परकासितवाक्य 8:2 - नुवो नेम (मेवड़ी नया नियम)

² में परमेसर का हामे हात हरग दुताँ ने देक्या। वाँने हात रणभेरियाँ दिदी गी ही।

परकासितवाक्य 8:2 Cross References

मत्ती 18:10

“देको, थाँ अणा फोरामूँ कणी ने बेकार मती जाणो, काँके मूँ थाँकाऊँ केवूँ हूँ के, हरग में वाँका दूत मारा हरग का बाप को मुण्डो हमेस्या देकता रेवे हे।

मत्ती 24:31

वो रणभेरी की मोटी अवाज का हाते आपणाँ दुताँ ने खन्दाई, वीं धरती की च्यारई दिसा मेंऊँ अन बादळा का खुणाऊँ आपणाँ गण्या-चुण्या लोगाँ ने अगेटा केरी।

लूका 1:19

हरग-दुत वींने क्यो के, “मूँ जिबराईल हूँ। अन हमेस्यान परमेसर का हामे हाजीर रूँ हूँ। अन वणा मने थाँराऊँ बात करबा का वाते अन ओ हव हमच्यार केबा के वाते खन्दायो हे।

लूका 21:36

ईं वाते जागता रो अन हरेक टेम परातना करता रेवो, ताँके थाँ अणा हारी आबावाळी आपतीऊँ बचन अन मूँ मनक का पूत का हामें ऊबा रेवा के जोगा बण सको।”

1 कुरिन्थियों 15:52

जद्याँ आकरी रणभेरी बजाई जाई वीं दाण आँक झपकाताँ तईं एकीस दाण में अस्यान वे जाई। जद्याँ रणभेरी बजाई जाई तो मरिया तका जीवता वेन अमर वे जाई अन आपाँ ज्यो जीवता हाँ बदल्या जावा।

1 थिस्सुलुनिक्यों 4:16

काँके परबू खुद हरगऊँ उतरी अन वीं टेम परदान हरग-दुत को जोरको आदेस हुणाई अन परमेसर को वाक्यो बजायो जाई अन मसी में विस्वास करता तका जतरा मरग्या, वीं पेल्याँ जीवता वे जाई।

परकासितवाक्य 1:4

मूँ यहुन्नो आसिया परदेस की हात मण्डळ्याँ का नाम यो लिकरियो हूँ, जी परमेसर का आड़ीऊँ अबाणू हे, जीं हमेस्यान हे अन ज्यो आबावाळो हे, वाँ हात आत्मा का आड़ीऊँ जीं वींके गाद्दी का हामे हे। अन ईसू मसी का आड़ीऊँ ज्यो विस्वास जोगो अन मरिया तका मेंऊँ जीवतो वेबावाळा मेंऊँ पेलो हे, अन ईं धरती का राजा पे हाकम हे। ज्यो आपणाँऊँ परेम करे हे। अन वणी आपणाँ खुनऊँ आपाँने पापऊँ छुटकारो दिदो हे, वीं ईसू मसी का आड़ीऊँ, थाँका पे दया, सक अन सान्ती वेती रेवे।

परकासितवाक्य 11:15

हातवे दूत जद्याँ रणभेरी बजई, तो हरगऊँ जोरकी अवाज अई के, “अबे ईं धरती पे परबू अन वींका मसी को राज हे। अन वीं जुग-जुग तईं राज करी।”

परकासितवाक्य 15:1

ईंका केड़े में हरग में एक ओरी अचम्बो करबावाळो हेन्याण देक्यो, में कई देक्यो के, हात हरग-दुत हे अन वाँके नके हात विपत्याँ ही। काँके ईं आकरी नास के पूरो व्या केड़े परमेसर को गुस्सा को भी अंत वे जाई।

परकासितवाक्य 16:1

तद्याँ में हुण्यो के, वाँ हातई हरग-दुताँ ने मन्दर मेंऊँ कुई जोरऊँ अवाज देन केरियो हो, “जावो अन अणा परमेसर का कोप का हातई प्याला ने धरती पे उँन्धई दो।”

परकासितवाक्य 8:13

तो में आकास में एक बाज ने उड़तो तको देक्यो अन वो जोरकी अवाज में बोलरियो हा के, “आलतरे तो तीन हरग दुताँ को रणभेरी बजाणी बाकी हे, ईं वाते धरती पे रेबावाळा मनकाँ ने कतरो दुक वेई, कतरो दुक वेई।”

परकासितवाक्य 8:6

तो वीं हरग-दुत ज्याँका नके हात रणभेरियाँ हा, वीं वाँने बजाबा का वाते त्यार वेग्या।

परकासितवाक्य 9:1

पाँचवे हरग-दुत रणभेरी बजई, तो में आकासऊँ धरती पे एक तारो पड़तो तको देक्यो। वींने पाताळ खोलबा का वाते कुस्याँ दिदी गी ही।