फिलिप्‍पी 1:7 - जिरेल

⁷ ख्‍योकोन विषयला खाबाते दि बात ङे थाराङ खाबाते मेन। ङा ङीन नुप ख्‍योकोनला सम्‍झे खिनराङ देत्‍क्‍यो। ङा दुरू जेलदु देता ओत्‍सीनोङ थेमे ङाराङगी लोप्‍च्‍येते बात सत्‍यते ईन सिन बेला बेलाला अड्डादु बयान तेरा फाप्‍सीनोङ परमेश्‍वर दयेकी खित्‍सादुराङ ङे दोक दोक खिता थुपा ओत। ङाला दया खित्‍कान्‍ते परमेश्‍वरगी ख्‍योकोन गाङेलाङ ङाला च्‍योकराङ खाला दया खिन ओत।

फिलिप्‍पी 1:7 Cross References

शक्ति काम 20:23

ईन्‍सीनोङ ङा यरूशलेमपा लेप्‍नामेकी ङे थेरू जेलदु देता फाप्‍क्‍यो थेमे ङेतासम्‍म दुक्‍पा ङेत्‍क्‍यो सिन परमेश्‍वर आत्‍मेकी ङाला सार सारला याङ याङ छ्या स्‍येबा खाईन बिन्‍दा ओत।

शक्ति काम 21:33

थेमे थे छ्येते मिकी “दि मिला जुम्‍ला लाक्‍पा ङिकारला नेल कोन,” सिन पावलला जिन च्‍युत्‍कीन थेरू मिओनला “दि मि सु ईन्‍दे? दिकी च्‍यि खासुङा?” सिन ठिसुङ।

१ कोरिन्‍थी 13:7

थेकी दाक्‍पोनला जति दुक्‍पा बिन्‍सीनोङ थोक्‍ते मिलाङ ङिङज्‍ये खिन देत्‍क्‍यो, थेकी सुङलाङ शंका मिक्‍किओ, थेकी जो मिङ लेमु काम खित्‍कान ओङा थुप्‍क्‍यो सिन आश खिओ थेमे जस्‍तो दुक्‍पा ओङसीनोङ थे सेम मेसेता खाला देत्‍क्‍यो।

१ कोरिन्‍थी 9:23

गा लाङच्‍येते बात मिओनगी लेमु खाला ङेन्‍स्‍यीत थेमे दि बातला ङेत्‍क्‍यो साबाते आशी ङेङ ङेत्‍स्‍यीत सिनराङ ङा दोक खिओ।

२ कोरिन्‍थी 3:2

ङ्योकोनतेनी ङेराङ सेमगी नाङराङ टिबा ओताते थेमे मि गाङेकी ख्‍योकोनला ताला ङेराङ चुक्‍ते मि ईन्‍दाका सिन छ्या स्‍येच्‍येते चिट्ठी च्‍योक्‍ते ख्‍योकोनराङ ईन।

२ कोरिन्‍थी 7:3

ख्‍योकोनला मेलेबा सिराला ङे दोक साबाते मेन। थोक ईन्‍दा ईन्‍सीन ङ्योकोनगी ख्‍योकोनला खितासम्‍म ङिङज्‍ये खाबा ओत सिन ङा सिरच्‍याराङ मेतान। ङेराङ सोन्‍ला देत देतसाक थेमे स्‍याराङ फाप्‍सीनोङ ङ्योकोन ख्‍योकोनला नोमुङ टोक ज्‍येता मुथुबो।

गलाती 5:6

च्‍यिला सासीन येशू ख्रीष्‍टताङ जीउज्‍यीकराङ ओङाते मिओनगी खतकी चिनु जोसीनोङ माजोसीनोङ छ्याःङ फरक परे मिक्‍किओ। छ्येते बातचेन थेबेकी येशू ख्रीष्‍टला विश्‍वास खाला ज्‍येनतेबालाङ ङिङज्‍ये खिकाना मिक्‍किका सिरच्‍येतेकामा ईन।

