फिलिप्पियों 1:21 - चम्बयाली नौआ नियम

²¹ किजोकी जे अगर मैं जियां तां से मसीह यीशु री बड़ाई करणे तांइ होणा, ते जे अगर मैं मरी भी जां तां से भी फायदेमंद है किजोकी तां मैं मसीह कने रैह्णा।

फिलिप्पियों 1:21 Cross References

1 कुरुन्थियों 1:30

पर परमेश्वर ने तुसा लोक्कां रा रिस्ता मसीह यीशु कने जोड़ेया, ते मसीह यीशु रे जरिये से असा जो अपणा ज्ञान दिंदे, परमेश्वर असा जो अपणी नजर बिच धार्मिक ठैहरांदे। असी मणू मसीह यीशु रे जरिये पवित्र ठैहराये गेरे हिन ते असा जो पाप का अजाद करदे।

2 कुरुन्थियों 5:1

जिय्यां कि असी जाणदे कि इस दुनिया बिच असा रा सरीर इक्क तम्बू सांई है जित्ते असी रैहन्दे। जां असी मरी जाणा तां असा जो परमेश्वर रे पास्से का स्वर्ग का इक्क इदेया सरीर मिलणा जे हत्थां रा बणे रा नी पर हमेसा तिकर रैह्णे वाला है।

2 कुरुन्थियों 5:6

अते असी हमेसा हिम्मत बणाई रखदे ते ए जाणदे की जां तिकर असी सरीर बिच रैहन्दे, तां तांइ असी प्रभु कने नी स्वर्ग बिच नी रेया करदे हिन।

2 कुरुन्थियों 5:8

इस तांइ असी हिम्मत बणाई रखदे कि मरणे रे बाद सरीर जो छड्डी करी प्रभु कने रैह्णा होर भी जादा खरा समजदे।

गलातियों 2:20

ए इदेया है कि जां यीशु मसीह सुली पर मरे तिय्यां ही मैं भी मरी गेया ते अवे मैं जिंदा नी रेया, पर मसीह यीशु मेरे बिच जिंदे। अते मैं अवे जे जिंदा है तां सिर्फ तिस विश्वास कने जिंदा है, जे मेरे जो परमेश्वर रे पुत्तर पर है, जिन्हा ने मेरे कने प्यार कित्तेया, अते मेरे तांइ अप्पु जो देई दित्तेया।

गलातियों 6:14

पर मैं कदी भी मसीह री सुली री मौत जो छड्डी करी होर कुसकी गल्ल पर घमंड नी करणा चाह्‍ंदा। मसीह यीशु रे सुली पर मरणे री वजह कने मैं अवे दुनिया री बुरी इच्छां रा गुलाम नी है, ते तिन्हा बुरी इच्छां का मेरे पर राज करणे तांइ होर ताकत नी है।

फिलिप्पियों 1:20

मेरी तां ए ही दिल का लालसा ते आस है कि मैं कुसकी गल्ल अन्दर शर्मिंदा ना होआं, पर जिय्यां मेरे हिम्मत कने मसीह रा बसेख सुनाणे री वजह कने मसीह यीशु री बड़ाई मेरे जरिए हमेसा हुंदी आए री है, तिय्यां ही अब्बे भी हो, चाए मैं जियां या मरी जां।

फिलिप्पियों 1:22

पर जे अगर मैं जिन्दा रेयां तां मैं मसीह यीशु तांइ होर भी कम्म करी सकदा, इधेरे तांइ नी जाणदा जीणा खरा है या मरणा?

फिलिप्पियों 1:23

किजोकी मैं इन्हा दोन्नां इच्छा बिच उलझी गे रा है: मैं तां चाह्‍ंदा कि मैं इस जिन्दगी जो छड्डी करी मसीह यीशु कने रैह्णे तांइ चली जां,

फिलिप्पियों 2:21

किजोकी सारे अपणे-अपणे मतलब री चीजां रे पीच्छे पे रे हिन। ते तिन्हा गल्लां री फिकर नी करदे जे मसीह यीशु तांइ जरुरी हिन।

कुलुस्सियों 3:4

नौई जिन्दगी दैणे वाले मसीह यीशु ने जां वापिस हटणा जिन्हा ने नौई जिन्दगी दित्ते री है, तां तुसा भी तिन्हा कने होणा ते तिन्हेरी महिमा बिच हिस्सा लैणा।

प्रकाशित वाक्य 14:13

फिरी मैं स्वर्ग का ए अवाज सूणी, “इन्हा गल्लां जो लिख्खी लै, अब्बे का लेई करी से मणू धन्न हिन जे परमेश्वर बिच विश्वास करदे होए ही मरे। फिरी पवित्रात्मा ने इस गल्ल जो ए बोल्ली करी पक्का कित्तेया, ए सच है। से धन्न हिन किजोकी तिन्हा ने अवे अपणी मैहनत रे कम्म का अराम करणा, तिन्हा जो तिन्हेरे कित्ते रे कम्मां तांइ ईनाम दित्तेया जाणा।”