Fıٜ̃lıٜ́pıٜ̃ lé ꞌbá 4:12 - Tã-drı̣̃ Lẽlẽ Óꞌdí Óvârí Kâ

¹² Má nı̣̃ trá lạ́tı̣̂ âꞌdózó rĩlí ĩzã ngá ũrûkậ ꞌbá yí kâ bê, gõꞌdá má nı̣̃ kpá trá lạ́tı̣̂ âꞌdózó rĩlí cú ngá-tı̣̂ dũû bê rõô. Má nı̣̃ tã kíríwá lạ́tı̣̂ gólâ rĩzó ãyĩkõ ró rî kâ kpá trá nõtí. Rĩrĩ pı̣̃pı̣̂sı̣́lı̣́ ạ̃ꞌdı̣́ sĩ tã lârâkô rĩ ꞌbá ámâ ꞌẽlé rî ꞌá, ngãtá mâ cú nyãsá bê nyãlé yã ngã má rî lõfó sĩ yã, ngãtá mâ cú rĩꞌá ngá bê rõô ámâ nyãányâ drí yã, ngã mâ rĩꞌá ngá ꞌdĩ ꞌbá yî ĩzã lâ bê yã rî.

Fıٜ̃lıٜ́pıٜ̃ lé ꞌbá 4:12 Cross References

Mãtáyõ 11:29

Nĩ ꞌbã ãnî nyãányâ drı̣́-ãcê ámákâ zẽlé rû ı̣̂ꞌbũ ꞌbá ámákâ ró. Nĩ ârî tã gólĩyî má drí rĩꞌá âtálâ ãnî drí rî ꞌbá yî, nĩ gõ ró tã rî ꞌdĩ ꞌbá yî ꞌẽlé ĩꞌdî, tãlâ má âꞌdó kô sı̣́ lõmbâ ꞌbá ꞌî. Tã ámákâ rĩꞌá mãnísĩ, âꞌdó kô mbârâkã sĩ. Õzõ nĩ õꞌê tã rî ꞌdĩ ꞌbá yî trá ĩtí rî, nĩ âꞌdô lôvô-lôvô ûsúꞌá ãnî nyãányâ drí.

Mãtáyõ 13:52

Gõꞌdá Yésũ drí kpá tã âtázó drílĩyî kĩ nĩ rî, “Rĩꞌá tãndí ró õzõ ãꞌdô trá ĩtí rî, tãlâ lãꞌbí îmbá ꞌbá gólâ tã Ôvârí kâ ı̣̂lı̣́ ꞌbá gõꞌdá drílâ gõzó rĩlí kũmũ Ôvârí kâ zẽlé rî, gólâ rĩꞌá nyé õzõ ꞌbã-lı̣́pı̣̂ gólâ ngá tãndí óꞌdí íyíkâ lôfõ ꞌbá ngá tãndí ạ̃kû bê võ gólâ drí lậpı̣́zó lâ rî ꞌásĩ tã tãndí ꞌẽzó ĩꞌdî sĩ lâ yî rî kâtí. Gólâ âꞌdô tã Ôvârí drí âꞌdálé ạ̃kû ró rî ꞌbá yî ı̣̂lı̣́ꞌá tã Ôvârí drí âꞌdálé ngbãângbânõ rî ꞌbá yí bê.”

2 Kõrínĩtõ lé ꞌbá 10:1

Mâ Póõlõ ámâ nyãányâ, má lẽ ãnî drí úlı̣́ ámákâ má drí âtálé ãnî drí mãnísĩ rû lôgõ sĩ vũdrı̣́ pı̣̃pı̣̂sı̣́lı̣́ ạ̃ꞌdı̣́ sĩ õzõ Yésũ Krístõ kâtí nõ ârílí. Áâtâ trá kĩ, kậyı̣̂ má drí ꞌbãzó ãní bê nã, má lôgõ mâ trá âꞌdólé gbõ ngá fínyáwá ró ãnî ândrá. Gõꞌdá õzõ má õtírĩ ꞌbãâ ãnî lãfálé yû rî, má drí gõzó rĩꞌá úlı̣́ âmbâ-âmbâ âtálé ãnî drí.

2 Kõrínĩtõ lé ꞌbá 10:10

Nĩ ndrê trá, áâtâ trá kĩ, mâ Póõlõ, úlı̣́ ámákâ îgĩlí wárãgã ámákâ ꞌá rî, tã lâ íyíkâ âmbâ-âmbâ ró, gõꞌdá mâ rî gógó drí ꞌbãzó ãní bê tólâ rî, má ãâꞌdô íyíkâ mbârâkã ãkó. Gõꞌdá úlı̣́ ãmákâ âtálé ãmâ lãfálé ꞌá rî ãâꞌdô íyíkâ úlı̣́ tãkó rî ꞌbá yî ĩꞌdî.

2 Kõrínĩtõ lé ꞌbá 11:27

Má rî lôsĩ ꞌẽlé rõô bũúũ lâŋõ drí fĩzó má rú. Kậyı̣̂ ãzâ ꞌbá yî sĩ rî, má ꞌê lôsĩ ngạ́cı̣̂ gı̣̃rı̣̃, má kó ậꞌdú kô. Kậyı̣̂ ãzâ ꞌbá yî sĩ rî, mâ trá lõfó ró lı̣̃mvû lôvó bê. ꞌDĩî ꞌê rû trá ĩtí ândálé dũû. Gõꞌdá kậyı̣̂ ãzâ ꞌbá yî sĩ rî, mâ trá ngá nyãnyã ãkó nyãlé. Má rî trá ítá tãndí ãkó sõlé ẽꞌdẽ drí, gõꞌdá kpá jó tãndí ãkó rĩzó ꞌá lâ, õzõ õcâ trá ôzê lı̣̃mvû bê rî.

2 Kõrínĩtõ lé ꞌbá 11:7

Gõꞌdá kậyı̣̂ gólâ má drí rĩzó tã âtî-âtî tãndí Ôvârí kâ nõ pẽlé ãnî drí rî, má îjí ãnî kô ậdı̣̂ âfẽlé má drí. Gõꞌdá má lôgõ mâ trá âꞌdólé ngá fínyáwá ró, gõꞌdá nĩ âꞌdô ró bê gạ̃rạ̃. Tã gólâ má drí ꞌẽlé ꞌdĩ tã õnjí ꞌî yã?

2 Kõrínĩtõ lé ꞌbá 11:9

Kậyı̣̂ má drí ꞌbãzó ãní bê tólâ rî, gbõ lé má ãꞌdô bê ngá ãkó rî, má îkpókpólõó ãnî kô ngá má drí âꞌdózó ĩzã lâ bê ꞌdĩ tãsĩ âfẽlé má drí, tãlâ krístõ ꞌbá gólĩyî âcá ꞌbá Mẽkẽdónĩyã lésĩ rî ꞌbá yî âfẽ ngá ĩzã lâ drí ámâ ꞌẽlé rî nĩ má drí. Nĩ ndrê trá, sı̣́sı̣́ rî má ꞌbãá lâŋõ ámákâ kô ãnî drı̣̃ı̣̂. Gõꞌdá ı̣̃zạ́tú rî, má îcá kpá kô ꞌbãlâ ãnî drı̣̃ı̣̂.