फिलिप्पी 1:20 - परमेश्‍वरए ताँ तमु क्युइर

²⁰ ङए थेबै इच्छा नेरो आशा चु मुँ: ङ खोंयोंइ फापिल् त्हुरिब् आरे। ङ बेल्‍ले भोंसि तब्मुँ, सिल् त्हुलेया, सोल् योंलेया ओंसोंबै धोंले तोगो या ङउँइँले येशू ख्रीष्‍टए मान तरिगे।

फिलिप्पी 1:20 Cross References

भजनमैं 119:116

ङ सोरिबै ल्हागिर क्हिजी फैबै बाछा अनुसार ङलाइ भोंब लमिंन्। ङइ थेंबै आशा फुल् आपिंन्।

भजनमैं 119:80

ङ फापिल् आत्हुबै ल्हागिर क्हिए निसाफमैंइ बिब् धोंले ङए खों छ्याब मुँब आतरिगे।

भजनमैं 25:2

ओ ङए परमेश्‍वर, ङइ क्हिए फिर्न भर लइमुँ, ङलाइ फा पिन् आलमिंन्, ङए शत्तुरमैं ङए फिर ट्होगों तल् आपिंन्।

भजनमैं 62:5

छतसि ओ ङए सो, परमेश्‍वरर मत्‍त्रे भों न्हद्; ङए आशा खीजीन् पूरा लमिंम्।

हितोपदेश 10:28

ठिक के लब्मैंइ आशा थेंबै ताँमैंइ लिउँइँ सैं तोंल् लम्, दिलेया दुष्‍ट म्हिमैंइ थेंबै आशा तोन्-तो तयाम्।

हितोपदेश 23:18

छलस्याँ क्ह्रोंसेंन क्हिइ इनाम योंब्मुँ; धै क्हिइ थेंबै आशा तोन् तोर्न तरिब् आरे।

यूहन्‍ना 21:19

(परमेश्‍वरए मिं थेब् लबै ल्हागिर पत्रुस खैले सिल् त्‍हुम् बिसि येशूजी छ बिल।) चु ताँमैं बिल् खाँबै लिउँइँ येशूजी चने “ङए लिलि प्रद्!” बिइ।

चेला चिब्मैंए केमैं 20:24

दिलेया ङइ ह्रोंसए छ्ह ह्रोंसए ल्हागिर तोइ सैइ आमैं। बरु परमेश्‍वरजी म्हिमैंए फिर दयाम्हाँया लबै बारेर सैं तोंबै ग्वाइ बिप्रबर प्रभु येशूजी पिंबै के ङइ ताँन् लल् खाँरिगे बिब् मत्‍त्रे ङइ मैंम्।

चेला चिब्मैंए केमैं 21:13

दिलेया खिइ बिइ, “क्‍हेमैं छले क्रोसि ङए सैं तले च्योंब् लमुँ? प्रभु येशूए ल्हागिर ङ जेलर फैब् मत्‍त्रे आङिं, यरूशलेमर सिल् त्हुनाबिलेया ङ तयार मुँ।”

चेला चिब्मैंए केमैं 4:31

चमैंइ प्राथना लल् खाँबै लिउँइँ चमैं खागु तबै क्ल्ह्‍यो लायाइ, धै चमैं ताँन् पबित्र प्ल्हजी प्लिंयाँइ, छतमा चमैंइ आङ्हिंन्ले परमेश्‍वरए ताँ पोंइ।

रोमी 12:1

छतसि ओ ङइ खोबै अलि-अङाँमैं, परमेश्‍वरजी ङ्योए फिर च्हौ थेबै ल्हयो लबइले ङ क्‍हेमैंने यो छ्युँ लमुँ: सोगों ख्रो धोंले ह्रों-ह्रोंसए ज्यु परमेश्‍वरलाइ पिंन्। छाबै ख्रो पबित्र नेरो परमेश्‍वरलाइ सैं तोंन् लबै क्‍ह्रोंसेंन्‍बै सेवा ग।

