फिलिप्पी 1:6 - केवट नया कारार

⁶ हमरा यी पक्का विश्वास छै कि परमेश्वर तोरासिमे कुछु बढियाँ करैले शुरु कैल्कौ छे, परमेश्वर ही यी काम उटा दिनमे पुरा कर्तौ जब येशू ख्रीष्ट वापस ऐतौ।

फिलिप्पी 1:6 Cross References

यूहन्ना 6:29

येशू ओकरासिके जबाब देल्कै, “परमेश्वरके काम यी छै कि तुहेंसब हमरापर विश्वास कर जकरा ऊ भेजल्कै छे।”

चुन्ल आर भेज्ल चेलासब 11:18

यी बात सुन्लके बाद यहूदी विश्वासीसब चुप भेलै, आर एरं कहते परमेश्वरके महिमा कैल्कै, “आब ते परमेश्वर गैर-यहूदी आदमीसिके भी कहियो खतम नैहुएवाला जीवनके लिए पाप करैले छोडिके परमेश्वरके तरफ मन लगाबैके मौका देल्कै छे।”

चुन्ल आर भेज्ल चेलासब 16:14

हमरसिके बात सुनेवालासिमेसे लिडिया नामके एकटा जनानी रहै। ऊ थिआटिरा सहरके निवासी रहै आर बैगनी रंगके कपडाके व्यापार कर्ते रहै। ऊ परमेश्वरके भक्ति करेवाला एकटा भक्त जनानी रहै। पावलके कहेल बात ध्यानसे सुनै कहिके प्रभु ओकर मन खोली देल्कै।

१ कोरन्थी 1:8

आपनसिके प्रभु येशू ख्रीष्टके यी संसारमे वापस आबैके दिनमे तोरासिके दोषरहित राखैले परमेश्वर तोरासिके अन्ततक विश्वासमे मजगुत राख्तौ।

२ कोरन्थी 1:15

हमरा यी बातके निश्चय रहै कि सभैसे पहेला तोरसिके भेट करैके हमरसिके योजना तुहेंसब बुझ्लहैं। आर एरंके हमे दी बेर तोरसिके भेट करिके तोरासिके दुगन्ना आशिष दियैले चहते रहियै।

२ कोरन्थी 2:3

हमे उटा चिट्ठी इहे ल्याके लिख्लियौ रहे, हमर ऐलके बाद कहुँ एरं नै भ्याजै कि जे आदमीसिसे हमरा आनन्द मिलना चाही से आदमीसब हमरा दुःखित बनाबै। कहिनेकी हमर आनन्द तोरसिके सभैके आनन्द हैछै कहिके हमरा तोरसिके सभैके बारेमे भरोसा रहै।

२ कोरन्थी 7:16

हमे आनन्दित छियै कि हमे तोरासिपर पुरा भरोसा राखे सकैछियै।

२ कोरन्थी 9:4

एरं नैहै कि जब माकेडोनिया प्रदेशसे कुछु विश्वासीसब हमरसिके संगे आबै आर तोरसिके धन तैय्यार नैहौ ते कि पता हमेसब तोरसिके उप्पर आपन भरोसाके कारण शर्मिन्दा हैबै, मगर तुहेंसब आरहौ भी बेसी शर्मिन्दा हैभैं कहिनेकी हमेसब तोरासिपर बडका भरोसा राख्लियौ रहे।

गलाती 5:10

हमे परमेश्वरपर भरोसा राखैछियै कि ऊ तोरासिके झुट्ठा शिक्षासिपर विश्वास करैसे बच्याके राख्तौ। मगर तोरसिके लिए परेशानी खडा करेवाला सभे आदमीसब परमेश्वरके द्वारा सजाय पैतै।

एफिसी 4:12

ओकरसिके जिम्मेदारी यी छै कि ऊसब विश्वासीसिके परमेश्वरके काम करैके लिए तैय्यार करै आर ख्रीष्टके शरीर यानिकी मण्डलीके निर्माण करै।

फिलिप्पी 1:10

ताकी तुहेंसब चुने सक्हैं, कि करना सही छै, आर जब ख्रीष्ट वापस ऐतै ते तुहेंसब शुद्ध आर निर्दोष रहे सक्हैं।

फिलिप्पी 1:29

कहिनेकी परमेश्वर तोरासिके खाली ख्रीष्टमे विश्वास करैके ही नै मगर ओकरामे विश्वास करैके कारणसे दुःख भोगैके अवसर भी देल्कौ छे।

फिलिप्पी 2:12

सेल्याके हे हमर प्रिय विश्वासी भ्या-बहिनसब, जब हमे तोरसिके संगे रहियौ तब तुहेंसब सभे दिन आज्ञापालन कैल्हैं। एखन हमे तोरसिसे दूर छियौ, तोरासिके आरहौ बेसी आज्ञापालन करना चाही। तोरासिमेसे हरेक आदमी डरके साथ आर कम्पनके साथ ऊ चीजसब कर जे काम परमेश्वरद्वारा उद्धार पैल आदमीसिके लिए सही छै।

