फिलिप्पियों 1:7 - चम्बयाली नौआ नियम

⁷ खरा होणा कि मैं तुसा सबणी तांइ इदेय सोच रख्खां, किजोकी मैं तुसा कने बड़ा वरी प्यार रखदा, किजोकी तुसा मेरे कने ए सौभाग्य परमेश्वर रे अनुग्रह कने हासिल कित्ते रा है, अब्बे भी जां मैं कैद बिच है ते मसीह रे सुब बसेख पर उठणे वाले सवाल्लां रा जवाब दैणे ते तिसजो साबित करणे बिच भी।

फिलिप्पियों 1:7 Cross References

प्रेरितां रे कम्म 20:23

सिर्फ ए ही कि पवित्रात्मा हर इक्क सहर बिच गवाही देई-देई करी मेरे जो बोलदा कि बंधन ते कहला तेरे तांइ तैयार हिन,

प्रेरितां रे कम्म 21:33

तां पलटन रे सरदार ने नेड़े आई करी तिसजो पकड़ी लेया ते दो संगलां कने बणने रा हुकम देई करी पूच्छणा लगेया, ए कुण है ते इनिए कै कित्ते रा है?

1 कुरुन्थियों 13:7

से हर गल्ल जो सैह्‍ण करी लिंदे, प्यार करणे वाले मणू परमेश्वर बिच विश्वास नी छडदे, प्यार परमेश्वर बिच असा री आस जो बणाई रखदा, ते मुस्किल ते तकलिफां रे दौर बिच से सबर कने रैहन्दा।

1 कुरुन्थियों 9:23

मैं ए सब किच्‍छ मसीह रे सुब बसेख जो फैलाणे तांइ करदा ताकि इसेरी आशीषां बिच हिस्सा पां।

2 कुरुन्थियों 3:2

तुसा ता अप्पु ही चीठ्ठियां सांई हिन जे परमेश्वर तांइ कित्ते रे मेरे कम्मां री सिफारिश करदे ते जिन्हा जो सारे मणू पढदे ते समजदे।

2 कुरुन्थियों 7:3

मैं तुसा जो दोषी ठैहराणे तांइ ए नी बोलदा, किजोकी मैं पैल्ले ही बोल्ली चुक्के रा है कि असी तुसा जो इन्ना प्यार करदे कि असी तुसा कने जीणे-मरणे तांइ भी तैयार हिन।

गलातियों 5:6

जां असी मसीह यीशु बिच विश्वास करणा सुरु करी दिंदे तां यहूदी या गैर यहूदी होणे रा कोई फरक नी रैहन्दा। पर जरुरी गल्ल ए है कि असी मसीह बिच विश्वास करदे ते तिस वजह कने परमेश्वर ते बाकि मणू प्यार रखदे।

इफिसियों 3:1

किजोकी परमेश्वर ने ए सारा किच्‍छ तुसा गैर यहूदी लोक्कां तांइ कित्तेया, मैं पौलुस तुसा सारेयां तांइ प्रार्थना करदा। मैं मसीह यीशु री सेवा तुसा रे खातिर कित्ती इधेरे तांइ मैं कैद बिच है।

इफिसियों 4:1

इधेरे तांइ मैं जे प्रभु री सेवा करणे री वजह कने कैद बिच है, तुसा रे छन्दे करदा कि जिस बुलाह्ट कने तुसा सद्दे गे थिये, तिस जोग्गी चालचलन बणाई रख्खो,

इफिसियों 6:20

हालांकि मैं कैद बिच है फिरी भी मैं सुब बसेख तांइ इक्क राजदूत सांई है। मेरे तांइ प्रार्थना करेयो कि मैं सुब बसेख सुनाणे बिच हिम्मत वाला बणां, जदेया मेरे जो होणा भी चाएदा।

फिलिप्पियों 1:12

ओ संगी विश्वासियों, मैं चाह्‍ंदा कि तुसा जो ए पता लग्गी जाओ कि मेरे कने बीत्ती, तिस कने सुब बसेख लोक्कां बिच होर जादा फैल्लेया।

फिलिप्पियों 1:13

इत्ते तक कि सम्राट रे राजभवन री सारी सैना रे दल ते बाकि सबणी मणूआं अन्दर पता लग्गी गेया कि मैं मसीह यीशु री सेवा करणे री वजह कने कैद है।

फिलिप्पियों 1:14

ते मेरे कैद होणे री वजह कने बाकि रे विश्वासियां की हिम्मत बधी गे री है। से निडर होई करी हिम्मत कने परमेश्वर रा बसेख सुणाया करदे हिन।

फिलिप्पियों 1:5

किजोकी तुसा रे मसीह यीशु बिच विश्वास करणे रे पैल्ले दिन का लेई करी अज्ज तांइ तुसा मसीह यीशु रा सुब बसेख जो फलाणे अन्दर मेरे कने बराबर रे।

फिलिप्पियों 2:22

पर तुसा तां जाणदे कि तीमुथियुस ने किय्यां साबित कित्ते रा है कि से विश्वासयोग्य है। ते जिय्यां इक्क पुत्तर अपणे प्यो कने मैहनत करदा, तिय्यां ही तीमुथियुस ने सुब बसेख फैलाणे अन्दर मेरे कने मैहनत कित्ती है।

फिलिप्पियों 4:14

तां भी तुसा मेरी मुसीबत बिच मेरे जो दान देई करी मेरी मदद कित्ती, तुसा ने खरा कित्तेया।

