ಫಿಲಿಪ್ಪಿ 2:6 - ಕೊಡವ ಬೈಬಲ್

⁶ ಅಂವೊ ದೇವನಾಯಿತ್ ಇಂಜತೇಂಗಿಯು, ಅಂವೊ ದೇವಡ ಕೂಡೆ ಸಮವಾಯಿತ್ ಇರಂಡೂಂದ್ ಅದ್‍ನ ಪುಡ್‌ಚಂಡೇ ಇಂಜಿತ್‌ಲ್ಲೆ.

ಫಿಲಿಪ್ಪಿ 2:6 Cross References

ಮತ್ತಾಯ 1:23

ಆ ತಕ್ಕ್ ಎಂತ ಎಣ್ಣ್‌ಚೇಂಗಿ: ನೋಟ್, ಒರ್ ಕನ್ನಿ ಮೂಡಿ ಕೆಲಕರ್ತಿಯಾಯಿತ್ ಒರ್ ಮೋಂವೊನ ಪೆರ್‌ವ; ಅಂವೊಂಗ್ ಇಮ್ಮಾನುವೇಲ್ ಎಣ್ಣುವ ಪೆದ ಇಡಂಡು. ಇಮ್ಮಾನುವೇಲ್ ಎಣ್ಣ್‌ಚೇಂಗಿ: ದೇವ ನಂಗಡ ಕೂಡೆ ಉಂಡ್‍ೕಂದ್ ಅರ್ಥ.

ಯೋಹಾನ 1:18

ದಾರೂ ದೇವನ ಒರ್‌ಕಾಲು ಕಂಡಿತ್‌ಲ್ಲೆ, ಅಪ್ಪಂಡ ಎದೇಲ್ ಉಳ್ಳ ದೇವಡ ಪ್ರೀತಿರ ಒರೇ ಮೋಂವೊ ಮಾತ್ರ ನಂಗಕ್ ಅಂವೊನ ಗೊತ್ತ್ ಮಾಡಿ ಕೊಡ್‍ತತ್.

ಯೋಹಾನ 10:30

ನಾನು ನಾಡ ಅಪ್ಪನು ಒಂದ್‍ೕಂದ್ ಅಯಿಂಗಕ್ ಎಣ್ಣ್‌ಚಿ.

ಯೋಹಾನ 10:33

ಅಂವೊಂಗ್ ಯೆಹೂದ್ಯಂಗ: ನೀನ್ ಮಾಡ್‍ನ ನಲ್ಲ ಕಾರ್ಯತ್‍ನ ಕಂಡಿತ್ ನಂಗ ನೀಕ್ ಕಲ್ಲ್ ಕನಿಪಕ್ ನೋಟಿಯಂಡ್ ಇಲ್ಲೆ, ನೀನ್ ಮನುಷ್ಯನಾಯಿತ್ ಉಳ್ಳಿಯ, ಆಚೇಂಗಿ ನೀನ್ ನಿನ್ನ ದೇವಾಂದ್ ಎಣ್ಣಿಯಂಡ್ ಮಾಡಿಯಂಡ್ ಉಳ್ಳಿಯ. ಇನ್ನನೆ ದೇವ ದೂಷಣೆ ಪರ್ಂದಂಡ್ ಉಳ್ಳಗುಂಡ್ ನೀಡ ಮೇಲೆ ಕಲ್ಲ್ ಕನಿಪಕ್ ನೋಟಿಯಂಡುಂಡ್‍ೕಂದ್ ಎಣ್ಣ್‌ಚಿ.

ಯೋಹಾನ 10:38

ನಾನ್ ನಾಡ ಅಪ್ಪಂಡ ಕ್ರಿಯೇನ ಮಾಡ್‍ಚೇಂಗಿ, ನಿಂಗ ನನ್ನ ನಂಬತ ಇಂಜತೇಂಗಿಯು, ನಾನ್ ಅದ್‍ನ ಮಾಡ್‌ವಿ. ನಾನ್ ನಾಡ ಅಪ್ಪಂಡ ಕೂಡೆ, ನಾಡ ಅಪ್ಪ ನಾಡ ಕೂಡೆ ಉಂಡ್‍ೕಂದ್ ಸಾಕ್ಷಿಯಾಯಿತ್ ನಾನ್ ಮಾಡ್‌ವ ಅದ್ಬುತ ಕಾರ್ಯತ್‍ನ ನೋಟಿತ್ ಅದ್‍ನ ನಂಬುವಿರಾಂದ್ ಎಣ್ಣ್‌ಚಿ.

