फलिपी 1:11 - जीवन को च्यानणो (सेकावाटी नया नियम की पोथ्या)

¹¹ धारमिक्‍ता का चोखा लखणाऊँ थारो जीवन भरज्यावै, जखो परमेसर की मेमा अर जे-जैकार ताँई ईसु मसीऊँ मिलै ह।

फलिपी 1:11 Cross References

मत्ती 5:16

थारा चोखा काम बि दिआ क च्यानणा की जंय्यां चमकणा चाए जिऊँ दुसरा मिनख भला कामानै थारै जरिए देख सकै अर थारा परम-पिता की जखो ईस्बर नगरी म ह बिकी बडाई करै।

यहून्ना 15:16

थे मनै कोनी टाळ्या पण म थानै टाळ्यो हूँ, अर थानै बोळा सारका फळ ल्याबा को काम सूप्यो हूँ। अंय्यां का फळ फळो जखा सदाई बण्या रेह्‍वै, अर इ बजेऊँ परम-पिता बो सक्यु देसी, जोक्यु बी थे मेरा नामऊँ बिऊँ माँगस्यो।

यहून्ना 15:2

बो माली हरेक बी डाळीनै काटै ह, जखी फळ कोनी ल्यावै, अर बि डाळीनै छांगर साप करै जखी फळ ल्यावै ह, जिऊँ बा ओरबी फळै।

यहून्ना 15:8

जखी परम-पिता चावै ह, थे बंय्यांई करो जणा इऊँ परम-पितानै मान मिलसी अर जणाई बेरो पड़सी क थे मेरा चेला हो।

रोमीयो 15:28

जणा ओ काम कर मतबल भेळा करेड़ा इ धननै जिमेबारी क सागै समळार, थारी नगरी होतो होयो स्पेन रवाना होज्यास्युं।

रोमीयो 6:22

पण इब थानै पाप का बंदणाऊँ छुटा लिओ गयो ह, अर थे परमेसर का दास बणगा हो, जणा जखी खेती थे काटर्या हो बा थानै पबितरता म लेज्यावै ह जिको आखरी फळ अजर-अमर जीवन ह।

1 कुरन्थीयो 10:31

इ ताँई थे चाए खायो, चाए पीयो, सक्यु परमेसर की मेमा ताँई करो।

2 कुरन्थीयो 9:10

परमेसर बोवणियानै बीज, अर खाबा ताँई रोटी देवै ह। बोई थारी जुर्त पूरी करसी अर थारी धारमिक्‍ता की फसलनै बढासी।

इफिसुस 1:12

जणाई म्हें मसी प आस लगाबाळा पेला हां, परमेसर की मेमा ताँई जे-जैकार करां हां।

इफिसुस 1:14

आ पबितर आत्मा इ बात की जामनी ह क परमेसर आपका मिनखा ताँई जखो बादो कर्यो ह बो पूरो होज्यासी, अर आपणानै ओ बिस्वास दिलावै क जखा बी बिका ह बानै परमेसर पूरो-पूरो छुटकारो दिलासी जिऊँ बिकी मेमा की जे-जैकार होवै।

इफिसुस 2:10

आपा परमेसर की बणाएड़ी रचना हां अर मसी ईसुऊँ भला काम करबा ताँई आपानै रच्यो गयो ह, जानै परमेसर पेल्याऊँई आपणा ताँई त्यार कर्यो ह।

फलिपी 4:17

इको मतबल ओ कोनी क मनै दान चाए; पण म थारी बही म बढतो होयो फाईदो देखबो चाऊँ हूँ।

कलुसीयो 1:10

जिऊँ थे परबु जंय्यां चावै ह बंय्यां जी सको अर हर बाता म सदाई परबु मसीनै राजी राख सको। थारै जीवन म भला कामा का फळ लागै अर थे परमेसर का ज्ञान म दिन-दिन बढता रह्यो।

कलुसीयो 1:6

चोखो समचार सगळा जगत म फळर्यो-फुलर्यो अर फेलर्यो बी ह। बंय्यांई जद थे परमेसर की दया क बारां म सुण्या अर सचमई बिनै समज्या हा जदऊँ लेर थारै म बी चोखो समचार फळर्यो-फुलर्यो अर फेलर्यो बी ह।

2 थिसलूनिकी 1:12

जिऊँ आपणा परमेसर अर परबु ईसु मसी की दयाऊँ आपणा परबु ईसु को नाम थारै म मान पावै अर थे बिमै मान पावो।

तितूस 3:14

आपणा मिनखानै ओरा की जुर्त पूरी करबा ताँई चोखा करमा म टेम बिताणो चाए, बानै फालतु को जीवन नइ जीणो चाए।

इबरानीआ 12:11

जि टेम का दकाल लगाई जावै ह जणा बा चोखी कोनी लागै पण दुख देबाळी होवै ह। पण क्युंक टेम पाछै बिऊँ जखा पक्का होगा हीं बानै धारमिक्‍ता की स्यांती को फळ देवै ह।

1 पतरस 2:12

परमेसरनै नइ ध्यारबाळा मिनख थानै बुरा बतावीं हीं। इकै वावजुद बी बाकै मांयनै थारो बरताव अर चाल-चलन चोखो राखो। जिऊँ जखी चोखी बाता बे थारै म देखसी बा बेई बे न्यायहाळा दिन परमेसर की मेमा करसी।

1 पतरस 2:5

जणा इब थे बी जीवता भाठा की जंय्यां हो, जाऊँ परमेसर आपको आत्मिक घर बणार्यो ह। थे पबितर याजक बी हो, जखा आपका आत्मिक चढावानै ईसु मसी क जरिए परमेसरनै राजी करबा ताँई चढाओ हो।

1 पतरस 2:9

पण थे अंय्यां का मिनख कोनी हो। थे तो परमेसर का टाळेड़ा खास मिनख हो। थे स्याही याजका की टोळी अर पबितर कूणबो हो। एक कूणबो जखो परमेसरऊँ निकळ्यो ह। परमेसर थानै अँधकारऊँ ताजूबभर्या च्यानणा म ल्यायो ह। जणा इब थानै चाए क थे बिकी ताजूबभरी बाता को जखी बो करी ह, हेलो पाड़ो। पबितर सास्तर म मंडेड़ो ह,

1 पतरस 4:14

ज मसी क नाम की बजेऊँ थानै दुख अर बेजती सेणी पड़ै जणा बिनै सोभाग मानो। आ बात इनै दिखावै ह क परमेसर की मेमा भरी आत्मा थारै सागै ह।