फिलिप्‍पी 4:19 - जिरेल

¹⁹ ङे माने खिन ओताते परमेश्‍वरताङ ङुरूङगी विचारराङ खिता मुथुप्‍च्‍या जेसुकै ओत। थेकीराङ ख्‍योकोनला गोच्‍येते जति येशू ख्रीष्‍ट छ्य्‌वापेकी पूरो खाला तेरग्‍यो।

फिलिप्‍पी 4:19 Cross References

मत्ती 6:32

परमेश्‍वरला छ्या मेस्‍येकान्‍ते मिओनगीकामा खालि साच्‍या थुङच्‍याताङ खोन्‍च्‍ये विचारकामा खिन देत्‍क्‍यो। ख्‍योकोनला साप थुङा थेमे खोन्‍दा गोक्‍यो सिननी स्‍वर्गने देत्‍कान्‍ते ख्‍योकोन आबा परमेश्‍वरला दाक छ्या ओत याङ।

यूहन्‍ना 20:17

थेमे थेकी थेला “ङाला मादो। च्‍यिला सासीन ङा थोरूमोङ आबा ओत्‍साने गाला मेत। खो था दुरूकी गाल्‍ला ङे न्‍वाओनला ‘ङा था आबा ओत्‍साने डुइन ओत। थेचेन ख्‍योकोनतेङ आबा ईन। थे ङेते परमेश्‍वर ईन, थोकराङ खाला ख्‍योकोनतेङ परमेश्‍वर ईन,’ साला बिन,” सिन सिदुक।

यूहन्‍ना 20:27

थेमे थोमाला “लो ङे लाक्‍पाला काँटी ग्‍याप्‍कीन थोताते मे डाम खो खोरोङ लाक्‍पे जुकीराङ छामे खाला तो। थोकराङ खाला कोखादु बार्सा रोपे खासादुङ खो छामे खाला तो। थेमे शंका खिता ताङला बरू ङा सोम्‍बो लोक्‍पाते पक्‍काराङ दुका सिन पत्ते खि,” सिन सिदुक।

रोमी 1:8

गोमाचेन ङा येशू ख्रीष्‍ट छ्य्‌वापेकी ख्‍योकोन गाङे लाईदु परमेश्‍वरला धन्‍यवाद सिओ। च्‍यिला सासीन ख्‍योकोन येशूला विश्‍वास खित्‍कान्‍ते मि ईन सिन गाङेपे मिला छ्या दुक।

रोमी 11:33

परमेश्‍वरगी खित्‍च्‍येते काम थोई बुद्धि पुरे खाईन खाला दुका। थे च्‍योकराङ जे बादोङ छ्या स्‍येकान्‍ते ज्‍येन सुङ मेत। थेमे थेकी मिओनला सजाय तेरच्‍येतेताङ ङिङज्‍ये खित्‍च्‍येते चुक खाला खित्‍च्‍या ईन्‍दाका सिन खोबा चाल्‍सीनोङ सुङगीङ खोबाराङ मुथुबो।

रोमी 2:4

ख्‍योकोनलाचेन खेराङ लेमु मि ईन्‍गीनका परमेश्‍वरगी आउदी दया खाला लेमु खिन ओताते ईन सिराच्‍योक लाङगीतासीन। तर बात दोक मेन। ख्‍योकोनगी खेराङ पापी दुका सिन छ्या स्‍येला थे खोरोङ छ्य्‌वापा लै खित्‍स्‍यीत सिनका परमेश्‍वरगी थरिङसाक छ्याःङ मिक्‍किता खाईन देताते ईन सिन ख्‍योकोनगी छ्या स्‍येबा खि।

रोमी 8:18

था तिरी परमेश्‍वरगी ङुरूङला थोक खाला मान बिन्‍ला थे खोरोङगी ज्‍वा चाला च्‍योकराङ लेमु जोच्‍येते बात सम्‍झे खासीन थरिङोला ङुरूङगी भोगे खिता फाप्‍च्‍येते पीरताङ दुक्‍पाका च्‍यि ईन्‍देरो, ङालानी दिनी छ्याःङ मेन सिराच्‍योक लाङगीदुक।

रोमी 9:23

थोकराङ खाईन थे खोरोङगी ङिङज्‍ये खाबाते ज्‍येन मिओनलाचेन थेकी थे खोरोङ चुक छ्ये ईन्‍दे थेमे चुक आशी तेरकान्‍ते ईन्‍दे सिनोङ तेन्‍गीन बिन्‍दा ओत। थेबालाचेन मान बिन्‍ला थे खोरोङगी ज्‍वा चाला च्‍योकराङ लेमु जोइओ सिन थेकी गोमामेकीराङ टुङ्गो खाबा ओतान।

