Kpojemi 2:5 - BAIBLO ALOO NGMAMI KLƆUKLƆU Ɔ

⁵ Lɔ ɔ he ɔ, moo hɛli o he si ngɛ nɔ nɛ mi nɛ o gbee si ngɛ ɔ he. Mo tsake o tsui, nɛ o hi si kaa kekle ɔ. Ke o tsakee we o tsui ɔ, ma ba o ngɔ, nɛ ma ba je o kane tso ɔ kɛ je e ma he ɔ.

Somi He Ɔ

⁵ Lɔ ɔ he ɔ kaii he nɛ o je kɛ nɔ si ɔ, nɛ o tsake o tsui, nɛ o tsu kekle ni tsumi ɔmɛ; se ke pi ja a, ma ba o ngɔ oya, nɛ ma je o kane tso ɔ kɛ maa je e ma he ɔ, ja o pia o he.

Kpojemi 2:5 Cross References

Kpojemi 3:19

Nihi nɛ i suɔ mɛ ɔ, i kaa a hɛ mi, nɛ i gblaa a tue. Lɔ ɔ he ɔ, o hɛ nɛ dɔ, nɛ o tsake o tsui.

Kpojemi 2:16

Lɔ ɔ he ɔ, mo tsake o tsui! Ke pi ja a, ma ba o ngɔ be kpiti. Ma ngɔ klaate nɛ ngɛ ye nya mi ɔ, nɛ i kɛ jamɛ a ni ɔmɛ maa hwu ta.

Hosea 14:1

Israel ma, nyɛɛ kpale kɛ ba Yawɛ, nyɛ Mawu ɔ ngɔ. Nyɛ yayami ɔmɛ ha nɛ nyɛ pee kaa ni komɛ nɛ tɛ nɔ́ nɛ a nɔɔ si.

Kpojemi 2:19

I le ní nɛ o tsuɔ; i le o suɔmi, o hemi kɛ yemi, bɔ nɛ o sɔmɔɔ, kɛ bɔ nɛ o toɔ o tsui si ngɛ nɔ́ nami mi. I le kaa o ngɛ ní tsue amlɔ nɛ ɔ kulaa pe kekle ɔ po.

Kpojemi 1:20

Dodoe kpaago ɔmɛ nɛ o na ngɛ ye hiɔ nine mi, kɛ sika tsu kane tso kpaago ɔmɛ ɔ, laami sane nɛ kɔɔ a he ji nɛ ɔ nɛ: dodoe kpaago ɔmɛ daa si ha asafo kpaago ɔmɛ a bɔfohi, nɛ kane tso kpaago ɔmɛ daa si ha asafo kpaago ɔmɛ.”

Ezekiel 20:43

Kɛkɛ ɔ, ngɛ lejɛ ɔ, nyɛ ma kai nyɛ blɔ yaya amɛ, kɛ nyɛ ní peemi ní ɔmɛ tsuo nɛ nyɛ kɛ ble nyɛ he ɔ. Nyɛ nitsɛmɛ nyɛ he maa nyɛɛ nyɛ ngɛ nyɛ ní hiemi ní ɔmɛ tsuo nɛ nyɛ pee ɔ a he.

Luka 1:17

E maa sɛ Nyɔmtsɛ ɔ hlami kɛ he wami, kɛ kã kaa gbalɔ Eliya. E maa pee tsɛmɛ kɛ a bimɛ kake ekohu. E ma ha nihi nɛ bui Mawu tue ɔ maa kpale ba nyɛɛ ni nɛmɛ nɛ buɔ lɛ tue ɔ a blɔ ɔmɛ a nɔ. Nɛ nihi nɛ Mawu nitsɛ hla a, e ma dla mɛ ngɔ to lɛ.”

Malaki 4:6

Lɛ nɛ e maa dɔ tsɛmɛ a tsui kɛ ba a bimɛ a he, nɛ bimɛ hu a tsui maa ba a tsɛmɛ a he; nɛ e maa pee mɛ kake ekohu. Ke pi ja a, ma ba, nɛ ma ba kpata nyɛ zugba a hɛ mi.” Yawɛ Tabohiatsɛ ɔ lɛ de.

Yesaya 1:26

Ma ha nyɛ ma nimeli, kɛ ga woli kpakpahi kaa nihi nɛ hi si blema a. Ke enɛ ɔ ba mi ɔ, a ma tsɛ Yerusalem ke ma nɛ a yeɔ dami sane kɛ anɔkuale ngɛ mi.”

Luka 20:16

E ma ba kpata jamɛ a apaa yeli ɔmɛ a hɛ mi, nɛ e maa ngɔ wai ngmɔ ɔ kɛ ha ni kpahi.” Benɛ ni ɔmɛ nu munyu nɛ ɔ, a de ke, “Kpaoo, e ko ba mi ja!”

Marko 12:9

Yesu bi mɛ ke, “Lɛɛ ke ngmɔtsɛ ɔ ba a, kɛ e maa pee kɛɛ? E ma ba kpata apaa yeli ɔmɛ a hɛ mi, nɛ e kɛ wai ngmɔ ɔ ma ha ni kpahi.

