फिलिप्पि 3:15 - Dhimal NT

¹⁵ केलाइ जाइ आत्माता परिपक्का जेङका हिनाहि, कालाउ नेलाइ झाराङ बुङ एनोङ दोङ मनको जेङतेङ हिसु, कालाउ नेलाइ हिदोइ बुङ आरु बिचारता हिसुना पानु परमेस्वर नेलाइहेङ इङको बुङ झालाफालापा पाप्याङ।

धिमाल

¹⁵ केलाइ खान्‍धुरता बोल्‍याका जेङकालाइचाहिँ झाराङ ए मनको ज्‍याइने। एदि नेलाइ हिहिङ काथाता बिमति ताअ्‌सुखेना पानु परमेस्‍वर दोङ नेलाइहेङ इङको बुङ देखाल पाप्‍यावा।

फिलिप्पि 3:15 Cross References

मत्‍ति 5:48

ओदोङ भाअ्सिङ जेलाउ बुङ नेलाइ आसल पासु, जेसाङ स्वर्गता हिका नेलाइको आबा परमेस्वर बुङ आसल पाखे।

लुका 11:13

नेलाइ मारेम्का जेङतेङ बुङ ताइको चान-चामिन्दिगेलाइहेङ रेम्का आनेमानेगेलाइ पिलि गिसुखेना पानु, झन स्वर्गता हिका नेलाइको परमेस्वर आबा वाको दोफा ह्रेकालाइहेङ झन हेथे रेम्फा पबित्तरो आत्मा प्यावा।

युहन्‍ना 6:45

कालाउ इम्बालाइ झाराङहेङ परमेस्वर पाहासो धिरपावा दोअ्तेङ परमेस्वरको बक्तागेलाइको धर्मसास्तरता लेखेका हि। कालाउ झाराङ जाइ आबा परमेस्वरसो हिङखे कालाउ धिरखे उङको काङकोता लोखे।

युहन्‍ना 7:17

परमेस्वरको इच्छा आन्सार काम पालि भोकालाइ चाहि ग्यावा कि, काङको सिक्स्या परमेस्वर पाहासो हि, या काङको ताइको सिक्स्या दोङ वा थाहा निनावा।

रोमि 15:1

केलाइ खाङधुरिता बल्लियाका हिकालाइ ताइमिहेङ खिनिङ खुसि बानाइलि माको भरु खाङधुरिता हुइका द्‍याङगेलाइहेङ बुङ साघाइलि गोइखे।

1 कोरिन्थि 14:20

खान्धुराइ ओनेगेलाइ, इदोइ काथागेलाइता नेलाइको सोचिका बिचारगेलाइता जामाललाइ भाइपा माजेङसु। मारेम्का काथागेलाइको भाअ्सिङ जामाललाइ भाइपा आन्जान जेङसु, कालाउ इसिका खाल्को काथा बुझिलिको भाअ्सिङ वाराङ द्‍याङ भाइपा जेङसु।

1 कोरिन्थि 2:6

कालाउ बुङ परिपक्का खान्धुराइगेलाइको माझाता केलाइ बुद्दिको काथा पानाखे, कालाउ सुमिङको द्‍याङगेलाइको बुद्दि माको, ना ते इदोइ सुमिङको सासकगेलाइको बुद्दि भाइपा, जेदोङ नासातेङ हानावा।

गलाति 5:10

का प्रभुता भोरोसा पाखा, कि वा नेलाइहेङ धाताइका सिक्स्यागेलाइसो फारापा ताअ्तावा। कालाउ नेलाइहेङ आवाइतुपाका हासुहेङ लाउ बुङ परमेस्वर वासेहेङ दन्ड प्याङ।

एफिसि 1:17

का परमेस्वर दोफा प्रार्थाना पाखा, कि केलाइको प्रभु येसु ख्रिस्टको महिमाको आबा नेलाइहेङ आत्मिक बुद्दि कालाउ ग्यान प्याको कालाउ वासेहेङ बुङ परमेस्वर हासु दोअ्तेङ बुझिलि ग्यान प्याको।

कलस्सि 1:28

केलाइ गोताङ द्‍याङगेलाइहेङ ख्रिस्टको बारेता हिङपान्हाखे, झाराङ द्‍याङहेङ चेताउनि कालाउ सारा बुद्दिहोइ धिरपाहान्खे जेदोङ परमेस्वर केलाइहेङ पिका हि। कालाउकि केलाइ निसित जेङलि द्वाको कि झाराङ द्‍याङ ख्रिस्टता परिपक्का जेनावा जेलाउ इम्बालाइ परमेस्वरको आगाता जाअ्तावा।

कलस्सि 4:12

नेलाइको नगरसो लोका येसु ख्रिस्टको दास इपाफ्रास बुङ ताइको आभिबादन पिगिल्का हि। वा लगनसिल जेङतेङ प्रार्थानाता परिस्रोम दोफाङ जेलाउ बुङ नेलाइहेङ फोम पातेङ हिखे। कालाउकि नेलाइ परिपक्क जेङसु कालाउ परमेस्वरको गोताङ इच्साता गोताङ रुपहोइ आग्याकारि हिनाङ निर्धक्क हिलि दोसु।

1 थेस्लोनिकि 4:9

कालाउ खान्धुराइ ओनेगेलाइता प्रेमको बिसोइता नेलाइहेङ केलाइ हिदोइ बुङ काथा लेखेलि आवस्यक मान्थु, हाइपालिपानु एमिसो-भेनेङहेङ प्रेम पासु दोअ्का काथा नेलाइ ताइमिङ परमेस्वरसो धिरका हिसुना।

2 तिमोथि 3:17

कालाउकि परमेस्वरको जनगेलाइ गोताङ खाल्को आसल काम पालि तियार कालाउ सक्स्यम जेङलि द्वाको दोअ्तेङ इदोइ धर्मसास्तर पिका हि।

हिब्रु 5:14

कालाउ जाराउका चाका-आम्का चाहि खाङधुरिता बल्लियाका द्‍याङको भाअ्सिङ दोङ हि, वाते रेम्का-मारेम्का काथा लाअ्पालि दोका तालिम निङलि दोका हिखे।

१ युहन्‍ना 2:5

कालाउ जाइ परमेस्वरको बचन केम्खे, वाकोता परमेस्वरको प्रेम जातिङकोङ सिद्द जेङका हिखे। केलाइ परमेस्वर दोफा ए जेङतेङ हिनाहि दोअ्का काथा इदोइसोङ निस्चित जेङन्हाखे।