Fıٜ̃lıٜ́pıٜ̃ lé ꞌbá 3:7 - Tã-drı̣̃ Lẽlẽ Óꞌdí Óvârí Kâ

⁷ Tã gólĩyî má drí rĩꞌá tã lâ yî ı̣̂sũlı̣́ kĩ, ãâꞌdô ámâ ꞌbãꞌá âꞌdólé sı̣́sı̣́ ꞌálâ ró õjílã gólâ tã lâ drí sũlı̣́ Ôvârí lı̣̃fı̣́ rî ró rî, mâ trá rĩꞌá njãâ ꞌbãlâ ĩyî má ũgúlı̣́ Yésũ rî tãsĩ.

Fıٜ̃lıٜ́pıٜ̃ lé ꞌbá 3:7 Cross References

Mãtáyõ 16:26

Âꞌdô âꞌdóꞌá ángô tí õzõ õjílã ãꞌdô cú ngá-drı̣̃ ãmbá ãngó nõ ꞌá nõ bê ndrĩ rî, gõꞌdá õzõ gólâ ı̣̃ı̣̂vı̣̃ lạ́tı̣̂ lédrẽ-lédrẽ ạ̃dũkũ ãkó rî kâ trá rî yã? Ĩtí rî, gólâ âꞌdô îcáꞌá ngá ãzâ gĩlí lédrẽ-lédrẽ ạ̃dũkũ ãkó rî võ lâ lôgõzó yã?

Márãkõ 10:50

Ĩtí rî, Bãtĩmáyã ní drí ítá ândrê ní rú rî ângízó vũlı̣́ vũdrı̣́, ngãzó nĩlí ꞌwãâꞌwâ Yésũ ngálâ.

Lúkạ̃ 14:26

Yésũ drí âdrézó, rĩꞌá gólĩyî lı̣̃fı̣́ îcílí tã ãzâ ꞌbá yî sĩ, gólĩyî ãꞌdô ró ĩyî bê ngá lẽlẽ bê Ôvârí ꞌá kĩ nĩ rî, “Õzõ nĩ õlẽ tã ámákâ kô lậvũlı̣́ gạ̃rạ̃ õjílã ãníkâ ꞌbã ꞌá rî drı̣̃ı̣̂ sĩ rî, kpá ãnî rî gógó ífífí lâ drı̣̃ı̣̂ sĩ rî, îcá kô ãnî drí ꞌbãzó rû ı̣̂ꞌbũ ꞌbá ámákâ ró.

Lúkạ̃ 14:33

Má âtâ ĩꞌdî nõ ãnî drí, nĩ ı̣̂sũ tã zãlô sı̣́sı̣́, õzõ nĩ ãꞌdô trá njãâ ngá ãmbá ãníkâ ꞌdĩ ꞌbá yî âyélé, õjílã ãníkâ ꞌbã ꞌá rî ꞌbá yí bê, ámâ vó bẽzó ĩꞌdî rî. Õzõ nĩ õꞌê ĩtí kô rî, óꞌbãá ãnî rû ı̣̂ꞌbũ ꞌbá ámákâ ró rî kô.

Lúkạ̃ 16:8

“Gõꞌdá ãgô ãmbá ngá lı̣́pı̣̂ ró ꞌdĩ ârî tã gólâ ngá vó ndrẽ ꞌbá ꞌdĩ drí rĩꞌá ꞌẽlâ ꞌdĩ bê rî, gólâ kĩ, ‘Ngá vó ndrẽ ꞌbá ꞌdĩ ꞌê ꞌdĩ lı̣̃fı̣́ lõmbâ ꞌî yí drí. Gólâ êdê lạ́tı̣̂ yí drí ı̣̃zạ́tú óõtírĩ íyî âyé ngá ꞌẽrẽ ꞌásĩ rî tãsĩ.’ ” Gõꞌdá Yésũ âtâ tã trá nõtí kĩ nĩ rî, “Nĩ ndrê drẽ, õjílã ãngó nõ kâ bê ndrĩ, gólĩyî rĩꞌá tã nı̣̃ ꞌbá ꞌî kôrô õjílã Ôvârí kâ rî ꞌbá yî drı̣̃ı̣̂ sĩ, tãlâ õjílã ãngó nõ rî kâ rî ĩyî êdélé njãâ rĩlí tã gólâ ꞌẽ ꞌbá âcálé ı̣̃drú ı̣̃nậtú ãngó nõ ꞌá rî tãsĩ. Gõꞌdá õjílã Ôvârí kâ rî ꞌbá yî êdé ĩyíkâ ĩyî kô võ ꞌbũû ꞌálâ rî tãsĩ.

Tã ꞌẼꞌẽ 27:38

Gõꞌdá nĩngá sĩ, ãmâ ndrĩ nyálé bê ngá nyãnyã îcálé dũû rî, õjílã kõlóngbõ ꞌdî kâ ꞌdĩ ꞌbá yî drí ngãzó ạ̃drúgú lâkí ꞌbá kõlóngbõ drí rĩꞌá njı̣̃lâ rî âtrõzó lûvũlı̣́ lı̣̃mvû ꞌá, tãlâ lậnjı̣̃-lậnjı̣̃ lâ õzó kô kõlóngbõ îrí lı̣̃mvû zẽlé.

Ị́bũrũ 11:26

Tã ı̣̂sũ gólâkâ trá rĩꞌá nõô rî tí. Rĩꞌá tãndí ró íyî lôꞌdázó õjílã Ôvârí pạ̃tı̣́ı̣̃ kâ rî ꞌbá yí bê, ꞌdíyî pã ꞌbá gólâ Ôvârí drí ꞌẽꞌá âjólâ ı̣̃zạ́tú rî tãsĩ. Tã rî ꞌdĩ lậvũ kôrô drı̣́-ngá gólĩyî dũû Mạ́sı̣̃rı̣̃ kâ gólĩyî yí drí ꞌbãꞌá ûsúꞌá lâ ózõwá kúmú ạ́ngı̣́ kâ ró rî drı̣̃ı̣̂ sĩ, tãlâ gólâ rî íyî lı̣̃fı̣́ ꞌbãlé tã lânjã ndrĩ gólĩyî Ôvârí drí ꞌbãlé trá ꞌẽlé õjílã íyíkâ drí rî ꞌbá yî drı̣̃ı̣̂.