२ कोरिन्‍थी 12:21

दि पालो ङा थेपा ओङजीन ख्‍योकोन थोरूमोङ होदोक दोकराङ खिन ओता थेप्‍सीन ङे माने खिन ओताते परमेश्‍वरगी ख्‍योकोनगी खित्‍सादु ङाला ङोचा लोङगीता सिन ज्‍यीबा लाबा ओत। दोस्‍यिककामा मेन, ख्‍योकोन नाङ गोमाबा रन्‍डीबाजी थेमे होदि च्‍योक्‍ते खिता मेङच्‍येते ज्‍येनोङ ङोचा लाङच्‍येते काम खित्‍कान्‍ते मिओनगी खोपरोङगी थोक खाबाते लेमु मेन्‍दाक्‍वा सिन थोक खिता ताङा मेत्‍सीन थोक्‍ते मिओन लाईदु ङे ङुइनकामा पीर खिता फाप्‍क्‍यो।

२ कोरिन्‍थी 4:17

थरिङोला टिक्‍पी दिन दोक्‍ते दुक्‍पा भोगे खिता फाप्‍सीनोङ दोक खाईन सिन्‍नामेईनी परमेश्‍वरगी ङेराङला सधैँभरि लाईदु मान बिन्‍ला थे खोरोङगी ज्‍वा चाला च्‍योकराङ लेमुका जोइओ। होथे बात सम्‍झे खित्‍जीन ङ्योकोनलानी थरिङोला टिक्‍पी दिन ङेराङगी भोगे खिन ओताते होदोक्‍ते पीरताङ दुक्‍पा छ्याःङ मेन सिराच्‍योक लाङगीदुक।

एफिसी 1:18

ङा ज्‍येनोङ च्‍यि सिन प्रार्थना खिते सासीन परमेश्‍वरगी ख्‍योकोनला थे खोरोङ दोन्‍दु स्‍योक सिन कातोङजीन तिरी ख्‍योकोनते च्‍यि आश ओते सिन साबाते बात थेमे थे खोरोङ सन्‍तान ज्‍येनतेबाताङराङ तिरी ख्‍योकोनगी ङेत्‍च्‍येते जति चुक लेमु ईन्‍दे सिरच्‍येते बात थेकी ख्‍योकोनला लेमु खाला खो ज्‍युत्‍स्‍यीत सिन प्रार्थना खिओ।

एफिसी 1:7

थेमे ङुरूङला पापकी सजायदुकी डेलाला थेकी ख्रीष्‍टला स्‍याप्‍ला दुरू ताङसुङ। ख्रीष्‍ट स्‍यिजीन थे जीउदुकी थेन्‍दाते ठागी खित्‍सादु थेकी ङुरूङगी खाबाते पाप गाङे माफ बिन्‍दा ओत। थे खोरोङ आउदी खाला दया खित्‍कान्‍ते ईन्‍देकी

एफिसी 2:7

ङुरूङला ङिङज्‍ये खाईन थे खोरोङगी येशू ख्रीष्‍ट छ्य्‌वापेई खाबाते होदि गाङे काम चुक दया खाईन खाबाते ईन्‍दे सिन परमेश्‍वरगी जुग जुगसाकराङ गाङेला छ्या स्‍ये ज्‍युत्‍क्‍यो।

एफिसी 3:16

थे आउदी खाला दया खित्‍कान्‍ते ईन्‍देकी थेमे थेत्ताङ छ्येज्‍यीक शक्ति ओतेकी थेकी थे खोरोङ आत्‍मेकी ख्‍योकोन सेमगी नाङ शुरू खाबाते काम खिन देत्‍ला ख्‍योकोनला थे खोरोङगी ज्‍वा चालाच्‍योक ओङाला झन शक्ति तेरस्‍यीत

एफिसी 3:8

दि काम खिताला परमेश्‍वर सन्‍तान गाङे नाङ ङा सोईराङ मिक्‍किकान्‍ते मि ईन्‍सीनोङ परमेश्‍वरगी ङालाराङ दि काम खित्‍च्‍येते जिम्‍मा बिन्‍सुङ। ङे कामचेन ख्रीष्‍टकी ङुरूङ लाईदु खाबाते कामतेबा खोबा चाल्‍ला खोबा मुथुप्‍च्‍या चुक अचम्‍ब खाईन खाबाते ईन्‍दे सिन ज्‍येन ज्‍येन जातकी मिला लोप्‍च्‍येते

फिलिप्‍पी 4:7

थोक थोक खासीन ख्‍योकोनगी जति बुद्धि खिये खासीनोङ खोबा मुथुप्‍च्‍या खाला परमेश्‍वरगी अचम्‍ब खाला ख्‍योकोन सेमला ढुक्‍क लोङगो। थेकी थोक खानामेई येशू ख्रीष्‍टताङ जीउज्‍यीकराङ ओङा ओतेकी ख्‍योकोन सेमला पीरताङ ताप माफाबो, फाप्‍सीनोङ थेतेराङ विचार खिन देता माफाबो।

