फिलिपियों 3:19 - नुवो नेम (मेवड़ी नया नियम)

¹⁹ वाँको अन्त नास हे, काँके वाँको पेटईस वाँको परमेसर हे। जणा बाताँ पे वीं मेपणो करे हे वणा बाताँ पे वाँने हरम करणी छावे अन दनियाँ की चिजाँ पे मन लगान राके हे।

फिलिपियों 3:19 Cross References

मत्ती 16:23

ईसू पाच्छा फरन पतरसऊँ क्यो, “हे सेतान, मारा नकेऊँ छेटी वेजा! थूँ मारा वाते ठोकर को कारण हे, काँके थूँ परमेसर की बाताँ पे ने, पण मनकाँ की बाताँ पे मन लगावे हे।”

मत्ती 25:41

“तद्याँ वो डावा पाल्ड़े वाळाऊँ केई, ‘हो हरापवाळा मनकाँ, मारा हामेंऊँ वीं कदी ने बजबा वाळी वादी में पड़ जावो, ज्या सेतान अन वींका दुताँ का वाते त्यार किदी गी हे।

लूका 12:19

अन आपणी आत्माऊँ केवूँ के, “आत्मा, थाँरा पा घणा वरा का वाते धन-दोलत हे। आणन्द का हाते खा अन पीं अन राजी-खुसी रे।” ’

लूका 16:19

एक धनवान मनक हो। ज्यो हमेस्यान मेंगाऊँ मेंगा गाबा पेरतो हो अन हरेक दन धूम-धाम अन भोग-विलासऊँ रेतो हो।

लूका 18:4

वणी नरी दाण तो वींकी ने मानी पण आकरी में मन में होच-बच्यार किदो, ‘मूँ कदी भी परमेसरऊँ ने दरपूँ हूँ अन नेई कणी मनक की परवा करूँ हूँ।

रोमियों 16:18

काँके अस्या मनक आपणाँ परबू मसी की ने पण आपणाँ पेट की सेवा करे हे। अन ईं आपणी मिटी-मिटी अन चापलूसी बाताँऊँ भोळा-भाळा मनकाँ ने भरम में नाक देवे हे।

रोमियों 6:21

जणा बाताँऊँ थाँने आज हरम आवे हे वींको थाँने कई फळ मल्यो? काँके वींको आकरी फळ मोत हे।

1 कुरिन्थियों 3:3

काँके थाँ अबाणू तईं दनियाँ का मनकाँ का जस्यान हो, ईं वाते थाँकामें रिस्याँ बलणो अन कळेस मोजुद हे, तो कई थाँ दनियाँ का सांसारिक मनक ने हो अन थाँ सांसारिक मनकाँ के जस्यान वेवार करो हो?

1 कुरिन्थियों 5:2

अणी बात पे थाँ होक भी ने करो हो, थाँने ओ छावे के, थाँ अस्यो काम करबावाळो थाँका बचमेंऊँ निकाळ दो, पण थाँ तो मेपणो करो हो।

1 कुरिन्थियों 5:6

थाँको मेपणो करणो हव ने हे। कई थाँ ने जाणो के, “थोड़ोक हाज्यो हाराई गुद्‍या तका आटा ने हाज्यो कर देवे हे।”

2 कुरिन्थियों 11:12

ईं वाते ज्यो कई मूँ करूँ हूँ, वींने करतो रेऊँ जणीऊँ ज्याँने थाँ खन्दाया तका मोटा चेला केवो हो, वाँने आपणी तरियाँ मेपणो करबा को मोको ने मले, जणी बात पे वीं मेपणो करे हे।

2 कुरिन्थियों 11:15

ईं वाते वीं सेतान का दास भी धरम का काम करबावाळा का जस्यो रूप धारण करे हे या कई मोटी बात ने हे, पण अंत में वाँको नास वाँके काम का जस्यान वेई।

गलातियों 6:13

काँके वीं ज्याको खतनो वेग्यो हे वीं खुद तो मूसा का नेमा को पालण ने करे हे, पछे भी वीं छावे हे के, थाँ भी खतनो करावो, ताँके थाँके अणी देह का रिवाज मानबा पे वीं मेपणो कर सके।

फिलिपियों 2:21

काँके हारई आपणाँ हवारत की भाळ में रेवे हे, ने के ईसू मसी की।

कुलुसियों 3:2

धरती की चिजाँ का बारा में मती होचो पण हरग की चिजाँ का बारा में होचो।

2 थिस्सुलुनिक्यों 1:9

वीं परबू का हामेंऊँ अन वाँकी सामरत का तेजऊँ छेटी वेन जुग-जुग का नास को दण्ड भोगी।

2 थिस्सुलुनिक्यों 2:12

अणीऊँ जतरा हाँच पे विस्वास ने किदो अन जूट में मजा लेता हा, वीं हाराई दण्ड पाई।

2 थिस्सुलुनिक्यों 2:8

ईंका केड़े ओ पाप को मनक परगट वेई, जिंने ईसू मसी आपणाँ मुण्डा की फूँकऊँ मार नाकी अन आपणाँ पाच्छा आबा का तेजऊँ वींने बाळ नाकी।