Ezekiel 36:31

Kɛkɛ ɔ, nyɛ ma kai nyɛ je mi bami yaya amɛ, kɛ zo níhi nɛ nyɛ tsu ɔ, nɛ nyɛ nitsɛmɛ nyɛ he maa nyɛɛ nyɛ ngɛ nyɛ yayami ɔmɛ, kɛ nyɛ ní hiemi ní ɔmɛ a he.

Kpojemi 2:2

I le ní nɛ o tsuɔ, dengme nɛ o gboɔ, kɛ bɔ nɛ o toɔ o tsui si. I le hu kaa o ha we yayami peeli hɛ mi. Nihi nɛ tsɛɔ a he bɔfohi, se pi bɔfohi ji mɛ ɔ, bɔ nɛ o ka mɛ, nɛ o na kaa lakpatsɛmɛ ji mɛ ɔ, i le lɛ tsuo pɛpɛɛpɛ.

Galatabi 5:4

Nyɛ nihi nɛ nyɛ hlaa kaa nyɛ maa ye mlaa a nɔ, konɛ a dla nyɛɛ kɛ Mawu nyɛ kpɛti ɔ, pe nyɛ tsɔ nyɛ he kɛ je Kristo he ɔ nɛ. Enɛ ɔ tsɔɔ kaa nyɛ kua Mawu dloomi ɔ.

Malaki 3:4

Nike ní nɛ Yuda ma a, kɛ Yerusalem bi ɔmɛ ma ba ha Yawɛ ɔ, ja jã loko nike ní ɔ maa sa e hɛ mi kaa sa a.

Yesaya 14:12

“Babilonia matsɛ, mo nɛ́ o ngɛ kaa nɔkɔ nɛ kpɛɔ hleii makɛ ɔ, o je hiɔwe ba nɔ si bum! Be ko nɛ be ɔ, o ye mahi a nɔ kunimi, se jehanɛ lɛɛ a tsɛ̃ mo ko si.

Yuda 1:24

Lɛ nɔ nɛ e ngɛ he wami nɛ e kɛ maa hyɛ nyɛ nɛ nyɛ be si nɔe, nɛ e maa hɛɛ nyɛ kɛ bua jɔmi kɛ ba e hɛ mi nyami klɔuklɔu ɔ mi nɛ piami ko be nyɛ he hie ɔ,

Hebribi 10:32

Nyɛ kai bɔ nɛ nyɛ hi si sa a. Benɛ nyɛ ba le Mawu ɔ, nyɛɛ kɛ hɛ mi miami na amanehlu babauu.

Hosea 9:10

Yawɛ ke, “Benɛ i na Israel ma a kekleekle ɔ, a ngɛ kaa wai yiblii ngɛ nga nɔ. Benɛ i na nyɛ nɛmɛ ɔmɛ ɔ, a ngɛ kaa ngmɔkɔ he nɛ fu ngɛ e be mi. Se benɛ a ba su Peor yo ɔ he ɔ, a ba bɔni Baal jami. A kɛ nɔ́ nɛ ɔ ble a he, nɛ a he pee tai kaa nɔ́ ɔ nɛ a ngɛ jae ɔ nɔuu.

Kpojemi 16:9

Pu la nɛ nya wa a sãã mɛ saminya, nɛ a tu musu bɔmi munyuhi kɛ si Mawu, nɔ nɛ ngɛ he wami ngɛ kikɛmɛ a haomi nɛ ɔmɛ a nɔ ɔ. Se a tsakee we a tsui, konɛ a wo Mawu hɛ mi nyami.

Mateo 5:14

“Nyɛ ngɛ kaa la kɛ ha je ɔ. Ma nɛ a bɔ ngɛ yoku nɔ ɔ, e be nyɛe maa laa.

Mateo 5:15

Jehanɛ se hu, nɔ ko su we kane kɛ ma sowe sisi; mohu e kɛ maa kane tso nɔ, nɛ́ e tso ha nihi tsuo nɛ ngɛ we ɔ mi.

Filipibi 2:15

Ke nyɛ pee ja a, nyɛ he ma tsɔ, nɛ piami ko piami ko be nyɛ he hie; nyɛ maa pee Mawu bimɛ nitsɛnitsɛmɛ ngɛ yayami peeli, kɛ nihi nɛ a tue wa a a kpɛti. Ejakaa nyɛ je mi bami he tsɔ kaa bɔ nɛ dodoe kpɛɔ.

2 Petro 3:17

Se ye nyɛmimɛ nɛ i suɔ, nyɛɛ lɛɛ nyɛ le enɛ ɔ momo. Lɔ ɔ he ɔ, nyɛɛ hyɛ nɛ hi saminya, nɛ nihi nɛ bui mlaa a, a ní peemi ní yayami ɔmɛ kó gbla nyɛ se, nɛ nyɛ si nɛ nyɛ da a ko bɔ nyɛ.