دانیال 5:2 - هُدائے پاکێن کتاب، بلۆچی زبانا

² وهدے بِلشازَرا شرابئے تام چشت، هُکمی دات که هما تلاه و نُگرهێن دَرپ آرگ ببنت که آییئے پیرُک نِبوکَدنِزَرا چه اورشَلیمئے مزنێن پرستشگاها، چه هُدائے لۆگا آورتگ‌اَتنت تانکه بادشاه، آییئے میر و مهتِر، آییئے جَن و سُریَت اِشانی تها بنۆشنت.

دانیال 5:2 Cross References

دانیال 1:2

چه هُداوندئے رَزایا یَهودائے بادشاه، یِهۆیاکیمی پرۆش دات. بادشاهئے جند و هُدائے لۆگئے لهتێن دَرپی گۆن وت بابلئے سرڈگارا، وتی هُدائے لۆگا آورت و دَرپی وتی هُدائے لۆگئے هزانَگا اێر کرتنت.

دانیال 5:11

تئیی بادشاهیا مردے هست که آییا پاکێن هُدایانی روه مان اِنت و تئیی پیرُکئے دئورا گِندَگ بوتگ که آییا باتنی رُژنایی، سَرپدی و هکمت و هُدایانی ڈئولێن داناییے گۆن. تئیی بادشاهێن پیرُک، نِبوکَدنِزَرا اے مَرد جادوگر، ساهر، نجومی و اِستارزانتانی مستر کرتگ‌اَت،

دانیال 5:13

گڑا دانیال، بادشاهئے دێما آرگ بوت. بادشاها گۆن دانیالا گوَشت: ”تئو هما دانیال ائے که چه یَهودائے دَرانڈێهان اِنت، هما که منی بادشاهێن پیرُکا چه یَهودایا آورتگ‌اَنت؟

دانیال 5:18

او بادشاه! بُرزێن ارشئے هُدایا، نِبوکَدنِزَر بزان تئیی پیرُک، بادشاهی، مزنی، شان و شرَپ داتگ‌اَت.

دانیال 5:23

تئو وتارا آسمانی هُداوندئے دێما بُرز زانت و لێکِت و هُکمِت کرت که هُدائے لۆگئے دَرپ تئیی دێما آرگ ببنت. تئو و تئیی میر و مهتِران، تئیی جَنان و سُریَتان اے درپانی تها شراب وارت و تئو نُگره، تلاه، بْرنج، آسن، دار و سِنگێن هُدا ستا کرتنت که نه گندنت، نه اشکُننت و نه سرپدَ بنت. بله تئو هما هُدا شان و شئوکت ندات که تئیی ساه و تئیی سجّهێن راه آییئے دستا اَنت.

دانیال 5:3

گڑا هما تلاهێن دَرپِش آورتنت که چه اورشَلیما، چه هُدائے پرستشگاها آوار جنگ بوتگ‌اَتنت. بادشاه، آییئے میر و مهتِران، آییئے جَنان و سُریَتان اِشانی تها شراب وارت.

دانیال 5:30

هما شپئے شپ بابلیانی بادشاه، بِلشازَر کُشگ بوت.

دانیال 5:4

آیان شراب وارت و تلاه، نُگره، بْرنج، آسن، دار و سِنگێن هُدایانی ستا کرت.