एफिसी 3:1

परमेश्‍वरगी ख्‍योकोनला होदोक लेमु खाबा ओतेकी ङा पावल ख्‍योकोन लाईदु परमेश्‍वरला प्रार्थना खिओ। येशू ख्रीष्‍टकी खि साबाते काम खाबेकी ङाला जेलदु ज्‍याक्‍पा ओत। ख्‍योकोन ज्‍येन ज्‍येन जातकी मिला लेमु ओङस्‍यीत सिन ङा दोक खाला दुक्‍पा भोगे खिओ।

एफिसी 4:1

बात दोक दोक ईन्‍देकी ङा ख्‍योकोनला दोक खि सिन सिओ। प्रभु येशू ख्रीष्‍टकी खि साबाते काम खाबेकी ङाला जेलदु ज्‍याक्‍पा ओत। ङा ख्‍योकोनला चुक खि सिते सासीन ओर्च्‍ये, परमेश्‍वरगी खेराङला थे खोरोङ दोन्‍दु स्‍योक सिन कातोङजीन ख्‍योकोनगी चुक चुक खिता फाप्‍क्‍यो सिन साबा ओताने थोक थोकराङ खि।

एफिसी 6:20

ङा दि गा लाङच्‍येते बात लोपाला येशू ख्रीष्‍टकी ताङाते मि ईन्‍सीनोङ दुरू जेलदु देता फापा ओत। जे ईन्‍सीनोङ ङे दि बात छ्याःङ ज्‍यीबा मिक्‍किता खाला जस्‍तो खाला लोपा फाप्‍च्‍येते ईन थोकराङ खाला लोप्‍कीन देता थुप्‍स्‍यीत सिन प्रार्थना खिनराङ देत।

फिलिप्‍पी 1:12

थेमे आज्‍यो न्‍वावे, ङाला जेलदु ज्‍याक्‍पातेनी लेमुका ओङसुङ। ङाला जेलदु ज्‍याक्‍नामेई झन काल्‍बेई मिकी गा लाङच्‍येते बात थोबा ओत।

फिलिप्‍पी 1:13

चुक ओङसुङा सासीन ङे खइँदा मेलेबा काम खाबेकी मेन्‍गीन ख्रीष्‍टते गा लाङच्‍येते बात लापेकीका ङाला जेलदु लुक्‍पाते दुका सिन दुरू ओताते रोमी गेल्‍बो मिल्‍टेरीओनताङ ज्‍येनोङ मि गाङेकी छ्या स्‍येसुङ।

फिलिप्‍पी 1:14

ङाला जेलदु लुक्‍नामेई प्रभु ख्रीष्‍टला विश्‍वास खित्‍कान्‍ते ज्‍येन आज्‍यो न्‍वा काल्‍बेईकी ज्‍यीबा खाला देता मेङच्‍याक्‍वा सिन आँट ङेता ओत। आँट ङेत्‍कीन था थेबेकी परमेश्‍वर बात ज्‍यीबाराङ मिक्‍किता खाला लोप्‍कीदुक।

फिलिप्‍पी 1:5

ङा च्‍यिला थेला धन्‍यवाद तेरगीते सासीन खेराङगी गा लाङच्‍येते बात ङेन्‍दा छुरनामेई दि बात ज्‍येनगीङ छ्या स्‍येबा फाप्‍क्‍यो सिन ख्‍योकोनगी ङात्ताङ डिगीन दि बात फैले खित्‍च्‍येते काम खासुङ। थोक खिता ख्‍योकोनगी थोरूमसाक ताङा मिन्‍दुक।

फिलिप्‍पी 2:22

तिमोथी थे खोरोङगी खिता फाप्‍च्‍येते काम चुक लेमु खाला खित्‍कान्‍ते मि ईन्‍दे सिन ङे ख्‍योकोनला सिरा माफाप्‍तासीन। फुज्‍युङतेकी आबातेताङ डिगीन काम खाबा च्‍योकराङ खाईन दिकी ङात्ताङ डिगीन ज्‍येनला गा लाङच्‍येते बात लापा ओत।