ಯೋಹಾನ 14:28

ನಾನ್ ನಿಂಗಳ ಬುಟ್ಟಿತ್ ಪೋಪಿ ಆಚೇಂಗಿ ನಾನ್ ನಿಂಗಡ ಪಕ್ಕ ಪುನಃ ಬಪ್ಪೀಂದ್ ನಾನ್ ಎಣ್ಣ್‌ನದ್‍ನ ಕ್‍ೕಟಿರಲ್ಲ. ನಿಂಗ ನನ್ನ ಪ್ರೀತಿಚಿಟ್ಟತೇಂಗಿ, ನಾನ್ ಅಪ್ಪಂಡ ಪಕ್ಕ ಪೋಪೀಂದ್ ಎಣ್ಣ್‌ನ ವಿಷಯಕ್ ಕುಶಿ ಪಡುವಿರ, ಎನ್ನಂಗೆಣ್ಣ್‌ಚೇಂಗಿ ಅಪ್ಪ ನಾಕಿಂಜ ಬಲ್ಯಂವೊನಾಯಿತುಂಡ್.

ಯೋಹಾನ 14:9

ಅದ್ಂಗ್ ಯೇಸು: ಫಿಲಿಪ್ಪನೇ, ನಾನ್ ಇಚ್ಚಕ್ ಕಾಲ ನಿಂಗಡ ಕೂಡೆ ಇಂಜಿಯೆ, ಅಂತು ನಿಂಗಕ್ ನನ್ನ ಗೊತ್ತ್‌ಲ್ಲೆಯಾ? ನನ್ನ ಕಂಡಂವೊ ನಾಡ ಅಪ್ಪನ ಸಹ ಕಂಡಿತುಂಡ್; ಅನ್ನನೆ ಇಪ್ಪಕ, ಅಪ್ಪನ ಕಾಟಿತಾಂದ್ ನಿಂಗ ಎಣ್ಣ್‌ವದ್ ಎನ್ನನೆ?

ಯೋಹಾನ 17:5

ಇಕ್ಕ, ಅಪ್ಪಾ! ಈ ಲೋಕ ಸೃಷ್ಟಿ ಆಪಕ್ ಮಿಂಞಲೇ ನಾಕ್ ನೀಡ ಪಕ್ಕ ಇಂಜ ಮಹಿಮೇರಗುಂಡ್ ಇಕ್ಕ ನೀನ್ ನೀಡಲ್ಲಿ ನಾಕ್ ಮಹಿಮೆ ಕ್‍ಟ್ಟುವನೆಕೆ ಮಾಡ್.

ಯೋಹಾನ 20:28

ಅಕ್ಕ ತೋಮ: ನಾಡ ಒಡೆಯನೇ ನಾಡ ದೇವನೇಂದ್ ಎಣ್ಣ್‌ಚಿ.

ಯೋಹಾನ 5:18

ಯೇಸು ಸಬ್ಬತ್ ದಿವಸತ್‍ಲ್ ಮಾಡ್‌ವಕಯ್ಯತದ್‍ನ ಮಾಡ್‍ನದ್ ಅಲ್ಲತೆ, ದೇವನ ತಾಂಡ ಸ್ವಂತ ಅಪ್ಪಾಂದ್ ಕಾಕಿತ್, ಅಂವೊನ ದೇವಕ್ ಸಮವಾಯಿತ್ ಮಾಡ್‍ನಗುಂಡ್, ಯೆಹೂದ್ಯ ಅದಿಕಾರಿಯಂಗ ಅಂವೊನ ಕೊಲ್ಲಂಡೂಂದ್ ಇಂಞು ದುಂಬ ಆಲೋಚನೆ ಮಾಡಿಯಂಡಿಂಜತ್.

ಯೋಹಾನ 5:23

ಮೋಂವೊನ ಗನ ಪಡ್‍ತತಯಿಂಗ, ಅಂವೊನ ಅಯಿಚ ಅಪ್ಪನ ಸಹ ಗನ ಪಡ್‍ತತಯಿಂಗಳಾಯಿತುಂಡ್.

