ফিলিপীয় 2:14 - Chakma Bible

^14-16 তুমি কনঅ আবিত্তি আর তর্ক ন-গুরিনে বেক্কানি গরঅ, যেন তুমি নিদ্দুজি আর খাটি ওই পারঅ আর এই কালর্ বিবেক-নেইয়্যে আর বজং খাচ্চ্যদর্ মানুচ্চুনো মুজুঙোত্ গোজেনর্ থুদোনেইয়্যে মানুচ্ ওই পারঅ। সে মানুচ্চুনো মুজুঙোত্ তুমি দঅ জিংকানি দান গুরিয়্যে কধা তুলি ধুরিনে এ জগদত্ তারা ধোক্ক্যেন জ্বোল্‌জোল্যে ওই আঘঅ, সালে খ্রীষ্ট যেদিন্যে এবঅ সেদিন্যে মুই ইয়েনিলোই দেমাগ্ গুরি পারিম যে, মর্ চেষ্টা আর কামানি নিষ্ফল ন-অয়।

ফিলিপীয় 2:14 Cross References

গীতসংহিতা 106:25

তারা তাম্বুলো ভিদিরে কধা কুয়ো ধুরিলাক্; লগেপ্রভুর কধা তারা কান ন-পাদিলাক্।

গম্ উপদেজ্ 13:10

বাড়্‌বো গরানাগানে বানা কোল্-কোজ্যে বাজেই দে, মাত্তর্ যিগুনে উবদেজ্ শুনোন্ তারা ইদু জ্ঞান পাহ্ যায়।

গণাণা 14:27

“আর কয়দিন এই পাজি জাদ্‌তুনে মর্‌ বিরুদ্ধে বক্‌বক গুরিবাক? তারার্‌ বক্‌বক্‌ গরানা মুই শুন্যং।”

মথি লেখ্যে গম্ হবর্ 20:11

সেক্কে তারা সে গিরোজ্‌সো বিরুদ্ধে মনত্ দুঘে কুয়ো ধুরিলাক্,

মার্ক 14:5

ইয়েন বিজিলে দঅ তিনশঅ দীনারত্তুন্‌‍‍অ বেশ্ অদঅ আর সিয়েন্ নাঢা মানুচ্চুনোরে দিয়্যে যেদঅ।” ইয়েন কোইনে তারা মিলেবোরে গেইল্ দিয়্যে ধুরিলাক্।

মার্ক 9:14

যীশু আর সেই তিনজন শিচ্চ্য অন্য শিচ্চ্যগুনো ইধু ফিরি এইনে দেগিলাক্, তারা চেরোকিত্তে বোউত্ মানুচ্ তুবেয়োন আর কয়েক্কো ধর্ম-মাষ্টর তারা সমারে কধা তর্কাতর্কি বাজেয়োন্।

লূকে লেখ্যে গম্ হবর্ 5:30

সেক্কে ফরীশীগুনে আর তারা দলর্ ধর্ম-মাষ্টরুনে বিরক্ত ওইনে যীশু শিচ্চ্যগুনোরে কলাক্, “তুমি খাজানা তুলিয়্যে আর ভান্ন্যেই মানুচ্চুনো সমারে হানা-দানা গরঅ কিত্তে?”

প্রেরিত্‌ 15:2

সেক্কে পৌল আর বার্ণবা সমারে এ মানুচ্চুনোর্ জদবদে কধা তর্কাতর্কি অলঅ। যেরেদি থিগ্ অলঅ যে, পৌল আর বার্ণবা আন্তিয়খিয়ার কয়েক্কো বিশ্বেজিরে সমারে লোইনে যিরূশালেমত্ যেবাক্ আর দিপাধেয়্যেগুনো সমারে আর মন্ডলী নেতাগুনো সমারে এ পৌইদ্যেনে কধাবাত্তা কবাক্।

প্রেরিত্‌ 15:39

সেক্কে পৌল আর বার্ণবা ভিদিরে এমন্‌ কধার্ অমিল্ অলঅ যে, তারা একজন আরেক্ জনত্তুন্ ফারগ্ ওই গেলাক্। বার্ণবা মার্করে লোইনে জাহাজত্ গুরি সাইপ্রাস দ্বিপোত্ গেলঅ, আর পৌল সীলরে বেঈ নেযেল।

প্রেরিত্‌ 15:7

বোউত্ তেম্মাং গরানার্ পরেদি পিতরে উদিনে তারারে কলঅ, “ভেইলগ্, তুমি দঅ কোই পারঅ যে, ভালোক্ দিন আগে তমা ভিদিরেত্তুন্ গোজেনে মরে বেঈ লোইয়্যে যাতে অযিহূদীগুনে মঅ মুয়োত্তুন্ গম্ হবরর্ কধা শুনিনে বিশ্বেজ্ গরন্।

প্রেরিত্‌ 6:1

সে অক্তত্ শিচ্চ্যগুন বাড়দন্। সেক্কে শিচ্চ্যগুনো ভিদিরে যে যিহূদীগুনে গ্রীক ভাষায় কধা কদাক্ তারা ইব্রীয় ভাষায় কধা কোইয়্যে যিহূদীগুনোরে ইয়েন কোইনে দুচ্‌ দিয়্যে ধুরিলাক্, পত্তিদিন হানা দিবার সময়োত্ তারার্ রানী মিলেগুনে কিচ্চু ন-পান্।

