ফিলিপীয় 4:8 - Chakma Bible

⁸ যেরেদি কং, ভেইলগ্, যিয়েন সত্য, যিয়েন যগাজ্জ্যে, যিয়েন গম্, যিয়েন খাটি, যিয়েন-দোল্, যিয়েন সর্মান পেবার যগাজ্জ্যে, আজল্ কধা যিয়েন গম্ আর নাঙ্ গিনিবার্, সিন্দি তুমি মনানি দুয়ো।

ফিলিপীয় 4:8 Cross References

পত্থম 18:19

মুই লগেপ্রভু এ আশালোই তারে বেঈ নেযেয়োং যেনে তে তার পুয়ো আর ঘরর্‌ অন্য বেক্কুনোরে গম্‌ আহ্ দোল্ কাম্‌ গুরিনে মর্‌ আওজ্ মজিম মানি চুলিবার্‌ উবদেজ্ দে। যুদি তারা অব্রাহাম কধা শুনিনে সেধোক্ক্যেন গুরি চলন্‌, সালে মুই লগেপ্রভু অব্রাহাম পৌইদ্যেনে যিয়েনি কোইয়োং সিয়েনি বেক্কানি গুরিম্‌।”

২ শমূয়েল 1:23

বাঁজি থাগদে শৌল আর যোনাথনে কোচ্‌পেইয়্যে আর গম্‌ মানুচ্‌ এলাক্; তারা মরদেয়ো ফারক্‌ ন-অলাক্‌। তারার গঙার্ এলদে চিল পেগোত্তুন্‌‌অ বেশ্‌, আর বল্‌‌অ এলদে সিংহত্তুন্‌ বোউত্‌ বেশ্।

২ শমূয়েল 23:3

ইস্রায়েলর গোজেনে কোইয়্যেদে, ইস্রায়েলর আশ্রয়-মুড়ো মরে কোইয়্যেদে, ‘যে মানুচ্চো গমেডালে মানুচ্চুনোরে শাজন্ গরে আর গোজেনরে দরায়,

গীতসংহিতা 82:2

“আর কয়দিন তুমি অন্যেয়র শাজন্ চালেবা? কয়দিন পাজিগুনোর তপ্পে থেবে?

গম্ উপদেজ্ 11:1

ঠগাইদ্যে পাল্লাবো লগেপ্রভু ঘিনাই, মাত্তর্ যগাজ্যে সিলুনোত্তে তে হুজি অয়।

গম্ উপদেজ্ 12:4

গম্ আর গুণবলা মোগ্ নেগর্ মাঢাবোর মুকুট ধোক্ক্যেন্, মাত্তর্ যে মোক্কো লাজ্ গরে পারা কাম গরে তে তা নেক্কোর পঁচা আড় ধোক্ক্যেন।

গম্ উপদেজ্ 16:11

যগাজ্যে পাল্লাবো আর মাপ্পান্ লগেপ্রভুর; থৈল্যেবোর ঠিগ্ শিলুন তা চোগেদি গম্।

গম্ উপদেজ্ 20:7

গোজেন ভক্ত মান্‌জ্যে গমেডালে চলে; বর্ পেইয়্যে তার বংশগুন!

গম্ উপদেজ্ 31:10

গম্ আর গুণবলা মিলে কন্না পেই পারে? প্রবাল পাত্তরত্তুন্অ তা দামান বোউত্ বেশ্।

গম্ উপদেজ্ 31:29

“বোউত্ মিলে তারার কাবিদ্যেঙানি দেগেয়োন্, মাত্তর্ তুই তারারে বেক্কুনোরে ছাড়ি যেইয়োচ্।”

গম্ উপদেজ্ 31:31

তা কামর্ পাওনা সর্মান তারে দুয়ো; শঅর গেদোত্ তা কামানিয়ে তারে বাঈনী গোরোক্।

পরমগীত 5:16

তা মুয়োন্ অমকদ মিদে, তার্ বেক্কানি দোল্। ও যিরূশালেমর্ মিলেগুন্, তেয়ই মর্ কোচ্‌‌‌‌‌পানা, মঅ সমাজ্যে।

