फिलिप्पियों 1:20 - चम्बयाली नौआ नियम

²⁰ मेरी तां ए ही दिल का लालसा ते आस है कि मैं कुसकी गल्ल अन्दर शर्मिंदा ना होआं, पर जिय्यां मेरे हिम्मत कने मसीह रा बसेख सुनाणे री वजह कने मसीह यीशु री बड़ाई मेरे जरिए हमेसा हुंदी आए री है, तिय्यां ही अब्बे भी हो, चाए मैं जियां या मरी जां।

फिलिप्पियों 1:20 Cross References

यूहन्ना 21:19

यीशु ने ए सब पतरस री मौत रे पास्से इसारा करणे तांइ बोल्लेया, जिस कने पतरस ने परमेश्वर री बड़ाई करणी। इन्ना बोल्ली करी यीशु ने पतरस जो बोल्लेया, मेरा पीच्छे चल ते “मेरा चेल्ला बणी रे।”

प्रेरितां रे कम्म 20:24

पर मैं अपणी जान जो किच्‍छ भी नी समजदा कि तिसजो प्यारा समजां, पर तां ए कि, मैं अपणी दौड़ जो ते तिस सेवा जो पूरा करां, जे मैं परमेश्वर रे अनुग्रह री सुब बसेख पर गवाई दैणे तांइ प्रभु यीशु का पाए री है।

प्रेरितां रे कम्म 21:13

पर पौलुस ने जवाब दित्तेया, तुसा करदे कै हिन कि रोई-रोई करी मेरा दिल तोड़ेया करदे हिन? मैं तां प्रभु यीशु तांइ यरुशलेम अन्दर ना सिर्फ कैद होणे तांइ पर तां मरणे तांइ भी तैयार है

प्रेरितां रे कम्म 4:31

जां से प्रार्थना करी बैठे, तां से जगाह् जित्ते से कठित्ते रे थिये, हिली गेया ते से सारे पवित्रात्मा बिच भरी गे, ते परमेश्वर रा वचन हिम्मत कने सुणादे रेय।

रोमियों 12:1

इधेरे तांइ ओ संगी विश्वासियों, मैं तुसा जो परमेश्वर रे दया जो याद दुआई करी तुसा का छन्दे करदा, कि अप्पु जो जिन्दा, ते पवित्र अते परमेश्वर जो भाणे वाले कुर्बानी रे रुप बिच चढ़ाओ। परमेश्वर री सेवा करणे रा ए ही सही तरिक्का है।

रोमियों 5:5

ते इस आस कने असा जो निराशा नी हुंदी, किजोकी परमेश्वर ने असा जो पवित्रात्मा दित्ते रा है, जे असा रे मन जो परमेश्वर रे प्यार कने भरी दिंदा।

रोमियों 6:13

अते अपणे जिस्म रे कुसकी भी अंग जो बुरे कम्मां री सेवा करणे तांइ हवाले मत करो, बल्कि, अप्पु जो पूरे तरिक्के कने परमेश्वर रे हवाले करी देयो। किजोकी तुसा मरी गे थिये, पर अवे तुसा का नौई जिन्दगी है। इधेरे तांइ अपणे पूरे जिस्म जो इक्क औजार रे तौर पर परमेश्वर री महिमा तांइ इस्तेमाल करो।

रोमियों 6:19

तुसा री आत्मिक गल्लां जो समजणे री कमी री वजह कने मैं आमतौर री जिन्दगी बिच का ए उदारण देया करदा है, कि जिय्यां तुसा अपणे जिस्म रे हिस्सेयां जो गलत ते अधार्मिक कम्म करणे तांइ गुलाम्मां सांई सौंप्पि दित्तेया थिया, तिय्यां ही अवे अप्पु जो धार्मिकता रे कम्म करणे तांइ सौंप्पि देयो, ताकि तुसा पवित्र जिन्दगी जी सको।

रोमियों 8:19

किजोकी परमेश्वर री सारी रचना बड़ी उम्मीद तिस दिन जो भालेया करदे हिन जां परमेश्वर ने ज़ाहिर करणा कि कुण तिन्हेरे असली औलाद्दां हिन।

रोमियों 9:33

जिय्यां कि पवित्रशास्त्र बिच लिख्खे रा है, “दिख्खो, मैं सिय्योन बिच इक्क बट्टे जो रखणा, जिस कने ठोकर लगदी, अते इक्क इदेइ टोल, जिस कने ठोकर खाई करी लोक्कां ने छुड़कणा, पर से जे कोई मणू तिस पर विश्वास करे, तां तिसजो कदी शर्मसार नी होणा पैणा।”

1 कुरुन्थियों 15:31

ओ संगी विश्वासियों, मेरे जो तुसा पर गर्व है कि तुसा रा मसीह यीशु कने इक्क गहरा रिस्ता है, ते ए गल्ल भी सही है कि मैं हर रोज मसीह रा बसेख सुनाणे री वजह कने मौत रे खतरे बिच रैहन्दा।