रोमी 5:5

ङ्योइ थेंबै आशार ङ्यो सैं च्योंब तल् आपिं, तलेबिस्याँ परमेश्‍वरजी खीए पबित्र प्ल्ह ङ्योलाइ पिंइमुँ, छतसि परमेश्‍वरजी ङ्योए फिर बेल्‍ले म्हाँया लइमुँ बिसि पबित्र प्ल्हजी ङ्योए सैं न्‍होंर छेनाले सेल् पिंम्।

रोमी 6:13

छलेन ह्रोंसए ज्युर्बै भागमैंलाइ पाप केमैं लबर आल्हैदिद्। बरु सिबइले धबै सोगों तबै म्‍हि धोंले छ्याँबै के लबै ल्हागिर ह्रोंसलाइन परमेश्‍वरए योर पिंवाँन्।

रोमी 6:19

क्हेमैंइ क्होल् आखाँ उ बिसि ङइ क्‍होल्‍ले बिरिइमुँ। ओंसों क्हेमैंइ खैले ह्रोंसए यो प्हलेलाइ पापर च्होवाबै आछ्याँबै केमैं लल् पिंल। छलेन तारे पापर आच्होरिगे बिसि ह्रोंसए यो प्हले परमेश्‍वरए के लबै ल्हागिर पिंवाँन्।

रोमी 8:19

परमेश्‍वरजी बनेबै तोन्दोंरि सैइ परमेश्‍वरए च्‍ह-च्हमिमैं खाब्मैं ङ्‍हे बिसि ङो सेबै त्हिंइ खैंमा ङ्‍हे बिसि ह्रेरिइमुँ।

रोमी 9:33

येशू ख्रीष्‍टए बारेर परमेश्‍वरए छ्वेर छले प्ह्रिइमुँ, “ङ्‌ह्‍योद्, ङइ यहूदीमैंए म्‍हाँजोरि प्हले थुरबै युँमा थेंम्, च युँमार ल्हें म्‍हि थुरसि क्‍हुरयाब्‍मुँ, दिलेया खीए फिर बिश्‍वास लब्मैं खाबै या सैं च्योंब तल् त्हुरिब् आरे।”

१ कोरिन्थी 15:31

ओ अलि-अङाँमैं, ङ्योए प्रभु येशूए फिर क्हेमैंइ बिश्‍वास लबइले ङए सैं भोंइमुँ। छतसि प्रभुए के लबर ङ त्हिंइ ह्रोंसे या सिल् खाँम्।

१ कोरिन्थी 6:20

तलेबिस्याँ खीजी क्‍हेमैं सै फोसि किंब् ग। छतसि ह्रोंसए ज्युज्यै या क्हेमैंइ परमेश्‍वरए मिं थेब् तबै के लद्।

१ कोरिन्थी 7:34

छाबै म्हिए सैं ङ्हिरि तम्। छलेन ब्ह्‍या आलबै च्हमिरिइ अथवा कन्येइ ज्यु नेरो सैं ङ्हिंन-ङ्हिंनइ प्रभुए के खैले लब् ङ्‍हे बिसि प्रभुए केर्न सैं पिंम्। दिलेया ब्ह्‍या लबै च्हमिरिइ ह्रोंसए प्युँए सैं तोंन् लबै ल्हागिर ह्‍युलर्बै सैर न्हुँ लम्।

२ कोरिन्थी 10:8

प्रभुजी ङिलाइ पिंबै अधिकार क्‍हेमैंलाइ न्‍होह्रों लबै ल्हागिर पिंब आङिं, बरु क्‍हेमैंलाइ भोंब् लमिंबै ल्हागिर पिंब् ग। छतसि प्रभुजी ङिलाइ पिंबै अधिकारए बारेर ङइ प्हैंसि पोंलेया ङ फापिल् त्हुरिब् आरे।

