फिलिप्पियों 4:19 - गददी

¹⁹ इन्दा पिता प्रमात्मां, अपणै अपार धन रै अनुसार मसीह यीशु मन्ज तुन्दी सब जरूरता जो पूरी करला।

फिलिप्पियों 4:19 Cross References

मत्ती 6:32

क्ओकि गैर यहूदी ईयां सबी चिजा री खोज मन्ज रैहन्दै हिन, अतै तून्दा स्वर्गीय पिता जाणदा हा, कि तुसिओ ऐह सब चिजा चहिन्दी हिन।

यूहन्‍ना 20:17

यीशुऐ तैहा सोगी बल्लू, “मिन्जो पकड़ी मत रख, क्ओकि अऊँ हालि तिकर पिता बलै ऊपर ना गच्छुरा हा, पर मेरै भाई बलै गिचीकरी तियां सितै बली दे, कि अऊँ अपणै पिता अतै तून्दै पिता, अपणै प्रमात्मैं अतै तून्दै प्रमात्मैं बलै ऊपर चलूरा हा।”

यूहन्‍ना 20:27

ता तिनी थोमा सोगी बल्लू, “अपणी उँगळी ऐड़ी लेई करी मेरा हत्था जो हेर अपणा हत्थ लेई करी मेरी प्रहि मन्ज पा, अतै अविस्वासी ना पर विस्वासी बण।”

रोमियो 1:8

पैहलै अऊँ तूसु सबी तांयें यीशु मसीह रै द्धारा अपणै प्रमात्मैं रा धन्यवाद करदा, क्ओकि तून्दै यीशु पुर विस्वास करनै री चर्चा पूरै रोमी साम्राज्य मन्ज भूणा लगुरी हा।

रोमियो 11:33

आये हाय! प्रमात्मैं रै अनुग्रह रा धन, ज्ञान अतै बुद्धि कै ही गम्भीर हा! कैतना असम्भव हा असु तांयै प्रमात्मैं रै फैसलै अतै तसेरै रस्तै जो समझणा।

रोमियो 2:4

तू प्रमात्मैं री दया, सहनशीलता अतै धीरजरूपी धन जो तुच्छ समझदा हा पर ऐह ना समझदा कि प्रमात्मां दया सोगी इंतजार करू करदा कि तू अपणै पापा थऊँ मन फेरा।

रोमियो 8:18

अऊँ जाणदा हा कि ऐस युग रै दुख अतै क्‍लेश तैहा महिमा सामणै, जैड़ी प्रमात्मां असु पुर प्रकट करनै बाळा हा, कुछ भी निय्आ।

रोमियो 9:23

प्रमात्मां धीरज सोगी भाळ करदा कि सो प्रभावशाली रूपा सोगी अपणै कम्मा जो प्रकट करा तियां मणु पुर जियां पुर सो दया करदा हा। जियां जो तिनी टैमां थऊँ पैहलै ही चुणी लैऊरा कि सो तियां सोगी रेय्आ।

2 कुरिन्थियों 12:21

मिन्जो ड़र हा जैहणै मुँ दोबारा तूसु बलै ईणा ता प्रमात्मां मिन्जो तून्दै सामणै नम्र करा। मिन्जो ऐसा गल्ला रा दुख भूणा कि कईये अपणा पुराणा पाप ना छडुरा हा। तुहै अपणै गन्दै कम अतै व्यभिचार अतै लुचपन थऊँ, जैडा तुहै करदै थियै तैत थऊँ अपणा मन ना फिराऊरा हा।

2 कुरिन्थियों 4:17

क्ओकि इन्दा पल भर रा हल्का जिन्‍ना क्‍लेश असु तांयें बड़ा ही जरूरी अतै अनन्त महिमा पैदा करदा गान्दा हा;

इफिसियों 1:18

अऊँ ऐह प्रार्थना करदा कि प्रमात्मां तून्दै दिला तेज सोगी भरा अतै तुहै सो उम्मीद अतै सच्चाई जो समझन जैड़ी तिनी तियां जो दितुरी हा जियां जो तिनी हैदुरा हा। तसेरै पवित्र मणु जैड़ै तसेरी महिमा रै भण्ड़ार मन्ज अमीर हिन।

