फिलिप्पियन 2:13 - Bagheli Bible

¹³ काहेकि उआ काम करँइ के इच्छा, अउर ओही पूर करँइ के काम, उँइ दोनव बातन काहीं परमातिमा अपने भली इच्छा से तोंहरे मनन माहीं डारिन हीं।

फिलिप्पियन 2:13 Cross References

लूका 12:32

हे छोट झुन्ड, डेरा न; काहेकि तोंहरे पिता परमातिमा काहीं इआ नीक लाग हय, कि तोंहईं राज देंय।

लूका 2:14

“स्वरग माहीं परमातिमा के महिमा, अउर धरती माहीं उँइ मनइन काहीं जउनेन से ऊँ प्रसन्न हें, सान्ती मिलय।”

यूहन्ना 3:27

तब यूहन्ना उनहीं जबाब दिहिन कि, “कउनव मनई काहीं तब तक कुछू नहीं मिल सकय, जब तक ओही स्वरग से न दीन जाय।”

यूहन्ना 6:45

परमातिमा के सँदेस बतामँइ बालेन के किताबन माहीं लिखा हय, ‘ऊँ पंचे सगले जन परमातिमा के तरफ से सिखाए होइ हँय।’ जे कोऊ पिता परमातिमा से सुनिस अउर सिखिस ही, उआ हमरे लघे आबत हय।

यूहन्ना 6:65

यीसु पुनि उनसे कहिन, “एहिन से हम तोंहसे कहेन तय, कि जब तक कोहू काहीं पिता परमातिमा के तरफ से इआ बरदान न दीन जाय, तब तक उआ हमरे लघे नहीं आय सकय।”

खास चेलन 11:21

अउर प्रभू के सामर्थ उनखे साथ रही हय, अउर खुब जने खुसी के खबर के ऊपर बिसुआस कइके प्रभू कइती मुड़ि आएँ।

रोमियन 12:3

काहेकि परमातिमा के किरपा से जउन अधिकार हमहीं मिला हय, ओहिन के मुताबिक हम तोंहसे पंचन से अरथात हरेक जन से कहित हएन, कि जइसन अपने-आप काहीं समझँइ चाही, ओसे बढ़िके अपने-आप काहीं न समझा। जइसन परमातिमा तोंहरे पंचन के छमता के मुताबिक, जेतना बिसुआस दिहिन हीं, ओहिन के मुताबिक अपने-आप काहीं सही तरीके से समझा।

रोमियन 9:11

अउर ऊँ लड़िकन के पइदा होंइ से पहिलेन, अउर उनखे कुछू नीक-नागा करँइ से पहिलेन, परमातिमा कहिन, कि “बड़कबा लड़िका छोटकबा लड़िका के दास होई।”

रोमियन 9:16

एसे कोहू के इच्छा के मुताबिक नहीं, अउर न कोहू के जादा कोसिस किहे के कारन, परमातिमा ओही चुनँय, बलकिन ऊँ केही चुनत हें, इआ दया करँइ बाले परमातिमा के हाँथे माहीं हय।

1 कुरिन्थियन 12:6

अउर सेबा के काम त कइअक मेर के हें, पय परमातिमा एकयठे हें, जउन मनइन काहीं दूसर-दूसर मेर के काम करँइ के सक्ती देत हें।

1 कुरिन्थियन 15:10

पय हम अब जउन कुछू हएन, त परमातिमा के किरपा से हएन, अउर उनखर जउन किरपा हमरे ऊपर भे ही, उआ बेकार नहीं गय; काहेकि हम ऊँ सगले खास चेलन से जादा मेहनत किहेन हय, अउर सचमुच उआ मेहनत हम खुद न होय किहेन हय, पय हमरे ऊपर किरपा कइके ओही परमातिमा किहिन हीं।

2 कुरिन्थियन 3:5

अइसन नहिं आय, कि हम पंचे एतने काबिल हएन, कि सोचँइ लागी, कि हम पंचे खुद कुछू काम कइ सकित हएन। बलकिन हमहीं पंचन काहीं काबिल बनामँइ बाले परमातिमा आहीं।

इफीसियन 1:11

परमातिमा बहुत साल पहिले, अपने योजना के मुताबिक, मसीह के ऊपर बिसुआस कइके उनखर बारिसदार बनँइ के खातिर हमहीं पंचन काहीं चुनिन हीं। काहेकि परमातिमा अपने उद्देस्य अउर मरजी के मुताबिक सब कुछ करत हें।

इफीसियन 1:5

अउर परमातिमा अपने मरजी अउर निकहे बिचार के मुताबिक हमहीं पंचन काहीं पहिलेन से ठहराइन रहा हय, कि यीसु मसीह के ऊपर बिसुआस करँइ के द्वारा हम पंचे उनखर गोद लीन सन्तान कहाई।

इफीसियन 1:9

अउर परमातिमा अपने इच्छा के भेद काहीं अपने निकहे बिचार के मुताबिक हमहीं पंचन काहीं बताइन हीं, जउने काहीं ऊँ मसीह के द्वारा हमहीं पंचन काहीं देखामँइ चाहत रहे हँय।

इफीसियन 2:8

काहेकि परमातिमा के बड़ी किरपा से हम पंचे यीसु मसीह के ऊपर जउन बिसुआस किहे हएन, ओखे द्वारा हमहीं पंचन काहीं मुक्ती मिली हय, अउर इआ हमहीं पंचन काहीं हमरे कइती से नहीं मिली, बलकिन इआ परमातिमा के दान आय।

2 थिस्सलुनीकियन 1:11

एसे हम पंचे, हमेसा तोंहरे खातिर प्राथना घलाय करित हएन, कि हमार पंचन के परमातिमा, तोंहईं उआ जीबन के काबिल समझँय, जउने काहीं जिअँइ के खातिर बोलाइन रहा हय, अउर तोंहरे भलाई के हरेक इच्छा, अउर बिसुआस के हरेक कामन काहीं सामर्थ सहित पूर करँय।

2 तीमुथियुस 1:9

परमातिमा हमहीं पंचन काहीं मुक्ती दिहिन हीं, अउर पबित्र जीबन जिअँइ के खातिर बोलाइन हीं, एसे नहीं कि हम पंचे निकहे काम किहेन हय, बलकिन परमातिमा अपने उद्देस्य काहीं पूर करँइ के खातिर, हमहीं पंचन काहीं बोलाइन हीं, काहेकि परमातिमा संसार के बनामँइ से पहिलेन, अपने किरपा से मसीह यीसु के व्दारा, मुक्ती देंइ के योजना बनाइन रहा हय।

इब्रानियन 13:21

अउर उँइन परमातिमा तोंहईं पंचन काहीं, हरेक निकही बातन माहीं परिपूर्न करँय, जउने तूँ पंचे उनखे मरजी काहीं पूर करा, अउर उनहीं जउन कुछू नीक लागत हय, ओही ऊँ यीसु मसीह के द्वारा हमरे पंचन के भीतर पइदा करँय, अउर उनहिन के बड़ाई जुग-जुग होत रहय। आमीन।

1 पतरस 1:3

हमरे पंचन के प्रभू यीसु मसीह के पिता परमातिमा के धन्यबाद होय, जउन यीसु मसीह काहीं मरेन म से जिआइके, अपने बड़ी दया से हमहीं पंचन काहीं अनन्त जीबन पामँइ के खातिर, जउन जिअत आसा ही, ओखे खातिर नबा जनम दिहिन हीं।