फिलिप्‍पी 2:2 - जिरेल

² थोरूम ख्‍योकोनगी दोक दोक खासीन ङाला झन गा लाङच्‍या ओतान। चुक सासीन ख्‍योकोन गाङेराङ सेमज्‍यीकराङ खाला डिक्‍ला देत, दोक्‍पोईकी ज्‍येनज्‍यीकला ङिङज्‍ये खि, जे खित्‍जीनोङ लो ङुरूङ दोकराङ खिइ साला डिक्‍ला खित्‍च्‍येते खि।

फिलिप्‍पी 2:2 Cross References

यूहन्‍ना 3:29

बेउलेकी बेउली फाङमा खिओ। बेउलीचेन बेउला ओत्‍सापा डुइओ। थेमे बेउले र्‍वाचेन थे खादुराङ देत्‍ला थेकी साबाते बात ङेन्‍ग्‍यो। थेमे बेउला ओत्‍सापा बेउली डोच्‍येते बात थोला आउदी गा खिओ। थोक खाला मिओन थे ओत्‍सापा डुइदुक सिरा थोजीन ङाला गा लाङगीदुक।

शक्ति काम 1:14

थेबाताङ थेरू गोमा येशूताङ ख्‍याम्‍कान्‍ते फेम्‍मे मिओन, येशू आमा मरियम थेमे येशू न्‍वातेबाङ ओतान। थेबाबरी गाङेराङ ङ्योम्‍बुराङ परमेश्‍वरला प्रार्थना खिन देत्‍कीन ओतान।

शक्ति काम 2:1

पेन्‍तिकोस छोमुङ येशूला विश्‍वास खित्‍कान्‍तेबा गाङेराङ ठाउँज्‍यीकराङ रूकीन देता ओतान।

शक्ति काम 2:46

थेबा ङीमे ठाङमा परमेश्‍वर मन्‍दिरदु जम्‍मा ओङला ङ्योम्‍बुराङ परमेश्‍वरला प्रार्थना खिन ओतान। थेबेकी दोक्‍पोईकी ज्‍येनज्‍यीकला ईख इबी खुरगीन मेतान। बरू खाम्‍बा खाम्‍बाला रूला प्रभु भोज साच्‍येते थेमे गा खिन ङ्योम्‍बुराङ साप साच्‍येते खिन ओतान।

शक्ति काम 5:12

येशू ख्रीष्‍टकी खटे खाबाते मिओनगी मिओन नाङ छ्ये छ्येताङ अचम्‍बतेन्‍दे काम काल्‍बेई खिन ओतान। येशूला विश्‍वास खित्‍कान गाङेराङ डिक्‍ला परमेश्‍वर मन्‍दिरदु ओताते सोलोमन सिराते पिंढीदु जम्‍मा ओङगीन ओतान।

रोमी 12:16

थेमे ख्‍योकोन गाङेराङ सेमज्‍यीकराङ खाला डिक्‍ला थुन्‍ला देत। छ्ये मिक्‍किता खाला दिबाङ सु ईन्‍देरो सिराच्‍योक ठाने खाबाते मिओनताङोङ साङ खि। ङा छेतते सुङ मेन सिराच्‍योक माकेत।

१ कोरिन्‍थी 1:10

आज्‍यो न्‍वावे, ङुरूङ प्रभु येशू ख्रीष्‍टकीराङ ङाला दोक खित्‍च्‍येते अधिकार बिन्‍दा ओतेकी ङा ख्‍योकोनला च्‍यि सिते सासीन ख्‍योकोनगी खेराङ नाङ फाटो ओङच्‍येते काम माकेत। बरू गाङेकी सेमज्‍यीकराङ खाला डिक्‍ला काम खि।

२ कोरिन्‍थी 13:11

लो आज्‍यो न्‍वावे, था ज्‍येन बातका च्‍यि सिरच्‍ये, ख्‍योकोनगी परमेश्‍वरगी खेराङला ज्‍वा चाला च्‍योकराङ लेमु मि ओङस्‍यीत सिन थोक्‍ते मि ओङच्‍ये छ्य्‌वापा स्‍येत खि। ङे लाःपा कोताते ङेन्‍ला था चुक खिता फाप्‍कीका थोककामा खि, ख्‍योकोन गाङेराङ सेमज्‍यीकराङ खाला डिक्‍ला थुन्‍ला देत। थोक खासीन गाङेला ङिङज्‍ये खित्‍कान्‍ते थेमे डिक्‍ला थुन्‍ला देत ज्‍युत्‍कान्‍ते परमेश्‍वर ख्‍योकोनताङ ङ्योम्‍बुराङ देत्‍क्‍यो।

२ कोरिन्‍थी 2:3

ङाला गा लाङच्‍येते बात ख्‍योकोनलाङ गा लाङच्‍येतेराङ ईन सिन ङाला लेमु खाला छ्या ओतेकी ङाराङ मेङा खाईन ङे थे चिट्ठीकामा टिबाप। ख्‍योकोनचेन ङाला मन परे खित्‍च्‍येते काम खित्‍कान्‍ते मि ईन। दि पालो ङा थेपा वाबा ईन्‍सीन ङाला आउदी दुक्‍पा लाङच्‍या ओतान।