कलस्‍सी 1:27

ज्‍येन ज्‍येन जातकी मिला चुक अचम्‍ब खाला आशी बिन्‍ला लेमु खिते सिरच्‍येते बात थे खोरोङ सन्‍तानओनगी छ्या स्‍येबा फाप्‍क्‍यो सिन परमेश्‍वरगी थेबाला छ्या स्‍ये च्‍युत्‍कीन बिन्‍सुङ। परमेश्‍वरगी गोमा छ्या स्‍ये च्‍युता मेताते होथे बात च्‍यि ईन्‍दे सासीन ख्रीष्‍टचेन ख्‍योकोन ज्‍येन ज्‍येन जातकी मि सेमगी नाङ देत्‍क्‍यो। थे थोक खाईन ख्‍योकोन सेमगी नाङ देत्‍नामेई परमेश्‍वरगी तिरी ख्‍योकोनला मान बिन्‍ला थे खोरोङगी ज्‍वा चाला च्‍योकराङ लेमु जोइओ सिरच्‍येते बात पक्‍काराङ दुका सिन आश खाला गुला देता थुप्‍क्‍यो।

कलस्‍सी 3:16

थेमे खेराङगी ख्रीष्‍टकी बात झन झन लेमु खाला छ्या स्‍येबा थुप्‍स्‍यीत सिन थे बात ख्‍योकोनगी सेमगी नाङ गुने खिनराङ देत। चुक सासीन परमेश्‍वरगी बिन्‍दाते बुद्धिकी ख्‍योकोनगी थे बात खेराङ नाङ लोप्‍कीन देत, थेरू साबा च्‍योकराङ खिन देता फाप्‍क्‍यो सिन दोक्‍पोईकी ज्‍येनज्‍यीकला सिनराङ देत। थेमे परमेश्‍वरगी खेराङला चुक दया खासुङा सिन गा खिन थेला धन्‍यवाद सिनकामा खेराङ नाङ भजन लिन्‍च्‍येते, परमेश्‍वरला छ्ये जोच्‍येते लु लिन्‍च्‍येते थेमे परमेश्‍वर आत्‍मेकी लिन च्‍युताते ज्‍येनोङ लु लिन्‍च्‍येते खि।

१ थिस्‍सलोनिकी 2:12

थेमे परमेश्‍वर मिओनगी चुक चुक खिता फाप्‍कीते सिन लाप्‍कीन थोक खिन देत सिन लोप्‍कीन देताप। ख्‍योकोन थे खोरोङ राज्‍यदु देता ङेत्‍स्‍यीत थेमे थे खोरोङ चुक छ्ये ईन्‍दाका सिन लेमु खाला छ्या स्‍येस्‍यीत सिन थे खोरोङ दोन्‍दु स्‍योक सिन कातोङकान्‍ते परमेश्‍वरराङ ईन।

१ तिमोथी 6:17

थेमे थरिङोला छ्युक्‍पु ओताते मिओनला दोक सिन कोत। थेबाला छ्ये माकेत सि, सम्‍पत्ति ओत्‍कीन ओत सिन ढुक्‍क खाला मादेत सि। थोक्‍ते सम्‍पत्तिनी नामसाक दाक्‍पोन लाःक्‍तु देत्‍कीते सिन छ्याःङ छ्या मेङगो। बरू थेबाला परमेश्‍वरला भर परे खिता लोप सिन सि। थेकीराङ ङुरूङला गोच्‍येतेबरी दाङच्‍या ख्‍योप्‍च्‍या खाला बिन्‍ला गा खिन देत ज्‍युत्‍क्‍यो।

फिलेमोन 1:4

ङे माने खिन ओताते परमेश्‍वरला प्रार्थना खित्‍जीन खोल्‍ला सम्‍झे खिन खुई लाईदु ङा जहिलेङ थेला धन्‍यवाद तेरग्‍यो।

१ पत्रुस 5:1

थाचेन ङा ख्‍योकोन नाङ येशू ख्रीष्‍ट मिओनला ताकान्‍ते मिओनला बातज्‍यीक बात ङि सिरामीन। ङा ङाराङोङ ख्‍योकोन च्‍योकराङ येशू ख्रीष्‍ट मिओनला ताकान्‍ते मिज्‍यीक ईन। ख्रीष्‍टकी भोगे खाबाते दुक्‍पातेबा ङे गाङे ङाराङ मिगीराङ थोङाते ईन। था थे छ्येज्‍यीक शक्ति ङेत्‍ला ग्‍युरला ओङजीन ङाङ मान ङेत्‍ला थेत्ताङ देता ङेत्‍क्‍यो सिनोङ ङाला छ्या ओत। येशू ख्रीष्‍ट मिओनला ताकान्‍ते मिओन ख्‍योकोनगी ओर्च्‍ये दोक खि।

१ पत्रुस 5:10

टिक्‍पी दिन ख्‍योकोनगी दोक्‍ते दुक्‍पा खपे खिता फाप्‍सीनोङ ख्रीष्‍टकी खाबाते कामगी खित्‍सादु खितासम्‍म दया खित्‍कान्‍ते परमेश्‍वरगी ख्‍योकोनला सधैँभरि लाईदु मान तेराला थे खोरोङ दोन्‍दु स्‍योक सिन काताङा ओत। थेकीराङ ख्‍योकोनला सेम सेता ओत्‍सादुई लोक्‍ला आँट तेरग्‍यो, जस्‍तो ओङजीनोङ मेलेबा खित्‍सादुई जोए खाला ज्‍य्‌वाक्‍यो थेमे ख्रीष्‍टला विश्‍वास खिन देताला शक्ति तेरग्‍यो।