पिलिपिया 4:8 - पवित्र पोल्‍ले

⁸ विस्वासुल्‍कुनिटा! आकिरते इंकुंदि पोल्‍ले वेहानद मंता. अद बतल इत्‍ते, बव पोल्‍लें अय्ते सत्‍तेम, तल्‍सकुननालायक मंतां, अव पोल्‍लेना बारेमतेन विचारम कीसेक मंटु. इत्‍ते, बरोसालायक पोल्‍लें, कदरलायक पोल्‍लें, नीतिता पोल्‍लें, पवित्र पोल्‍लें, कुसिता पोल्‍लें, सोबांचना पोल्‍लें इवे पोल्‍लेना बारेमते विचारम कीसेके मंटु.

पिलिपिया 4:8 Cross References

मत्‍तयाल 22:16

परिसिल्क येसुन पसांचना उपायाल्‍क कीसि, ओरा इच्‍चुर सिस्युल्कुन हेरोद राजाना मनकालोरतोनि ओनाहेके लोहचीतुर. ओर येसुनगा होंचि इल्‍हा इत्‍तुर. “गुरु, निमे निजम वळ्‍कानोन, पेनदा हर्दा बारेमते सत्‍तेमते करहानोन आंदिन इंचि माक एरपाट मंता. बोर बतल इनिनागानि दाना पिकिरगुडा किय्‍यिन, निमे लोकुल्‍कुना मोकम हूळसि वळ्किन, इदिंका माकु एरके.

लूकाल 16:15

पजा येसु ओर्कुन, “मिमेट लोकुल्‍कुना मुन्‍ने, ‘मोमोट नीतिमंतुल्‍कुम’ इंतिर, गानि पेन मीवा मनसुन एरपाट कींता. बव पोल्‍लें अय्ते मनकना विचारमते कदरतव मंतां, अव पोल्‍लेन पेन बिल्कुल हय्‍सो.”

लूकाल 2:25

अवे तूकुल्कुने येरुसलेमते सिमोन पोरोलतोर वरोर मनकल मनुंदुर. ओर नीतिमंतुड आनि पेनदा पोल्‍लेपोर्रो ताकानोर मत्‍तोर. इस्राएलता लोकुल्‍कुंक पेन बस्के सुकम-सांति हींतनो इंचेके ओर एदुर हूळसेक मनुंदुर. ओनतोनि पवित्र आत्मा मत्‍ता.

लूकाल 23:50

पजा अगा यहुदिया एरियाता अरिमताइ नाटेनोर वरोर योसेप इनना मनकल मत्‍तोर, ओर यहुदिल्कुना पंचादिता मेंबर मत्‍तोर. अल्‍हेने ओर बेस नीतिमंतुड मत्‍तोर. पंचादिते येसुन हव्कना बारेमते येतता निरनायम ओन्क इस्‍टम मनाहिल्‍ले. इस्राएल देसेमते पेन दाना राज्येम बस्के निलाहंता इंचि ओर एदुर हूळसेक मत्‍तोर.

योहान 7:18

बोर अय्ते ओना सतता पोल्‍लें कराहंतोरो, ओर ओना पोरोल्तुने पेद्‍दा कियालय हूळांतोर. गानि बोर अय्ते ओन लोहतोन्कु कदर दोर्कना इंचि इनकुंतोरो, ओर सत्‍तेम मनकल आंदुर, ओनगा बतले आबद्‍दम हिल्‍ले.

प्रेरितुल्‍कुना कबाह्‍क 10:22

अस्‍के आ मनकालोर, “माकुन उंदि पोलिस दलमता दरोगाल कुरनेलियुस इनानोर लोहतोर. ओर बेस नीतिमंतुड आनि पेनदुक वेरियसि ताकाना मनकल आंदुर. यहुदि जातिता लोकुल्‍कुने ओर बेस पोरोल होत्‍तोर. नीकुन ओना लोन केया वेहचि, नीहेंदाल ओन्क पोल्‍लें वेहालय उंदि पवित्र पेनदा दूता ओन्क वेहता,” इंचि इत्‍तुर.

प्रेरितुल्‍कुना कबाह्‍क 22:12

अगा हनन्‍याल पोरोलतोर वरोर मनकल मत्‍तोर. ओर मूसाना नियम परकारम ताकुंदुर. अगाटा अंटोर यहुदिल्क इंका ओन बेस मनकल इनुंदुर.

