Filipɛ̀n anmàn-bɔ̀ 4:19 - Ɛmɛẅi ankà ankrànkràn 2003

¹⁹ M'Ɔwɔ kɛ lɛ tán nyɛ̀n ɛkɔrɛ̀-wá lɔ fɛn n'ɛnnɛ̀ncüì-dì vri lɔ mɛ̀n Zhezü Krisì bɩmɛ̀n.

Filipɛ̀n anmàn-bɔ̀ 4:19 Cross References

Matie 6:32

Anwrɔn hɔ̀n léyi kè sɩ̀ nyrì Ɔwɔ nɔn de ke ji ɛnvra lɔ fɛn ɛci ndɔ hɔ̀n lɔ nɔn. Tɛ́n nyɛ́n Zi léyi dú anhobɩ́ nɔn, nyri eci léyi nye ji nɔn.

Zhan 20:17

Zhezü kɛ dɔ́ nɛ̀n le: “E bɩ ẅɛn mɛ̀n ɛ hɛ́n hàn, ɔmuhi mɛ vá hɔ́n Dade yri nɔn. Tɛ́n ɛ̀ hɔ̀n dɔ́ nmàn ẅì hɔ̀n le mɛ hɔ́n Dade yri, nɛ́n léyi nɛ̀n dú nyɛ́n zi mán nɔn, mɛ hɔ́n Ɔwɔ yri nɛ́n léyi nɛ̀n dú ny'Ɔwɔ mán nɔn.”

Zhan 20:27

Zɛtɛn nɛ dɔ́ Toma le: “È sɩ́ v'ɛtieẅì lɔ ɛnu, ô ɛ̀ nyan m'ɛmàn hɔ̀n lɔ; è sɩ́ v'ɛkɔrɛ̀ lɔ ezì, ô è bɩ́ nɛ̀n ɛ̀ wá m'ɛgbroẅiè lɔ mɛ̀n. E bɩ́ vru ẅɛn ankà-tro anhyrɛ̀a, è bùtan ankaẅì!”

Rɔmɛ̀n-anmàn-bɔ̀ 1:8

Eci lɔ fɛn mɛ̀n, mɛ tán m'Ɔwɔ ɔkùɛn Zhezü Krisì bɩmɛ̀n, nyɛ́n lɔ fɛn ny'ɛkruhú, ɔmuhi yɛ dɔ́ ny'ankaẅì-bùtan-ẅɛn-ankà ɛnhibù mumù lɔ fɛn wú nɔn.

Rɔmɛ̀n-anmàn-bɔ̀ 11:33

Nyàn ɔmuhi Ɔwɔ nɛ̀ncüì-dì lɔ sevri nɔn! Nyàn ɔmuhi n'ankà-nyrì mán n'eci-nyrì vrɛn nɔn! Antɔnwrɔn de kɛ lɛ dɔ́ n'eci-hán ankà nɛ́n? Antɔnwrɔn de ke le nyri n'ankɔnda-ci-hán ankà nɛ́n?

Rɔmɛ̀n-anmàn-bɔ̀ 2:4

Kale e gbri Ɔwɔ bɔrɛ wɔwɔ lɔ, n'ɛnbɔrɛ-ẅɛ̀n-hɛ́n mán n'ɛnhyɔ̀bɔ̀-nyrì lɔa? È sɩ̀ nyrì ɔmu le Ɔwɔ ɛnbɔrɛ wɔwɔ lɔ de kɛ lɛ hán mɛ́n ɛ̀ crɔn vɛ́n eci-hán-ci lɔ nɛ́n?

Rɔmɛ̀n-anmàn-bɔ̀ 8:18

Me tro le bɔ́ ejüe-dì hɔ̀n léyi dú ɛnvra ndɔ lɔ mɛ̀n nɔn, ke sɩ̀ krɔn eci-zrɔ léyi Ɔwɔ kɛ lɛ hán bɔ̀ bɔ̀ kàn nɔn.

Rɔmɛ̀n-anmàn-bɔ̀ 9:23

Tɛ́n ne ji nɛ̀n yé ɔmu lɔ le n'eci-zrɔ ẅɛn vɔ̀nshɛ́ anwrɔn nyantɛn hɔ̀n wú, anwrɔn hɔ̀n léyi nɛ̀n ẅɛn yɔ ɛnhyɔ̀bɔ̀-nyrì, anwrɔn hɔ̀n léyi nɛ́n gɔ̀ wá esùva nɛ̀n hɛ́n ô kè dú n'eci-zrɔ lɔ mɛ̀n nɔn.

