसब येशू ख्रीष्टके विषयमे सच्चा सन्देशपर विश्वास नैकरैछै मगर दुष्ट तरिकाके प्रेम करैछै।

२ थेसलोनिकी 2:8

सेल्याके, जब ख्रीष्ट विरोधीके रोकेवाला चीजके हटैल जैतै तब येशू ख्रीष्ट दिखाई पड्तै। तब उटा ख्रीष्ट विरोधीके प्रभु येशू नाश करैके आदेश द्याके आर ओकर फेर वापस आबैके महिमा देख्याके शक्तिहीन बनैतै।

१ तिमोथी 6:5

ओकरसिके दिमाग दुष्ट शंकासे भर्ल छै, आर ऊसब निरन्तर दोसर आदमीसिके संगे वाद-विवाद करैछै, आर ऊसब आब नै समझे सकैछै कि सच्चाई कि छै। ऊसब सोचैछै कि परमेश्वरके बारेमे शिक्षा देना पैसा कमाबैके रस्ता छै।

२ तिमोथी 3:4

ऊसब आपन साथीसिके संगे विश्वासघात कर्तै, ऊसब बिना सोची विचारीके काम कर्तै, ऊसब अपने आपके दोसर आदमीसिसे बेसी महत्वपूर्ण सोच्तै आर ओहिने व्यवहार कर्तै आर परमेश्वरसे बेसी सुख विलासके प्रेम कर्तै।

याकूब 4:16

मगर तुहेंसब आपन अहंकारी योजनाके विषयमे घमण्ड करैछैं। यी सभे घमण्ड खराब छै।

२ पत्रुस 2:1

जेरंके बहुते पहेला गलत शिक्षासब सिखाबेवाला आदमीसब इस्राएलीसिके बीचमे दिखाई देल्कै रहे, ओहिने करिके ही तोरसिके बीचमे झुट्ठा शिक्षकसब दिखाई देतौ। ऊसब झुट्ठा शिक्षासिके गुप्त रुपसे फैल्या देतौ, जे बात आदमीसिके ख्रीष्टमे विश्वास करैसे रोकी देतै। यी झुट्ठा शिक्षकसब ख्रीष्टके आपन मालिक मानैसे भी इन्कार करि देतै आर जे ओकरासिके पापके शक्तिसे छुटकारा देल्कै छे। एरंके ऊसब अपने आपके अचानक नाश करैतै।

२ पत्रुस 2:13

ओकरसिके विनाश उटा नोक्सानीके प्रतिफल छै जे ऊसब कैल्कै छे। ऊसब दिन्हैमे खराब सुख-विलासमे पडल रहना पसन्द करैछै। ऊसब तोरसिके बीचमे एकटा कलंक आर दाग छै। ऊसब धोखा दियैमे खुशी मनाबैछै, जब कि ऊसब तोरसिके प्रीति-भोजमे तोरसिके संगे खान-पिन करैछै।

२ पत्रुस 2:3

यीसब लोभी हैतै आर ऊसब बन्ल बनैल कहानीसब सुन्याके तोरासिके धोखा देतौ ताकी तोरासिसे पैसा कमाबे सकै। परमेश्वर बहुते समय पहेला ही फैसला करि लेल्कै रहे कि ऊ ओकरासिके सजाय देतै आर ऊ एरं करैके लिए तैय्यार छै। परमेश्वर जरुर ओकरासिके नाश करि देतै।

यहूदा 1:10

मगर यी आदमीसब ऊ बातसिके विरुद्ध अपमानजनक तरिकासे बोलैछै, जकरा ऊसब नैबुझैछै। आर जे बातसब ऊसब बुझैछै आर उटा कामसब स्वभाविक तरिकासे बौक जानवरसिके जुगुर करैछै ते, यीसब उटा पापमय कामसिके करैके द्वारा खुदके नाश करैछै।

यहूदा 1:16

यी आदमीसब सभे दिन परमेश्वरके विरुद्धमे बोलैछै आर दोसर आदमीसिमे गल्ती खोजैछै। ऊसब लगातार उटा खराब कामसिके करैछै जे ओकरसिके दिल करैले चाहैछै। ऊसब आपन विषयमे घमण्डसे दावा करैछै आर खुदके लिए फैदा लियैके खातिर दोसर आदमीसिके चापलुसी करैछै।

यहूदा 1:4

हमे तोरासिके लिखैछियौ कहिनेकी कुछु आदमीसब जे येशू ख्रीष्टमे विश्वास करैके दिखावा करैछै, ऊसब तोरसिके मण्डलीमे सामिल भ्या गेलौ छे। ऊसब परमेश्वरके सम्मान नैकरैछै आर ऊसब एरं कहिके गलत शिक्षा दैछै, कहिनेकी परमेश्वर आपन अनुग्रहसे आपनसिके पापसिके माफ करि दैछै, इहे ल्याके अपनासब अनैतिक जीवन जिये सकैछियै। ऊसब येशू ख्रीष्टके अस्वीकार करैछै, जे आपनसिके एक्केटा मालिक आर आपनसिके प्रभु छै। बहुते समय पहेला धरमशास्त्र कहैछै कि परमेश्वर एरं आदमीसिके सजाय देतै।

प्रकाश 18:7

तुहें ओकरा जरुर ही बहुते पिडा आर तकलीफ दिल्वैभ जे ओकर विलासी जीवन आर ओकर अपने आपके प्रति घमण्डके बराबर छै। ऊ अपने आपके कहैल्कै, ‘हमे एकटा रानीके जुगुर आदमीसिपर राज्य कर्बै। हमे एकटा मोसमात नैछियै आर हमे दुःखके अनुभव नैकर्बै।’

प्रकाश 19:20

मगर उटा जंगली जानवरके पक्डी लेल गेलै आर ओकरसंगे उटा झुट्ठा-भविष्यवक्ताके भी पक्डी लेल गेलै जे जंगली जानवरके तरफसे झुट्ठा चमत्कारसब देख्याके ऊ आदमीसिके बहकैते रहै, जे आदमीसब ऊ जंगली जानवरके छाप आपन कपारमे लेल्कै रहे आर ओकर मूर्तिके पूजा कैल्कै रहे। ऊ जंगली जानवर आर झुट्ठा-भविष्यवक्ता दोनोके गन्धकसे धधक्ते रहेवाला आगिनके कुण्डमे जिन्दे फेकि देल गेलै।

प्रकाश 21:8

मगर जे हमरापर विश्वास नैराखैछै, ओकरासिके जबरजस्ती गन्धकसे जरेवाला उटा तालाबमे फेक्ल जैतै, जे कि दोसर मौत छै। आर यी नतिजा ओकरसिके भी हैतै, जेसब आदमीसिके समनामे हमरा स्वीकार करैसे डराबैछै, खराब कामसब करैछै, जेसब हत्यारासब छै, जेसब व्यबिचार करैछै, जादु-टोना करैछै आर मूर्तिसिके पूजा करैछै या झुठ बोलैछै।”

प्रकाश 22:15

मगर ऊ आदमीसब जे दुष्ट काम करैछै, जादु-टोना करैछै, जेसब व्यबिचार करैछै, आर मूर्तिसिके पूजा करैछै या ऊसब जे झुठ बोलैछै, ऊसब कहियो भी सहरमे प्रवेश नैकरे सक्तै।