२ कोरिन्थी 3:12

छतसि ङिल छाबै क्ह्रोंसेंन्बै आशा मुँबइले सैं तोंबै ताँ बिप्रमा थेबै भों खम्।

२ कोरिन्थी 4:10

येशूजी थोब् धों तबै छ्ह ङिज्यै या थोल् खाँरिगे बिसि ङिए ल्हागिर खी सिमिंबै दुःख मैंसि ङिज्यै या ह्रोंसए ज्युर्न खोंयोंइ बिलै दुःख नोप्रम्।

२ कोरिन्थी 5:15

ङ्यो ह्रोंसए ल्हागिर छ्ह थोब आङिं, खीए ल्हागिर छ्ह थोरिगे बिसि येशू ख्रीष्‍ट ङ्योए ल्हागिर सिमिंसि धबै सोगों तइ।

२ कोरिन्थी 7:14

क्‍हेमैंए बारेर ङइ तीतसने प्हैंलेया क्‍हेमैंए बारेर ङ फापिल् त्हुबै घ्याँ तोइ आरेल। ङिइ खोंयोंन् बिलै क्‍हेमैंने क्‍ह्रोंसेंन्‍बै ताँ बिइमुँ। छलेन ङिइ तीतसने क्‍हेमैंए बारेर प्हैंब् धों तबै के क्‍हेमैंइ लसि उँइँइ।

२ कोरिन्थी 7:4

क्‍हेमैं म्रोंसि ङ ढुक्‍का तसि ङ्‍हो लोंइँमुँ। क्हेमैं म्रोंसि ङए सैं क्होइमुँ। छतसि ङिइ खैतबै दुःख योंलेया ङ सैं तोंन्लेन् टिम्।

फिलिप्पी 1:14

छले ङ झेलर च्युवासेरो ल्‍हें अलि-अङाँमैं प्रभुए फिर बिश्‍वास लबर भोंब् तइमुँ, धै चमैंइ आङ्हिंनले परमेश्‍वरए ताँ पोंल् खाँइमुँ।

फिलिप्पी 2:17

क्‍हेमैंइ लबै येशू ख्रीष्‍टए फिर्बै बिश्‍वास परमेश्‍वरए मिंर ख्रो पिंब् धों ग। छतसि क्हेमैंइ परमेश्‍वरए मिंर पिंबै सैमैंए फिर ङइ ह्रोंसलाइन् ख्रो पिंल् त्हुलेया, ङए सैं तोंब्मुँ। छले क्हेमैं ताँनने ङ बेल्‍ले तोंइमुँ।

कलस्सी 1:24

क्हेमैंए ल्हागिर दुःखन् योंरिलेया ङ सैं तोंइमुँ, तलेबिस्याँ ख्रीष्‍टए ज्युए ल्हागिर, खी क्वेंब्मैंए ल्हागिर ङज्यै या नोल् त्हुबै दुःख ङ‍ए ज्युर्न नोसि पूरा लम्।

१ थेसलोनिकी 5:23

शान्ति पिंबै परमेश्‍वरजी ताँन् सैर क्‍हेमैंलाइ पबित्र लमिंरिगे, धै ङ्योए प्रभु येशू युबै त्हेर क्हेमैंए ज्यु, सैं, खों, बेल्‍ले छ्याँब नेरो खोट आरेब तरिगे।

१ पत्रुस 4:16

दिलेया क्‍हेमैं ख्रीष्‍टियान तबइले दुःख योंल् त्‍हुस्‍याँ क्‍हेमैं फा आपिद्, बरु ख्रीष्‍टए मिंउँइँले क्हेमैंइ परमेश्‍वरलाइ धन्‍यबाद पिंन्।

१ यूहन्‍ना 2:28

ओ ङइ खोबै कोलोमैं, ख्रीष्‍ट युमा ङ्यो भोंब तरिगे, धै खी युबै त्हिंइर खीए उँइँर ङ्यो फापिल् आत्‍हुरिगे बिसि खीनेन् घ्रिन् तसि प्रद्।