2 Korɛntɛ̀n anmàn-bɔ̀ 12:21

Mɛ ẅɛn ɛnjansù le m'ɛyri hɔ̀n lɔ mɛ̀n, m'Ɔwɔ kɛ lɛ trɔ mɛ̀n ezì ny'ezìwú, kɩ me le wú eyú mɛ̀n ku bobrebe hɔ̀n léyi dú ɛgbàn hán mɛ̀n nɔn ɛwú hán ɛnbiɛhɛ́n vra lɔ, kɩ yɔ sɩ̀ crɛ̀ ezì sɔhɔ́ ɛnbrá-ci-hán mɛ̀n, ɛwúvà gbàngbàn-ẅɛn mɛ̀n, mán ɛnkru-fé ci hɔ̀n léyi yɔ hán nɔn mɛ̀n.

2 Korɛntɛ̀n anmàn-bɔ̀ 4:17

Obòtò léyi bɔ́ cɔ́ ɛnvra ndɔ lɔ mɛ̀n nɔn, wole vrán eci-zrɔ bobrebe léyi ke sɩ́ trɔa, ɔmuhi nɛ̀n ẅɛn vɔ̀nshɛ́ vri, kɩ nɛ sán hán bɔ̀ nɔn.

Efɛzɛ̀n anmàn-bɔ̀ 1:18

Nɛ̀n vuru nyɛ̀n anvɛ̀ n'ɛyri-kàn lɔ mɛ̀n, ô nyɛ́n cɔ̀ nyɛ́n nyri esɛ́ léyi, hɩ kruhú, nɛ̀n bi nyɛ̀n, ô nyɛ́n nyri anvrɛn hɔ̀n léyi nɛ̀n tán anwrɔn hɔ̀n léyi dú nɛ tɛn, anvrɛn ndɔ hɔ̀n lɔ, nyɛ́n nyri n'ɛnnɛ̀ncüì-dì mán n'eci-zrɔ,

Efɛzɛ̀n anmàn-bɔ̀ 1:7

Ɔmuhi, Krisì cice léyi dú nɛ́n dùku nɔn, n'ɛmɛ̀n lɔ bɔ̀ cɔ́ esrúze, kɩ bɔ́ ɛgbàn hɔ̀n lɔ bɩ́ ce bɔ̀. Ɔmu lɔ de Ɔwɔ yé bɔ̀ n'ɛnshifù nɛncüì-dì,

Efɛzɛ̀n anmàn-bɔ̀ 2:7

N'ɛzrɔ léyi nɛ̀n yé bɔ̀ Zhezü Krisì bɩmɛ̀n nɔn, hɩ mɛ̀n lɔ, ne ji nɛ̀n hán tán ɛnvra hɔ̀n léyi dú ezì kɛ và nɔn, kè nyri nɛ́n boafɔ̀n nɛ̀ncüì-dì vri lɔ.

Efɛzɛ̀n anmàn-bɔ̀ 3:16

Mɛ sán nɛ̀n, ô n'ɛnnɛ̀ncüì-dì ci-zrɔ lɔ mɛ̀n, nɛ̀n tán nyɛ̀n ecüì ɛnhɛ́n mɛ̀n, n'ɛkɔrɛ̀-srɔn Hɛ́n cüì lɔ mɛ̀n,

Efɛzɛ̀n anmàn-bɔ̀ 3:8

Ankaẅì-bùtan-ẅɛn-bɔ̀ lɔ fɛn, mɛ̀n dú y'ɛcɛ; ɔmu tɛ̀kɩ, Ɔwɔ tán mɛ̀n anvrɛn ndɔ lɔ, ô mɛ̀n dɔ́ anwrɔn hɔ̀n léyi kè sɩ̀ dù Zhüifɛ̀n-bɔ̀ nɔn, Krisì nɛ̀ncüì-dì léyi kè sɩ̀ ẅɛ̀n ɛnkrutrɔ nɔn yi ankà.

Filipɛ̀n anmàn-bɔ̀ 4:7

Kɩ anwɔwɔ léyi dú Ɔwɔ mɛ̀n, hɩ ká ankà-tro lɔ fɛn ankɔrɛ̀ nɔn, kɛ lɛ hɛ́n ny'ɛnbɔrɛ hɔ̀n lɔ mán ny'ankà-tro hɔ̀n lɔ Zhezü Krisì bɔ̀sɔ̀ lɔ mɛ̀n.

Kɔlɔsèn anmàn-bɔ̀ 1:27

Ɔmuhi, Ɔwɔ ke ji kɛ̀ hán tán yɔ, ye nyri ankɔ́nda-ci-hán ankà-bán-ankà ndɔ léyi ẅɛn vɔ̀nshɛ́, hɩ sevri, dú eci léyi yɛ hán, ô kè dú fɛcüè hɔ̀n lɔ fɛn ɛnkrukɔrɛ̀ nɔn. Kɩ nyàn ankà-bán-ankà ndɔ lɔ: Krisì dú nyɛ̀n ɛmɛ̀n kɩ nɛ tán nyɛ̀n esɛ́ le, nye le dú Ɔwɔ ci-zrɔ lɔ mɛ̀n.