प्रेरितुल्‍कुना कबाह्‍क 6:3

अदुनहाटीं नावा विस्वासुल्‍कुनिटा! मिमेट मीवव्टेटाले बेस कदर, बुद्‍दि आनि पवित्र आत्माते निंडिस मत्‍ता एडुर मांडसातुन पेरकुंट. मोमोट ओर्कुन ई कबळ पोर्रो इर्रांतोम.

रोम सहरतोरहाटीं पौलुसना सिट्‍टि 13:13

पोद्‍दला ओप्‍पनालायक मनम ताकाना. अदुनहाटीं लावारिस तिरिया मनि, कराब पार्टिं कियामन्‍नि, रिम्मा वायानव उनामन्‍नि, बोगम कबाह्‍क कियामन्‍नि, जगडाल्‍क कियामन्‍नि, इंकावरोन पोर्रो कळ्‍क पोत्‍ता मन्‍नि, गानि मनम बेसता हर्दे ताकाना.

रोम सहरतोरहाटीं पौलुसना सिट्‍टि 13:3

बेसता कबाह्‍क कियानोंकु अदिकारिना वेर्रे मन्‍नो, तप्पु कबळ कियानोंक अदिकारिना वेर्रे मनंता. अदुनहाटीं अदिकारिंक वेरियाकोंटा मंदना इत्‍ते, मिमेट सत्‍तेमते ताकट. अस्‍के ओर मीकुन मेच्‍चुकुंतोर.

रोम सहरतोरहाटीं पौलुसना सिट्‍टि 14:18

इल्‍हा किरिस्‍तुना सेवा कीतोन पेन मेच्‍चुकुंता, लोकुल्‍कुना नड्‍डुमगुडा ओनकु कदर दोर्कंता.

रोम सहरतोरहाटीं पौलुसना सिट्‍टि 2:29

बोर अय्ते पेनदा इच्‍चा मत्‍ताप ताकंतुर ओरे निजम यहुदिल्क आंदुर. मूसाना नियम परकारम पलाताल आतदे कतना आयो, गानि पेनदा आत्माहेंदाल मनसु मारियता मनकालोरे निजम कतना आता यहुदिल्क आंदुर. इसंटा मनकालोर लोकुल्‍कुना कदरतुन आयो गानि पेनदा कदरतुन पहकंतुर.

1 कुरेंति 4:5

अदुनहाटीं न्‍यायम कियाना वेला वायाका मुन्‍ने बोने न्‍यायम कियमट, सामि वायानाल एदुर हुळाट. ओर हीकटते मक्‍किस मत्‍ता पोल्‍लेन वेल्‍गुने तरंतोर, मनसुने मत्‍तवुन पलाते अरहंतोर. अस्‍के पेन अंटोर्कुन मिमेट बेस कीतिट इंचि मेच्‍चुकुंता.

2 कुरेंति 13:7

ओक्‍काला मोमोट निजम प्रेरितुल्‍कुनालेसीं मीक दिस्‍साकोन्‍नागुडा, बतल सत्‍तेम मंता अदे कियाना इंचि मीहाटीं पेनदुक पारतना कीसेक मंतोम.

2 कुरेंति 6:8

इंकावरोर माकुन कदर हिय्‍यिना-हिय्याकोन्‍ना, बेसतोर इन्‍निना-इन्‍नाकोन्‍ना, माकुन नळेह कियानोर इंचि इंतुर गानि मोमोट सत्‍तेमतोर्कुम आंदुम.

2 कुरेंति 8:18

अल्‍हेने तीतुनतोनि अन्‍नि कलिसियाने बेसता कबुरतुन वेहालय पोरोल पेय्सतोर वरोर दादनगुडा लोहसेक मंतोम.

2 कुरेंति 8:21

सिराप पेनदा मुन्‍नेने तप्‍पु हिल्‍वाप आयो, गानि मनकालोरा मुन्‍नेगुडा तप्‍पु हिल्‍वाप मंतोम.

गलातिया 5:22

पेनदा आत्माता कबाह्‍क इल्‍हा मंतां: पावरम कियमळ, कुसिते मनमळ, सांतिते मनमळ, ओप्के पीसि मनमळ, दया कियमळ, मंचितनम, इमानदारते मनमळ, मेत्‍तगा मनमळ, बसोंटा परिक्‍सा वायिनागानि अव्टे अर्राकोंटा सततुन आपकुनमळ.

इपीसि 4:25

मनम अंटोरम उंदे मेंदुल्ता वेरे-वेरे बागाल्क आताहाटीं, इंदकेटाल वरोनतोनि-वरोर आबद्‍दम वळ्‍कमळ होळसिसि, हरेक मनकल सत्‍तेमे वळ्‍कगोम.

