फिलिप्पियों 4:3 - चम्बयाली नौआ नियम

³ ते मैं मसीह री सेवा करणे वाले अपणे विश्वासी भ्याल सुजुगस का ए बिनती करदा, कि से तिन्हा जनानियां बिच भी सुलह कराई दये किजोकी तिन्हा जनानियां ने मसीह रा सुब बसेख फैलाणे बिच मेरे, क्लेमेंस ते मेरे बाकि रे साथियां कने बराबर मैहनत कित्ते री है। ते तिन्हेरे नां जिन्दगी री कताब बिच लिख्खे गेरे हिन।

फिलिप्पियों 4:3 Cross References

लूका 10:20

फिरी भी इस गल्ल पर खुस मत हुदें, कि दुष्टात्मा तुसा रा गलाया मन्दियाँ, पर सिर्फ इस गल्ले री खुसी मनाओ कि तुसा रे नां स्वर्ग अन्दर लिखी दित्ते रे हिन।

रोमियों 12:1

इधेरे तांइ ओ संगी विश्वासियों, मैं तुसा जो परमेश्वर रे दया जो याद दुआई करी तुसा का छन्दे करदा, कि अप्पु जो जिन्दा, ते पवित्र अते परमेश्वर जो भाणे वाले कुर्बानी रे रुप बिच चढ़ाओ। परमेश्वर री सेवा करणे रा ए ही सही तरिक्का है।

रोमियों 16:12

असा री विश्वासी बहणा, त्रूफैना कने त्रुफोसा जो भी मेरा नमस्कार, जे प्रभु री सेवा तांइ बड़ी मैहनत करदी। प्यारी भैण पिरसिस जो भी मेरा नमस्कार, जिनिए प्रभु तांइ बड़ी जादा मैहनत कित्ते री है।

रोमियों 16:9

उरबानुस जो मेरा नमस्कार, जे मसीह यीशु री सेवा करणे बिच असा रा साथी है, ते प्यारे इस्तखुस जो भी मेरा नमस्कार!

फिलिप्पियों 1:12

ओ संगी विश्वासियों, मैं चाह्‍ंदा कि तुसा जो ए पता लग्गी जाओ कि मेरे कने बीत्ती, तिस कने सुब बसेख लोक्कां बिच होर जादा फैल्लेया।

फिलिप्पियों 1:16

से मणू इधेरे तांइ मसीह रा सुब बसेख सुणांदे किजोकी से मेरे जो प्यार करदे ते से जाणदे कि मैं मसीह रे बसेख पर उठणे वाले सवाल्लां रा जवाब दैणे तांइ चुणेया गे रा है।

फिलिप्पियों 1:27

सिर्फ इन्ना ही करो कि मसीह रे सुब बसेख रे हिसाब कने जिन्दगी जियो। ते भले ही मैं तुसा जो आई करी मिलां या ना भी मिलां, वस तुसा रे बारे बिच ए ही सूणेया कि तुसा इक्क-मन होई इक्क ही मकसद तांइ इकठ्ठे होई करी तिस विश्वास तांइ कड़ा संघर्ष करदे रैहन्दे जे मसीह यीशु रा सुब बसेख है।

फिलिप्पियों 1:5

किजोकी तुसा रे मसीह यीशु बिच विश्वास करणे रे पैल्ले दिन का लेई करी अज्ज तांइ तुसा मसीह यीशु रा सुब बसेख जो फलाणे अन्दर मेरे कने बराबर रे।

फिलिप्पियों 1:7

खरा होणा कि मैं तुसा सबणी तांइ इदेय सोच रख्खां, किजोकी मैं तुसा कने बड़ा वरी प्यार रखदा, किजोकी तुसा मेरे कने ए सौभाग्य परमेश्वर रे अनुग्रह कने हासिल कित्ते रा है, अब्बे भी जां मैं कैद बिच है ते मसीह रे सुब बसेख पर उठणे वाले सवाल्लां रा जवाब दैणे ते तिसजो साबित करणे बिच भी।