যিশাইয় 26:7

গোজেনভক্ত মানুচ্চুনোর পথ্‌তান্ সং থায়; ও ন্যায়বলা, তুই গোজেন ভক্তগুনোর্ পথ্‌তানি সং গুরি থাচ্।

মথি লেখ্যে গম্ হবর্ 22:16

তারা হেরোদ দলর্ কয়েক্কো মান্‌জ্য লগে নিজোর্ কয়েক্কো শিচ্চ্যরে যীশু ইধু পাধেলাক। তারা যীশুরে কলাক্, “মাষ্টরবাবু, আমি হবর্ পেই তুই এক্কো গম্ মানুচ্। গোজেন পথ্‌তান পৌইদ্যেনে তুই সত্য শিক্ষ্যে দি থাচ্। মান্‌জ্যে কি মনে গুরিবাক্ ন-গুরিবাক্ সিয়েনিলোই তর্ কি অয়, কিয়া তুই কারঅ মু চেইনে কিচ্ছু ন-গরচ্।

মার্ক 6:20

মাত্তর্ হেরোদে যোহনরে দোরেদ বিলি তে সিয়েন গুরি ন-পারে। যোহনে যে এক্কো গোজেন্‌ভক্ত আর পবিত্র মানুচ্ হেরোদে সিয়েন হবর্ পেদঅ, সেনত্তে তে যোহনরে দযাত্তুন্ রোক্ষ্যে গুরিদো। যোহনর্ কধা শুনিবার সলাত্ মনত্ খুব দুঘ্ পেলেয়ো হেরোদে তা কধানি শুনিবাত্তে গম্ পেদঅ।

লূকে লেখ্যে গম্ হবর্ 16:15

সেক্কে যীশু তারারে কলঅ, তুমি মান্‌জ্য মুজুঙোত্ নিজোরে ধার্মিক দেগেই থাগঅ, মাত্তর্ গোজেনে তমা মন কধা কোই পারে। মান্‌জ্যে যিয়েন সর্মানি মনে গরন্ গোজেন চোগোত্ সিয়েন ঘিনাইদ্যে জিনিস।

লূকে লেখ্যে গম্ হবর্ 2:25

সেক্কে যিরূশালেমত্ শিমিয়োন নাঙে এক্কো ধার্মিক আর গোজেনভক্ত মানুচ্ এলঅ। গোজেনে কক্কে ইস্রায়েলীয়গুনো দুঃখানি দূর্ গুরিবো সেই সময়ানত্তে তে বাজ্জেই আঘে। পবিত্র আত্মা তা উগুরে এলঅ আর তাইধু ফগদাং গোজ্যেদে যে, মুরি যেবার্ আগেদি তে প্রভুর সেই মশীহরে দেগিবো।

লূকে লেখ্যে গম্ হবর্ 23:50

যোষেফ নাঙে এক্কো গম্ আর ধার্মিক মানুচ্‌ বড়সভার্ মেম্বার্ এলঅ। তে অরিমাথিয়া নাঙে যিহূদীগুনোর্ এক্কান আদামর মানুচ্‌।

যোহন 7:18

যে নিজোত্তুন্ কধা কয় তে তার্ নিজোর্ নাঙ্ ফুদেবার্ চেষ্টা গরে, মাত্তর্ যে দিপাধেয়্যে, কেঅ যুনি তার নাঙ্ ফুদেবার্ চেষ্টা গরে সালে তে সত্যবাদী আর তা মনত্ কনঅ ছলনা নেই।

প্রেরিত্‌ 10:22

সেই মানুচ্চুনে কলাক্, “সেনাপতি কর্ণীলিয় আমারে পাধেয়্যে। তে এক্কো ধার্মিক মানুচ্‌ আর তে গোজেনরে ভোক্তি গরে। বেক্‌ যিহূদীগুনে তারে নাঙ্ গিনোন্। গোজেনর্ এক্কো দূত্ তারে উগুম দিয়্যে যেন তে তরে তা ঘরত্ ডাগি নেযেইনে তঅ কধা শুনে।”