फिलिप्‍पी 4:14

बात दोक ईन्‍सीनोङ ख्‍योकोनगी ङाला गोबे बेलाला पैसा ताङगीन आउदी लेमु खासुङ।

फिलिप्‍पी 4:15

गोमा म्‍यासिडोनिये लुङबादु गा लाङच्‍येते बात लाप्‍ला थेरूई डोजीन ख्‍योकोन फिलिप्‍पीदु जम्‍मा ओङकान्‍ते येशू ख्रीष्‍ट मिओन लाःकनापेकीकामा ङे पैसा लाबा ओतान। ज्‍येन ज्‍येन ठाउँकी येशू ख्रीष्‍ट मिओन लाःकनापेईचेन ङे पैसाज्‍यीगोङ लाबा मेतान। गा लाङच्‍येते बात लाप्‍कीन बिन्‍नामेई ख्‍योकोनगी ङे कामगी लाईदु सिन दुकीन बिन्‍दाते पैसाचेन ङे लाबा ओतान। दि बात ख्‍योकोनगी पक्‍काराङ टोक ज्‍येता मेतासीन।

फिलिप्‍पी 4:3

ङात्ताङ डिक्‍ला ङे च्‍योकराङ खाला काम खित्‍कान्‍ते ङे र्‍वा खुई थे फेम्‍मे मि ङिबोला डिक्‍पा खाला बिन। गा लाङच्‍येते बात फैले खिताला ङात्ताङ थोङला दुक्‍पा खाला खाला काम खित्‍कान्‍ते मि नाङ क्‍लेमेण्‍टताङ ज्‍येनतेबाकामा मेन, होथे फेम्‍मे मि ङिबोङ ईन। थेबा गाङे मिन नोमुङ मिसिन्‍च्‍येते जुनी ङेत्‍कान्‍ते मिओन मिन टिबाते किताबला टिबा ओत।

कलस्‍सी 4:18

थेमे ङेतेङ ख्‍योकोनला नमस्‍ते सिनचेन ङा पावल ङाराङ लाक्‍पेकीराङ टिगीन ओत। ङा जेलदु ओताते बात टोक माज्‍येत। प्रभु येशू ख्रीष्‍टकी ख्‍योकोनला दया खिनराङ देत्‍स्‍यीत।

कलस्‍सी 4:3

थेमे थे खोरोङगी गोमा सुङलाङ छ्या स्‍ये च्‍युता मेताते ख्रीष्‍टकी बात मिओनला लोपाला परमेश्‍वरगी ङ्योकोनला मौका तेरस्‍यीत सिन ङ्योकोन लाईदुङ प्रार्थना खि। होथे बात मिओनला लापेकी खित्‍सादु थरिङोला ङाला जेलदु लुक्‍पा ओत।

१ थिस्‍सलोनिकी 5:5

ख्‍योकोननी गाङेराङ परमेश्‍वर नाम्‍दाकला देत्‍कान्‍ते मि ईन। ख्‍योकोन मुन्‍दाकला खित्‍च्‍येते मेलेबा मेलेबा काम खित्‍कान्‍ते मि मेन्‍देकी नाम्‍दाकला लेमु काम खित्‍कान्‍ते मि ईन। ङुरूङचेन मेलेबा मेलेबा काम खिन मुन्‍दाकला देत्‍कान्‍ते मि मेन।

२ तिमोथी 1:8

थोक ईन्‍देकी ज्‍येनला ङुरूङ प्रभु येशू बात लोपा नोमुङ ङोचा माकेत। थेमे थे बात लापेकी ङाला जेलदु ज्‍याक्‍पा ओत्‍सीनोङ खो छ्याःङ ङोचा माकेत। बरू थे गा लाङच्‍येते बात लोप्‍जीन खुईङ ङे च्‍योकराङ खाला दुक्‍पा भोगे खिता फाप्‍च्‍या दुक सासीनोङ थोकराङ खि। थोक खिताला परमेश्‍वरगीराङ खोल्‍ला थे खोरोङ शक्ति तेरग्‍यो।

