फीलीपी 2:12 - चेपाङ

¹² लौ उया पुःचोङ् हौचोङ्‌लम् ङ्‌हापाय् ङा नीङ्‌कुस् मुओहाङः ङाइ तोओ कुरा ग्‍यातीलेः जाङ्‌ह्‌तेःनीतो द्याह्‌पाय् ङा मुमालोहाङःमा ङाइ तोओ कुरापाय् न्‍हाङ्‌तोलेः जाङ्‌ह्‌सा खेःतो। ओहाङःसै परमेस्‍वर्‌कः एङःती दल्ओ मान्‍ताकोः काम्‌लम् जुगाङ् दप्‌तीलेः जाङ्‌ह्‌नु दा।

फीलीपी 2:12 Cross References

मत्ती 11:12

बाप्‍तीस्‍मा बयःओ युहना वाङ्‌तोक्‌हाङः सबै परमेस्‍वर्‌कोः कुरा छ्यानःओमयःइमा मोसाइ बयःओ ऐन्इमा इ राजीकोः कुरा छ्यानःती तोआकानी। ओहाङःसैको युहना मुओ दीन्‌हाङःसै तेन्‌छ्याङ्‌च्‍युक्‌कायःलेः परमेस्‍वर्‌कोः राजीहाङः जोक्ओ मान्‍तालम् मीन्‍ह्‌काय्‌लाङ् वाङ्‌नै।

मत्ती 11:29

ङाकोः काम् जाङ्‌ह्‌सा थेङा ङाकःताङ् स्‍यान्‌लाङ् वाङ्‌न। ङापाय् खह्र्ओमा ज्‍योङःओ ल्‍हुङ्‌कोः मान्‍ता खेःङल ङाइ बयःओ काम् हाःतो लेःआः बा।

खबरदुत 16:29

एत सायःआक्‌तीको ओउः झ्‍याल्‍खानकायः ल्‍युङ्‌ह्ओ मान्‍ता थोङ्‌ती योसा म्‍हेःलेः नोकरीसै तेती त्‍याक्‌ती पावुल् सीलास्‌कःताङ् तन्‌ती योलाङ् वाङ्आ। तन्‌ती वाङ्आक्‌तीको ओउः मान्‍ता रैतीमा रीङ्‌ह्‌तीमा पावुल् साथीनीस्‌कोः दोम्‌हाङःताङ् बाःआथाच।

खबरदुत 9:6

“लौ चीङ्‌ती सहर्‌ताङ् आल्‌धाङ्अ। आल्आक्‌तीको नाङ्इ दोह् हायःसा त ङाइ ओहाङः स्‍यान्‌नेःनाङ्” त दाय्‍ह्‌ती सावुल्‌कायः तोआथै।

रोमी 2:7

सुसुखेइ गलकायःमा पेओ काम्‌लेः जाङ्‌ह्‌धै लयःकायः पेतोमा ताङ्‌ह्‌तो स्‍याव्‌साकायःमा गलमा द्योक्‌मालो जीङःकायःमा बोङःनानी ओउःमयःकायःलेः परमेस्‍वर्‌इ गलमा द्योक्‌मालो जीङः बयःआनाःथास।

१ कोरीन्‍थी 15:58

लौ उया ङाइ राप्ओ पुःचोङ् हौचोङ्‌य ग्रमःत मुती प्रभुकोः काम्‌पाय् गलकायःमा पेतो म्‍ह्याङ्‌तीलेः जाङ्‌ह्‌झुङ्‌नु दा ओउःपाय् आह्रे काम् खेःबाय्‌ल।

१ कोरीन्‍थी 2:3

वाङ्‌तोक्‌हाङः “ङाच्‍युक् मीओ मान्‍ता इत ताङ्‌ह्ओ कुरा तोसालेः खेःनाङः” त म्‍हर्‌ती ङा आन ल्‍हुङ् रुःती रैआताङः

१ कोरीन्‍थी 4:14

इ कुरा नीङ्‌कायः रास्‌ताक्‌साकायः लेखओ खेःङल ङाकोः ल्‍हुङ्‌गोरे चोःलम्‌लो लेखालेः नीङ्‌कायः ङाइ गानाक्‌ती तोओ लेखनेःनाङ्‌स।

