फिलिप्‍पी 1:21 - जिरेल

²¹ ख्रीष्‍टला मान खितालाराङ ङा सोन्‍ला देत्‍क्‍यो। ङे लाईदु दि जुनीते छ्येते बात दिराङ ईन। स्‍यिसुङराङ सासीनोङ झन ङाला लेमुराङ ओङगो।

फिलिप्‍पी 1:21 Cross References

१ कोरिन्‍थी 1:30

परमेश्‍वरगी खित्‍सादुकामा ख्‍योकोन येशू ख्रीष्‍टताङ जीउज्‍यीकराङ ओङाते ईन। येशू ख्रीष्‍टला ताला परमेश्‍वर चुक बुद्धि पुरे खाला काम खित्‍कान्‍ते ईन्‍दे सिन छ्या स्‍येक्‍यो। च्‍यि सासीन ख्रीष्‍टकी खित्‍सादु परमेश्‍वरगी ङुरूङला दोषी मेन सिओ, थेकी ङुरूङ सेम खुदुक जोबा ओत थेमे ङुरूङला पापकी सजायदुकी टाला ओत।

१ कोरिन्‍थी 3:22

च्‍यि सासीन पावल, अपोल्‍लोस, पत्रुस गाङे ख्‍योकोनला लेमु ओङाला काम खित्‍कान्‍ते मि ईन। थेमे दि सा लुङबादु ओताते जेसुकै ख्‍योकोन लाःक्‍तुराङ ओत। सोन्‍ला देत्‍च्‍येते, स्‍यिच्‍येते, थरिङोला ओङगीन ओताते थेमे था तिरी ओङच्‍येते दुक्‍पा किम्‍मु बात जेसुकै ख्‍योकोनला लेमु ओङालाराङ ईन।

२ कोरिन्‍थी 5:1

थरिङोले ङुरूङ जीउ ङीमा ङि सुम देताला टाँए खाबाते पाल च्‍योक्‍तेकामा ईन। स्‍यिनामेकी ङुरूङ दाक रूल्‍ला डुइओ सिन ङुरूङला छ्या ओत। ईन्‍सीनोङ था तिरी परमेश्‍वरगी ङुरूङला नोमुङ स्‍यिला रूल्‍ला मोन्‍डोच्‍येते जीउ तेरग्‍यो। थे जीउचेन मिकी जोबाते खाम्‍बा च्‍योक मेन्‍देकी नोमुङ माराम्‍च्‍येते स्‍वर्गे खाम्‍बा च्‍योक्‍ते ईन।

२ कोरिन्‍थी 5:6

दोक खाला परमेश्‍वरगी होथोक्‍ते जीउ तेरच्‍येते ईन्‍देकी ङुरूङगी सेम सेता माफाबो। थरिङोले दि जीउ ओत ओतसाक प्रभु येशूताङ सधैँभरि देताराङ मेङेदो सिन ङुरूङला छ्याराङ ओत।

२ कोरिन्‍थी 5:8

तिरी सधैँभरि थेत्ताङ देता ङेत्‍क्‍यो सिन लेमु खाला छ्या ओतेकी ङ्योकोनलानी थेत्ताङ होथोक खाला देताला बरू होत्ता स्‍यिसीन ओङच्‍या ओतान सिराच्‍योक लाङगीदुक।

गलाती 2:20

चुक खाईन सासीन ख्रीष्‍टला स्‍यिङगी थामला टाँए खाला सेत्‍जीन ङाङ थेत्ताङराङ थे थामला टाँए खाईन स्‍याप्‍ते ईन। ङा थोक खाईन स्‍याप ईन्‍सीनोङ थोरूमसाक सोम्‍बोराङ ओत। ङाराङ सोम्‍बो ओत्‍सीनोङ थरिङोला ङे जे खिदुक थे ङे खित्‍च्‍येते मेन, ख्रीष्‍ट ङे सेमगी नाङ ओतेकी ङे च्‍यि च्‍यि खिका गाङे थेकीराङ खित ज्‍युत्‍च्‍येते ईन। मास्‍यिथुप था ङा परमेश्‍वर फुज्‍युङला विश्‍वास खिन देत्‍ला थेकी खित ज्‍युता चाला च्‍योककामा खिन देत्‍क्‍यो। थेकी ङाला ङिङज्‍ये खाईन ङे लाईदु थे खोरोङ ज्‍यानराङ बिन्‍गीन स्‍या ओतान।

