पिलिपिया 2:2 - पवित्र पोल्‍ले

² इव अन्‍नि पोल्‍लें निजमे गदा! अय्ते मीवा अंटोरा विचाराल्क बस्‍केळ्‍क उंदे मन्‍निंकांटी, मिमेट वरोंक-वरोर उंदच्‍चोने पावरम कीम्‍टु, मीवा अंटोरद उंदे मनसु, उंदे उद्‍देसम मनना. इल्‍हा पिसतिरित्‍ते नना निजमते पुरागा कूस मनंतन.

पिलिपिया 2:2 Cross References

योहान 3:29

मरमिन पेडल मत्‍तागेन मरमिन पेगिड मनंता. नना अय्ते मरमिन पेडाना पक्‍काते निलसि मनना ओना दंटागानसंटोन आंदुन. मरमिना पेडल बतलन्‍ना वेहते अद केंजसि आ दंटागाल वेल्‍लेन कूस आंतोर. ननागुडा अल्हेन, लोकुल्‍क ओनगा होननद हूळसि नना पुरागा कुसिते निंडसोत्‍तन.

प्रेरितुल्‍कुना कबाह्‍क 1:14

ईरतोनि इच्‍चुंग मुर्ताह्क, येसुना यावल मरियम, ओना तम्मुह्‍क ईर अंटोर उंदे मनसुने पारतना कीसेके मनुंदुर.

प्रेरितुल्‍कुना कबाह्‍क 2:1

पेंतेकोस्‍त पंडुगु रोजुने अंटोर विस्वासुल्‍क उंदि जेगाते जमा आसि मत्‍तुर.

प्रेरितुल्‍कुना कबाह्‍क 2:46

रोज गुळिते उंदि मनसुने जमा आयुंदुर. ओर लोन-लोन हारि उराहचि, आनंदमते पीटे बतले अन्‍समन्‍स हिलाकोंटा अंटोर कलियसि गाटो तिनुंदुर.

प्रेरितुल्‍कुना कबाह्‍क 5:12

अल्‍हेने प्रेरितुल्कुना कय्‍दाल वेल्‍ले चिन्‍हां, इचंत्रमता कबाह्‍क लोकुल्‍कुना मुन्‍ने आयुंदुं. विस्वासुल्‍क अंटोर गुळिते सुलेमान राजाना पंदिरतगा बस्‍केळ्‍क उंदि मनसुने जमा आयुंदुर.

रोम सहरतोरहाटीं पौलुसना सिट्‍टि 12:16

अंटोरतोनि बेस कलियसि मंटु, पोमाडेंगि वेहकुन्‍मटु. कदर हिल्वा लोकुल्‍कुनतोनि बेस कूळसि मंटु, मोमोटे तेल्विगल्‍लोरम इनकुनमटु.

1 कुरेंति 1:10

विस्वासुल्‍कुनिटा! मीलोप्‍पो जगडाल्‍क आसेक मंतां इंचि क्‍लोयेना लोतोर नाक वेहतुर. अदुनहाटीं मिमेट अंटोर उंदे पोल्‍लेते ताकाटु, मीलोप्‍पो वरोनद-वरोंक अर्राकोंटा मनमट, गानि मिमेट उंदे मनसुने, उंदे विचारमते कलियसि मंटु इंचि नना मीक मना सामि येसु किरिस्‍तुना पोरोलते विनंति कीसेक मंतन.

2 कुरेंति 13:11

विस्वासुल्‍कुनिटा! नना आकिरते वेहानद इदे गदा, कुसिते मंटु. मीवा गुनम बेस इर्राट, वरोंक-वरोर दैरनेम हीम्टु, उंदि मनसुने मंटु, सांतिते मंटु, अस्‍के पावरम आनि सांति हियाना पेन मीवातोनि मनंता.

