फिलिप्पि 2:14 - Dhimal NT

¹⁴ गोताङ काम गनगन माकुनु झर्क मामानिसिङ पासु।

धिमाल

¹⁴ नेलाइ हिदिङ काम पालाउ बुङ गानगानमापासिङ रो माचेरसुसिङ गोताङ काम पासु।

फिलिप्पि 2:14 Cross References

मत्‍ति 20:11

कालाउ ज्याला निङलि दोअ्तेङ मिलिङको गिह्रिको बिरोधता इम्बालाइ गनगन पालि तेङहि।

मर्कुस 14:5

हाइपालिपानु इदोइ आत्तरको चुइति साअ्-बासार खान्तेङ बुङ हेन्जा ज्यालाको कामाइ, “कालाउ इङको चुइति पिइतेङ गरिबगेलाइहेङ ताका पिलि दोअ्धाङ।” आरोङ इम्बालाइ उङको बेजानहेङ मिसियाँ दाइ-दाइ पातेङ चेरहि।

मर्कुस 9:14

जेलाउ येसु कालाउ वाको सुमि चात्यागेलाइ तिकारसो खुतेङ लेता लोहि आरोङ चात्यागेलाइ हिका थामेता लोहि, इम्बालाइ इन्ता एनोङ बारका द्‍याङगेलाइको जेर वाको कोरपाहाङ तिङहि कालाउ व्यवस्था धिरपाका द्‍याङगेलाइ चात्यागेलाइ दोफा नाइसुतेङ हिघाहि।

लुका 5:30

फारिसि दोअ्का समुहगेलाइ कालाउ व्यवस्था धिरपाका द्‍याङगेलाइ वाको चात्यागेलाइको बिरोधता एसा दोअ्तेङ गुनगुनाइलि तेङहि, कालाउ दोअ्हि, हाइ पालि नाअ् पोत ल्होपाका कालाउ पापि द्‍याङगेलाइ दोफा योम्तेङ चाखेना?

साल्न्हाका चात्या 15:2

जेलाउ पावल कालाउ बार्नाबास इम्बालाइ दोफा मामिलिसुका कालाउ गालाबाजि जेङतेङ न्हुसो, इन्ताको खान्धुराइ ओनेगेलाइ पावल कालाउ बार्नाबास कालाउ आधिमि द्‍याङगेलाइहेङ इदोइ प्रस्नको फैसाला पालिको भाअ्सिङ साल्न्हाका चात्यागेलाइ कालाउ मन्डलिको आगुवागेलाइकोता यरुसेलेम सहर हानिलि नियुक्ति पाहि।

साल्न्हाका चात्या 15:39

पावल कालाउ बार्नाबासको माझाता इङको बिसोइता बार्का मि तुपासुका जेङहि, कालाउ इम्बालाइ लाअ्सुहि। बार्नाबास चाहि मर्कुसहेङ चुम्पुतेङ समुन्द्रको दामा पाहासो साइप्रस टापुता हानिहि।

साल्न्हाका चात्या 15:7

कालाउ निकोङ बेलोम्पा थेकापा बहस जेङतेङ न्हुसो पतरुस जाअ्तेङ इम्बालाइहेङ दोअ्हि, “ओइ खान्धुराइ ओनेगेलाइ नेलाइहेङ थाहा दोङ हि, कि हेन्जा सोमोइ लाम्फा हेसा परमेस्वर काङकोसो गैर-यहुदिगेलाइ सुसमाचारको बचन हिङतेङ खाङधुरि पाको दोअ्तेङ नेलाइको माझासो कासेहेङ साल्हि।

साल्न्हाका चात्या 6:1

इङको दिना जेलाउ चात्याको सङख्या बाढेलि तेङहि, कालाउ ग्रिक भासा धुइका यहुदि खान्धुराइगेलाइ हिब्रु भासा धुइका यहुदि खान्धुराइगेलाइको बिरोधता गनगानाइलि तेङहि। हाइपालिपानु दिनाङ चाका आमेने कालाउ ताका बाखाराइकाता इम्बालाइको के सिका बेबाललाइहेङ गोइका जति चाका-आम्का कालाउ ताका मानिङघाखे।

रोमि 12:18

जेङलि दोनु, झाराङ दोफा मिलितेङ हिसु।

रोमि 14:1

खाङधुरिता हुइका हिका द्‍याङगेलाइहेङ सुइकार पासु, कालाउ वा हाइ पालि गोइका या मापालि गोइका काथागेलाइता काथा पोसुलि माको।

