फिलिप्पी 2:7 - केवट नया कारार

⁷ मगर ऊ सभे चीज त्यागल्कै, ऊ सभे कुछु पाछु छोडी देल्कै आर दासके स्वरुप धारण कैल्कै आर ऊ आदमी बनी गेलै।

फिलिप्पी 2:7 Cross References

मत्ती 12:18

“हमर दास जकरा हमे चुन्लियै छे, हमर प्रिय जकरसे हमे बहुते खुश छियै, हमे परमेश्वरके आत्मा ओकरामे राखी देबै, आर ऊ जात-जातके आदमीसिके न्यायके प्रचार कर्तै।

मत्ती 20:28

जेरंके हमे, आदमीके बेटा खुद एकटा महान शासकके जुगुर आपन सेवा करवाबैके लिए नै ऐलियै छे, एकर बदलामे हमे दोसरसिके सेवा करैके लिए आर दोसरसिके बचाबैके लिए आपन जान दियैले ऐलियै छे।”

मर्कूस 9:12

येशू कहैल्कै, “यी सच छै कि परमेश्वर एलियाके भेजैके वादा कैल्कै रहे कि ऊ सभे कुछु सही करैले पहेला आबिजै। मगर एलिया पहलहै आबी गेलै छे आर आपनसिके अगुवासब ओकरसंगे बहुते खराब व्यवहार कैल्कै। जेरं ऊसब करैले चहते रहै, जेरं कि परमेश्वरके वक्तासब बहुते पहेला ही कहैल्कै रहे कि ऊसब एरंको कर्तै। मगर हमे, आदमीके बेटा, हमर बारेमे धरमशास्त्रमे बहुते कुछु लिख्ल छै। वचन कहैछै कि हमे बहुते दुःख सहबै आर आदमीसब हमरा अस्वीकार कर्तै।”

लूका 22:27

बडका के छै जेरं तोरासिके लागैछौ? भोजन खैले बैठेवाला कि सेवा करेवाला बडका छै? जरुर ही भोजन खैले बैठेवाला बडका छै। मगर हमे ते तोरसिके बीचमे एकटा सेवा करेवालाके जुगुर छियौ।

यूहन्ना 1:14

आर ऊ जकरा वचन कहेल जैछै एकटा आदमी बन्लै। ऊ अनुग्रह आर सच्चाईसे परिपूर्ण भ्याके आपनसिके बिच्चेमे रहलै, आर हमे ओकर महिमा देख्लियै। ओकर महिमा एरं रहै जेरं परमेश्वर पितासे ऐल एक्लौता बेटाके महिमा रहै।

रोमी 1:3

यी खुश-खबरी परमेश्वरके बेटाके विषयमे छै, आपनसिके प्रभु ख्रीष्ट। ऊ आदमी बनिके दाऊद राजाके वंशमे जनम लेल्कै।

रोमी 15:3

कहिनेकी ख्रीष्ट भी खुदके खुशी नैबनैल्कै। मगर जेरं धरमशास्त्रमे लिख्ल छै, “तोर निन्दा करेवाला आदमीसब हमर निन्दा कैल्कै छे।”

रोमी 15:8

हमे तोरासिके कहैछियौ, आपन पुर्खासिके देल प्रतिज्ञाके सच साबित करैके लिए ख्रीष्ट, परमेश्वरके सच्चाईके सबूत दियैके लिए यहूदी आदमीसिके सेवक बन्लै।

रोमी 8:3

जे काम मूसाके विधि-विधान नैकरे सकल्कै, उटा काम परमेश्वर कैल्कै, कहिनेकी आपनसिके पापी स्वभाव मूसाके विधि-विधानके कमजोर बनैल्कै रहे। ऊ आपन बेटाके पापके बलिदान हुऐके लिए आपनसिके जुगुर शरीरमे भेजल्कै। एरंके ऊ मानव शरीरमे पापके न्याय कैल्कै।

२ कोरन्थी 13:4

कहिनेकी ऊ कमजोर भ्याके क्रूसमे काँटी ठोकिके जान मार्ल गेलै, मगर परमेश्वरके शक्तिसे ऊ जिन्दा भेलै। हमेसब ओहिने कमजोर छियै जेरं ख्रीष्ट रहै। तैय्योपर भी परमेश्वरके शक्तिद्वारा हमेसब तोरसिके संगे व्यवहार करैके लिए ओकरसंगे रहबै।

२ कोरन्थी 8:9

तुहेंसब आपनसिके प्रभु येशू ख्रीष्टके अनुग्रहके जानैछैं, कि ऊ मातबर भ्याके भी तोरसिके खातिर गरिब बन्लै ताकी ओकर गरिबीसे तुहेंसब मातबर हुए सक्हैं।

गलाती 4:4

मगर जब परमेश्वरके तय कैल समय ऐलै, परमेश्वर खुद आपन बेटाके यी संसारमे भेजल्कै, आर ऊ एकटा आदमीके रुपमे जनम लेल्कै। ऊ एकटा यहूदी आदमीके रुपमे जनम लेल्कै रहे आर मूसाके विधि-विधानके अनुसरण कर्ते रहै।

फिलिप्पी 2:6

ऊ सभे किसिमसे परमेश्वरके जुगुर भ्याके भी परमेश्वरके बराबर हुएवाला बातके एकटा पक्डीके राखेवाला चीज जेरं नैसोचल्कै,

हिब्रू 12:2

या अपनासब आदमीसिके विश्वासके शुरु करेवाला आर सिद्ध करेवाला येशूके विषयमे निरन्तर सोच्ते रहियै। ऊ आनन्दके लिए जे ओकर समनामे भविष्यमे राख्ल रहै, ऊ अपमानके कोनो चिन्ता नैकरिके क्रूसके दुःख सहैल्कै आर एरंके ऊ मरि गेलै आर आब ऊ परमेश्वरके दहिना हातके बगलमे सम्मानके जगहमे बैठ्लै।

हिब्रू 13:3

जेलमे पड्ल आदमीसिके प्रति तोरसिके व्यवहार एरं हौ मान कि तुहेंसब खुद ओकरसिके संगे जेलमे छैं। आर जे आदमीसब सतैल जैछै ओकरासिके एरंके खियाल राख जेरं कि तुहेंसब ओकरसिके दरदके आपन शरीरमे महसुस करैछैं।

हिब्रू 4:15

कहिनेकी यी प्रधान पुजारी, जे येशू ख्रीष्ट छै, आपनसिके हरेक कमजोरीके बुझैछै। येशू आपनसिके जुगुर सभे प्रकारके परीक्षाके सामना कैल्कै, मगर ऊ कोनो भी पाप नैकैल्कै।