इपीसि 5:9

वेलगुने पिसते सिराप अन्‍नि तीरकुना बेसतनम, नीतितनम आनि निजम इवे दिसंतां.

इपीसि 6:14

अदुनहाटीं मिमेट सत्‍तेमतुन नडि पट्‍टालेह्‍का दोह्‍चि, नीतितुन इनुम अंगिलेह्का मेंदुल्क केरसि,

पिलिपिया 3:1

विस्वासुल्‍कुनिटा! आकिरते नना इंकुंदि मल्का वेहांतन, पेनदापोर्रोटा मीवा विस्वासमते मिमेट कूस मंटु. रासता पोल्‍लेंगें ऊके-ऊके रासालय नाक बतल तकलिप आयो. बारित्‍ते इव पोल्‍लें मीकुन तप्‍पुड बोदानाल कापाळंतां.

कुलुसि 4:5

विस्वासम कियवोरतोनि बेस तेल्‍विते ताकट, मोका दोर्कतस्के ओर्क बेसता कबुर वेहाना पायदा तप्‍पाकोंटा एतट.

1 तेसलोनि 4:12

इल्‍हा मत्‍ते मिमेट विस्वासम कियवोरा मुन्‍नेगुडा कदरलायक मनंतिर, बोना पोर्रोने बर्वु आयिर.

1 तिमोति 2:2

मनम राजालोराहाटीं आनि पेद्‍दा-पेद्‍दा अदिकारिल्कुनाहाटीं पारतना कियगोम. अल्हा कीते मनम आरामते, सांतिते आनि पेनदुक नच्‍चना कदरगल्‍ला पिस्वर पिसा पर्रांतोम.

1 तिमोति 3:11

इल्हेने मुर्ताह्कगुडा अंटोर कदर हियनलायक मनगोम. अवुनगा वेरेतोर्कुन अपमानम कियना गुनम मनामन्‍नि. गानि बेस ओप्‍केते अन्‍नि पोल्‍लेने विस्वासम कियनलायक अव मनगोम.

1 तिमोति 3:4

ओर ओना सतता कुटुंब बारेमता अन्‍नि जिम्मेदारिं बेस हूळकुनानोर मनगोम, ओना मर्क-मियाह्क ओना देकरेकते मंचेके ओना बेस कदर कियनोर मनगोम.

1 तिमोति 4:12

नीवा लेय्यातनमहेंदाल बोरे नीकुन सिन्‍नगा हूळानायो. गानि वळ्कुमळते, ताकमळते, पावरम हूप्‍समळते, विस्वासमते, पवित्र मनमळते विस्वासुल्‍क नीकुन हूळसि करियगोम, अल्हा मन्‍नु.

1 तिमोति 5:10

इंका अद मुरतळ बेस कबाह्‍कुने बेस पोरोल तरकुंचि मनगोम, मर्क-मियाह्कुन पोस कीतद आयगोम, वाता हेळमितोरा सेवा कीतद आयगोम, पवित्र लोकुल्‍कुना काल्क नोरतद आयगोम, तकलिपने मत्‍तोर्कुंक सहायम कीतद आयगोम इंका अन्‍नि परिस्तितिने बेस कबाह्‍क कियालय अप्पजेपतद आयगोम.

1 तिमोति 5:2

अल्हेन पेद्‍दा वयम मुर्ताह्‍कुन यावह्क इन्कुंचि आनि सिन्‍ना वयम मुर्ताह्‍कुन हेलाह्क इन्कुंचि पुरागा पवित्र मंचेके अवुंक तेल्‍पिचि वेहा.

तीतु 1:8

गानि आ अदिकारि हेडमितोन बेस हूळकुनानोर आयगोम, बेस कियमळतुन पावरम कियानोर आयगोम, मनसुना आसेन आपिसि पीसि मनानोर आयगोम, ओर सादा-सिंपल मनागोम, पवित्र आनि सततुन आपकुंचि मनानोर आयगोम.

तीतु 2:14

इंका किरिस्‍तु मनाकुन अन्‍नि तीरकुना तप्‍पुड कबाह्कुनाल तपिच्‍चि, बस्‍केळ्‍क बेसता कबाह्के कियगोम इंचि मनसु इर्राना ओना सतता लोकुल्‍क मनम आयगोम इंचि, मनाकुन पवित्र कियनाहाटीं ओना सतता जीवातुन हीतोर.

