فیلیپیان 4:14 - کتاب مقدس به زبان مازندرانی - گویش شرقی

¹⁴ با این وجود، لطف هاکاردینی که مِ زحمِت هائه دِله شَریک بَینی.

گیله ماز

¹⁴ با این وجود، لُطف هَکُردین که می زَحماتِ دِلِه شریک هَبِین.

کتاب مقدس به زبان مازندرانی - گویش غربی

¹⁴ با هَین وجود، لِطف هاکِردِنی گه می زَحمتایی دِلِه شریک بَوِنی.

فیلیپیان 4:14 Cross References

اِنجیلِ مَتّی 25:21

وه اَرباب بااوته: 'آفِرین، ای باوِفا و خوارِ نوکِر، اِسا که این کَمِ پولِ دِله اَمین بیئی، پول ویشتَری تِ اختیار اییِلمه. بِرو شه اَربابِ خِشالیِ دِله شَریک بَواش.

رومی ایشون 15:27

وِشون شه خواسِنه این کارِ هاکانِن؛ و راس راسی هم وِشون، اورشَلیمِ ایموندارونِ مدیون بینه. چوون اگه غیرِ یَهودیون، یَهودیونِ روحانی برَکاتِ دِله شَریک بَینه، یَهودیون هم وِنه، برکاتِ مالیِ دِله، وِشونِ خِدمِت هاکانِن.

غَلاطیان 6:6

اونی که خِدائه کِلامِ جِم تَعلیم گِرنه، وِنه تِمومِ خوارِ چیا ره اونِ هِمراه که وه ره تَعلیم دِنه، شَریک بَووه.

فیلیپیان 1:7

مِن این حَقِّ دارمه که شِما همهِ خَوِری این طی حسی دارِم، چوون که مِ دلِ دِله، جا دارنِنی؛ چوون شِما همه مِ هِمراه خِدائه فیضِ دِله شریکِنی، هم مِ زِندون دَکِتِنِ دِله، هم اِنجیل دِفاع هاکاردِنِ جِم و هم اونِ حَییقَتِ ثابت هاکاردِن.

فیلیپیان 4:18

شِمه کُمِک ها مِ دَس بَرِسیه و شه احتیاجِ جِم ویشتر دارمه. اِسا که شِمه کُمِک اِپافْرودیتوسِ طریق که مِ وِسه بَفرِسینه ره، بَییتِمه، همه چیِ جِم فِراوون دارمه. شِمه هَدیه، خِشبو عطر و قابلِ قبولِ قِروونی ای هَسه که خِدا ره راضی کانده.

اول تیموتائوس 6:18

وِشونِ دستور هاده که خواری هاکانِن و خوارِ کارائه دِله دولِتمند بَووِن، بَخشنده و دَس دِلواز بوئِن.

نامِه مَسیحینی عبرانی نِژادی سِه 10:33

بَعضی وختا همهِ چِشِ پَلی، فحش خواردینی و عِذاب کَشینی و بَعضی وختا کِسایی دوش به دوش اِیست هاکارده بینی که وِشونِ هِمراه این طی رِفتار بونِسه.

نامِه مَسیحینی عبرانی نِژادی سِه 10:34

چوون شِما اونایی هِمراه که زِندونِ دِله دَینه، همدردی کاردینی و اون مووقه که شِمه مال و مِنالِ غارِت کاردِنه خِشالیِ هِمراه قبول کاردینی، چوون شِما شه دونِسِنی یِتا بهترِ مال و مِنالِ صاحابِنی که تا اَبد موندِنه.

نامِه مَسیحینی عبرانی نِژادی سِه 13:16

خواری هاکاردِنِ جِم و بَقیه ره شَریک هاکاردِن، اونچیِ دِله که دارنِنیِ جِم کِتاهی نَکِنین، چوون خِدا این طی قِروونی هائه جِم راضیِ.

یوحنایِ مکاشفه 1:9

مِن یوحنا، شِمه بِرار، که عِذابِ دِله و پادشاهی و صبر و تِحَمُّلی که عیسیِ دِله ئه، شِمه هِمراه شریکِمه، خِدائه کِلام و عیسیِ شِهادتِ خاطِری یِتا جزیرهِ دِله دَیمه که اونِ پاتموس گاتِنه.