প্রেরিত্‌ 22:12

পরেদি অননিয় নাঙে এক্কো মানুচ্‌ মইধু এলঅ। তে মোশির্ রীতি-সুদোমানি ভোক্তি গুরিনে পালেদ, আর সিধুগোর্ বেক্‌ যিহূদীগুনে তারে ভারি সর্মান গুরিদাক্।

প্রেরিত্‌ 6:3

ভেইলগ, তমা ভিদিরেত্তুন্ এমন্‌ সাতজন্ মান্‌জ্যরে তুমি বেঈ লঅ যিগুনোরে বেক্কুনে সর্মান গরন্ আর যিগুনে পবিত্র আত্মালোই আর জ্ঞানে পরিপূরোন। আমি তারা উগুরে এ সেবা কামর ভারান্ দিইনে নিজে তবনা আর গোজেনর্ কধা ফগদাঙত্ মনান্ দিবোং।”

রোমীয় 13:13

রঅ ছাড়িনে মদ হানা আর মাত্তল্ ওইনে নয়, সিনেলী আর যাগুলুক্যে জিংকানিত্ নয়, কোল্-কোজ্যে আর ইংসেলোই নয়, মাত্তর্ যিগুনে দিনো পহ্‌রত্ আঢাউদো গরন্, এজঅ, আমি তারা ধোক্ক্যেন্ গমেডালে জিংকানি কাদেই।

রোমীয় 13:3

যিগুনে গম্ কাম্ গরন্ শাসনগুরিয়্যেগুনোরে দোরেবার কনঅ কারন তারার্ ন-থায়, মাত্তর্ যিগুনে অন্যেয় গরন্ তারা দরান্। শাসন গুরিয়্যেগুনোরে ন-দোরেইনে কি তুমি চলিবাত্তে চঅ? সালে যিয়েন গম্ সিয়েন গুরি থাগঅ। সেক্কে তুমি তাত্তুন্ বাঈনী পেবা।

রোমীয় 14:18

যে এবাবোত্যেগুরি খ্রীষ্টরে সেবা গরে গোজেনে তা উগুরে হুজি অয় আর মান্‌জ্যেয়ো তারে গম্ মনে গরন্।

রোমীয় 2:29

মাত্তর্ মনেদি যে যিহূদী তেয়ই আজল্ যিহূদী। আজল্ চুনু মাঢাবো চামান কাবানার্ কামান্ মন ভিদিরে অয়। ইয়েন পবিত্র আত্মার্ কাম্, লেক্ক্যে আইন মানিবার্ কাম্ নয়। এ বাবোত্যে মানুচ্‌ মান্‌জ্যর্ বাঈনী ন-পায় ঠিগ্, মাত্তর্ গোজেনত্তুন্ বাঈনী পায়।

১ করিন্হীয় 4:5

সেনত্তে প্রভু এবার্ আগেদি, অত্তাৎ সেই ঠিগ্ গোজ্জ্যে সময়ানর্ আগে তুমি কনঅ কিচ্চু দুষ্ ধুরিবাত্তে ন-যেয়ো। আন্ধারত্ যিয়েন লুগেইয়্যে আঘে তেয়ই সেক্কে সিয়েন পহ্‌রত্ আনিবো আর মান্‌জ্য মনর্ গুমুরো কধানি ফগদাং গুরিবো। সেই অক্তত্ গোজেনত্তুন্ যে যার্ পাওনার্ বাঈনী পেবাক্।

২ করিন্হীয় 13:7

আমি গোজেন ইধু তবনা গুরিই যেন তুমি কনঅ ভান্ন্যেই কাম্ ন-গরঅ। অন্যগুনে যেন আমারে খাটি বিলিনে মনে গরন্ সেনত্যে আমি যে ইয়েন মাগির্ সিয়েন নয়। আমি চেই, তারা আমারে খাটি বিলিনে মনে ন-গুরিলেয়ো তুমি যেন যিয়েন গম্ সিয়েনই গরঅ।