फिलिप्पियों 4:15

ओ फिलिप्पी सहर रे संगी विश्वासियों, तुसा अप्पु भी जाणदे की सुब बसेख री सुरुआत बिच, जां मैं मकिदुनिया प्रदेश का निकलेया, तां तुसा जो छड्डी करी होर कुसकी कलीसिया ने लैणे-दैणे रे मामले बिच मेरी मदद नी कित्ती।

फिलिप्पियों 4:3

ते मैं मसीह री सेवा करणे वाले अपणे विश्वासी भ्याल सुजुगस का ए बिनती करदा, कि से तिन्हा जनानियां बिच भी सुलह कराई दये किजोकी तिन्हा जनानियां ने मसीह रा सुब बसेख फैलाणे बिच मेरे, क्लेमेंस ते मेरे बाकि रे साथियां कने बराबर मैहनत कित्ते री है। ते तिन्हेरे नां जिन्दगी री कताब बिच लिख्खे गेरे हिन।

कुलुस्सियों 4:18

मैं पौलुस, चीठ्ठी रे इस हिस्से जो अपणे हत्थ कने लिख्खी करी तुसा जो नमस्ते भेज्जेया करदा है। याद रख्खेयो कि मैं कैद बिच है, ते मेरे तांइ प्रार्थना करदे रेयो। तुसा पर परमेश्वर रा अनुग्रह बणे रे। आमीन।

कुलुस्सियों 4:3

ते कने-कने असा तांइ भी प्रार्थना करदे रेया करो ताकि परमेश्वर असा जो मसीह रे बसेख रा प्रचार करणे रा इक्क इदेया मौक्का दैण कि असी मसीह रे तिस राज़ रा वर्णन भी करी सकण। मैं अब्बे कैद बिच है किजोकी मैं इस बसेख रा प्रचार कित्ता।

1 थिस्सलुनीकियों 5:5

किजोकी तुसा सारे दिन री लौ जदेय धार्मिकता रे मणू हिन। असी न्याहरे जैसी बुराई ते रात रे मणू नी हिन।

2 तीमुथियुस 1:8

इस वजह कने दूज्जे लोक्कां जो असा रे प्रभु मसीह यीशु रे बारे बिच दसणे का शरमाओ मत, ते तुसा जो इधेरे तांइ भी शर्मिंदा होणे री जरुरत नी है किजोकी मैं तिन्हेरी सेवा करणे री वजह कने कैद बिच है। इसेरे बजाए तुसा जो से ताकत इस्तेमाल करणी चाएदी जे तुसा जो परमेश्वर दिंदे ते सुब बसेख तांइ मेरे कने मेरी तकलीफ बिच हिस्सेदार बणी जाओ।

2 तीमुथियुस 2:9

मैं मुजरिमां सांई तकलिफां सहन करेया करदा है किजोकी मैं सुब बसेख रा प्रचार करदा, इत्ते तिकर मैं कैद बिच भी पाया गे रा है, पर परमेश्वर रे बसेख जो फैलणे का कोई नी रोक्की सकदा।

फिलेमोन 1:13

मैं तिसजो अपणे का ही रखणा चाह्‍ंदा थिया ताकि से इत्ते सुब बसेख रा प्रचार करणे बिच मेरी मदद करे। किजोकी मैं जाणदा कि तू मेरी मदद करणा चाह्‍ंदा पर से तेरे बदले इत्ते रेई करी मेरी मदद करी सकदा।

इब्रानियों 3:1

इधेरे तांइ मेरे संगी विश्वासियों, तुसा जे परमेश्वर रे हिन, परमेश्वर ने तुसा जो स्वर्ग बिच हमेसा री जिन्दगी रे हिस्सेदार बणने तांइ सद्दे रा है। मसीह यीशु पर ध्यान लाई रख्खो, जे असा तांइ परमेश्वर रे पास्से का भेज्जे गेरे प्रेरित ते प्रधान पुरोत्त हिन।

1 पतरस 4:13

बल्कि इस गल्ल तांइ सिर्फ खुस हो, किजोकी तुसा जो मसीह पर होए जुल्मां री बराबरी बिच थोड़ा जदेया हिस्सा मिल्लेया। किजोकी जां मसीह ने लोक्कां पर अपणी महिमा जाहिर करणे तांइ हटणा, तिस बेल्ले तुसा जो बड़ा आनंद मिलणा।

1 पतरस 5:1

तुसा रे कलीसिया रे बुजुर्ग लोक्कां कने मैं इक्क संगी मुखिया ते मसीह पर होए जुल्मां रा इक्क इदेया गवाह होणे रे नात्ते, जिनिये तिन्हेरी महिमा बिच हिस्सेदार भी होणा ए बिनती करदा,

2 पतरस 1:13

असा रे प्रभु मसीह यीशु ने ए गल्ल मेरे पर जाहिर कित्ते री है कि मैं तौले मरी जाणा। इधेरे तांइ मेरे जो लगदा कि अब्बे रा समय मेरे तांइ बदिया है कि जां तिकर मैं जिन्दा है तां तांइ तुसा जो तिन्हा शिक्षां री याद दुआंदा रेयां।

1 यूहन्ना 3:14

असी जाणदे कि असी हमेसा री मौत रे वस बिच नी हिन ते अवे असा का परमेश्वर रे पास्से का हमेसा री जिन्दगी है किजोकी असी अपणे संगी विश्वासी कने प्यार करदे ते जे मणू प्यार नी करदा, से हमेसा री मौत रे वस बिच हिन।