गलाती 6:14

ङे नोमुङ होथेबेकी च्‍योक खाला दाक्‍पोनगी खाबाते खइँदा कामगी छ्य्‌वापेई छ्ये खिता माफाप्‍स्‍यीत। ङेनी स्‍यिङगी थामला टाँए खाईन सेताते ङुरूङ प्रभु येशू ख्रीष्‍टलाकामा छ्ये जोइओ सिन टुङ्गो खाईन सिन्‍दा ओत। प्रभु येशू ख्रीष्‍ट थोक खाईन स्‍याप्‍की खित्‍सादु ङाङ स्‍यिङगी थामला टाँए खाईन स्‍याप्‍ते च्‍योक ओङगीन दि सा लुङबे मिओनगी ङेन्‍दा फाप्‍क्‍यो सिरच्‍येते नियम थेमे थेबेकी माने खित्‍च्‍येते रीतिथितिओन ङे लाईदु छ्याःङ काम लै मिक्‍किच्‍या गाला ओत। थेमे ङाराङचेन होथोक्‍ते नियमताङ रीतिथिति लाईदु स्‍याप छेतराङ ओङा ओत।

फिलिप्‍पी 1:20

था याङराङ अड्डादु बयान लिन्‍जीन ङाला सेत्‍सीनोङ सोम्‍बोराङ ताङसीनोङ थातासाक खाबा च्‍योकराङ खाला हत्तेरिका ङे च्‍यिला थोक खाताका सिराच्‍योक लाङच्‍येते कामताङ बात छ्याःङ मिक्‍किओ सिन टुङ्गो खाबा ओत। दोक खाला ङाराङला जस्‍तो ओङसीनोङ सुङताङ ज्‍यीबा मिक्‍किता खाला ख्रीष्‍टते जय जय ओङच्‍येते कामकामा खिता थुप्‍स्‍यीत सिन ङे आश खाबा ओत।

फिलिप्‍पी 1:22

ईन्‍सीनोङ थोरूम सोन्‍गीन देता ङेत्‍सीन ङे झन मि काल्‍बेईला ख्रीष्‍टते गा लाङच्‍येते बात लोपा ङेत्‍क्‍यो। थोगी स्‍यिसीन लेमु ईन्‍दा सोन्‍ला देत्‍च्‍येते लेमु ईन्‍दा ङे छ्याःङ डेला थुपा मेत।

फिलिप्‍पी 1:23

ङे लाईदुनी ङिकाराङ थोजोराङ ईन। ङाराङ बातकामा खिइ सासीन स्‍यिनामेकी ख्रीष्‍टताङराङ देता ङेत्‍च्‍येते ईन्‍देकी स्‍यिसीन काल्‍बेई लेमु ओङच्‍या ओतान सिराच्‍योक लाङगीदुक।

फिलिप्‍पी 2:21

ज्‍येनतेबाचेन येशू ख्रीष्‍ट काम खिताला मेन, खालि खोपरोङला फाइदा ओङच्‍ये छ्य्‌वापाकामा तेइदुक।

कलस्‍सी 3:4

ङुरूङला साम्‍बाते जुनी तेरकान्‍ते ख्रीष्‍ट था तिरी गाङेकी थोङच्‍या खाला देमा ग्‍युरला ओङगो। थेजीनराङ ख्‍योकोन परमेश्‍वरगी ज्‍वा चालाच्‍योक लेमु गाल्‍गीन मान ङेत्‍कीन थेत्ताङ ङ्योम्‍बु ओताते गाङेकी थोङगो।

छ्या स्‍ये च्‍युताते बात 14:13

थेमे दि तिरी स्‍वर्गनेकी “लो दि बात टि। थानामेकी उसो प्रभु येशूला विश्‍वास खिन खिनला स्‍यिकान्‍ते मिओन भाग्‍यमानी ईन,” सिन सिरा ङे थोसुङ। थेमे परमेश्‍वर आत्‍मेकी “ईन, साँच्‍चीराङ दोकराङ ईन। था थेबेकी पीरताङ दुक्‍पे छ्य्‌वापेई ठाल्‍ला ढुक्‍क खाला देता ङेत्‍क्‍यो। पीरताङ दुक्‍पालाङ लेमु काम खिनराङ देतेकी था थेबाला लेमु ओङगो,” सिन सिदुक।