फिलिप्पि 3:14 - Dhimal NT

¹⁴ का स्वर्गको इनाम निङलिको भाअ्सिङ ल्क्स्य भारि हानिदोङखा इङको पुरुस्कार चाहि परमेस्वर कासेहेङ स्वर्गता काइका हि, हाइपालिपानु येसु ख्रिस्ट काङको भाअ्सिङ सिपिहि।

धिमाल

¹⁴ इदोइखातिर का सादेलको इनाम जितिलिको भाअ्‌सिङ धाअ्‌दोङखा। परमेस्‍वर याको भाअ्‌सिङ ख्रिस्‍ट इसुसो असिमको ज्‍यान निङलि कासेहेङ काइका एइ।

फिलिप्पि 3:14 Cross References

लुका 16:16

जेलाउ थेकापा बप्तिस्ता पिका युहान्‍ना मालोहि, इङको बेला मोसाको व्यवस्था कालाउ परमेस्वरको बक्तागेलाइको सिक्स्याहोइ नेलाइहेङ आगुवाइ पाघाखे। कालाउ एला परमेस्वरको सासनको खुसिको बानाल प्राचार जेङदोङखे, कालाउ झाराङ द्‍याङगेलाइ लिता हानिलि उत्सुकता हि।

रोमि 11:29

हाइपालिपानु परमेस्वर ताइमिङ पिका बरदानगेलाइ आरोङ माह्रुखे कालाउ काइलि दोकालाइहेङ हेलाउ बुङ मालाखे।

1 कोरिन्थि 9:24

नेलाइहेङ थाहा दोङ हि कि, धाअ्काता झाराङ धाअ्खे, कालाउ लाङ पुरुस्कार निङका चाहि एमि खिनिङ द्‍याङ हिखे। एसा पासोङ केलाइ झाराङ परमेस्वरहेङ लेङचापाका काम पालि गोइखे, कालाउकि केलाइ इनाम निङलि द्वाको जेदोङ परमेस्वर केलाइहेङ भबिस्यता प्याङ।

2 कोरिन्थि 4:17

केलाइको दुखगेलाइ एला आतुइसा हि कालाउ ह्रिङका सोमोइ थेकापा माहियाङ, हाइपालिपानु इङको दुखगेलाइहोइ केलाइहेङ आनान्त महिमा पिखे, जेदोङ केलाइ कल्पाना पालि दोका खान्तेङ हेन्जा हि।

फिलिप्पि 3:3

हाइपालिपानु केलाइ परमेस्वरको आत्मासो आराधाना पानाखे, कालाउ येसु ख्रिस्टता गर्ब पानाखे कालाउ मानिमुइ कोसिसता भर मापरिनाखे, हाइपालिपानु केलाइ जातिङकोङ परमेस्वरको द्‍याङगेलाइ दोङ हिनाहि।

कलस्सि 2:18

ख्रिस्ट जिउको पुरिङ हि। वाकोसोङ दोङ जिउको गोताङ आङगगेलाइ तेअ्खे कालाउ गोताङ आङगगेलाइको स्याहार जेङखे। ओदोङ भाअ्सिङ इदोङ परमेस्वरको इच्छा आन्सार बाढेखे। ताइमिहेङ आपामान पातेङ कालाउ स्वर्गदुतगेलाइको आराधाना पातेङ हासुहेङ बुङ आयोग्य बानाइलि जोर मापिसु। इसिका द्‍याङगेलाइ दर्सन तिङखे कालाउ द्‍याङको बिचार आन्सार इङको दर्सन पाहासो ओबालाइता घमन्ड लोखे। कालाउ ओबालाइ ख्रिस्टहेङ लाअ्का हि।

1 थेस्लोनिकि 2:12

केलाइ नेलाइहेङ हाउसाइ कालाउ सान्तावाना पिन्हाहि कालाउ बिन्ति पानाहि कि परमेस्वरहेङ मन परिका जिबन जियाइसु, जाइ नेलाइहेङ ताइको सासन कालाउ महिमाता काइयावा।

2 तिमोथि 1:9

परमेस्वर केलाइहेङ बान्चिपाहि कालाउ पबित्तरो जिबन जियाइलि काइहि। केलाइ रेम्का काम पाकानाङ काइका माको, भरु ताइको योजाना कालाउ आनुग्रहहोइ परमेस्वर केलाइहेङ बान्चिपाहि। जेदोङ आनुग्रह वा येसु ख्रिस्ट पाहासो सुमिङहेङ सिरजाइका खान्तेङ लाम्फा पिका हिघाहि।

हिब्रु 3:1

ओदोङ भाअ्सिङ परमेस्वर वाको दोफा स्वर्गता झ्वाइनालि काइका खान्धुराइ ओनेगेलाइ दोङ हिसुना, येसुता मन लागाइसु जाइ केलाइको भाअ्सिङ परमेस्वरको दुत कालाउ प्राधान पुजारि जेङका हि।

हिब्रु 6:1

ओदोङ भाअ्सिङ एला केलाइ ख्रिस्टको बारेता धिरका प्रार्थामिक सिक्स्याहेङ खिनिङ मानितेङ खाङधुरिता परिपक्का बानाइका सिक्स्या भारि लागियाइने, प्रार्थामिक सिक्स्याहेङ एनोङ बार्का जग भाइपा माकिताइने, हाइपालिपानु इङको सिक्स्या ते परमेस्वरता खाङधुरि पाका कालाउ पापमय कामसो पासताइ पापाका को बारेता खिनिङ हि, जाइहोइ सिका भारि चुम्पुखे।

1पतरुस 1:13

ओदोङ भाअ्सिङ, नेलाइ हाइ पादोङ सुखेना दोअ्का बारे रेम्फा सोचिसु कालाउ आत्माहेङ तहता ताअ्सु मुक्ति निङका आस पासु, जेदोङ आनुग्रहसो लोखे, जाइ नेलाइहेङ येसु ख्रिस्ट इदोइ सुमिङता धुरितेङ लोका दिनाता प्यावा।

1पतरुस 5:10

परमेस्वर, जाइ पुर्न रुपता आनुग्रहकारि हि केलाइको ख्रिस्ट येसु दोफाको सम्बन्धको कारन ताइको आनान्त महिमाता केलाइहेङ हकदार जेङलि काइका हि। नेलाइ कोम्हा सोमोइ थेकापा कस्ट भोगितेङ परमेस्वर नेलाइहेङ आसल बानाइयाङ कालाउकि नेलाइता हिदोइ बुङ गल्ति माज्याको कालाउ वा नेलाइको ह्रदयहेङ बल्लियाका बानाइयाङ कालाउ इस्थिर जेङलिको भाअ्सिङ वाकोता खाङधुरि पाका बानाइयाङ।

२ पत्‍रुस 1:3

केलाइ परमेस्वरहेङ नाल्कानाङ वा केलाइहेङ वाको दोफा हिका इङको सरबुङ पिका हि। ओदोङ भाअ्सिङ केलाइ वासेहेङ लेङचापाका जिबन जियाइलि गोइका गोताङ काथा हि। वाको ताइकोङ पुर्न कालाउ महिमा पुर्न चरित्तरोको कारन वा केलाइहेङ ताइकोङ द्‍याङ जेङलि छाल्का हि।

प्रकास 3:21

जाइ दुस्टको सरबुङहेङ हारिपावा वा का दोफा काङको सिङहासनता योमावा, जेसाङ का जितितेङ काङको आबा दोफा वाको सिङहासनता योम्का हिघा।