फिलिप्‍पी 1:1 - पुना गच्छरना NT (BSI)

¹ मसी येसुसी जॊंख़म पौलुस अरा तीमोथियुस फिलिप्‍पी नगरे नू मसी येसुसी र'अना उर्मी नेम्‍हा आलर‍ गे अरा आर ही गने कलीसिया ही ईरु-ख़ूजू मुद्धर गे अरा कलीसिया ही ईरू-ख़ूजुर गे ई चिठिन लिखदम।

फिलिप्‍पी 1:1 Cross References

मरकुस 13:34

ई उदाहरन आबोन मेना। ओन्‍टा आलस रहचस। आस उन्‍दुल डहरे ईक्‍कियस। आस एड़पा ती काना ती मुन्‍द तंग्‍है जॊंख़र सिरे एड़पा ही उर्मी नलख अम्‍बियस चिच्‍चस। तहाँ आस बली ख़ा‍पुसिन जॊहचका र'आ गे आनियस।

यॊहनस 12:26

नॆ एंगन सुस्र'आ बेद्ददस आस एंग्‍है गने चॊंख़्रदस नेकअन, अरा एसन ऎन र'ओन असन एंग्‍है जॊंख़स हूँ र'ओस। नॆ एंगन सुस्र'अदस, आसिन एम्‍बस मईन ननोस।

त‍इरकर 1:20

ईद गा दाऊदसी डंडी पुथी नू एन्ने लिख्रकी र'ई, ‘आसी र'अना अड्डा धंस्र'ओ क'ओ नेकअन, अरा अइय्या नॆ हूँ मल ओक्र'ओर नेकअन।’ अरा ‘आसी पद आबोन नन्नस इंझ्र'ओस नेकअन।’

त‍इरकर 20:28

औंगे निम्‍है पत्त नू अरा धर्मेस तंग्‍है ख़द्दासी ख़ॆंस ती ख़ीन्‍दका तंग्‍है कलीसियन ख़ापा गे नेम्‍हा बॊलतस निमन ईरू-ख़ूजू उइय्का उर्मी खोंड़हा ही पत्त नू चिहुंक र'अके।

त‍इरकर 9:13

लिकिन हनानियास आनाकिर्ताचस, “उर्बायो! ऎन कैनो बग्‍गे आलर ती मेंजकादन का ईस येरुसलॆम नू निंग्‍है नेम्‍हा आलारिन नगदे डाहचकाचस।

रोमी 1:1

ऎन म‍सी येसुसी जॊंख़न पौलुस धर्मेसी त‍इरका मना गे मॆख़रका र'अदन। अरा आसी दौ कत्‍थन तेंगा कुद्दा गे चजरका र'अदन।

रोमी 1:7

ऎन रोम नगरे नू र'ऊ निमा ओर्मर गे ई चिठिन लिखदन। धर्मेस निमन चोन्‍हा नन्‍दस अरा आसी आलर मना गे चज्जिका र'अदस। नम्‍है धर्मे बंगस अरा उर्बस येसु मसीस ती निमा मया अरा कोड़े ख़क्ख्रअन नेकअन।

1 कोरिन्‍थ 16:10

तीमोथियुस निम्‍है गुसन बर'ओस होले, आस निम्‍है मझी नू र'ओ बारी बिगर एल्‍चका ती र'आ गे तिहा ननके। एन्‍देरगेका आस एंग्‍है लेक्‍खम उर्बासी नलख नन्‍दस।

2 कोरिन्‍थ 1:1

धर्मेसी मने ती मसी येसुसी त‍इरकन पौलुस, अरा नम्‍है भइय्योस तीमोथियुस, कोरिन्‍थ नगरे ता धर्मेसी कलीसिया गे अरा सौंसे अख़ाया चक नू र'ऊ ओर्मा नेम्‍हा आलर गे लिखना चिठी ईद हवे।

गलातिया 1:10

अक्‍कु ऎन नॆख'आ सोग्‍गे ख़क्‍खा बेद्ददन आलर ही मलता धर्मेसी? महले ऎन आलारिन रिझाब'आ बेद्ददन का? ऎन आलारिन रिझाब'आ बेद्दना होले, मसीसी जॊंख़ मल र'ओन दने।

गलातिया 3:26

अरा नीम ओर्मर गा मसी येसुस म‍इय्याँ ता पत्त'अना ती धर्मेसी ख़द्दर मंजकादर।

गलातिया 3:28

अक्‍कु नॆ हूँ यहूदी मला महले नन-यहूदी मला, बिट्ठी ननू जॊंख़ मला महले छछेम मला, नॆ हूँ मॆत मला महले मुक्‍का मला। अक्‍कु नीम ओर्मर मसी येसुस नू ओन्‍टा मंजकर केरकर।

इफेसुस 1:1

धर्मेसी मने ती मसी येसुसी तइरकन पौलुस [इफेसुस नगरे ता] मसी येसुसिन पत्त'ऊ नेम्‍हा आलर गे ई चिठिन लिखदन।