२ कोरिन्‍थी 7:7

थे वाबेकीकामा मेन, थेकी खुलाबाते लोन थोनामेई ङ्योकोनला ढुक्‍क लासुङ। चुक सासीन ख्‍योकोनगी थेला लेमु खाबेकी थेकी आँट ङेत्‍सुङलो, ख्‍योकोनगी ङाला आउदी खाईन ठेता सेम खाला दुक्‍लो, खेराङगी ङाला गोमाबा थोक मेलेबा खाबाते लेमु मेन्‍दाक्‍वा सिन ख्‍योकोन थरिङोला बात खिदुक्‍लो थेमे ङा मेलेबा मि ईन सिन सिरकानला ख्‍योकोनगी पावल थोक्‍ते मिराङ मेन सिन ङे छ्य्‌वा खाला बात खिदुक्‍लो सिन तीतसकी ङ्योकोनला लाःप्‍सुङ। दि बातओन थोजीन ङाला झन आउदी गा लासुङ।

फिलिप्‍पी 1:4

ख्‍योकोन गाङे लाईदु ङा आउदी गा खिनकामा परमेश्‍वरला प्रार्थना खिओ।

फिलिप्‍पी 2:16

थेमे नोमुङ मिसिन्‍च्‍येते जुनी ङेत्‍च्‍येते बात ङेन्‍दा ख्‍योकोनगी बान्‍दा मातोङ। ख्‍योकोनगी ङे खि साबा च्‍योकराङ खिन देत्‍सीन था ख्रीष्‍ट ग्‍युरला ओङे छोमु ङे ख्‍योकोन नाङ स्‍याप स्‍याप खाईन दुक्‍पा खाईन खाबाते काम थाराङ खेरो मागाल्‍सुङ, ङे थोक खाबाते चुक लेमु ओङसुङा सिन गा खिता ङेत्‍क्‍यो।

फिलिप्‍पी 2:20

चुक खासीन ख्‍योकोनला लेमु ओङगीताका सिन ङात्ताङ डिक्‍ला काम खित्‍कान्‍ते मि दुरू तिमोथीकामा ओत।

फिलिप्‍पी 4:2

थेमे इयोदियाताङ सिन्‍तकेला ङा च्‍यि सिते सासीन ओर्च्‍ये, खेराङ ङिकाराङ प्रभु येशू मि ईन सिन सम्‍झे खाला लोक्‍ला डिक्‍ला थुन्‍ला देत।

कलस्‍सी 2:5

ङा ख्‍योकोनताङ ङ्योम्‍बु मेत्‍सीनोङ ख्‍योकोनला चुक ओताका, च्‍यि खिन ओताका सिन आउदी खाला सम्‍झे खिओ। ख्‍योकोन डिगीन थुन्‍गीन देताते थेमे ख्रीष्‍टला विश्‍वास खिन देता ओताते बात सम्‍झे खित्‍जीनचेन ङाला गा लाङगीदुक।

२ थिस्‍सलोनिकी 2:13

दोक ईन्‍सीनोङ आज्‍यो न्‍वावे, ख्‍योकोनलाचेन प्रभु येशू ख्रीष्‍टकी आउदी ङिङज्‍ये खाबा ओत। थेमे ङ्योकोन जहिलेङ ख्‍योकोन लाईदु परमेश्‍वरला धन्‍यवाद सिओ। परमेश्‍वर आत्‍मेकी खित्‍सादु ख्‍योकोन सेम खुदुक गालाते मि ओङला थेमे सत्‍यते बात ङेन्‍ला ख्‍योकोनगी पापकी सजाय भोगे खिता माफाप्‍स्‍यीत सिन परमेश्‍वरगी ख्‍योकोनला दि सा नाम ज्‍वा भन्‍दा गोमाकाराङ छाने खाबा ओतेकी ङ्योकोनगी थेला धन्‍यवाद सिरा फाप्‍च्‍येतेराङ ईन।

२ तिमोथी 1:4

ङुरूङ ठाल्‍जीन खो चुक आउदी खाईन ङुबा ओताने सिन ङाला ठेम्‍बा लाङगीदुक। थे बात सम्‍झे खित्‍जीन ङाला खोल्‍ला ठेता आउदी सेम लाङगीदुक। खोल्‍ला लोक्‍ला ठेता ङेत्‍सीन ङाला आउदी गा लाङच्‍या ओतान।

फिलेमोन 1:20

खो प्रभु येशू ख्रीष्‍टला विश्‍वास खित्‍कान्‍ते ईन्‍देकी ओर्च्‍ये ङे छ्येत ताला खुई ओनेसिमसला ङे साबा च्‍योकराङ खि। ख्रीष्‍टताङ जीउज्‍यीकराङ ओङाते मिकी खिता फापाच्‍योक खाईन भाइ खुई थोक खासीन ङाला ढुक्‍क ओङगो।

२ यूहन्‍ना 1:4

थेमे खुई फुज्‍युङ फुमु कोई कोईकी ङुरूङला आबा परमेश्‍वरगी खि सिन कोता च्‍योकराङ खाईन सत्‍यते बात ङेन्‍गीन थेरू खि साबा च्‍योकराङ खाबा थोङगीन ङाला आउदी गा लाबा ओत।

३ यूहन्‍ना 1:4

ङाराङ फिजाओनगी सत्‍यते बात ङेन्‍ला थेरू खि साबा च्‍योकराङ खिदुक्‍लो सिन थोजीन ङाला आउदी गा लाङगीदुक, दि छेत गा लाङच्‍येते बात ङे लाईदु ज्‍येन छ्याःङ मेन।