1 तिमुतियूस 6:5

अन वणा मनकाँ में लड़ई-जगड़ा वेवे हे जणाकी अकल मरगी हे, अन जीं हाँचऊँ छेटी वेग्या हे, वीं होचे हे के, परमेसर की सेवा धन कमावा को सादन हे।

2 तिमुतियूस 3:4

वीं धोको देबावाळा, बेपरवा, मरोड़ में रेबावाळा, परमेसर की परेमी वेबा का बजाय मोज-मस्तीऊँ परेम करबावाळा वेई।

याकूब 4:16

पण थाँ तो जुट-मुट को मेपणो करो हो। अस्यान को मेपणो बुरो हे।

2 पतरस 2:1

जस्यान वीं टेम में वणा लोगाँ में परमेसर का आड़ीऊँ जूटा बोलबावाळा हा, वस्यानीस थाँका मयने भी परमेसर की आड़ीऊँ जूटा बोलबावाळा वेई, वीं छानेऊँ नास करबावाळा कामाँ ने करी अन वीं वणी मालिक को मान ने करी, जणी वाँने आजाद किदा हा, अस्यान करन वीं खुद को फटाकऊँ नास कर देई।

2 पतरस 2:13

अणाने बुरई का बदले बुरईईस मली। वाँने दन का उजिता में कुकरम करणो हव लागे हे। ईं तो मनकाँ के नाम पे कळंक हे। ईं मनक थाँका हाते तेवाराँ पे भेळा वेवे हे, तो ईं मनक अणी ताक में रेवे हे के, अणाने अस्यान की कुई लुगई मल जावे जिंका हाते ईं कुकरम कर सके। अस्यान करबाऊँ वाँकी आक्याँ पाप करबाऊँ रके कोयने। ईं मनक भोळा-भाळा मनकाँ ने पाप करबा का वाते हिकावे हे। अणाको मन पुरी तरियाऊँ लाळचऊँ भरियो तको हे। ईं मनक हराप की ओलाद हे।

2 पतरस 2:3

वीं लाळच की वजेऊँ थाँने दिकावटी बाताँ बोलन थाँकाऊँ धन कमाई। वाँको दण्ड तो पेल्याँऊँ परमेसर ते कर मेल्यो हे अन वाँको नास वाँकी वाट नाळरियो हे।

यहूदा 1:10

पण ईं मनक तो जणा बाताँ का बारा में जाणी कोयने वाँका बारा में भलो-बुरो केवे हे। ईं तो बना हमजवाळा जनावराँ का जस्यान हे, जीं आपणी मरजी का जस्यान करे हे। अस्यान करन ईं खुद को नास कररिया हे।

यहूदा 1:16

काँके ईं मनक बड़बड़ाबावाळा, दूजाँ मनकाँ पे दोस लगाबावाळा, आपणी मरजी पुरी करबावाळा, मोटी-मोटी बाताँ करबावाळा अन आपणाँ नफो करबा का वाते दूजाँ की चमचागीरी करबावाळा हे।

यहूदा 1:4

पण थाँकी मण्डली में छानेऊँ अस्यान का मनक आग्या हे, ज्याँका बारा में सास्तर में पेल्याँई लिक्यो हे के, वाँने दण्ड मली, काँके वीं परमेसर ने कोयने जाणे हे। अणा मनकाँ परमेसर की दया ने खुद का वाते कुकरम करबा की छुट मान लिदी हे अन आपणाँ परबू जीं आपणाँ मालिक ईसू मसी हे वाँने मानबा का वाते नट जावे हे।

परकासितवाक्य 18:7

जतरा वणा आपणी मेमा, बड़ई अन भोग-विलास किदो हे, वतरो वींने दक अन तकलिप जेलबा दो। काँके वाँ खुदऊँ गुमानऊँ बोल्या करती हे, “मूँ विदवा ने हूँ, पण राणी हूँ। तो पछे मूँ होक काँ मनाऊँ?”

परकासितवाक्य 19:20

वीं डरावणा जनावर ने अन वींके हाते जूटी आगेवाणी करबावाळा जी हेन्याण चमत्कार बतान वणा मनकाँ ने ज्यापे वीं जनावर की मोर लगई ही अन वींकी मूरत ने पुजा करता हा, वाँने पकड़ लिदा। वणा दुया ने वीं वादी की बळता तका नरक का कुण्ड में जीवताई नाक दिदा ग्या।

परकासितवाक्य 21:8

पण दरपण्या अन बना विस्वासवाळा, भरस्ट, हत्यारा अन कुकरमी, जादु-टोना करबावाळा, मूरती पुजबावाळा, अन हाराई जूट बोलबावाळा को भाग वीं कुण्ड में मली ज्यो हमेस्यान बळतो रेवे हे। या दूजी मोत हे।”

परकासितवाक्य 22:15

पण जादु-टोना करबावाळा, कुकरमी, हत्यारा, मूरती पुजबावाळा, अन हरेक तरियाऊँ जूट पे चालबावाळा, जूटऊँ परेम करबावाळा ईं अड़क्या गण्डकड़ा का जस्यान हे अन ईं हाराई नगरऊँ बारणे पड़्या रेई।