ರೋಮ್ 9:5

ಮುತ್ತಜ್ಜಂಗ ಅಯಿಂಗಕುಳ್ಳಯಿಂಗಳೇ, ತಡೀರ ಪ್ರಕಾರ ಕ್ರಿಸ್ತ ಸಹ ಅಯಿಂಗಡಲ್ಲಿ ಪುಟ್ಟ್‌ಚಿ, ಇಂವೊ ಕಾಲಕಾಲಕು, ಎಲ್ಲಾಂಗು ಕೊಡಿಲ್ ದೇವನಾಯಿತ್ ಕೊಂಡಾಡುವಕ್ ಉಳ್ಳಂವೊನಾಯಿತುಂಡ್, ಆಮೆನ್.

2 ಕೊರಿಂಥ 4:4

ದೇವಡ ರೂಪವಾಯಿತುಳ್ಳ ಕ್ರಿಸ್ತಂಡ ಮಹಿಮೇರ ನಲ್ಲ ಸುದ್ದಿರ ಬೊಳಿ, ಕ್ರಿಸ್ತನ ನಂಬತಯಿಂಗಕ್ ಬೊಳಿಯಾಯಿತ್ ಇಲ್ಲತಿಪ್ಪನೆಕೆ, ಈ ಲೋಕತ್‍ರ ದೇವನಾಯಿತಳ್ಳ ಸೈತಾನ ಅಯಿಂಗಡ ಮನಸ್ಸ್‌ನ ಕುರ್‌ಡ್ ಮಾಡ್‍ಚಿ.

2 ಕೊರಿಂಥ 8:9

ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ಕೃಪೆ ನಿಂಗಕ್ ಗೊತ್ತುಂಡ್; ಅಂವೊ ಐಶ್ವರ್ಯವಂತಂವೊನಾಯಿತ್ ಇಂಜತೇಂಗಿಯು, ಅಂವೊಂಡ ಗರೀಬತನತ್‍ರಗುಂಡ್ ನಿಂಗ ಐಶ್ವರ್ಯವಂತಯಿಂಗಳಾಯಿತ್ ಆಪನೆಕೆ ಅಂವೊ ನಿಂಗಕಾಯಿತ್ ಗರೀಬನಾಚಿ.

1 ತಿಮೊಥೆಯ 1:17

ನಿತ್ಯವಾಯಿತುಳ್ಳಂವೊನೂ ಚಾವ್ ಇಲ್ಲತಂವೊನು ಕಣ್ಣ್‌ಕ್ ಕಾಂಗತ ರಾಜನಾಯಿತ್, ತಾನ್ ಒಬ್ಬನೇ ಜ್ಞಾನವುಳ್ಳಂವೊನಾಯಿತ್ ಇಪ್ಪ ದೇವಕ್ ಎಕ್ಕಾಲು ಗನ ಪಿಂಞ ಮಹಿಮೆ ಇರಡ್. ಆಮೆನ್.

1 ತಿಮೊಥೆಯ 3:16

ಏದ್ ಅನುಮಾನವು ಇಲ್ಲತನೆಕೆ, ನಂಗಕ್ ಕಾಂಬ್‍ಚಿಟ್ಟಿತುಳ್ಳ ಸತ್ಯತ್‍ರ ಗುಟ್ಟ್ ದುಂಬ ಬಲ್ಯದ್. ಅದ್ ಎಂತ ಎಣ್ಣ್‌ಚೇಂಗಿ: ಕ್ರಿಸ್ತ, ತಡೀಲ್ ಪುಟ್ಟ್‌ಚಿ. ಪವಿತ್ರಾತ್ಮ ಅಂವೊನ ನೀತಿ ಉಳ್ಳಂವೋಂದ್ ಎಣ್ಣ್‌ಚಿ. ದೇವದೂತಂಗ ಅಂವೊನ ಕಂಡತ್. ಅನ್ಯ ಜನ ಅಂವೊಂಡ ವಿಷಯತ್‍ನ ಕ್‍ೕಟತ್. ಲೋಕತ್‍ರ ಜನ ಅಂವೊನ ನಂಬ್‍ಚಿ. ಮಹಿಮೆಲ್ ಪರಲೋಕಕ್ ಪೋಚಿ.

