फिलिप्पी 2:22 - केवट नया कारार

²² मगर तोरासिके मालुम छौ कि केरंके तिमोथी अपने आपके विश्वासयोग्य देखैल्कै छे। जेरंके बेटा बाबुके सेवा करैछै ओहिने करिके ऊ हमरसंगे खुश-खबरी फैलाबैमे हमरसंगे मेहनत कैल्कै छे।

फिलिप्पी 2:22 Cross References

चुन्ल आर भेज्ल चेलासब 16:2

लुस्त्रा सहर आर आइकोनियन सहरमे रहेवाला विश्वासी भ्या-बहिनसिके नजरीमे तिमोथीके बहुते इज्जत रहै।

रोमी 5:4

परमेश्वर अपनासिके स्वीकार करैछै कहिनेकी अपनासब धीरज राखैले सिख्लियै छे, ऊ अपनासिके स्वीकार करैके कारणसे अपनासिके आशा छै।

१ कोरन्थी 16:10

यदि तिमोथी तोरसिकेलगत कोरन्थी सहरमे ऐतौ ते, तोरसिके बीचमे ओकर स्वागत करिहैं, कहिनेकी ऊ हमरे जुगुर प्रभुके काम करैछै।

१ कोरन्थी 4:17

सेल्याके हमे तोरसिकेलगत तिमोथीके भेजैछियौ। ऊ प्रभुमे हमर प्यारा आर विश्वासयोग्य बेटा छै। आर ऊ तोरासिके यी बात फेर याद दिलैतौ कि हमे येशू ख्रीष्टके अनुयायीके रुपमे केरं व्यवहार करैछियै, जेरंके हमे जते भी जैछियै ओत्करो मण्डलीमे सिखाबैछियै।

२ कोरन्थी 2:9

कहिनेकी हमे इहे ल्याके भी यी चिट्ठी लिख्लियौ रहे कि तोरासिके जाँचे सकियौ कि तुहेंसब हमर निर्देशनके पालन करैके लिए तैय्यार छैं कि नैछैं।

२ कोरन्थी 8:22

आर हमेसब एकरसिके संगे एकटा आरहौ विश्वासी भ्याके भेजैछियौ, जकरा हमेसब बहुतेबेर जाँचिके बहुते बातमे उत्साही पैलियै छे, मगर आब तोरासिपर ओकरा बहुते भरोसा छै, इहे ल्याके ऊ आरहौ भी बेसी उत्साही भेल छै।

२ कोरन्थी 8:24

इहे ल्याके ओकरासिके तोरसिके प्रेम देखा आर तोरसिके विषयमे कैल हमरसिके गर्व सही छै कहिके मण्डलीसिके सभे विश्वासीसिके सबूत दहैं।

२ कोरन्थी 8:8

हमे यी बात आज्ञाके रुपसे ते नैकहैछियौ, मगर एकरा दोसर आदमीसिके उत्सुकतासे तुलना करिके तोरसिके प्रेमके सच्चाईके जाँचैके लिए कहैछियौ।

फिलिप्पी 1:12

हे विश्वासी भ्या-बहिनसब, तोरासिके यी बात मालुम हौ कहिके हमे चाहैछियै, कि हमर उप्परमे ऐल बातसिसे वास्तवमे खुश-खबरीके फैलाबैले आरहौ सहायता मिल्लै छे।

फिलिप्पी 1:16

बढियाँ विचारसे प्रचार करेवाला आदमीसब प्रेमके कारणसे यी करैछै कहिनेकी ओकरासिके मालुम छै कि हमरा ख्रीष्टके बारेमे खुश-खबरीके रक्षा करैके कारण जेलमे कैद कैल्कै छे।

फिलिप्पी 1:7

तोरसिके सभैके लिए एरं सोचना हमर लिए सही छै, कहिनेकी तोरसिके लिए हमर मनमे विशेष जगह छै। चाहे हमे कैदमे छियै या खुश-खबरीके सच्चाईके साबित आर रक्षा करैछियै, हरेक समयमे तुहेंसब परमेश्वरके अनुग्रहमे हमरसंगे सामिल भेल छैं।

फिलिप्पी 2:20

कहिनेकी हमरलगत तिमोथीके जुगुर स्वभावके दोसर कोय नैछै, जे शुद्ध मनसे तोरसिके चिन्ता करै।

१ तिमोथी 1:18

तिमोथी तुहें जे हमर बेटाके जुगुर छैं, हमर देल आदेशसब यी छै: हमे तोरासे बिन्ती करैछियौ कि परमेश्वरके वक्तासब पहेला तोर विषयमे कहेल बात याद कर। ऊ झुट्ठा शिक्षकसिके विरुद्धमे खुश-खबरीके सच्चाईके लिए बढियाँसे लडैके लिए उटा शब्दसब प्रयोग कर।

१ तिमोथी 1:2

हमे यी चिट्ठी तिमोथीके लिखैछियै। तुहें हमर आपने बेटाके जुगुर छैं कहिनेकी तुहें भी ख्रीष्टमे भरोसा राखैछैं। हमे प्रार्थना करैछियै कि परमेश्वर पिता आर आपनसिके प्रभु येशू ख्रीष्ट तोरासिके अनुग्रह, कृपा आर शान्ति दौ।

१ तिमोथी 4:6

यदि तुहें विश्वासी भ्या-बहिनसिके हमर सिखैल बातसिके निरन्तर सिखैभैं, जकर बारेमे हमे तोरा एखन निर्देशन देलियौ छे आर तुहें विश्वासके सन्देशद्वारा मजगुत कैल गेल्हैं छे आर बढियाँ शिक्षाके अनुसरण कैल्हैं छे ते, तुहें येशू ख्रीष्टके एकटा बढियाँ सेवक हैभैं।

२ तिमोथी 1:2

तिमोथी, हमे यी चिट्ठी तोरा लिखैछियौ, आर तुहें हमर लिए एकटा प्यारा बेटाके जुगुर छैं। हमे प्रार्थना करैछियै कि परमेश्वर पिता आर आपनसिके प्रभु येशू ख्रीष्ट तोरा अनुग्रह, कृपा आर शान्ति दौ।

२ तिमोथी 3:10

मगर तिमोथी, तोरा बढियाँसे मालुम छौ कि हमे कि सिखाबैछियै आर केरंके जियैछियै, हमर जीवनके मकसद कि छै आर हमे कि विश्वास करैछियै। तोरा मालुम छौ कि हमे धीरज धारण करैछियै आर सभे प्रकारके आदमीसिके प्रेम करैछियै, हमे कठिनाईसब सहलियै छे।

तीतस 1:4

तीतस तुहें जे हमर आपने बेटाके जुगुर छैं कहिनेकी तुहें भी ख्रीष्टमे भरोसा राखैछैं। हमे प्रार्थना करैछियै कि परमेश्वर पिता आर आपनसिके उद्धारकर्ता येशू ख्रीष्ट तोरासिके अनुग्रह आर शान्ति दौ।