২ করিন্হীয় 6:8

মান্‌জ্যে আমারে সর্মান গোত্তোক্ বা অসর্মান গোত্তোক্, আমা পৌইদ্যেনে গম্ কোদোক্ বা ভান্ন্যেই কোদোক্, আমি প্রমাণ গুরিত্তে, আমি গোজেনর্ সেবাগুরিয়্যে। মান্‌‌জ্যে আমারে পাজি কন্, মাত্তর্ আসলে আমি সত্যর্ পধেদি চুলির্।

২ করিন্হীয় 8:18

তীত সমারে আমি আর এক ভেইয়োরেয়ো পাদের্। যীশু খ্রীষ্ট পৌইদ্যেনে গম্ হবর্ ফগদাঙর্ কামত্ বেক্‌ মন্ডলীগুনে এ ভেইবোরে নাঙ্ গিনি থান্।

২ করিন্হীয় 8:21

আমি বানা প্রভুর্ মুজুঙোত্ নয়, মাত্তর্ মান্‌জ্য মুজুঙোত্অ গমেডালে চলানা ইন্দি মনযোগ্ দিই।

গালাতীয় 5:22

মাত্তর্ পবিত্র আত্মার্ ফল অলঅ-কোচ্‌পানা, হুজী, শান্তি, সোজ্জ্যগুন, দোয়্যের্ খাচ্চ্যত্, গম খাচ্চ্যত্, বিশ্বেজ্‌বলা,

ইফিষীয় 4:25

ইয়েনত্যে তুমি মিজে কধা ছাড়ি দুয়ো আর একজন আরেকজন ইধু সত্য কধা কঅ, কিয়া আমি বেক্কুনে একজন আরেকজন সমারে এগত্তর্।

ইফিষীয় 5:9

কিয়া যিয়েন গম, নিদ্দুষ আর সত্য সিয়েনই অলঅ পহ্‌রর ফল।

ইফিষীয় 6:14

ইয়েনত্যে সত্যলোই কমর্ বানিনে, বুগ্ রোক্ষ্যে গুরিবাত্যে গম্ জিংকানিলোই বুগ্‌কো ঢাগিনে,

দ্বি’লম্বর বিররণ 16:20

যে দেজ্‌ছান তমার গোজেন লগেপ্রভু তমারে দের্‌, তুমি যেনে বাঁজি থেইনে সিয়েন ভোগ-গজক্ গুরি পার সেনত্যে তুমি বানা ন্যায়ানরে মানি চলিবা।

ফিলিপীয় 3:1

জেরেদি কং, মর্ ভেইয়ুন, তুমি প্রভু লগে আঘঅ বিলিনে হুজি অ। তমা ইধু আরঅ একই কধা লেগদে মর্ কনঅ দুঘ্ ন-অর্, আর তমারে উজিয়ার্ গুরিবাত্যে সিয়েন গরানা গম্।

কলসীয় 4:5

যিগুনে গোজেনর্ মানুচ্‌ নয় সিগুনো সমারে বুদ্ধি খাদেইনে চোল্ল্য আর খ্রীষ্ট পৌইদ্যেনে সাক্ষি দিবার পত্তি সুযোগ্ কামত্ লাগেইয়ো।

১ থিষলনীকীয় 4:12

যেন বারেদি মানুচ্চুনো চোগোত্ তমার আঢাউদো যগাজ্জ্যে অয় আর অন্য উগুরে নির্ভর গরা ন-পড়ে।

১ তীমথিয় 2:2

এবাবোত্যেগুরি রাজাগুনোত্যে আর যিগুনো আঢত্ খেমতা আঘে তারার্ বেক্কুনোত্যে তবনা গরা পড়িবো, যেনে গোজেন উগুরে ভোক্তি দেগেইনে আর গমেডালে চলিনে আমি থির্ আর সুগে-শান্দিয়্যে জিংকানি কাদে পারিই।