२ तिमोथी 2:9

दि बात लापेकीराङ ङा दुक्‍पा भोगे खिन ओत। ङाला डाँकाला च्‍योक खाईन नेल कोन्‍गीन जेलदु समेत लुक्‍पा ओत। तर ङाला नेल कोन्‍ला जेलदु किल्‍ला ज्‍य्‌वाबाच्‍योक खाला परमेश्‍वर बात फैले मिक्‍किस्‍यीत सिनचेन जति खासीनोङ सुङगीङ छ्याःङ खिता मुथुबो।

फिलेमोन 1:13

गा लाङच्‍येते बात लापेकी खित्‍सादु ङा दुरू जेलदु फापा ओत। ईन्‍दानी दि बेलाला ङाराङताङ र्‍वा खिताला ङे दिला दुरू ङ्योम्‍बुराङ ज्‍य्‌वाबा चालाप। थोक खाईन दि दुरू देत्‍कीन ङात्ताङ र्‍वा खासीन खुई मद्धत खाबा छेतराङ ओङच्‍या ओतान।

हिब्रू 3:1

बात दोक दोक ईन्‍देकी आज्‍यो न्‍वावे, ख्‍योकोनचेन स्‍वर्गने देताला परमेश्‍वरगी थे खोरोङ दोन्‍दु स्‍योक सिन काताङाते मि ईन्‍देकी येशू चुक छ्ये ईन्‍दे सिरच्‍येते बातकीतेकामा ध्‍यान खिन देत। थेचेन परमेश्‍वरगीराङ खटे खाईन ताङाते थेमे गाङे भन्‍दा छ्येते पूजारी ईन। थे पक्‍काराङ होदोक छ्ये ईन सिन ङुरूङ थेला विश्‍वास खिओ।

१ पत्रुस 4:13

दोक्‍ते दुक्‍पा भोगे खिता फाप्‍जीन ख्‍योकोन गाका खि। च्‍यिला सासीन दोक ओङजीन ख्‍योकोनगी ख्रीष्‍टकी चुक दुक्‍पा भोगे खाबा ओता ईन्‍दाका सिन टिक्‍पी टिक्‍पी छ्या स्‍येक्‍यो। थेमे ख्रीष्‍ट था छ्येज्‍यीक शक्ति ङेत्‍ला दुरू ग्‍युरला ओङे छोमु ख्‍योकोनोङ आउदी खाला गा खिता ङेत्‍क्‍यो।

१ पत्रुस 5:1

थाचेन ङा ख्‍योकोन नाङ येशू ख्रीष्‍ट मिओनला ताकान्‍ते मिओनला बातज्‍यीक बात ङि सिरामीन। ङा ङाराङोङ ख्‍योकोन च्‍योकराङ येशू ख्रीष्‍ट मिओनला ताकान्‍ते मिज्‍यीक ईन। ख्रीष्‍टकी भोगे खाबाते दुक्‍पातेबा ङे गाङे ङाराङ मिगीराङ थोङाते ईन। था थे छ्येज्‍यीक शक्ति ङेत्‍ला ग्‍युरला ओङजीन ङाङ मान ङेत्‍ला थेत्ताङ देता ङेत्‍क्‍यो सिनोङ ङाला छ्या ओत। येशू ख्रीष्‍ट मिओनला ताकान्‍ते मिओन ख्‍योकोनगी ओर्च्‍ये दोक खि।

२ पत्रुस 1:13

ङा ङाराङ सोन्‍ला देत देतसाकराङ दि बातओन याङ याङ साला ख्‍योकोनला सम्‍झे खित ज्‍युता लेमु ईन सिराच्‍योक लाङगीदुक।

१ यूहन्‍ना 3:14

ङुरूङगी स्‍यिला सजाय ङेत्‍सादुकी थारगीन नोमुङ मिसिन्‍च्‍येते जुनी ङेत्‍कीन सिन्‍दा ओत सिन ङुरूङला छ्या ओत। च्‍यिला सासीन ङुरूङ दाक्‍पोन आज्‍यो न्‍वाला ङिङज्‍ये खिओ। ज्‍येनला ङिङज्‍ये मिक्‍किकान्‍ते मिचेन स्‍यिला सजाय ङेत्‍सादुकी थोरूमोङ थारा मेङगो।