2 कुरेंति 2:3

नना अगा वातस्के नाक बोराहेंदाल अय्ते कुसि आयाना मंता, ओरा अंटोराहेंदाल नाक दुक्‍कम आयामन्‍नि इंचि नना मुन्‍ने अद सिट्‍टि रासि लोहतन. नाक मी बारेमते विस्वासम मंता, नावा कुसि मीवा अंटोरदगुडा कुसि आंदु.

2 कुरेंति 7:7

सिराप ओर वाताहेंकेन आयो गानि मीहेंदाल ओनकु दोर्कता आ दैरनेमता हेंदालगुडा. ओर नावापोर्रो मत्‍ता मीवा इच्‍चाना बारेमते, दुक्‍कमता बारेमते, जोसता बारेमते वेहतोर. अदुनहाटीं नना इंका एक्‍को आनंदमते मंतन.

पिलिपिया 1:4

बेसता कबुर केंजसि विस्वासम कीता रोजुनाल अय्ते इदवेरदाकागुडा बेसता कबुरतुन वेहना नावा कबळते मिमेट नाकु तोळ मंतिर. अदुनहाटीं नना बस्के-बस्के अय्ते पारतना कींतन अस्‍के-अस्‍के वेल्‍लेन कुसिते मीवाहाटीं पारतना कींतन.

पिलिपिया 2:16

पिस्वर हियना पेनदा पोल्‍लेतुन गट्‍टिगा पीसि ताकट. इदुना हेंदाल किरिस्‍तु वायाना रोजुने, मीवाहाटीं नना कीता कस्‍टम, वितलाटा एर्तम आयाहिल्‍ले इंचि कुसिते वेहंतन.

पिलिपिया 2:20

मीवा बेसताहाटीं मनसुनाल चिंता कियानोर नहगा ओन्क तप्‍पा वेरे बोरे हिल्‍लोर.

पिलिपिया 4:2

युवादिया, सुंतुके अक्‍काह्कुनिटा मिमेट येसु किरिस्‍तुनोर आंदिर, अदुनहाटीं मिमेट जगडाल्‍क होळसि सामिना लोप्पो उंदि मनसुने मनना इंचि नना विनंति कीसंतन.

कुलुसि 2:5

नना मेंदुल्ते मिहागटाल लक्‍कु मंतन, गानि आत्माते मिहागेन मंतन. मीवा रोजता पिस्वर आनि किरिस्‍तुनलोप्‍पो मंदना मीवा गट्‍टि विस्वासम हूळसि नाक वेल्‍लेन कुसि आसेक मंता.

2 तेसलोनि 2:13

सामिना पावरमगल्‍ला विस्वासुल्‍कुनिटा! मिमेट पवित्र आत्माताहेंदाल पवित्र आसि, सत्‍तेमते विस्वासम इर्सि पिसालय पेन मीकुन मुन्‍नेने पेरता. अदुनहाटीं माकु मीवा बारेमते पेनदुक बस्‍केळ्‍क दन्यवाद कियमळ गावाले.

2 तिमोति 1:4

नावाहाटीं निमे पोंगागोटता कांडेरतुन मति कीसि नना नर्का-पिय्यल नीकु कलियाना इंचि इच्‍चा कीसंतन, इवटेन नावा आनंदम पुरागा आंता.

पिलेमोन 1:20

अदुनहाटीं नावा तम्मा! सामिना पोरोलते ओनेसिमुसना बारेमता विनंतितुन ओप्‍कुंचि, किरिस्‍तुना लोप्पो नावा मनसुंकु सांति हीम.

2 योहान 1:4

पेनबाबाल मनाकु हीता आदेस परकारम, नीवा इच्‍चुर पिलाल्क, सत्‍तेमते ताकानदुन हूळसि नाकु वेल्‍लेन कुसि आसेके मंता.

3 योहान 1:4

नावा पिलाल्क सत्‍तेमते ताकसेक मंतुर, इत्‍ता पोल्‍ले नाकु वेल्‍लेन कुसितुन हींता. दीनकु तप्‍पा इंका बद्‍दे पोल्‍ले केंजसि नाकु इच्‍चोन कुसि आयो.