इफेसुस 1:15

ई चड्डेम उर्बा येसुस नू निम्‍है पत्त'अना अरा उर्मी नेम्हा आलर मइय्याँ ता निम्है चोन्‍हा ही पत्त नू ऎन मेंजकन ती

इफेसुस 6:24

नॆ नम्‍है उर्बस येसु मसीसिन मल मुंज्रना चोन्‍हा ती चोन्हा नन्नर, आर ओर्मर मइय्याँ धर्मेसी मया मनन नेकअन।

फिलिप्‍पी 2:19

चाँड़हेम ऎन निम्‍है गुसन तीमोथियुसिन तइय्योन एन्ने उर्बा येसुस नू असरा नन्दन। होले ऎन आस ती निम्‍है हलन मेनोन ती रिझ्र'ओन।

फिलिप्‍पी 2:5

मसी येसुस नू रहचका सोचना लेक्खा दिम निम्है नू हूँ र'अना र'ई।

फिलिप्‍पी 3:12

इबड़ा उर्मिन ऎन ख़क्‍खा ख़च्चकादन, महले पखड़ मंज ख़च्चकादन एन्ने मल सोचरकी, मसी येसुस ती ऎन एन्देरगे चजरकादन अदिन पूरा नना गेम ऎन कोड़हे चिहुट नन्तेम र'अदन।

फिलिप्‍पी 3:3

एन्‍देरगेका मॆद ही पत्त ता कत्था गुट्ठी नू असरा मल उइय्यदत ती, अरा धर्मेसी बॊलतासी संगरा ती महबा नन्दत ती, अरा मसी येसुस नू फुलई मनू नाम दिम मानिम नू खतना मंजका आलर हिकदत।

फिलिप्‍पी 3:8

ईद लेका मला, ऎन एंग्‍है उर्बस मसी येसुसिन अख़ना लूर ही कोड़हे बॆस गने अबड़न जोक्ख'ओन ख़ने, उर्मी कत्‍था गुट्ठिन अनभनियाँ अक्‍कन। अरा आसी चड्डे अबड़ा उर्मी आलॊ गुट्ठिन फोकोरकन, अरा ऎन मसीसी मना गे अबड़न खतू सोचदन।

1 थेस्‍सलोनिकॆयर 1:1

ई चिठी ऎन पौलुस अरा सीलास अरा तीमोथियुस तरती थेस्‍सलोनिकॆ नगरे ता कलीसिया गे र'ई। धर्मे बंगस अरा उर्बस येसु मसीस नू निमा मया अरा कोड़े मनन नेक‍अन।

1 थेस्‍सलोनिकॆयर 2:2

लिकिन नीम अख़दर का मुन्‍द फिलिप्‍पी नगरे नू सस्‍ती सारना पीख़्रना नू हूँ एम्‍है धर्मेस एमा गे एन्ने डिढ चिच्‍चस का ऎम बिगर अटकरका धर्मेसी दौ कत्‍थन तिंकम।

2 थेस्‍सलोनिकॆयर 1:1

ई चिठी ऎन पौलुस अरा सीलास‍ अरा तीमोथियुस तरती नम्है धर्मे बंगस अरा उर्बस येसु मसीस नू र'ऊ थेस्‍सलोनीकॆ कलीसिया गे र'ई।

2 थेस्‍सलोनिकॆयर 1:10

आसी महबा तंग्‍है नेम्‍हा आलर नू ऎथ्र'ओ अरा तंगन पत्ताचका आलर ती हैकट मनोस, आसी बरना उल्‍ला ईद मनो। नीम हूँ आर ही गने मेस्र'ओर, एन्‍देरगेका ऎम निमन गोवाह चिच्‍कम अदिन पत्ताचकर।

1 तीमोथियुस 1:2

पत्त'अना नू एंग्‍है मानिम ख़द्दस तीमोथियुस गे इदिन लिखदन। धर्मे बंगस, अरा नम्‍है उर्बा मसी येसुस तरती निंगा मया अरा सोग्‍गे अरा कोड़े ख़क्‍खर‍'अन नेक‍अन।

1 तीमोथियुस 3:8

एन्नेम कलीसिया ही ईरू-ख़ूजुर हूँ म‍ईन ही जॊगे र'अना र'ई। अरा आर उंखुर अरा आलारिन ठगना ती अर्ज‍'उर अम्‍बोर र'आ।

तीतुस 1:1

ऎन पौलुस धर्मेसी जॊंख़न अरा येसु मसीसी त‍इरकन। ऎन धर्मेसी चज्जिका आलर गे पत्त'अना ही अरा मानिम लूर अरा महबा डहरे नू कड़हाब'अना कत्‍था ही पत्त नू तेंगा गे, ई नलख नू एंगन सोंपचकादन।

तीतुस 1:7

कलीसिया ही ईरु-ख़ूजू मुद्धस गा ओक्‍कना इजना नू बिगर बदी ही अरा हुड्ड मला, अरा लॆम गोसा मनू मला, अरा उंखू मला अरा पस‍'ऊ कूड़ू मला अरा मलदौ ती अर्ज‍'ऊ मल र'अना र'ई।