ಅಪೊಸ್ತಲನಾನ ಪೌಲ ತೀತಂಗ್ ಒಳ್‍ದ್‍ವ ಕಾಗದ 2:13

ಅನ್ನನೆ ಇಪ್ಪಕ, ನಂಗಡ ರಕ್ಷಕನಾನ ಯೇಸು ಕ್ರಿಸ್ತ ಎಣ್ಣುವ ಬಲ್ಯ ದೇವಡ ಮಹಿಮೆಲ್ ಬಪ್ಪ ಆ ಕುಶೀರ ದಿನಕಾಯಿತ್, ನಂಗ ಬಾರಿ ಕುಶೀಲ್, ಮಹಿಮೇರ ನಿರಿಕ್ಷೇಲ್ ಪಾರಕಾತಂಡ್ ಉಂಡ್.

ಇಬ್ರಿಯ 1:3

ಇಂವೊ ದೇವಡ ಮಹಿಮೇರ ಬೊಳಿಯು, ಅಂವೊಂಡ ರೂಪತ್‍ರ ಪ್ರತಿಮೆಯುವಾಯಿತುಂಡ್. ಅದಲ್ಲತೆ, ಎಲ್ಲಾನ ಅಂವೊಂಡ ಶಕ್ತಿ ದುಂಬ್‍ನ ವಾಕ್ಯತ್‍ರಗುಂಡ್ ಪೊರ್‍ತಂಡ್ ಅಂವೊನಗುಂಡ್ ನಂಗಡ ಪಾಪತ್‍ನ ಕಳೆಯುವಕಾಯಿತ್ ಶುದ್ದ ಮಾಡ್‌ವ ಕ್ರಿಯೇನ ಮಾಡ್‍ಚಿ. ಪಿಂಞ ಪರಲೋಕತ್‍ಲ್ ಉಳ್ಳ ಮಹಿಮೆ ದುಂಬ್‍ನಂವೊಂಡ ಬಲ್‌ತೆ ಬರಿಲ್ ಅಳ್‌ತತ್.

ಇಬ್ರಿಯ 1:6

ಇಂಞು, ದೇವ ತಾಂಡ ಆದ್ಯ ಮೋಂವೊನ ಈ ಲೋಕತ್‍ಲ್ ಅಯಿಪಕ, ದೇವದೂತಂಗ ಎಲ್ಲಾರು ಅಂವೊನ ಆರಾದನೆ ಮಾಡಂಡೂಂದ್ ಎಣ್ಣ್‌ಚಿ.

ಇಬ್ರಿಯ 1:8

ಆಚೇಂಗಿ ತಾಂಡ ಮೋಂವೊಂಡ ವಿಷಯತ್: ಓ ದೇವಾ, ನೀಡ ಸಿಂಹಾಸನ ಕಾಲಕಾಲಕು ಇಪ್ಪ, ನೀಡ ರಾಜ್ಯತ್‍ನ ನೀತಿರಗುಂಡ್ ಆಳುವಿಯ,

ಇಬ್ರಿಯ 13:8

ಯೇಸು ಕ್ರಿಸ್ತ ನಿನ್ನಾಂದ್, ಇಂದ್ ಪಿಂಞ ಎಕ್ಕಾಲು ಬದ್‍ಲಾಕತಂವೊನಾಯಿತುಂಡ್.

ಪ್ರಕಟನೆ 21:6

ಇದ್‍ಲ್ಲತೆ, ಅಂವೊ ನನ್ನ ನೋಟಿತ್: ಎಲ್ಲಾ ತ್‍ೕಂದತ್, ನಾನ್ ಅಲ್ಫಾವಾಯಿತು ಓಮೆಗವಾಯಿತು, ಆದ್ಯವಾಯಿತು ಆಕೀರಾಯಿತು ಉಳ್ಳ. ಬಾಯರಿಕೆಲ್ ಉಳ್ಳಂವೊಂಗ್, ಜೀವತ್‍ರ ಜಲ ನೀರ್‍ಯಿಂಜ ನಾನ್ ಇನಾಮಾಯಿತ್ ನೀರ್‌ನ ಕುಡಿಪಕ್ ತಪ್ಪಿ.