तीतु 2:2

ओप्‍केते, इमानदार मनमळते, सततुन आपकुनमळते, विस्वासमते, पावरमते, दैरनेमते, ओर्सकुनमळते गट्‍टिगा मंदालय मातरलोर्कुंक करहा.

तीतु 2:7

बेस कबाह्‍क कीसि निमे अन्‍नि पोल्‍लेने ओराहाटीं उंदि उदाहरनलेसीं मन्‍नु. नीवा कराहमळ सत्‍तेम आनि लोकुल्‍क बेस केंजनालायक मनगोम.

तीतु 3:14

अवसराल्कुन दोर्किच्‍कुननाहाटीं मना लोकुल्‍कगुडा बेस कबाह्‍क कीसेके मनमळ करियगोम, अल्हा कीते ओर पलम हियानोरलेह्का मनांतुर.

इब्रि 11:2

मना एनकटा पेद्‍दाल्कुनगा इसोंटा विस्वासम मत्‍ता, अदुनहाटींगे पेन ओर्कुन मेच्‍कुत्‍ता.

इब्रि 13:18

माहाटीं पारतना कीसेके मंटु. अन्‍नि तीरकुने मोमोट निजम बतल अदे कीसेके, बेस कदरते पिस्सेक मंतोम. इंका मावा बुद्‍दिगुडा सत्‍तेम मंता इत्‍ता बरोसा माकु मंता.

याकोब 1:27

बोर अय्ते दिक्‍कु हिल्वोर्कुना, मुंडामोस्तवुना तकलिप लोप्पो सहायम कींतोर, इद दुनियाता कराब कबाह्कुनाल लक्‍कु मनंतोर, असंटोर मना पेनबाबाना मुन्‍ने दोसेम हिल्वोर पवित्र आंदुर.

याकोब 3:17

गानि पोर्रोटाल वायाना तेल्वि अद मोदाला अय्ते पवित्र मनंता, आयंका सांति हियानद, सीदा-सादा गुनमतद, इंकावरोना पोल्‍ले केंजालय तयारते मनानद, दया आनि बेसता कबाह्‍क कियानद, अद बेदबाव कियवद, इमानदारते मनानद आंद.

1 पत्रु 1:22

मिमेट सत्‍तेमता हर्रि ताकसि मीवा आत्मातुन पवित्र कीकुत्‍तिर. अदुनहाटीं मिमेट वरोंक-वरोर पावरम कीसेके मंतिट. अल्‍हेने इंदके मीलेसीं विस्वासुल्‍क आतोर्कुन मिमेट पूरा मनसुनाल पावरम कीम्‍टु.

1 पत्रु 2:12

मिमेट अविस्वासुल्‍कुना नड्‍डुम मंतिट इंचि बेस ताकट. ओर मीकुन कराब लोकुल्‍क इंचि बदनाम किय्यिनागानि मीवा बेस कबाह्‍कुन हूळसि, पेन वायाना रोजुने ओर इंका पेनदा कदर कियानुर.

1 पत्रु 4:8

अन्‍निंकन्‍ना पेद्‍दा पोल्‍ले बतल इत्‍ते, वरोंक-वरोर एक्‍को पावरम कीम्‍टु, अल्हा कीते वेल्‍लेने पापाल्कुन मापि किया परकिर.

2 पत्रु 3:1

पावरमगल्‍लोरिटा! इद रोंडो सिट्‍टि नना मीक रासतन. इव रोंडु सिट्‍टिने मीवा पवित्र मनसुन जेगर्ताते इर्राट इंचि नना मति कीसि हीतन.

1 योहान 3:18

अदुनहाटीं नावा पिलाल्‍कुनिटा! मनम मना पावरम सिराप तोळ्‍दा पोल्‍लेनेन आयो गानि, सत्‍तेमते बेसता कबाह्‍क कीसि पावरम हुप्‍साना.

1 योहान 3:3

किरिस्‍तुनपोर्रो इसोंटा आसे इर्राना हरेक मनकल किरिस्‍तु पवित्र मत्‍ताप कुद्‍दुगुडा पवित्र कीकुंतोर.

1 योहान 4:1

पावरमगल्‍लोरिटा! नहगा पेनदा आत्मा मंता इनना अंटोरपोर्रो विस्वासम कियमट. मोमोट पेनदा कबुरतोरम इंचेके, तप्‍पुड बोदां कराहनोर वेल्‍लेन मंदि दुनियाते वेलियसंतुर. अदुनहाटीं बरोसा कियाका मुन्‍ने आ वळ्‍कानोनगा मनना आत्मां पेनदागटाल वातावेना इंचि, परिक्‍सा कीसि हुळट.