फिलॆमॊन 1:1

मसी येसुसी पत्त ता दौ कत्था तेंगना ही चड्डे जेहेल नू हॆंरका पौलुस ऎन, अरा नम्है भईस तीमोथियुस ई चिठिन नम्है दुलार अरा नम्है गने सुसर नलख नू र'ऊ फिलॆमॊनस गे लिखदम।

इब्रानी 13:23

नीम इदन अख़'आ हो'आ का नम्‍है भ‍ई तीमोथियुस जेहेल ती अमब्रकादस। आस चाड़हे अंड़सोस होले, आसी गने निम्‍है गुसन भेंट मना गे बर'ओन।

याकॊब 1:1

धर्मेस अरा उर्बस येसु मसीसी जॊंख़न ऎन याकॊब, तम्है राजी ती बहरी बींड़रका इस्राऎल आलर ही बारा गोतोर ता पत्त'ऊ आलर निमा गे मोंजरा नन्दन ती ई चिठिन लिखदन।

1 पतरस 2:25

मानिम नू मुन्द नीम बेहड़ारका भेंडो लेक्‍खा रहचकर, लिकिन अक्‍कु निम्‍‍है जिया गुट्ठी ही ख़ापुस अरा ईरु-ख़ूजुस मसीस गुसन किर्रका बरचका र'अदर।

2 पतरस 1:1

ऎन येसु मसीसी जॊंख़न अरा तइरकन सिमॊन पतरस नम्है धर्मेस अरा नाड़ुस येसु मसीसी सोग्गे अरा नेंवई ती एम्है पत्त'अना ही लेक्खा कोड़हे मूली ही पत्त'अनन ख़क्खका निमा ओर्मर गे ई चिठिन लिखदन।

यहूदा 1:1

येसु मसीसी जॊंख़ अरा याकॊबसी भईस ऎन यहूदा, धर्मे बंगासी दुलार अरा येसु मसीसी ख़ापना नू र'ऊ धर्मेस ती मॆख़्रका आलर गे ई चिठिन लिखदन।

दहदर मंजका कत्‍था 1:1

ईद येसु मसीसी चिच्का दहदर हवे। चाँड़हेम मन्ना कत्था गुट्ठिन तंग्है जॊंख़र गे ऎद'आ गे धर्मेस ई दहदर आबोन येसु मसीस गे चिच्चस। येसुस तंग्है पैकासिन तइय्यस ती तंग्है जॊंख़स यॊहनस गे इदन अख़ताचस।

दहदर मंजका कत्‍था 1:20

एका सतियो बीनको गुट्ठिन एंग्‍है तीना ख़ेक्खा नू नीन ईरकय, अरा अबड़ा सतियो सोना ही बिल्‍ली पटनी गुट्ठी ही गम एन्ने र'ई। सात गोट बीनको सात कलीसिया ही पैकर हवे, अरा सात गोट बिल्‍ली पटनी सात कलीसिया हवे।

दहदर मंजका कत्‍था 19:10

इदन मेंजकन ख़ने, ऎन आसिन ऒड़ लग्गा गे आसी ख़ेडमूली खत्रकन। ख़ने आस एंगन बाचस, “ऎरा, एन्ने अमा नना, ऎन हूँ निंग्‍है गने अरा येसुसी पत्त नू गोवाह चि'ऊ निंग्‍है भईर गने संगे जॊंख़न हिकदन। औंगे धर्मेसिन दिम ऒड़ लग्गा। एन्‍देरगेका नॆ येसुसी पत्त नू नन्नर गे तेंगनर, आर मानिम नू धर्मेसी बॊलतस आर गे चिच्का कत्था गुट्ठिन दिम तेंगनर।”

दहदर मंजका कत्‍था 2:12

पेरगमोन नगरे ता कलीसिया ही पैकस गे नीन एन्‍ने लिख'आ का: नॆख'आ गुसन अखी-पखी धारे तलवार र'ई, आस इबड़ा कत्थन ब'अदस।

दहदर मंजका कत्‍था 2:8

स्मुरना नगरे ता कलीसिया ही पैकस गे नीन एन्ने लिख'आ का: नॆ मुन्द ता अरा ख़ॊख़ा ता र'अदस, अरा नॆ केच्‍चस केरस, लिकिन उज्‍जा चॊचस, आस इबड़ा कत्थन ब'अदस का:

दहदर मंजका कत्‍था 22:9

ख़ने आस एंगन बाचस, “ऎरा, एन्ने अमा नना, ऎन हूँ निंग्‍है गने अरा येसुसी पत्त नू गोवाह चि'ऊ निंग्‍है भईर गने अरा धर्मेसी कत्था तिंगुर गने अरा ई पुथी ता कत्था गुट्ठिन मन'उर गने संगे जॊंख़न हिकदन। औंगे धर्मेसिन दिम ऒड़ लग्गा।”