Kɔlɔsèn anmàn-bɔ̀ 3:16

Ke ji le Krisì mùan-ankà-dɔ̀ mán n'ecüì-nɛ̀ncüì-dì lɔ fɛn, kɛ̀ sɔ́n ebɩ́ ny'ɛmɛ̀n. Nyɛ́n yé ny'edomɛ̀n ankà, ô nyɛ́n bi-dɔ́ ny'edomɛ̀n ankà-nyrì anvrɛnvrɛn mɛ̀n. Nyɛ́n bɩ́ ny'ɛnbɔrɛ lɔ fɛn mán ny'enyri-kùɛn-tán, nyɛ́n krɛ́ ɛmrɛ́n cɔ̀ mán eci-zrɔ cɔ̀ hɔ̀n léyi Ɛnhɛ́n Prɔnprɔn wá nyɛ̀n ɛnbɔrɛ mɛ̀n nɔn, nyɛ́n tán Ɔwɔ.

1 Tesalonikɛ̀n anmàn-bɔ̀ 2:12

Bɔ̀ yɩ́ nyɛ̀n edù kɩ bɔ́ bi ɛnbɔrɛ bɔ̀ wá nyɛ̀n, bɔ̀ wá tán nyɛ̀n ɛshishiemɛ̀n le ny'esùnàn kɛ̀ cüɛn Ɔwɔ ɛvɛ̀, nɛ́n léyi ne bi nyɛ̀n ô nyɛ́n bru n'Ɛnnɛ̀ncüì-dúyri mán n'ecizrɔ lɔ mɛ̀n nɔn.

Kpàkpà timote 6:17

Ɛ̀ wá tán anwrɔn hɔ̀n léyi ẅɛn ɛnhibù wú nɛ̀ncüì-di-ci hɔ̀n lɔ nɔn, yɔ bɩ́ hán tùtre ci; ɛ̀ dɔ́ yɔ yɔ bɩ́ bɩ́ y'esɛ́ lɔ yɔ wá ɛnnɛ̀ncüì-di-ci ndɔ hɔ̀n léyi dú eci vàcí ci nɔn mɛ̀n, tɛ́n Ɔwɔ mɛ̀n, nɛ́n léyi nɛ tán eci lɔ fɛn kɩ nɛ́n sɩ́ wɔɛn hán nɔn, ô bɔ́ dú ɛnbɔrɛbruemɛ̀n.

Filemɔn 1:4

Ɛnvra hɔ̀n lɔ fɛn léyi mɛ sɛ́n Ɔwɔ nɔn, me tro v'ankà, Filemɔn, kɩ mɛ tán Ɔwɔ ɔkùɛn;

1 Piɛrɛ̀n 5:1

Mɛ dɔ́ zɛtɛ̀ lɔ, anwrɔn hɔ̀n léyi ny'ɛmɛ̀n lɔ dú ɛcüìcüì-bɔ̀ Ɔwɔ fɛcüè mɛ̀n nɔn ankà. Mɛ̀n mán mɛ̀n dú ecüìcüì; mɛ̀n dú Krisì gbànkán hɔ̀n lɔ yɔ dalɛfuɛ-di-wrɔn kɩ mɛ lɛ cɔ́ n'eci-zrɔ léyi ye le yé nɔn. Nyàn eci léyi mɛ dɔ́ yɔ yɛ hán nɔn:

1 Piɛrɛ̀n 5:10

Nye le vru nyɛ́n kán ɛgbàn ɛnvra cá mɛ̀n. Tɛ́n Ɔwɔ léyi dú nboafɔ̀n lɔ fɛn shi-bɛ́ nɔn, bi nyɛ̀n ô nyɛ́n dú n'eci-zrɔ léyi kè sɩ̀ ẅɛ̀n ɛnkrutrɔ nɔn mɛ̀n, Zhezü Krisì mɛhi y'ɔbɔsɔ̀ lɔ mɛ̀n; nɛ́n dùku nɛ lɛ sàn hán nyɛ̀n, nɛ́n dùku nɛ lɛ hán nyɛ̀n nyɛ́n sàn zrɔ, nɛ lɛ tán nyɛ̀n ecüì kɩ nɛ lɛ hɛ́n nyɛ̀n edù kɛ̀ sɔ́ nyɛ̀n kɛ̀ hán Ɔwɔn hi-nan-bù hɔ́.