রোমীয় 12:18

তমা ইন্দিত্তুন্ যিদ্দুর্ পারঅ বেক্‌ মানুচ্চুনো সমারে সুগে-শান্দিয়্যে বজত্তি গরঅ।

রোমীয় 14:1

বিশ্বাজে যে মন্‌মরা তারে আপন গুরি নেয; তা কধাগান্দোই তা সমারে তর্কাতর্কি ন-গোজ্য।

রোমীয় 16:17

ভেইলগ্, তুমি যে শিক্ষ্যে পেইয়ো সিয়েনির বিরুদ্ধে শিক্ষ্যে দিইনে যিগুনে দলাদলি আর মানা গরন্, সিগুনো উগুরে খিয়েল্ রাগেবাত্তে মুই তমারে বিশেষ্ গুরিনে কোজোলি গরঙর্। তুমি তারাত্তুন্ দূরোত্ থেইয়ো,

১ করিন্হীয় 10:10

তারা ভিদিরে ভালোকজনে কাঙেলেত্যে পেইনে যেবাবোত্যেগুরি ভস্তগুরিয়্যে দূত্‌তুন্দোই ভস্ত ওইয়োন্ সেবাবোত্যেগুরি তুমি কাঙেলেত্যেগান ফগদাং ন-গোজ্জ্য।

২ করিন্হীয় 12:20

মত্তুন্ দর্ লাগের্, মুই যেক্কে তমা ইধু এম্ সেক্কে মুই তমারে যেধোক্ক্যেন দেগিবাত্যে চাং অয়ত সেধোক্ক্যেন্ ন-দেগিম্, আর তুমিয়ো মরে যেধোক্ক্যেন্ দেগিবাত্যে চঅ সেধোক্ক্যেন ন-দেগিবা। মত্তুন্ দর্ লাগেত্তে, তমা ভিদিরে কোল্-কোজ্যে, ইংসে, মেজাজ দেগানা, দলাদুলি, নিন্দে, পর কধালোই তেম্মাং, বাড়্ গরানা আর ঝাগুলুগ্ থেবঅ।

গালাতীয় 5:15

মাত্তর্ যুনি তুমি একজন আরেকজন সমারে কোল্-কোজ্জ্যে গরঅ সালে উজিয়ার্! এবাবোত্যে গুরিলে তুমি দঅ একজন আরেকজনরে ভস্ত গুরি ফেলেবা।

গালাতীয় 5:26

আমি যেন মিজে মিজে দেমাগ্ ন-গুরিই আর একজন আরেক জনরে কাঙেলেত্যে আর ইংসে ন-গুরিই।

ফিলিপীয় 2:3

নিজোর্ লাভর্ আজায় বা দেমাগর্ বশত কিচ্চু ন-গোজ্জ্য, বরং নম্র গুরিনে অন্যরে নিজোত্তুন্ সর্মানর্ জাগা দুয়ো।

১ থিষলনীকীয় 5:13

তারা যিয়েনি গত্তন্ সিয়েনিত্যে কোচ্‌পানার মনভাব্‌‌পোই তারারে তুমি বিশেষ গুরিনে শ্রদ্ধা গরঅ। তুমি নিজো ভিদিরে শান্তিয়ে থেইয়ো।

১ থিষলনীকীয় 5:15

চেইয়ো, অন্যেয়র্ বদলে কেঅ যেন অন্যেয় ন-গরন্। তুমি নিত্য একজন আরেকজনরে, এমন কি, অন্য বেক্কুনোর্ ভালেদি গুরিবার চেষ্টা গরঅ।

ইব্রীয় 12:14

বেক্‌ মানুচ্চুনো সমারে সুগে-শান্দিয়্যে থাগদে আর পবিত্র অবাত্যে আয়োজি অ।

যাকোব 1:20

কিয়া গোজেনে আমাত্তুন্ যে গম্ জিংকানি আজা গরে সিয়েন রাগর্ পৌইদ্যেনে ন-এজে।

যাকোব 3:14

মাত্তর্ তমা রিবেঙানি যুুদি ইংসেলোই ভুরি উদে আর নিজো লুভে ভরা থায় সালে জ্ঞানর্ দেমাগ্ ন-দেগেয়ো, সত্যগানরে মিজে ন-বানেয়ো।

যাকোব 5:9

ভেইলগ্, গোজেনে যেন তমারে দুষ্ ন-ধরে ইয়েনত্যে তুমি একজন আরেকজনরে দুষ ন-দুয়ো। চঅ, বিচের গুরিয়্যেবো দোরান কায়কুরে লুম্মেগি।

১ পিতর 3:11

ভান্ন্যেই কামত্তুন্ তে দূরোত্ থোক্, আর গম কাম গোরোক্; সুগ-শান্দিত্যে আওজি ওইনে তে তার্ পিজেদিগান ন-ছাড়োক্।

১ পিতর 4:9

কনঅ বাবোত্যে কাঙেলেত্যে ন-পেইনে তুমি একজন আরেকজনরে গর্বা ইজেবে মানি লঅ।

যিহূদা 1:16

এবাবোত্যে মানুচ্চুনে আমিঝে বেজারর্ ভাব দেগান, নিজোর ভাগ্যগানরে দুষ্ দুয়োন আর মনর্ আওজ মজিম আঢাউদো গরন্। তারা নিজোরে নিইনে দেমাগ্ গরন আর লাভত্যে মানুচ্চুনোরে উচ্চোমি দৈন্।