Juan 1:3 - Chayahuita (Shahui)

³ Naporoꞌ Yosë yonquirin yaꞌipi maꞌsha acocasoꞌ. Ina nohuanton, huiꞌnini acorin. Yaꞌipi maꞌsha ninin. Co aꞌnaya tërantaꞌ inaora yaꞌhuërinhuëꞌ. Co acorinhuëꞌ naporini, co mantaꞌ yaꞌhuëꞌitonhuëꞌ.

Juan 1:3 Cross References

Génesis 1:1

Yosë nani maꞌsha acorinso shaꞌhuichinquëmaꞌ: Iráca co manta yaꞌhuërinhuëꞌ. Yosëíchin yaꞌhuërin. Caniaritapon, piꞌiroꞌtëꞌton acorin. Ina quëran isoroꞌpantaꞌ, acorin.

Génesis 1:26

Naporo tahuëri chachin tapon: “¡Iporaso huachi piyapi niahuaꞌ! Inaso canpoa pochachin nisarin. Chiníquën nanantaton, samiroꞌsaꞌ, anpiantëhuanoꞌsaꞌ, inapita huaꞌanëntarin. Maꞌsharoꞌsa pëꞌtahuacaiso nipisopita, tananquë yaꞌhuëcaiso nipisopita, niohuaratërinsopita, yaꞌipi inapitanta huaꞌanëntarin,” tënin.

Salmos 33:6

Sinioro camaitohuachina, piꞌiroꞌtë yaꞌnorin. Inaquë yaꞌhuërinsopitantaꞌ, nonin quëran chachin acorin.

Proverbios 8:30

inapoasoꞌ, nani inaquë canta nisarahuë. Co piꞌpian tëranta aꞌporahuëꞌ. Cari acapacancanahuë. Nani oraquë pochin inarëꞌco yaꞌnipiárahuë.

Isaías 45:12

Cari isoroꞌpaꞌ ninahuë. Yaꞌipi piyapiroꞌsanta cari ninahuë. Piꞌiroꞌtëntaꞌ, cari nëꞌmëtë pëi ótënatë pochin acorahuë. Ca camaitërahuë quëran yaꞌipi tayoraroꞌsa yaꞌhuërin.

Isaías 45:18

Siniorosoꞌ Yosë niꞌton, piꞌiroꞌtë acorin. Isoroꞌpanta acohuachina, noyá acorin. Co topinan nicacaso marëꞌ acorinhuëꞌ. Piyapiroꞌsari yaꞌhuëtacaiso marëꞌ acorin. Ina chachin nontatonpoaꞌ: “Caso Sinioroco. Co aꞌninquëchin yaꞌnorahuëꞌ. Co aꞌna ca pochin yaꞌhuërinhuëꞌ.

Juan 1:10

Isoroꞌpaquë oꞌmarin. Iráca Tata Yosë nohuanton, yaꞌipi maꞌsha ninin. Inari acopirinhuëꞌ, co piyapiꞌsari nohuitopihuëꞌ.

Juan 1:2

Coꞌhuara isoroꞌpaꞌ yaꞌhuëyátërasohuëꞌ, Yosëꞌpaꞌ yaꞌhuërin.

1 Corintios 8:6

Canpoaso nipirinhuëꞌ Tata Yosëíchin chinotërëhuaꞌ. Yaꞌipi maꞌsha ninin. Ina marëꞌ acorinpoaꞌ. Quisocristoíchin huaꞌanëntërinpoaꞌ. Ina nininpoaꞌ. Nani nichaꞌërinpoaꞌ ina nohuitatëhuaꞌ nanpicaso marëꞌ.

Efesios 3:9

Iráca Yosëri yaꞌipi maꞌsha ninin. Naporo chachin yonquirinpoaꞌ anoyacancantinpoaso marëꞌ. Napoaponahuëꞌ, co yaꞌipi piyapiꞌsaꞌ shaꞌhuitërinhuëꞌ. Ipora huarëꞌ anitotërinco niꞌton, shaꞌhuitëranquëmaꞌ.

Hebreos 11:3

“Yosë noꞌtëquën nontërinpoaꞌ,” taꞌtëhuaꞌ, natërëhuaꞌ. Inaora yonquinën quëran yaꞌipi isoroꞌpaꞌ acorin. Co mantaꞌ yaꞌhuëpirinhuëꞌ, “Yaꞌhuëꞌin,” topachina, maꞌsha yaꞌhuërin. Yaꞌipi niꞌnëhuasopita co inaora yaꞌhuërinhuëꞌ. Yosëri nininsoꞌ. Quiricanën quëran anitotërinpoaꞌ.

1 Juan 5:1

Yaꞌipi Quisocristo imarëhuasopita aꞌna huënton pochin ninëhuaꞌ. “Quisocristo Yosë huiꞌnin chachin,” tënëhuaꞌ niꞌton, huëntonënquë yaꞌconëhuaꞌ. Huiꞌninpita pochin niꞌninpoaꞌ. Niꞌcoꞌ. “Quëmapi tëhuënchachin nosorohuatëra, huiꞌninpitantaꞌ nosororëꞌ,” topi.

Apocalipsis 3:14

—Ina quëran ansiano Naotisiaquë yaꞌhuërinsoꞌ ninshitëquëꞌ nonchin imapisopita natainaꞌ. “Ca Quisosoco quirica aꞌpataranquëmaꞌ, niꞌcoꞌ. Noꞌtëquën nonato, noꞌtën nanan aꞌchintëranquëmaꞌ. Co onporontaꞌ nonpintëranquëmahuëꞌ. Yosë nohuanton, yaꞌipi maꞌsha ninahuë. Napoaton, yaꞌipi piyapiꞌsaꞌ natëinacosoꞌ yaꞌhuërin.

Apocalipsis 4:11

“Quëmasáchin Sinioro imarainquën. Noya noyanquën niꞌton, yaꞌipi piyapiꞌsaꞌ chinochinënquën. Nani tahuëri natëinënquën. Yaꞌipi nanitaparan. Yaꞌipi maꞌsha ninan. Quëma nohuanton, ipora huantaꞌ yaꞌhuarin,” itopi.