२ कोरीन्‍थी 7:15

ओउःकायः नीङ्इ रैतीमा ग्‍यातीमा रोम्‌तेःआकानी त गीलती तीतस् आन ल्‍हुङ् म्रोतीलेः मुनाः।

एफेसस् 6:5

ओहाङःसै नीङ् नोकरीलम्‌य ख्रीस्‌कः ग्‍याती एङःओलो लेखालेः नीङ्‌कोः मालीक्‌लम्‌कः ग्‍याती एङःती ओउःमयःइ बयःओ काम्‌लम् म्‍ह्युङ्‌ती जाङ्‌ह्‌नु दा।

फीलीपी 1:27

ओहाङःसैको दोह् खेःयाकायःमा ख्रीस्‌कोः पेओ समचार्‌ ङ्‌हाम्ओलम्‌लो लेखा वाह्‌न। ओउःत हायःती नाङ्‌कायः ङाइ क्रुस्‌नेःनाङ्‌सया क्रुस्‌नेःनाङ्‌सलया “ओउःमयःइ यातैज्‍याङ् ल्‍हुङ् ग्रमःत मुती ब्राङ्‌तोलेः स्‍याव्‌ती ओउः पेओ समचार्‌कोः काम्‌पाय् त्‍युस्‌तीलेः जाङ्‌ह्‌नानी” त दाय्‍ह्‌ती नीङ्‌कायः नोःओ सायःपाङः।

फीलीपी 1:29

नीङ्‌पाय् दोह् हायःती ग्रमःत मुसा खेःतो दाय्‍ह्‌सा नीङ्‌कायःपाय् ङ्‌हाम्‌साकायः झुङ्आले खेःल ख्रीस्‌कायः नीङ्इ लीह्‌सीःओ गोरःसाकायःमा छ्युङ्‌ह्‌तेःइतो।

फीलीपी 1:5

दोह् हायःती दाय्‍ह्‌सा ङ्‌हाहाङःसै देङीच्‍युक्‌हाङः ङाइ परमेस्‍वर्‌कोः पेओ समचार्‌ थोल्‍ह्‌ती तोतोक्‌हाङः ङाकायः नीङ्इ लव्‍ह्‌धै मुतेःइतो

फीलीपी 1:6

ओउःत झ्‍यान्‍ते नीङ्‌कायः तोहालेः पेतो वाह्‌ताक्ओ परमेस्‍वर्‌लेः ओउःइ देङीमा लोनेःमा येसु ख्रीस् वाङ्‌नम् दीन्‌च्‍युक्‌हाङः पेतोलेः वाह्‌ताक्‌तेःनै एत ङा ल्‍हुङ्‌हाङः म्‍हर्‌नाङः।

फीलीपी 2:19

प्रभुइ ताक्‌नाःताङः त खेःया देङेलेः नीङ्‌कःताङ् तीमोथी ल्‍होक्‌नेःनाङ्‌स ओहाङःसै नीङ्‌कायः गत स्‍याव्‌नै त दाय्‍ह्ओ कुरा सायःआक्‌तीको ङा ल्‍हुङ् धोमाय्‌नाङः।

फीलीपी 4:1

लौ उया ङाइ आन राप्ओ आन झाह्ओ पुःचोङ् हौचोङ्‌य नीङ् पेतो स्‍याव्‌ती झ्‍यान्‍ते ङापाय् आन चोङाय्‌तो आन म्रोतोलेः मुनाङः। ओउःत खेःओ प्रभुकोः काम् फेमाःत ङाइ तोओलो लेखालेः क्रोङ्ओ ल्‍हुङ्इ पेतो जाङ्‌ह्‌धै मुन।

फीलीपी 4:15

ङ्‌हाहाङःपाय् पेओ समचार्‌ नीङ्इ तोहालेः सायःतोक्‌हाङः ङा मासीदोनीयासै फेआक्‌तीको सुइमा ङाकायः बयःताङःल नीङ् फीलीपीहाङः मुओ ङ्‌हाम्ओलम्इ ह ङाकुस्इ थोप्‌काय्‌तोलेः बयःकाय्आतय्‍ही। एत चीःतेःनानी।

