फिलिप्‍पि 3:20 - बान्‍तावा राई

²⁰ मेन आन्‍ताङ्‌युङ निनाम्‍मादु युङ्‌याङ। खोन्‍कि मोदाङ्‌का म़ताओ आन्‍कालेन्‍पा, हाङ्‌पा येसु ख्रिस्‍त आन्‍कान राक्‍स़रि हुङुम।

फिलिप्‍पि 3:20 Cross References

मत्‍ति 19:21

येसुआ मो अ़लासालोवा, “खाना झारा अ़नुवाक लिमा त़स़याङ्‌नालो खाराकि झारा आम्‍सामाचि इनुचिकि मान्‍तोक्‍कादाचि प़चि। खोन्‍कि खाना निनाम्‍मादु चासुम्‍छेन्‍बि त़तोक्‍तु। खोन्‍किना बानाकि अ़ङ्‌का त़ङ्‌ताङ।”

लुका 12:21

आप्‍पिओ निकि चासुम, छेन्‍बि काभुङ, मेन निनाम्‍हाङ्‌ओ अ़चुबुदा मान्‍तोक्‍कादा म़ना ओवात्‍निङा लि।”

लुका 14:14

खोन्‍कि खाना आसिखा त़तोक्‍तु। मोवात्‍नि त़च़नालो मोचिआ खाना अ़फान्‌दा चा प़मा ऩऱनान, मेन आदेङ साम्‌योक्‍मिचि म़स़दाओदाङ्‌का म़लाखोन्‍लोन्‌हिदा खाना ओसोओ सिरिफा त़तोक्‍तु।”

छाम्‍माय़ङ 1:11

खोन्‍किना मोचिआ अ़लोवाचुचिन, “गालिल्‌दाओ म़नाचिओ, खानानिन देकि त़एविन्‌कि नाम्‍चोक्‌दुत्‍नि खात़चोविन्‌येन? खानानिन्‌आ ओन्‍ग़रि ओ येसु आम्‍नुओ रादाङ्‌का निनाम्‍मादुत्‍नि देत्‍नि निनाम्‍हाङ्‌आ अ़थेन्‍ताखात्‍ताङाओ त़खाम्‌युङ्‌सुम, मोवात्‍निङा खोक्‍को ओ हेन्‍खामादा म़लाय़।”

१ कोरिन्‍थि 1:7

खोन्‌ओसा आन्‍हाङ्‌पा येसु ख्रिस्‍त म़लाताओ य़ङ राक्‌एनान हुङ्‌मादा खानानिन खाक्‍कोछाङ लावामि सावाओ य़ङ्‌दा त़हाप्‍तिन्‍दिसिमिन।

१ कोरिन्‍थि 15:48

बाखाआ मुवाओ म़ना दियाको मुवाङा, बाखाआ म़मुवाओचिछाङ मोवात्‍निङा म़मु। खोन्‍कि निनाम्‍मादुङ्‌काओ म़ना दियाको मुयाङ, निनाम्‍मादुओ म़नाचिछाङ मोवाकोङा म़मु।

२ कोरिन्‍थि 4:18

खोन्‌ओसा, आन्‍कान्‍का दात्‌याङ्‍ओ सामाचि अ़खान्‍मिन्‍चिन्‍का, मेन ऩदात्‍निनिन्‌ओ सामाचि आन्‍कान्‍का खाम्‍च़म्‍का। देकिनालो दात्‌ओ सामा अ़क्‍दुओ ओन्‍ङा मु, मेन अ़दात्‍निन्‌ओ अ़धुन युङ्‌युङ।

२ कोरिन्‍थि 5:8

आन्‍कान्‍काएदा झारा सोम्‍कुवा याक्‌याङ, हान पोक्‌दाङ्‌का फेक्‍मान्‍चिन्‌कि हाङ्‌पाएनान युङ्‌मा आन्‍कान्‍का स़न्‍का।

गलाति 4:26

मेन फोङ्‌याङ्‍ओ मेत्‍छामा साराआ निनाम्‍मादुओ यरुसलेम खाङ्‌मुसु, मो आन्‍मा ओ।

एफिसि 2:19

खोन्‌ओसा खानानिन हान्‌दाङ्‌का तावाङ्‌चि खोन्‍कि प़न्‍थादाओचि माआङ, मेन निनाम्‍हाङ्‌ओ अ़चुम़नाचिएनान खानानिन यावा-ताङ्‌युङ्‌चि खोन्‍कि निनाम्‍हाङ्‌ओ अ़चुखिम्‍लुम्‍पादाओ पाङ्‌यिचि त़लिसिन्‌युङ्‌सिन।

एफिसि 2:6

खोन्‍कि खोक्‍कोएनान आन्‍कान म़खोन्‍तालोइसाकि निनाम्‍मादुओ युङ्‌खाचिदा येसु ख्रिस्‍तएनान आन्‍कान म़युङ्‌सा।

फिलिप्‍पि 1:10

खोन्‌ओसा खानानिन्‌आ अ़नुवाक य़ङ छेन्‍मा त़ऱम्‍ने। खोन्‍किना ख्रिस्‍त म़लाताओ लेन्‌दा अ़च़क़ल़क खोन्‍कि लाहि मात्‍द़ङ्‌ओ त़लिसिन्‍ने।