১ তীমথিয় 3:11

ঠিগ্ সেবাবোত্যেগুরি তারার্ মোগ্‌কুনেয়ো যেন সর্মানর্ যগাজ্জ্যে অন্। তারা যেন অন্যরে বদ্‌নাঙ্ গুরিনে ন-বেড়ান্ আর নিজোরে দোঙেই রাগান্। বেক্কানি পৌইদ্যেনে যেন তারারে বিশ্বেজ্ গরা যায়।

১ তীমথিয় 3:4

তে যেন যগাজ্জ্যে গুরিনে তার্ নিজো ঘরর্ বেক্কানি পরিচালনা গরে আর তার্ পুয়ো-ছাগুনে যেন বাধ্য আর ভদ্র অন্।

১ তীমথিয় 4:12

তুই গাবুজ্যে বিলিনে কেঅ যেন তরে ঈচ্ ন-গরন্। কধালোই, চাল্‌চলনত্, কোচ্‌পানাত্, বিশ্বেজত্ আর পবিত্রতালোই তুই বিশ্বেজিগুনো ইধু আদর্শ অ।

১ তীমথিয় 5:10

ইয়েনিবাদে গম কামত্যে তার্ সুনাঙ্ থাহ্ পরিবো। এ গম কামানির্ ভিদিরে আঘেদে-পুয়ো-ছা মানুচ্‌ গরানা, গর্‌‌বা লবিয়োত্ গরানা, গোজেন মানুচ্চুনোরে টেং ধোই দেনা, যিগুনে দুঘোত্ পোজ্জ্যন তারারে এজাল্ দেনা, আর অন্য গম কামত্ মিজেনা।

১ তীমথিয় 5:2

বয়জে দাঙর্ মিলেগুনোরে মা ধোক্ক্যেন গুরি বুঝো আর গাবুজ্জ্যে মিলেগুনোরে বোনো ধোক্ক্যেন মনে গুরিনে গম্ মনভাব্‌পোই বুঝো।

তীত 1:8

সিয়েনর্ বদলে গর্‌‌বা-লবিয়োত্ আর দোয়্যের্ কাম গুরিবাত্যে তে যেন গম্‌ পায়। তার গম্ বিচের বুদ্ধি থেবঅ, তে সৎ আর গোজেনর্ বাধ্য অবঅ আর নিজোরে দোঙেই রাগেব।

তীত 2:14

যীশু খ্রীষ্ট আমাত্যে নিজো জিংকানিগান দিয়্যে, যেন বেক্‌ পাপ্‌পানিত্তুন আমারে উদ্ধোর্ গুরি পারে আর সিয়েন্দোই এমন্‌ এক দল মান্‌জ্যরে সিজি গুরি পারে যিগুনে বানা তা মানুচ্ অবাক্ আর যিগুনে অন্যগুনোরে উপকার গুরিবাত্যে আয়োজি অবাক্।

তীত 2:2

যিগুনে বুড়ো, তারারে কবে যেন তারা বেক্কানি পৌইদ্যেনে নিজোরে দোঙেই রাগান; তারা যেন সর্মান পেবার যগাজ্জ্যে অন্; তারার্ যেন গম বিচেরবুদ্ধি, সত্য বিশ্বেজ্, কোচ্‌পানা আর ধৈজ্জ্যগুণ থায়।

তীত 2:7

বেক্কানিত্ তুই তারা ইধু গম কামর্ এক্কান আদর্শ অ। তঅ শিক্ষ্যে ভিদিরে যেন গম উদ্দেচ্চ্য থায়, সিয়েনত্ যেন পাদল্ মনভাব ন-থায়।

তীত 3:14

অন্যগুনোরে উপকার গুরিবার কামত্ নিজোরে লাগি রাগেবাত্যেই আমা মানুচ্চুনোর্ শিগে পরিবো, যেন তারা অন্যগুনোর অভাব্‌ দূর্ গুরি পারন। এবাবোত্যে গুরিলে তারার্ জিংকানিগানি ফলিবো।

