फिलिप्‍पि 4:12 - बान्‍तावा राई

¹² अ़ङ्‌काएदा दित्‍छाङ मात्‍द़ङ्‌याङ्‌ओ ग़रि खोन्‍कि च़लोक युङाङाओ ग़रि देत्‍नि ह़ङ्‌मादोत, मो अ़ङ्‌का झारा सिन्‍तुङ्‌युङ्‌सुङ। खाङाहिदानेकि सास़ङाङाहिदाने, च़लोक युङ्‌याङ्‌हिदानेकि मात्‍द़ङ्‌हिदाने, झारा ग़रिदा सोम्‍सेत्‍मान्‍चिन्‌ओ अ़कोङ्‌दुम अ़ङ्‌का चिन्‍ताङ्‌युङ्‌साङ्‌च़ङ।

फिलिप्‍पि 4:12 Cross References

मत्‍ति 11:29

अ़ङ्‌कोम खुयानुम, खोन्‍कि अ़ङ्‌काएदाङ्‌का चिन्‍तानिन्‍चिन, देकिनालो अ़ङ्‌मिन्‍मा नोत्‌याङ्‌ओ खोन्‍कि कासिम्‍नान्‍चिन मुङाङा। खोन्‍किना खानानिन्‌आ आम्‍नुओ ह़ङ्‌म़ङ्‌चिदा सावातोम्‍मा त़तोक्‍तुम।

मत्‍ति 13:52

खोक्‍कोसाआ मोचि म़लोचि, “खोवात्‍निओसा, साङ्‌छाङ निनाम्‍हाङ्‌होन्‌ओ अ़तुक्‌वादा चिन्‍ताकिना अ़य़ङ्‌हुप काचिन्‍पा लिसानालो, खो अ़क्‍छा खिम्‍हाङ्‌पावाको ओ। खोसाआ अ़स़ङ्‌कुलुधुन्‌दाङ्‌का अ़ऩङ्‌वा खोन्‍कि बुयाओ अ़लुङ छ़ओ सामाचि बुङ्‌खादा लारुचि।”

२ कोरिन्‍थि 10:1

खा-खाक्‍को म़नाचि म़य़ङ, अ़ङ्‌का पावल, आम्‍नुओ बुदा खोन्‍कि सिम्‍ङान्‍च़ङ, मेन अ़थाया लिङाहिदा खानानिन्‌एदा छाक्‍लो लिङा! ख्रिस्‍तओ अ़चुसिम्‍मान्‍चिन खोन्‍कि अ़चुसोम्‍तुक्‍मालाम्‍पा अ़ङ्‌का खानानिन लोनाङ्‌नानिन।

२ कोरिन्‍थि 10:10

खा-खाक्‍कोचि म़य़ङ, “खोसोओ अ़छाप्‍लावाचि च़लोक छाक्‍लो खोन्‍कि सावापोरि मुयाङ, मेन खो ताहिदा खो मान्‍ऱकादा लि, खोन्‍कि खोसोओ अ़चेप्‍मा अ़काचि मात्‍द़ङ्‌ओ लि।”

२ कोरिन्‍थि 11:27

अ़ङ्‌का ब़द्‍धे काचि मुमादा, दुखादा, ब़द्‍धे मान्‌इम्‍माङ युङ्‌मादा, सास़मादा खोन्‍कि वामित्‍मादा, ब़द्‍धेकादु मान्‍चादा खोन्‍कि चुङादा तित मात्‍द़ङ्‌ओदा छुक्‍मादोरा।

२ कोरिन्‍थि 11:7

अ़ङ्‌का आप्‍पि सिम्‍नान्‍चिन्‍सा खानानिन सायामेत्‍मा निम्‍पाङ निनाम्‍हाङ्‌ओ अ़चुनुय़ङ्‌खान अ़ङ्‌का खानानिन मोहा खाएत्‍नानिन्‌ओसा दि अ़ङ्‌का हेवा मुवाङ?

२ कोरिन्‍थि 11:9

खानानिन्‌एनान युङाङ्‌याङ्‌हिदा अ़ङ्‌का मान्‍तोक्‍ङानुछाङ अ़ङ्‌का साङ्‌छाङ दुखा मान्‍प़ङा, देकिनालो माकेदोनियादाङ्‌का म़बानाओ ब़ब़, नाना खोन्‍कि निछाचिआ अ़ङ्‌मान्‍तोक्‍दामादा ऩफासाङ। खोन्‌ओसा खानानिन दुखा त़तोक्‍तिमिन्‍ने निकिना अ़ङ्‌का क़म्‍ताङ्‌च़ङ, खोन्‍कि माय़ङ्‌छाङ मोवात्‍निङा च़ङा।