फिलिप्‍पि 1:27

अ़च़वाङ य़ङ ओङा ओ, आम्‍नुओ ह़ङ्‌म़ङ्‌ओ च़माथाङ्‌माआ ख्रिस्‍तओ अ़चुनुय़ङ्‌खान खान्‍तुओ मुने। अ़ङ्‌का बान्‍ङाकि तुप्‍नानिन्‌नुछाङ माङ्‌लो अ़ङ्‌का अ़युङ्‌ऩङ्‌ऩङ्‌ङाने, अ़ङ्‌का ओ य़ङ आम्‍नुओ तुक्‌वादा एन्‍मा स़ङा, खानानिन अ़क्‌तात लावादा अ़क्‍नि त़लिसिन्‌कि त़एविन्‌ओ खोन्‍कि अ़क्‍मिन्‍माओ त़लिसिन्‌कि नुय़ङ्‌खान्‌ओ साकोङ्‌छ़ङ्‌ओ निम्‍पाङ अ़क्‍नि त़मुन्‌येन्‌ओ अ़ङ्‌का एन्‍मा तोक्‍तुङ्‌ने।

कलस्‍सि 1:5

निनाम्‍हाङ्‌आ आम्‍नुओ निम्‍पाङ निनाम्‍मादु अ़युङ्‌साओ आसिखा अ़नुछ्‍याङा त़तोक्‍तुम निकिना त़मित्‍तुम्‌युङ्‌सुम्‌योम्‌ओसा खानानिन्‌आ मोवात्‍नि सोमात़तुक्‍तुम्‌युङ्‌सुम्‌योम्‌ओ। मो आसिखाओ अ़तुक्‌वादा खानानिन बुयाङा अ़छ़ङ्‌य़ङ माङ्‌लो नुय़ङ्‌खान्‌दा त़एनुम्‌युङ्‌सुम।

१ थेसलोनिकि 1:10

खोन्‍कि निनाम्‍मादुङ्‌का काय़ निनाम्‍हाङ्‌ओ अ़चुछा येसु त़हुङुम्‌योम्‌निछाङ मोचि म़य़ङ्‌याङ। खोक्‍को निनाम्‍हाङ्‌आ म़सुवादाओदाङ्‌का अ़लासाखोन्‍तालोइसा, खोक्‍कोसाआङा तामा मुयाङ्‌ओ निनाम्‍हाङ्‌ओ अ़चुमाइसुङ्‌दाङ्‌का आन्‍कान म़लेन।

१ थेसलोनिकि 4:16

देकिनालो हाङ्‌पा अ़धिवो अ़मुक्‍माएनान, मुलो निनाम्‍हाङ काफाओ य़ङ्‌दा खोन्‍कि निनाम्‍हाङ्‌ओ अ़चुथुथुरिओ अ़ऱङ्‌माएनान निनाम्‍मादुङ्‌का म़य़, खोन्‍कि ख्रिस्‍तदा म़सुवादाओचि बुया म़खोन्‍लोन।

२ तिमोथि 4:8

हान्‌दाङ्‌का मोह्‍यात्‍नि अ़ङ्‌को निम्‍पाङ साम्‌योक्‍मिओ सिरिफा युङ्‌सायुङ्‌सा। मो साम्‌योक्‍मिओ छ़ङ्‌काछेन हाङ्‌पाआ मो लेन अ़ङ्‌का ऩप़ङा, खोन्‍कि अ़ङ्‌का ओन्‍ङा माआङ, मेन खोक्‍कोसोओ अ़चुलामातामा सोमाकातुक झारा म़प़चि।

तितस 2:13

ओवात्‍निङा तामामित्‍मा मुन्‌येन्‌ओ य़ङ तामालामा लेन्‌ओ अ़लाम आन्‍कान खाम्‌योम। मो लेन तोक्‍पो निनाम्‍हाङ येसु ख्रिस्‍त आन्‍कालेन्‍पा अ़धिवा साम्‌दा म़य़याङ्‌ओ खाङ्‌म़मुनान्‍चिन।

हिब्रु 12:22

मेन खानानिन सियोन भ़ऱदा त़तान्‌युङ्‌सिन। मो अ़ह़ङ निनाम्‍हाङ्‌ओ अ़चुसहरा, खोन्‍कि निनाम्‍मादुओ यरुसलेम ओ। मोदा खिप्‌दिअ़तेत्‍निन्‌ओ निनाम्‍हाङ काफाचि ऩङानुयाङ्‌सा म़कोप्‍नान्‍चिन।

हिब्रु 9:28

मोवात्‍नि ख्रिस्‍त्‌छाङ ब़द्‍धेकापाङ्‌सोओ अ़चुहेवा चुम्‍खाइसि अ़क्‍दु हेन्‍खोक्‌वा म़लिसा, खोन्‍कि खोक्‍को ह्‍वादुओदु हेवा चुम्‍खाइसि माआङ, मेन अ़चुऩङानुयाङ्‌सा खोक्‍को काहुङ्‌चि लेइसिओ निम्‍पाङ खाङ्‌म़मुनान्‍चिन।

खाङ्‌मुमा 1:7

खानुम, खोक्‍को य़वारिदा म़तायाङ! खोन्‍कि झारा म़क्‌चिआ खोक्‍को अ़खाङ, साङ्‌चिआ खोक्‍को अ़धुवायुङ्‌सा, खोचिआछाङ अ़खाङ। हेन्‍खामादाओ झारा म़नाचि खोक्‍कोसोओ अ़चुतुक्‌वाआ म़खाप। उवा, मो लिलाप! मोवात्‍निङा लिने।