इफिसियों 1:7

मसीह रै खूना रै बलिदान रै द्धारा असिओ इन्दै पापा थऊँ माफी अतै छुटकारा मुळु। प्रमात्मैं रा अनुग्रह कैतना महान हा जैड़ा तिनी असिओ दिता।

इफिसियों 2:7

तिनी ऐह करू कि सो ईणैबाळै टैमां मन्ज दस्सी सका कि सो असु पुर कैतना ज्यादा दयालु हा, क्ओकि अहै मसीह यीशु सोगी जुडुरै हिन।

इफिसियों 3:16

अऊँ प्रार्थना करदा कि प्रमात्मां अपणी महिमा रै धना सितै अपणी आत्मा रै द्धारा तुसिओ सामर्थ देय्आ तून्दै अन्दरूनी मनुष्यत्व जो बलवन्त करनै तांयै।

इफिसियों 3:8

मिन्जो पुर जैडा कि सबी पवित्र मणु मन्ज सबी थऊँ हल्कै थऊँ हल्का हा, फिरी भी मिन्जो पुर ऐह अनुग्रह भुआ, कि अऊँ गैर यहूदी जो मसीह यीशु रा सो सुसमाचार हणाऊ जैतिओ कि कोई नापी ना सकदा।

फिलिप्पियों 4:7

ता प्रमात्मैं री शान्ती जैड़ी कि मणु री समझ थऊँ बिलकुल बाहर हा, तून्दै दिला अतै विचारा जो मसीह यीशु सम्भाळी करी रखा।

कुलुस्सियों 1:27

प्रमात्मैं यहूदी अतै गैर यहूदी पुर प्रकट करना चाहन्दा कि यीशु रा धन अतै महिमा सबी मणु तांई हा, अतै ऐह ही सो भेद हा कि मसीह तूसु मन्ज जिन्दा हा, ऐह तुसिओ अपणी महिमा री उम्मीद मन्ज सहभागी भूणै रा भरोसा दिन्दा हा।

कुलुस्सियों 3:16

सदा मसीह रै बचना रै बारै मन्ज ध्यान करदै रेय्आ ताकि सो तून्दै कमा अतै सोच विचारा जो अपणै वशा मन्ज करी सका। सिद्व ज्ञाना सोगी अक्की दुऐ जो सखा अतै चेतावनी दिन्दै रेय्आ अतै अपणै-अपणै मनां मन्ज धन्यवाद सितै प्रमात्मैं रै भजन अतै स्तुतिगान अतै आत्मिक गीत गा।

1 थिस्सलुनीकियों 2:12

कि तून्दा चाल-चलन प्रमात्मैं रै मुताबक भोआ जैडा कि तूसु जो अपणै राज्य अतै महिमा मन्ज हैददा।

1 तीमुथियुस 6:17

ऐस संसारा रै अमीर मणु जो आज्ञा दे कि सो घमण्‍ड़ी ना भून अतै चंचल धन पुर उम्मीद ना रखन, पर प्रमात्मैं पुर उम्मीद रखन जैडा कि इन्दै सुखा तांई सब कुछ मता सारा दिन्दा हा।

फिलेमोन 1:4

जैहणै भी अऊँ तूसु तांयै प्रार्थना करदा हा अऊँ तूसु तांयै सदा प्रमात्मैं रा धन्यवाद करदा।

1 पतरस 5:1

अऊँ तूसु सांईयै अक्क तजुर्वै मन्ज स्याणा भूणै रै नातै तूसु स्याणै सितै कुछ बलणा चाहन्दा हा। मैंई अप्पू तिन्या दुखा जो हेरूरा हा जैड़ै मसीह असु तांयै सहू थू। जैहणै तैस दोबारा ईणा मुँ भी तसेरी महिमा मन्ज सहभागी भूणा। अऊँ अक्क तून्दा साथी तजुर्वै मन्ज स्याणा भूणै रै नातै तूसु सोगी बिनती करदा

1 पतरस 5:10

अबै प्रमात्मां जैडा सब अनुग्रह रा दाता हा, जिनी तुसिओ मसीह यीशु मन्ज अपणी सदा काल री महिमा तांयें हैदुरा हा, तून्दै थोड़ी देरा तक दुख सैहणै थऊँ बाद अप्पू ही तुसिओ सिद्ध, स्थिर अतै बलवन्त करना।