फिलिप्पी 2:13

कहिनेकी परमेश्वर तोरासिमे काम करैछौ, तोरासिके उटा काम करैके इच्छा आर शक्ति दैछौ जे काम ओकरा खुश करैछै।

फिलिप्पी 2:16

ताकी जब ख्रीष्ट वापस ऐतै तब हमरा गर्व करैके कारण है कि हमर प्रयास आर कठिन मेहनत करना बेकार नैभेलै।

कलस्सी 2:12

जब तुहेंसब बप्तिस्मा लेल्हैं, तुहेंसब ख्रीष्टके जुगुर गाड्ल गेल्हैं, आर ख्रीष्टके जुगुर मुर्दासे जिन्दा करैल गेल्हैं। यी इहे ल्याके भेलै कि तुहेंसब यी बातमे विश्वास कैल्हैं कि परमेश्वर, आपन शक्तिद्वारा, ख्रीष्टके मुर्दासे जिन्दा बनैल्कै।

१ थेसलोनिकी 1:3

आर जब हमेसब आपनसिके परमेश्वर पितासे प्रार्थना करैछियै, विश्वासके खातिर तोरसिके कैल कामसब, विश्वासीसिके प्रेम देखाबैके लिए कैल तोरसिके कडा मेहनत आर प्रभु येशू ख्रीष्टके दोसर आगमनके आशामे तोरसिके भोग्ल सतावटके हमेसब निरन्तर याद करैछियौ।

२ थेसलोनिकी 1:11

सेल्याके हमेसब तोरसिके सभैके लिए लगातार प्रार्थना भी करैछियै कि हमरसिके परमेश्वर तोरासिके उटा काम करैके लिए काबिल बनैतौ जे कामके लिए ऊ तोरासिके बोलैल्कौ छे। आर ऊ आपन शक्तिसे तोरसिके सभे बढियाँ मकसदसिके पुरा करौ आर सभे उटा कामके ऊ सफल बनाबौ जे तोरसिके विश्वासके फल छै।

२ थेसलोनिकी 3:4

आर हमरासिके प्रभुमे तोरासिपर भरोसा छै कि हमेसब तोरासिके जे कुछु करैले कहैलियौ छे, तुहेंसब ओहिने करैछैं आर कर्ते रहभैं।

फिलेमोन 1:21

यी चिट्ठी हमे तोरा लिख्लियौ छे, कहिनेकी हमे विश्वास करैछियै कि हमे जे तोरा करैले कहैलियौ छे ऊ तुहें कर्भैं। वास्तवमे, हमरा मालुम छै कि हमर कहेल से भी बेसी तुहें कर्भैं।

हिब्रू 10:35

सेल्याके आपन विश्वासके नैछोड ताकी तोरासिके परमेश्वरके तरफसे एकटा इनाम मिलौ।

हिब्रू 12:2

या अपनासब आदमीसिके विश्वासके शुरु करेवाला आर सिद्ध करेवाला येशूके विषयमे निरन्तर सोच्ते रहियै। ऊ आनन्दके लिए जे ओकर समनामे भविष्यमे राख्ल रहै, ऊ अपमानके कोनो चिन्ता नैकरिके क्रूसके दुःख सहैल्कै आर एरंके ऊ मरि गेलै आर आब ऊ परमेश्वरके दहिना हातके बगलमे सम्मानके जगहमे बैठ्लै।

१ पत्रुस 5:10

परमेश्वर जे पूर्ण रुपसे अनुग्रहकारी छै, आपनसिके ख्रीष्टके संगे भेल सम्बन्ध हुऐके कारण आपन अनन्त महिमामे अपनासिके साझेदार हुऐके लिए बोलैल्कै छे। तुहेंसब कुछु समयके लिए कष्ट भोग्लके बाद परमेश्वर तोरासिके बढियाँ बनैतौ ताकी तोरासिमे कोनो दोष नैरहौ आर येशू तोरसिके हृदयके मजगुत बनैतौ आर ओकरापर तोरसिके भरोसाके वास्तवमे स्थिर बन्या देतौ।

२ पत्रुस 3:10

मगर ख्रीष्ट जरुर फेर वापस ऐतै। ऊ अचानक फेर वापस आबी जैतै, जेरंके रातके समयमे कोनो चोर अचानक ही आबी जैछै। उटा समय आकाशमे गर्जनके आवाज हैतै आर आकाश अलप भ्याजैतै। आकाशमे सभे कुछु यानिकी सुरुज, चान आर तारा पुरा तरहसे जरि जैतै। उटा दिन परमेश्वर उटा सभे कामसिके प्रकट करि देतै जे काम आदमीसब कैल्कै छे ताकी ऊ ओकरसिके न्याय करे सकै।