ইব্রীয় 11:2

বিশ্বেজত্যে আমা পূরোণি মানুচ্চুনে গোজেনর্ বাঈনী পেইয়োন।

ইব্রীয় 13:18

আমাত্যে তবনা গোজ্জ্য। বেক্কানি পৌইদ্যেনে আমি গমেডালে চলিবাত্যে চেই বিলিনে আমি কোই পারিই, আমা বিবেগ্‌‌কানি সাব্।

যাকোব 1:27

রানী মিলে আর বাপ্-মা নেইয়্যেগুনোর্ দুঘোত্ তারার্ দেগাশুনো গরানা আর জগদর্ বেক্‌ কাজরানিত্তুন্ নিজোরে সাব্ রাগানা অলঅ বাবা গোজেনর্ চোগেদি খাটি আর সত্য ধর্ম।

যাকোব 3:17

মাত্তর্ যে জ্ঞানান্ স্বর্গত্তুন্ এজে সিয়েন পত্তমে খাটি, সে পরেদি শান্তিলোই ভরা; সিয়েনত্ থায় সোজ্জ্যগুণ্ আর নম্রতা; সিয়েন দোয়্যে আর গম কামত্ ভরা, থির্ আর ভন্ডামী-নেইয়্যে।

১ পিতর 1:22

ইক্কিনে সত্যগানরে মানি লোইনে তুমি তমার মনানরে সিজি গোজ্জ্য, আর সেনত্যে বিশ্বেজি ভেইয়ুনে তমা ইধু এদক্ পরাণর্। সেনত্যে কঙত্তে, তুমি একজন আরেকজনরে মনে-পরাণে গভীন্ গুরিনে কোচ্‌পেইয়ো।

১ পিতর 2:12

কারন সিয়েনিয়ে তমার আত্মার বিরুদ্ধে যুদ্ধো গরে। গোজেনরে যিগুনে ন-জানন্ তারা ভিদিরে তুমি গমেডালে চলঅ যেনে অন্যেয়গুরিয়্যে বিলিনে তারা তমারে নিন্দে গুরিলেয়ো তমা গম কামানি খিয়েল্ গরন্ আর বিচেরর্ দিনোত্ তমার্ সেই কামানিত্যে গোজেনরে বাঈনী গরন্।

১ পিতর 4:8

আর বেগত্তুন্ দাঙর্ কধাগান অলঅ, তুমি একজন আরেকজনরে যদবদে কোচ্‌পেইয়ো, কিয়া কোচ্‌পানাগানে ভালক্কানি পাপরে ঢাগি রাগায়।

২ পিতর 3:1

কোচ্‌পেইয়্যে ভেইয়ুন, তমা ইধু ইয়েনই মর্ দ্বি-লম্বর চিধি। দ্বিয়েন চিধিত মুই তমারে কয়েক্কান পৌইদ্যেনে ইদোত্ তুলি দিইনে তমার দোল্ মনানরে লাড়িবার্ চেষ্টা গোজ্জ্যং।

১ যোহন 3:18

পুয়ো-ছা লগ্, আমি যেন বানা মুয়োর্ কোচ্‌পানা ন-দেগেইনে কামানিলোই ঘেচ্চ্যেকগুরি কোচ্‌পানা দেগেই।

১ যোহন 3:3

যে কেঅ খ্রীষ্ট উগুরে এই আজাগান রাগায় তে নিজোরে খাটি গরানাত্ থায় যেধোক্ক্যেন খ্রীষ্ট খাটি।

১ যোহন 4:1

কোচ্‌পানার্ পুয়ো-ছা লগ্, তুমি বেক্‌ আত্মাগুনোরে বিশ্বেজ্ ন-গোজ্জ্য, বরং চাগি চঅ সিগুনে গোজেনত্তুন্ এচ্চ্যন কিনা, কিয়া জগদত্ বোউত্ ভন্ড ভাববাদী নিগিল্লোন।

রূত 3:11

তুই ন-দোরেচ্‌, তুই যিয়েন চেবে মুই তত্তে সিয়েনই গুরিম। মঅ আদামত্‌ বেক্কুনে খবর পান, তুই এক্কো গম্ মিলে।