फिलिप्पियों 4:2

मैं यूओदिया रे ते सुन्तुखे रे भी छंदे करदा की से अप्पु-मिते सुलह करी के परमेश्वर बिच सांती कने रैह्ण।

कुलुस्सियों 1:7

तुसा ने इसेरी शिक्षा इपफ्रास का पाई, जे मसीह रे बसेख जो फैलाणे बिच असा रा साथी है ते असा पास्से का मसीह रा विश्वासयोग्य सेवक है।

प्रकाशित वाक्य 13:8

धरती रे सारे मणूआं ने तिसेरी अराधना कित्ते री है। जिन्हा लोक्कां रे नां तिस जिन्दगी री कताब बिच दुनिया जो बणाणे रे पैल्ले लिख्खे गेरे हिन, सिर्फ तिन्हा ने ही तिस ड्रोणे जानवर री अराधना नी कित्ती। से जिन्दगी री किताब, तिस “उरणू” री कताब है जिस जो कुर्बान कित्तेया गेया थिया।

प्रकाशित वाक्य 17:8

जे ड्रोणा जानवर तैं अब्बे दिख्खेया, से पैल्ले कदी जिन्दा हुंदा थिया, पर अवे से मरी गे रा है, इनिये पताल का बाहर आणा ते परमेश्वर ने तिसजो हमेसा तांइ मुकाई दैणा। जे मणू धरती पर रेया करदे हिन, जिन्हेरे नां परमेश्वर ने अपणी जिन्दगी री कताब बिच नी लिख्खे रे हिन, तिन्हा लोक्कां ने तिस जानवर जो दिख्खी करी बड़ा हैरान होणा। से कदी जिन्दा हुंदा, पर अवे से मरी गे रा है, पर तिनिये फिरी वापिस आणा।

प्रकाशित वाक्य 20:12

फिरी मैं मरे रे लोक्कां जो दिख्खेया, मैं खास ते आम लोक्कां जो तिस सिंहासन रे सामणे खड़ित्ते रे दिख्खेया। जिन्ने भी मणू समुंदर बिच डूब्बी करी मरे थिये, जिन्ने भी मणू तिस जगाह् बिच थिये जित्ते मरे रे मणू रैह्‍न्दे, से सारे तिस सिंहासन रे सामणे खड़ित्ते रे थिये। तिस कताब जो खोल्लेया गेया जिस बिच तिन्हा लोक्कां रे नां लिख्खे गेरे थिये जिन्हा जो कदी ना मुकणे वाली जिन्दगी थी। से कताब भी खोल्ली गयी जिस बिच लोक्कां रे कित्ते रे कम्म लिखित्ते रे थिये, ते हर इक्क जणे का तिन्हेरे कित्ते रे कम्मां रा हिसाब-किताब लित्तेया गेया।

प्रकाशित वाक्य 21:27

पर तिस बिच कोई अपवित्र चीज, या बुरा कम्म करणे वाला, या झूठ रा गढणे वाला कुसकी तरिक्के कने तिस बिच आई नी सकणा, पर सिर्फ से मणू जिन्हेरे नां उरणू री जिन्दगी री कताब बिच लिख्खे रे हिन।

प्रकाशित वाक्य 3:5

जिन्हा लोक्कां ने दुष्ट पर जीत हासिल करणी, तिन्हा जो मैं इसी तरिक्के कने चिट्टे कपड़े पुआणे। मैं तिस कताब का तिन्हा लोक्कां रे नां नी कटणे जिस कताब बिच से नां लिख्खे गेरे हिन जिन्हा जो हमेसा री जिन्दगी मिलणी। मैं अपणे पिता ते परमेश्वर, ते सारे स्वर्गदूतां रे सामणे ए एलान करणा कि से मणू मेरे हिन।