रोमि 16:17

खान्धुराइ ओनेगेलाइ, का नेलाइहेङ सेउपाखा, कि नेलाइहेङ धिर्पाका सत्ये सिक्स्याको बिरोध पाका द्‍याङगेलाइसो जाइ खेङपाखे चङख हिसु कालाउ इम्बालाइसो दुरे हिसु।

1 कोरिन्थि 10:10

कालाउ केलाइ गनगन पालि माएल, जेसाङ इम्बालाइ मध्ये हेथेते पाहि, कालाउ परमेस्वर दिङगिल्का स्वर्गदुत पाहासो मारा पाहि।

2 कोरिन्थि 12:20

हाइपालिपानु का लोलाउ काङको इच्छा पाका आन्सार नेलाइहेङ मानिनाङका वाला, कालाउ नेलाइ बुङ कासेहेङ ताइमि इच्छा पाका बोमजिम माभेतेस्वाना कि दोअ्का का थितेङ हिघा। सायद इन्ता फेसुका, मि तुपाका, चेरताङका, दिका, स्वार्थ, काथा भानाइका, बोमिको आखेका काथा दोअ्का, आदार मापाका कालाउ गोलमाल जेनाङ वाला।

गलाति 5:15

कालाउ ता-ताइमिता चेरसुतेङ कालाउ दानाइसुतेङ हिसुना पानु, होस पासु, माकुनुते ता-ताइमिताङ नेलाइ नासास्वाना।

गलाति 5:26

केलाइ घमन्डि माजेनाइने, एमिसो-भेनेङहेङ चेर मातामपा प्याइने कालाउ एमिसो-भेनेङको मि मातुपाइने।

फिलिप्पि 2:3

स्वार्थ कालाउ घमन्डता हाइ दोङ मापासु, कालाउ मोनोइता एमिसो-भेनेङहेङ ताइमिहेङ खान्तेङ हेन्जा महत्व पुर्न थानेसु।

1 थेस्लोनिकि 5:13

इम्बालाइ नाङको भाअ्सिङ पाका कामको भाअ्सिङ इम्बालाइहेङ हेन्जा आदार कालाउ प्रेम पासु। कालाउ नेलाइ ता-ताइमिता मिलितेङ सान्तिसो हिसु।

1 थेस्लोनिकि 5:15

फोम पाअ्‌, हासु बुङ मारेम्का पाहि दोअ्काता वासेहेङ मारेम्का मापासु, कालाउ एमिसो-भेनेङ दोफा कालाउ झाराङ द्‍याङगेलाइ दोफा रेम्का पालि कोसिस पासु।

हिब्रु 12:14

झाराङ द्‍याङगेलाइ दोफा सान्तिता हिलि कालाउ पबित्तरो जिबन जियाइतेङ हिका कोसिस पासु, पबित्तरो बिना हिदोइ बुङ द्‍याङगेलाइ प्रभुहेङ तिङलि माद्वावा।

याकुब 1:20

हाइपालिपानु जेलाउ हिदोइ बुङ द्‍याङ चेरताम्खे, वा धर्मि जेङतेङ जियाइलि माद्वावा कालाउ परमेस्वरहेङ खुसि माबानाइखे।

याकुब 3:14

कालाउ जेसापा नेलाइको हृदयता हेन्जा आरिस कालाउ स्वार्थ हि पानु घमन्ड मापासु, कालाउ सत्येको बिरोधता माधाताइसु।

याकुब 5:9

ओइ खान्धुराइ ओनेगेलाइ, एमिसो-भेनेङहेङ मादुसिसु, माकुनुते नेलाइ दुसिका जेङस्वाना, खाङसु, प्रभु झाराङको न्याय पालि लोलिको भाअ्सिङ तियार हि।

1पतरुस 3:11

वा खाराका काम पालि लाअ्लि गोयाङ। भरु वा जेदोङ आसल हि इङको काम पालि गोइखे। आरु दोफा सान्तिता हिलिको भाअ्सिङ थाङका परिस्रोम पासु।

1पतरुस 4:9

द्‍याङगेलाइहेङ नेलाइको साअ्ता स्‍वागत पासु कालाउ हिदोइ बुङ गुनासो मापासिङ इसिका पाका पासु।

यहुदा 1:16

इदोइ द्‍याङगेलाइ जेलाउ बुङ परमेस्वरको बिरोधता नुइ धुइखे कालाउ आरु द्‍याङगेलाइता खिनिङ दुसिका निङखे। इम्बालाइको ह्रदयहोइ गोइका आन्सार इम्बालाइ निरन्तर कु-काम पाखे। इम्बालाइ ताइमि दोङ ताइको बारेता घमन्ड काथागेलाइ पाखे, कालाउ ताइको फाइदाको भाअ्सिङ आरु द्‍याङगेलाइको भाअ्सिङ भानाइदारि पाखे।