१ थेसलोनिकि 1:3

दोह् हायःती दाय्‍ह्‌सा ङीकोः प्रभु येसु ख्रीस्‌कायः पेतो राप्‌तीमा ङ्‌हाम्‌तीमा नीङ्इ ओउःकोः काम् त्‍युस्‌ती जाङ्‌ह्‌तेःनानी फेरी प्रभुकोः द्यान्‍ह्‌ती वाङ्‌सा दीन्‌कायः नीङ् ग्रमःतलेः ल्‍युङ्‌ह्‌ती मुतेःनै। ओउःत गीलती ङीइ परमेस्‍वर्‌ आपाकायः तेती तोतोक्‌हाङः गलकायःमा “च्‍युता” त तोनाङःसु।

२ तीमोथी 2:10

एत हायःओ स्‍याव्‌ती ङाइ परमेस्‍वर्‌इ छीङ्‌ह्ओ मान्‍तालम्‌कायः लीह्‌सीःओ गोरःलेःनाङः दोह् हायःती दाय्‍ह्‌सा ओउःमयःइमा येसु ख्रीस्इ जाङ्‌ह्ओ आन पेओ गलमा द्योक्‌मालो जीङः दोःसा खाय्‌नानी।

हेब्रैनी 12:1

ओउःच्‍युक् नाःतो पेतो हायःओलम् ङीकोः ङ्‌हासै वाह्आकाय् त खेःओ लौ वाह्‌तोक्‌हाङः दोह् दोह् कुराइ लीःनाःतय्‍ही दोह् दोह्इ रेव्‌ताक्‌नाःतय्‍ही ओउःपाय् जुगाङ् फेती ल्‍याम्‌कोः ङ्‌हाताङ् योती ल्‍हुङ् क्रोङ्‌तोलेः पेतो वाह्इ।

हेब्रैनी 4:1

ओउःमयःखे पोक्‌सा दोःइली परमेस्‍वर्‌कोः पेतो मुसा राजीहाङः ङीखेकायः “लौ पोक्‌सा दोःओ लेःआः” त ओउःइ तोती गम्आतय्‍ही। ओउःत झ्‍यान्‍ते नीङ्‌कःहाङः “यात्‌नीस्‌चाक् पोक्‌लाङ् दाह्‌साकायः दोःइली यादो” त दाय्‍ह्‌ती ल्‍हुङ् र्‍याङःती झ्‍यान्‍ते ङी घीःती मुसा खेःनाःतय्‍ही।

हेब्रैनी 4:11

लौ उया ङीइमा ओउःकोः राजीहाङः पोक्‌सा पेतो बोङःनी ओहाङःसै ङी काम् कोरःती मुसा खाय्‌नाःतय्‍ह्‌नी। सुमा ओउः पोक्‌सा दोःमालो आय्‌कानः तोकानःलो लेखालेः ल्‍हुङ् ग्‍यामाःत मुती वाय्‌तो स्‍याव्‌लाम्।

हेब्रैनी 5:9

ओहाङःसैको ओउःपाय् जुगाङ् नीङ्‌तोलेः स्‍याव्आक्‌तीको सबै ओउःकोः कुरा ग्‍याओलम्‌कायः येसुइ गलकायःमा दल्‌तो स्‍याव्‌सा दोःताक्आकान्।

१ पत्रुस् 2:11

लौ ङाकोः राप्ओ पुःचोङ् हौचोङ्‌लम् ल्‍हाव्‍ह्‌दैबाङ्‌कोः मुतोक्‌हाङः नीङ्‌पाय् भ्‍यामःती ब्‍याह्‌ती याक्ओ थेथे मान्‍तालो लेखालेः मुतेःनै ओउःत झ्‍यान्‍ते ल्‍हाव्‍ह्‌दैबाङ्‌कोः रेव्‌तो मोह्‌हाय्‌साकायः ग्‍यामाःत वाह्‌न। ओउः ल्‍हुङ्‌तुक्‌कोः मोह्‌हाय्ओइ गलकायःमा नीङ्‌कायः रेव्‌ताक्‌सा बोङःतेःनै।

२ पत्रुस् 3:18

लौ ङीकायः दल्‌ताक्ओ प्रभु येसु ख्रीस्इ नीङ्‌कायः न्‍हाङ्‌तोलेः बयःती ओउःकोः ल्‍हुङ्‌तुक् चीःताक्‌लेःपै। देङीमा गलकायःमा ङीकोः प्रभु जुगाङ् ताङ्‌ह्‌तोलेः स्‍याव्‌पाः। लौ ओउःतलेः स्‍याव्‌पाः।