1 कुरुन्थियों 6:20

किजोकी प्रभु ने सुली पर कुर्बानी देई करी तुसा री कीमत चुकाए री है। इधेरे तांइ अपणे सरीर कने ठीक कम्म करी के परमेश्वर री महिमा करो।

1 कुरुन्थियों 7:34

दो तरिक्के री जनानियां हुंदी, इक्क ता बगैर ब्याए री जनानियां हुंदी ते दुई ब्यात्ते री जनानियां हुंदी। ब्यात्ती री जनानियां ते बगैर ब्याए री कुड़ी बिच भी ए फरक है कि बगैर ब्याए री जनानियां प्रभु री सेवा री फिकर बिच रेह्न्दी कि से हमेसा परमेश्वर जो खुस करे। पर ब्याए री जनानियां दुनिया री गल्लां फिकर बिच रेह्न्दी कि अपणे लाड़े जो किय्यां खुस रख्खे।

2 कुरुन्थियों 10:8

किजोकी अगर मैं तिस हक रे बारे बिच होर भी गर्व करां, जे प्रभु ने असा जो तुसा रे विश्वास जो घटाणे तांइ नी पर तुसा रे विश्वास जो बधाणे तांइ दित्ते रा है, तां मैं शर्मिंदा नी होणा।

2 कुरुन्थियों 3:12

इधेरे तांइ इदेइ आस रख्खी करी असी हिम्मत कने बोलदे।

2 कुरुन्थियों 4:10

असी हर बेल्ले मसीह यीशु री तकलिफां ते मरणे रे अनुभव जो अपणे सरीर बिच महसूस करदे ताकि मणू मसीह यीशु रे जिन्दगी जो असा रे कम्मां रे जरिये जाणी सकण।

2 कुरुन्थियों 5:15

ते मसीह इधेरे तांइ सारेयां तांइ मरेया कि जे मणू जिन्दे हिन, से अग्गे जो अपणे तांइ ना जिन्दगी ना जीण पर तिन्हेरे तांइ जीण जे तिन्हेरे तांइ मरेया ते फिरी मरे रे लोक्कां बिच का जिन्दा होई गेया।

2 कुरुन्थियों 7:14

किजोकी अगर मैं तिसेरे सामणे तुसा रे बारे बिच किच्‍छ गर्व दिखाया भी, तां मैं शर्मिदां नी होया, पर जिय्यां असी सारी गल्लां तुसा रे सामणे सच-सच बोल्ली दित्ती थी तिय्यां ही असा रा गर्व करणा तीतुस रे सामणे सच निकलेया।

2 कुरुन्थियों 7:4

मैं तुसा कने बड़ी हिम्मत कने बोलदा कि मेरे जो तुसा पर बड़ा गर्व है, मैं बड़ा वरी उत्साहित है, अपणे सारे दुख बिच भी मैं खुसी कने भरी रैहन्दा।

फिलिप्पियों 1:14

ते मेरे कैद होणे री वजह कने बाकि रे विश्वासियां की हिम्मत बधी गे री है। से निडर होई करी हिम्मत कने परमेश्वर रा बसेख सुणाया करदे हिन।

फिलिप्पियों 2:17

प्रभु बिच तुसा रा विश्वास ते तुसा री सेवा इक्क कुर्बानी सांई प्रभु जो चढाया गेरे हिन, ते जे अगर मेरे जो तुसा रे विश्वास ते सेवा तांइ अपणी जान भी दैणा पये, तां भी मैं खुस है।

कुलुस्सियों 1:24

मेरे जो तुसा तांइ जुल्म झेलणे बिच खुसी हुंदी, मैं इस गल्ल बिच खुस है कि मैं मसीह रे सरीर तांइ, जे तिन्हेरी कलीसिया है, आखरी समय तिकर मसीह रा अपणी कलीसिया तांइ जुल्म झेलणे बिच जे भी कम्म अधुरा रेई गे रा हो, तिसजो पूरा करदे रैह्णा।

1 थिस्सलुनीकियों 5:23

ते परमेश्वर जे तुसा जो सांती दिंदे अप्पु ही तुसा जो पूरे तरिक्के कने पवित्र करण ते असा रे प्रभु यीशु मसीह रे हटी आणे तिकर तुसा री पूरी आत्‍मा ते पूरे प्राण ते पूरा सरीर कने बेकसूर ते सुरक्षित रे।

1 पतरस 4:16

बल्कि तुसा मसीह बिच विश्वास करणे वाले मणू हिन, ते तुसा तिसजो अपणी बेजती मत समजदे, बल्कि मसीह बिच विश्वास करणे रे नात्ते परमेश्वर री महिमा करो।

1 यूहन्ना 2:28

अते ओ बच्चेयों, मसीह बिच बणे रेयो कि जां मसीह हटी आये तां असा जो हिम्मत रे, ताकि तिन्हेरे आणे पर असी तिन्हेरे सामणे शर्मसार ना होण।